‘Vaitata ua ra Au ia Kotou’

‘E manganui te ka oro ki runga e ki raro, e tupu atura te kite mou tikai ki te maata anga.’​—DANI. 12:4.

AKAPEEA KOE ME PAU?

Akapeea te au tangata i teia tuatau te kite anga i ‘te kite mou tikai’?

Akapeea te aronga tei ariki mai i te tuatua mou i “manganui” ei?

Na roto i teea au tu i ‘tupu maata’ mai ei te kite mou tikai?

1, 2. (a) Akapeea tatou i kite ei e te vaitata ua ra a Iesu kia tatou i teia tuatau e a te tuatau ki mua? (e) Kia tau kia Daniela 12:4, eaa te ka tupu mai mei te apii meitaki anga i te au Tuatua Tapu?

AKAMANAKO ana e te noo ra koe ki roto i te Parataito. I te au popongi ravarai, ka ara mai koe ma te manako meitaki e te mataora i te akamata i tetai ra ou. Kare koe e mamae e e maki akaou. Ka meitaki tikai toou au mero no te akara anga, akarongo anga, ongi anga, amiri anga e te tongi anga. Ka maata toou maroiroi, ka mataora koe i taau angaanga, e ka maata toou au oa, e kare koe e manamanata akaou. Ko teia te au akameitakianga taau ka mataora i raro ake i te Patireia o te Atua. Ka akameitaki te Karaiti ko Iesu, te Ariki ikiia, i tona au tangata e ka apiiia ratou kia kite ia Iehova.

² A taua tuatau ra, ka tauturu a Iehova i tona au tavini tiratiratu ia ratou e rave ra i te angaanga apiianga i te ao katoa. E tauturu ua ana te Atua e tana Tamaiti i te aronga akarongo mou i te au anere mataiti. Mua ake ka oki ei a Iesu ki te rangi, kua akapapu aia ki tana au pipi tiratiratu e ka tauturu ua rai aia ia ratou. (E tatau ia Mataio 28:19, 20.) Ei akaketaketa anga i to tatou akarongo no teia taputou, ka akara tatou i tetai totou tei akauruia e te Atua, e tei tataia i Babulonia tere atu i te 2,500 mataiti i topa. No “te tuatau openga” e noo nei tatou, kua tata te peroveta ko Daniela e: ‘E manganui te ka oro ki runga e ki raro, e tupu atura te kite mou tikai ki te maata anga.’ (Dani. 12:4) Te marama nei tatou i te aiteanga o teia irava no te ‘oro anga ki runga e ki raro’ e ko te apii meitaki anga. Ka riro taua oro anga ki runga e ki raro ei akameitakianga tikai! Ka rauka i te aronga te apii meitaki ra i te au Tuatua Tapu i te kite mou tikai no runga i te Tuatua a te Atua. Te akakite katoa ra te totou e ka ariki mai te manganui i ‘te kite mou tikai.’ Pera katoa, ka tupu maata atu taua kite ra. Ka akatotoa aereia e ka arikiia mai te  reira. Ia tatou e akara ra e akapeea teia totou me akatupuia, ka kite mai tatou e te vaitata ua ra a Iesu ki tana au pipi i teia tuatau, e ka rauka ia Iehova i te akatupu pouroa i tana i taputou mai.

KITEAIA MAI ‘TE KITE MOU TIKAI’

