E TUPU ua ana te mataora no te uipaanga mataiti a te Taiate Punanga Tiaki Pipiria e te Pepa o Pennsylvania. Ko te reira tei tupu i te 127 uipaanga mataiti, tei raveia i te Maanakai o Okotopa ra 1, mataiti 2011! Kua akaputuputu mai te au taeake tei patiia mei te au ngai o teianei ao ki te Are Akaputuputuanga o te Au Kite o Iehova i Jersey City, New Jersey, i te U.S.A.

Kua turou mai a Gerrit Lösch o te Pupu Akaaere i te urupu tangata mataora. Kua akakite aia ki te aronga tei tae mai mei tetai 85 au enua e kia mataora ratou i te taokotaianga pa enua meitaki tikai. E akakitekite anga meitaki taua tu taokotaianga ra e te akakaka ra ia Iehova. Ko te taokotaianga te tumu manako no teia uipaanga.

RIPOTI MEITAKI NO MEIKO

Te akaari maira te tuanga mua o te porokaramu i te tu taokotai o to Iehova iti tangata. Kua uiui atu a Baltasar Perla e toru mema o te pamiri Betela o Meiko no te kapitiia anga te au opati manga e ono o Marike Rotopu ki to te opati manga o Meiko. No teia kapitianga, kua maata atu te au tangata tukeke no te au pa enua i roto i te pamiri Betela o Meiko. Kua riro te maataanga o te au taeake irinaki mei te au enua tukeke ei akamaroiroianga i tetai e tetai. Mei te mea rai e kua akaputuputu mai te Atua i te au pa enua ravarai e tai ngai.

E tai akaaoanga tei tupu mai no te kapitianga, koia oki te akamaramaanga ki te au papuritia e kare ratou i akatakakeia mei ta Iehova akaaerenga noatu kare te au opati manga e angaanga akaou ana i roto i to ratou au enua. Tei tupu mai, kua akanooia tetai i-mere tinamou kia rauka i te aronga i te au ngai mamao i te komunikeiti tika atu ki te opati manga.

RIPOTI OU NO TIAPANI

Kua akamarama mai a James Linton no te opati manga o Tiapani te takinoia anga to tatou au taeake e te ngaruerue enua e te tunami i roto ia Mati, mataiti 2011. Maata te Au Kite kua mate to ratou au akaperepere e kua ngaro ta ratou au apinga. Tere atu i te 3,100 au kainga e e anere ua atu au apinga akaoro tei orongaia mai e te Au Kite i vao ake i te ngai i kino. Kua angaanga ua rai te aronga tauturu tei piri atu ki te Au Kumiti Patu Anga o te Tapere i te akaou i te au are o te au taeake. Maata atu i te 1,700 aronga tauturu tei angaanga i te au ngai e anoanoia ra te tauturu. Kua tauturu mai tetai pupu tauturu no Marike mai i te akaou i te Are Uipaanga Patireia, e e 575 aronga tauturu tei rave i teia angaanga.

Maata te au tauturu i te pae vaerua e te pae manako tei orongaia ki te aronga tei takinoia. Tere atu i te 400 tangata pakari tei rave i te angaanga akapumaanaanga i te ngai e anoanoia ra. Kua akapapuia mai e te manako maira te Pupu Akaaere i te au taeake, te aere atu anga e rua akaaere o te tuanga enua mei te opati maata o teianei ao ki te ngai i kino, no te oronga anga i te akamaroiroianga. Kua riro te au akamaroiroianga a te Au Kite i te ao katoa ei akapumaanaanga.

