“KARE rava e rauka iaku i te aere mei tera are ki tera are!” Eia tangata apii Pipiria e manako akapera ana no runga i te tutuanga ki tetai au tangata ke! Na tetai vaa tuatua tukatau e e puapii Pipiria katoa i tuatua mai i teia, tei kapikiia e ko te akaaere tutaka.

Maata te aronga i tatau ana i te Zion’s Watch Tower tei akaruke i ta ratou au akonoanga, e tei inangaro i te piri atu ki te aronga e akakite aere ra i te tuatua mou Pipiria. Kua akamaroiroi te makatini i te aronga tatau kia kimi i te aronga aiteite to ratou akarongo e kia uipa putuputu no te apii Pipiria. Akamataanga i te mataiti 1894, kua tuku atu te Taiate Punanga Tiaki i te au akaaere tutaka kia aravei i te au pupu tei pati mai i tetai atoroanga. Kua ikiia teia au tangata maroiroi e te tukatau no to ratou tu maru, kite i te Pipiria, meitaki i te tuatua e te kite i te apii, e te tiratiratu ki te oko. No te maata o te angaanga, e pou ana e tai me kore e rua ra no te atoro anga. Maata te Aronga Apii Pipiria tei rave i te angaanga tutuanga no te taime mua na te tua tua anga i te au patianga no te akoanga a te akaaere tutaka. Muri ake i tana akoanga i te aiai i roto i tetai are apii, kua pau atu a Hugo Riemer, tei riro mai ei mema no te Pupu Akaaere i muri mai, i te au uianga Pipiria e pati ua atu i te turuaipo. Noatu te roiroi kua mataora aia i te akakite mai e e “mataora tikai” te uipaanga.

Kua akakite mai te Watch Tower e ko te “akakoroanga maata” no te atoro anga a te akaaere tutaka ko te akamaroiroi anga i “te ngutuare o te akarongo” na roto i te au uipaanga i roto i te au kainga o te au taeake irinaki. Kua aere mai te Aronga Apii Pipiria mei te au ngai takapini i reira no te au akoanga e te au tuanga no te au uianga e te au pauanga. E oti kua tae te taime no te akaari anga i te tu takinga meitaki. Tona meangiti anga, kua aere ana a Maude Abbott ki te akoanga i te popongi, muri ake kua akaputuputu te katoatoa takapini i tetai kainga kai roaroa i vao. “Maata tikai te kai manea​—te ui, moa varaipani, te varaoa tukeke, te pai e te keke! Kua kai te katoatoa i ta ratou ka rauka, e kua taokotai akaou matou i te ora rua no tetai akoanga.” Inara kua akakite mai aia e, “Tae anga ki te reira taime kua varevarea moe te katoatoa.” Kua akakite mai a Benjamin Barton, kua roa te akaaere tutaka anga e, ‘Naringa au i kai ana i te au kai meitaki tei orongaia mai kiaku, kua akamutu ke ana au i taku angaanga tutaka.’ Kare i roa ana kua tae mai tetai reta mei te opati maata i Brooklyn ki te au tuaine manako meitaki e e mea meitaki no te katoatoa kia angai i te akaaere tutaka i te “au ra ravarai ki te au kai tau ua” e kia “moe meitaki ratou.”

Kua meitaki atu te au apiianga a te au akaaere tutaka, na te taangaanga anga i te au tiati, au apinga akatutu, me kore tetai ua atu apinga tei rauka mai ia ratou ei akaoraora anga i ta ratou au apiianga. “E oraora ua ana i te pae vaerua” te au akoanga a R. H. Barber. E tuatua ua ana a W. J. Thorn mei tetai metua tane rai “tei aite ki tetai tangata pateriareka i te tuatau taito.” Tetai ra tei roto a Shield Toutjian i tetai motoka Model A Ford, kua kapiki maata aia e, “E Tapu!” Kua eke viviki aia ki vao i te motoka, kua akiaki mai i tetai au tiare, e kua oronga atu i tetai apiianga ki tona au oa no runga i ta Iehova au mea i anga mai.