3. Eaa tei tupu mai ki ‘te kite mou tikai’ i muri ake te mateanga o te au apotetoro?

³ Muri ake te mateanga o te au apotetoro, kua tupu mai te apiianga apoteiti tei totouia, mei roto mai i te Akonoanga Kerititiano mou e kua totoa atu mei te ai rai. (Anga. 20:28-30; 2 Tesa. 2:1-3) No te au anere mataiti, kare e maata ana ‘te kite mou tikai’ o te aronga kare a ratou apinga i kite i roto i te Pipiria e te aronga tei karanga e e Kerititiano ratou. Noatu kua karanga ratou e te irinaki ra ratou i te au Tuatua Tapu, kua apii te au arataki o Kerititome i te au tuatua pikikaa a te akonoanga​—‘te au apiianga a te au demoni,’ te akangateitei kore ra i te Atua. (1 Timo. 4:1) No reira, kare te maataanga o te au tangata i kite i te tikaanga no runga i te Atua. Te o maira ki te apiianga apoteiti te apiianga pikikaa e e Toru Tai te Atua, e e apinga tetai ka ora ua atu me mate te tangata, e e tamamaeia ana te reira i roto i te ai era e tuatau ua atu.

4. Akapeea tetai pupu o te au Kerititiano i te au mataiti 1870 te kimi anga i ‘te kite mou tikai’?

⁴ Inara, i te au mataiti 1870, e 40 mataiti i mua ake ka akamata ai “te au ra openga,” kua uipa taokotai mai tetai pupu meangiti o te au Kerititiano ngakau tae i Pennsylvania, U.S.A., kia apii meitaki i te Pipiria e kia kimi i ‘te kite mou tikai.’ (2 Timo. 3:1) Kua kapiki ratou ia ratou uaorai e ko te Aronga Apii Pipiria. Kare teia aronga apii Pipiria i “te aronga pakari e te kite” ta Iesu i tuatua ana te ka uunaia te kite mei ia ratou. (Mata. 11:25) E aronga akaaka ratou te inangaro ra i te rave i to te Atua anoano. Kua tatau meitaki, kua uriuri, e kua akamanako oonu teia aronga i te au Tuatua Tapu, e kua pure katoa no ta te Atua aratakianga. Kua akaaiteite katoa ratou i te au irava o te Pipiria e kua akara i te au tataanga a etai ke tei rave katoa i te kimikimi anga. Aere ua rai, kua kite mai teia Aronga Apii Pipiria i te tuatua mou tei kare i kiteaia ana no te au anere mataiti.

5. Eaa te akakoroanga o te au aenga pepa tei kapikiia e ko The Old Theology?

⁵ Mataora te Aronga Apii Pipiria i te au mea ta ratou i kite mai, inara kare ratou i akatika ana i to ratou kite ei akaparau anga na ratou; kare katoa ratou i tuku ana e kia akameitakiia mai ratou no te akakitekite aere anga i tetai apinga ou. (1 Kori. 8:1) Mari ra, kua nenei ratou i tetai au aenga pepa tei kapikiia e ko The Old Theology. Ko te akakoroanga, kia akamatau i te aronga tatau ki te tuatua mou tei tataia i roto i te Pipiria. Te tauturu ra te au aenga pepa mua i te au tangata kia apii i te Pipiria e kia rauka ia ratou i te kopae “i te au apiianga taito a te tangata” e kia ariki i te au apiianga tika a Iesu e a te au apotetoro, me kore “te au apiianga taito.”​—The Old Theology, Nu. 1, Aperira 1889, kapi 32.

6, 7. (a) Eaa te au tuatua mou tei akamaramaia mai kia tatou mei te au mataiti 1870? (e) Ko teea au tuatua mou taau e reka tikai ana i te apii?

⁶ E mea mataora tikai e kua kiteaia mai te au tuatua mou mei te akamataanga o te 100 tuma mataiti! * Kare teia au tuatua mou i te mea tamanako ua ei taumaro anga na te aronga apii akonoanga. E au tuatua mou mataora tikai teia te ka akapuapinga i to tatou oraanga e ka akamaata atu i to tatou rekareka e te manakonakoanga. Te tauturu maira te reira ia tatou kia kite ia Iehova​—tona tu aroa e tona akakoroanga. Te akamarama katoa maira te reira i ta Iesu tuanga, te tumu i ora ai e i mate ei aia, e tana e rave ra i teianei. Te akaari maira teia au tuatua  mou puapinga i te tumu i akatika ai te Atua i te kino, i mate ei tatou, akapeea tatou me pure, e akapeea tatou e mataora ai.