AUTU ANGA I TE PAE TURE

Kua akarongo meitaki te katoatoa kia Stephen Hardy no ko mai i te opati manga o Peritane no runga i te au autu anga i te pae ture tei tupu ua akenei. Ei  akatauanga, kua maro te kavamani o Varani e kia tutaki te au taeake i Varani i te tero e $99 mirioni (N.Z.). Kua akatikatikaia te manamanata te turuturu anga te Akavaanga no te Au Tika Anga o te Tangata i Europa (ECHR) ia tatou, na te akakite anga e kua aati te kavamani o Varani i te ture o te Atikara 9 no runga i te Koreromutu a Europa no te paruruanga i te tu rangatira o te au akonoanga. Te akaari maira te au tuatua tei ikiia e kare teia akavaanga no runga i te moni, no te mea te tatau ra teia e: “No te ariki kore anga i te akaerenga a tetai akonoanga, te takore anga i te reira, te tuatua akakino anga i tetai angaanga a te au akonoanga, e au akaraanga te reira no te tamanamanata anga i te tikaanga tei akamanaia e te ture o te Atikara 9 o te Koreromutu.”

Kua turuturu te ECHR ia tatou no runga i tetai akavaanga i Amenia. Mei te mataiti 1965 mai, kua akakite te ECHR e kare te Koreromutu a Europa i paruru ana i te tangata tataki tai mei te maroia anga kia rave i te angaanga tamaki. Kua akatika te Akavaanga Maata Atu​—te Akavaanga teitei roa atu o Europa—​e kia oronga te ture Koreromotu a Europa i te tikaanga ki tetai tangata kia “patoi i te angaanga vaeau, tei akakeuia e te au taumaroanga kino maata.” Kua riro teia ikianga ei maro anga ia Amenia e te au enua mei ia Atipatiani rai raua ko Tureki kia ariki i taua tikaanga ra.

AU ANGAANGA AKATU ANGA

Kua tuatua a Guy Pierce o te Pupu Akaaere i muri mai e te inangaro ra te katoatoa tei tae mai i te kite e eaa te tupu ra ki te au angaanga akatu anga i New York State. Kua akakite mai aia i tetai vitio te akaari ra i tei raveia e te ka raveia i Wallkill, i Patterson, e te au ngai ou i Warwick e i Tuxedo, New York. Ka oti tetai ngai nooanga ou i Wallkill i te akatuia, e tetai au 300 rumu i te mataiti 2014.

E au parani tetai no te akatu anga i tetai au are ou i runga i tetai 248 eka enua i Warwick. “Noatu e kare i papu ake ia matou to Iehova anoano no runga ia Warwick,” i karanga ai te Taeake Pierce, “ka rave matou i te angaanga i runga i teia enua ma te akakoroanga no te neke anga i te au opati maata o teianei ao o te Au Kite o Iehova ki te reira ngai.” E au parani tetai kia taangaangaia e 50 eka o te enua e 10 kiro mita i te tua tokerau o Warwick no te akanoo anga i te matini e te maani anga i te au apinga akatu anga. “Me akatikaia mai te angaanga akatu anga, te irinaki nei matou e ka oti te angaanga katoatoa i roto i te a mataiti,” i karanga ai te Taeake Pierce. “E oti, ka okoia atu to tatou ngai i Brooklyn.”

“Kua taui ainei te Pupu Akaaere i to ratou manako no te tumatetenga maata e vaitata maira?” i ui ei te Taeake Pierce. “Kare rava,” i pau mai ei aia. “Me tamanamanataia mai ta matou au parani e te tumatetenga maata, e mea mataora tikai te reira!”

MATAKITE I TE RIONA NGUNGURU

Aru mai, kua uriuri mai a Stephen Lett, tetai mema o te Pupu Akaaere ia Petero 5:8 e: “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.” Kua akakite mai te Taeake Lett i tetai au tu o te riona te tau ra ki ta Petero akataka anga i te Tiaporo.