Maata te au akaaoanga i roto i te angaanga akaaere, no te aronga tikai kua pakarikari. Ko te akaaoanga maata atu no tetai pae, ko te taui anga i ta ratou angaanga tutuanga. Te umuumuia ra ratou kia rave i te  aratakianga i roto i te angaanga tutuanga mei tera are ki tera are. Kua akakite mai te Watch Tower o Mati 15, 1924 e “ko tetai o te au angaanga maata” a te au Kerititiano mou “ko te akakitekite anga i te patireia. Ko te akakoroanga teia i tonoia ai te au akaaere tutaka ki vao.”

Kare tetai au akaaere tutaka i mataora ana i teia tauianga e kua akaruke ratou i te angaanga tutaka, e kua akatupu tetai aronga tei mareka kore i tetai pupu kia aru ia ratou. Kua akakite mai a Robie D. Adkins e kua kopekope tetai akaaere tutaka tukatau e: “Ko taku ua i kite ko te tutuanga mei runga mai i te paata. Kare rava e rauka iaku i te aere mei tera are ki tera are!” Kua maara i te Taeake Adkins e: “Kua kite atu au iaia i muri mai i ko i te uruoaanga i te mataiti 1924 i Columbus, Ohio. Koia tetai tangata maromaroa roa atu i reira e tu ua ra i raro i te ngai marumaru o tetai pu rakau meangiti i roto i te au tauatini ua atu au taeake mataora. Kare rava au i kite akaou ana iaia. Kua akaruke aia i te akaaerenga i muri poto ua ake.” Tetai tua, “maata te au taeake mataora tei na te pae mai e apai ra i ta ratou au puka ki ko i to ratou motoka,” tei inangaro i te akakitekite aere mei tera are ki tera are.​—Anga. 20:20, 21.

Maata te au akaaere tutaka, noatu te ru ra ratou mei te aronga rai tei tonoia ki te ngai o te rerue, tei rave maroiroi tikai i te angaanga tutuanga. No runga i te akakitekite anga mei tera are ki tera are, kua tata te akaaere tutaka e tuatua ana i te reo Tiamani ko Maxwell G. Friend (Freschel) e, “Kua akamaata atu teia tuanga angaanga a te akaaere tutaka i te au akameitakianga i roto i te ngai teretereanga. Kua ripoti mai te Akaaere a John A. Bohnet e kua ariki ngakau tae tikai te au taeake i te manako no te tutuanga i te Patireia. Kua tuatua aia e, e maata tikai te au tangata “tei maroiroi tikai i te tomo atu ki roto i te pupu mua no te tamakianga.”

I te au mataiti i aereia, kua riro ana te au akaaere tutaka akarongo mou ei akamaroiroianga tikai. “Papu tikai te tu meitaki e te puapinga o te au akaaere tutaka, mei taku i kite ana i toku meangiti anga,” i karanga ai a Norman Larson kua roa te riro anga ei Kite. “E maata ta ratou i rave i te akatikatika iaku na roto i te mataara tau.” E tae ua mai ki teia ra, te tauturu nei taua au akaaere tutaka tiratiratu ra e te tu akaatinga i te au taeake akarongo kia tuatua e, “Ka rauka ia tatou i te aere mei tera are ki tera are!”

[Tataanga i te kapi 32]

Mataora tikai te aere mai anga te au akaaere tutaka!

[Tutu i te kapi 31]

I te 1905, kua tata a Benjamin Barton e 170 ngai tapu anga i runga i te pepa

[Tutu i te kapi 32]

E akaaere tutaka a Walter J. Thorn tei kite meitakiia e ko Pappy no tona tu meitaki mei tetai metua tane rai

[Tutu i te kapi 32]

Kua tukuia a J. A. Browne ki Tiamaika ei akaaere tutaka i te 1902 kia akaketaketa, akamaroiroi i te 14 pupu rikiriki

[Tutu i te kapi 32]

Akaketaketa ana te angaanga akaaere tutaka i te akarongo, taokotaianga Kerititiano, e te akavaitata i te au taeake ki te akaaerenga