I te mea e maroiroi atu e e viviki atu te au riona i te au tangata, kare tatou e tauta i te tamaki atu me kore kia autu atu ia Satani ma to tatou uaorai maroiroi. Ka anoano tatou i ta Iehova tauturu. (Isa. 40:31) E arumaki ana te riona ma te papu tikai, no reira kia kopae tatou i te turanga poiri i te pae vaerua, te ngai e kimi ra a Satani i tetai tangata ei opu anga nana. Mei tetai riona rai e tamate ana i tetai manu airi meitaki me kore i tetai punua atini moamoavao e moe ra, te inangaro pakari ra a Satani i te tamate ia tatou. E i muri ake me pangia te matepongi o te riona, kare e kitea atu te tu o te manu tana i ta, mei te reira katoa te “openga” o te au tangata ta Satani ka takino i te pae vaerua, ka ‘kino maata atu to ratou openga i to muatangana ra.’ (2 Pete. 2:20) No reira ka anoanoia tatou  kia patoi pakari atu ia Satani e kia aru ngaueue kore i te au kaveinga Pipiria ta tatou i apii mai.​—1 Pete. 5:9.

ARIKI TIKAI I TOOU NGAI I ROTO I TO IEHOVA ARE

“E ngai to tatou katoatoa i roto i to Iehova are,” i tuatua mai ei te vaa tuatua ko Samuel Herd no te Pupu Akaaere. E ngai to te au Kerititiano katoatoa i roto i to te Atua “are”​—tona iero pae vaerua​—te akanoonooanga no te akamorianga iaia tei akatumuia ki runga i to Iesu atinga oko. Kia akaperepereia te reira ngai ei ngai akangateiteianga. Ka inangaro tatou mei ia Davida rai “kia noo rai i roto i te are o Iehova e ope roa ake [to tatou] puke rā i te ora anga nei.”​—Sala. 27:4.

Kua taiku mai te Taeake Herd ia Salamo 92:12-14, e kua ui mai e, “Akapeea a Iehova i te tauturu anga ia tatou kia puapingaia?” Kua pau mai aia e: “Te akono pumaana nei, te paruru nei e te oronga maira te Atua i te tuatua mou oraora kia tatou mei roto mai i te parataito pae vaerua. E kia akameitaki tatou iaia no taua au mea ra.” E oti kua akamaroiroi atu te Taeake Herd i te katoatoa: “Kia mareka ua tatou i te noo ki roto i to Iehova are​—kare no tetai tuatau poto ua mari ra e tuatau ua atu.”

AKANGATEITEI TE AU KERITITIANO I TE TUATUA A TE ATUA

Kua akamarama mai a David Splane, e mema katoa no te Pupu Akaaere, i roto i te akoanga tei aru mai e kua akangateitei ua rai te au Kerititiano i te tuatua a te Atua. I te anere mataiti mua, kua irinaki ratou ki te reira ei akatikatikaanga i te manamanata o te peritome anga. (Anga. 15:16, 17) Inara, kua akamata tetai au Kerititiano o te rua anere mataiti tei tereniia i roto i te apiianga Ereni i te aru i to ratou uaorai kite kare i ta te au Tuatua Tapu. Muri mai, kua mono tetai pae i te au apiianga Pipiria ki te au manako a te au Orometua Maata e te au emepera o Roma, i tupu mai ei te au apiianga pikikaa.

Kua akakite mai te Taeake Splane no runga i tetai akatutuanga a Iesu e ka vai rai tetai au Kerititiano ngakau tika tei akatainuia i te enua nei no te paruru anga i te tuatua mou. (Mata. 13:24-30) Kare i papu ia tatou e koai tikai teia aronga. Inara, i te au anere mataiti tei aereia, maata tei patoi i te au irinakianga e te au peu kare i roto i te Pipiria. Tetai o teia aronga e au Orometua Maata no te akonoanga Katorika o Lyons o te 9 anere mataiti, ko Peter  o Bruys, Henry o Lausanne, e Valdès (me kore, Waldo) no te 12 anere mataiti, ko John Wycliffe no te 14 anere mataiti, ko William Tyndale no te 16 anere mataiti, e Henry Grew e George Storrs no te 19 anere mataiti. Te turuturu maroiroi nei rai te Au Kite o Iehova i teia tuatau i te au turanga o te Tuatua Tapu e kua ariki ratou i te Pipiria ei tango no te tuatua mou. No reira te Pupu Akaaere i iki ei i ta tatou irava no teia mataiti 2012 i roto ia Ioane 17:17 e: “Ko te tuatua aau na te tuatua-mou.”

TAUIANGA MATAORA NO TE TERENIANGA E TE TAVINIANGA

Kua oronga mai a Anthony Morris o te Pupu Akaaere i tetai akakiteanga no runga i te au tauianga no te au mitinari e te au painia takake. I roto ia Tepetema 2012, ka raveia tetai au Apii Pipiria na te Au Tokorua Akaipoipo Kerititiano i tetai au enua tei ikiia. Kua taui te akakoroanga a te Apii Gileada. Akamataanga i roto ia Okotopa i topa akenei, kua o ke ana te katoatoa tei tereniia ana i Gileada ki roto i tetai tuanga o te tavini anga tamou takake​—ei au mitinari kare i aere ana ki Gileada, ei au painia takake, ei au akaaere tutaka, me kore ei au mema no Betela. Ka tukuia atu teia aronga tei karatuaiti kia tavini i roto i te opati manga me kore i te angaanga tutaka, me kore kia tutu aere i roto i te au oire mamaata ma te au putuputuanga o te reira ngai. Ka akaketaketa, ka tauturu e ka tereni ratou i te au taeake e te au tuaine e angaanga kapiti ra ratou.

Kapiti mai ka akamata te au painia takake i te tutu atu i te au ngai mamao. I roto ia Tianuare 1, mataiti 2012, kua tukuia atu tetai au taeake tei karatuaiti mai mei te Apii Pipiria na te Au Taeake Kare i Akaipoipo e te Apii Pipiria na te Au Tokorua Akaipoipo Kerititiano ei au painia takake no tetai tuatau poto ua, e kia akamata e kia akamaata atu i te tutuanga i te au ngai mamao. Ka rave ratou i te angaanga painia takake e tai mataiti e tae ua atu ki te toru mataiti. Ko te aronga tei akapapu mai e kua tutakau ratou, ka orongaia tetai ngai tinamou ei tavini anga na ratou.

E tuatau mataora tikai te uipaanga mataiti o te 2011. Ka akara tatou kia Iehova kia akameitaki mai i te au akanoonooanga ou no te akamaata atu i ta tatou angaanga tutuanga e kia akamaata atu i te taokotaianga o te au taeake​—ei akakaka anga e ei akameitaki anga iaia.

[Pia/​Au Tutu i te kapi 18]

KITE MEITAKI ANGA IA RATOU

Kua uiui katoaia e rima au tuaine takaua a te au mema o te Pupu Akaaere. Kua akakite mai te au tuaine ko Marina Sydlik, Edith Suiter, Melita Jaracz, Melba Barry, e Sydney Barber e akapeea ratou i kite ei i te tuatua mou e te akamata anga i te angaanga orometua tamou. Kua akakite mai ratou i to ratou au manako akaperepere ki te katoatoa no runga i ta ratou au tane, e te au akameitakianga tei rauka mai ia ratou. Ei taopenga anga i teia au uiuianga mataora, kua imene te katoatoa i te imene numero 86, koia oki te “Faithful Women, Christian Sisters.”

[Au Tutu]

(Runga) Daniel e Marina Sydlik; Grant e Edith Suiter; Theodore e Melita Jaracz

(Raro) Lloyd e Melba Barry; Carey e Sydney Barber

[Mapu i te kapi 16]

(No runga i teia, akara i te puka)

E ono opati manga tei kapitiia i raro ake i te arataki anga a te opati manga o Meiko

MEIKO

KUATEMARA

ONOTURA

ERE TARAVATOA

NIKARAKUA

KOTA RIKA

PANAMA

[Tutu i te kapi 17]

Parani o te opati maata o te Au Kite o Iehova no te tuatau ki mua i Warwick, New York