⁷ Ka marama i reira tatou i teianei i te aiteanga o te au totou tei “popaniia” no te au mataiti e manganui inara te akatupuia ra te reira i teia tuatau openga. (Dani. 12:9) Te maataanga o teia au totou, tei roto i te Au Evangeria e te puka o Apokalupo. Kua tauturu katoa mai a Iehova ia tatou kia marama i teia au mea kare tatou e kite mata ana​—te akateronoia anga a Iesu, te tamaki i runga i te rangi, e te uriia mai anga a Satani ki te enua nei. (Apo. 12:7-12) Kua tauturu katoa mai te Atua ia tatou kia marama i te aiteanga o te au mea ka kite atu tatou​—te tamaki, ngaruerue enua, maki mate, onge, e te au tangata akono kore i te Atua te akatupu ra i te “kino maata.”​—2 Timo. 3:1-5; Luka 21:10, 11.

8. Koai ta tatou ka akameitaki no te au mea ta tatou i kite mai e i akarongo ana?

⁸ Mama ua ia tatou i te ariki i ta Iesu i akakite ki tana au pipi e: “E ao to te mata i akara i te au mea ta kotou e akara nei: E akakite atu au kia kotou, e manganui te au peroveta, e te ui ariki, i anoano i te akara i te au mea ta kotou e akara nei, e kare akenei ratou i akara; e i te akarongo i te au tuatua ta kotou e akarongo nei, e kare akenei ratou i akarongo.” (Luka 10:23, 24) Ka akameitaki tatou i te Atua ko Iehova no tei tauturu mai ia tatou kia kite e kia akarongo ki taua au tuatua mou ra. E te ariki rekareka nei tatou e kua tonoia mai “te Akapumaana” me kore te tauturu, ko te vaerua tapu o te Atua, kia arataki i te au pipi a Iesu “ki te tuatua-mou katoatoa”! (E tatau ia Ioane 16:7, 13.) E akaperepere ua rai tatou i ‘te kite mou tikai’ e kia akakite atu i te reira ki tetai ke!

“MANGANUI” TEI ARIKI I ‘TE KITE MOU TIKAI’

9. Eaa te patianga tei orongaia i roto i te itiu o Aperira, i te mataiti 1881 o teia makatini?

⁹ Ia Aperira i te mataiti 1881, i mua ake ka tae ei ki te rua mataiti kua neneiia te itiu mua o Te Punanga Tiaki, e kua pati mai teia makatini i tetai 1,000 aronga tutu aere. Te karanga ra te atikara e: “Ki te aronga te ka rauka i te oronga ngakau katoa mai e apa ua me kore e maata atu i to ratou taime ki te angaanga a te Atu, e parani ta matou ka akakite atu . . . , koia oki: Kia aere kotou ki te au oire mamaata me kore oire meangiti, kia tau ki to kotou au tu karape, ei Au Painia, kia kimi i te au Kerititiano ngakau tae i te au ngai ravarai, e ka kite mai kotou i te maataanga ia ratou e e tu maroiroi to ratou no te Atua, kare ra o ratou kite mou tikai; e e akakite atu ki teia aronga i te tu meitaki o to Tatou Metua aroa e te tu manea o Tana tuatua.”

10. Akapeea te au tangata te ariu mai anga ki te patianga no te aronga tutu aere?

¹⁰ Te akaari maira taua patianga ra e kua kite te Aronga Apii Pipiria e ko tetai angaanga puapinga a te au Kerititiano mou, ko te tutu aere i te tuatua meitaki. Inara, kare i papu e me ka ariki mai e 1,000 aronga tutu aere i taua patianga ra, no te mea e anere tuma ua rai aronga e aere mai ana ki te uipaanga a te Aronga Apii Pipiria i taua tuatau ra. Muri ake te tatau anga i tetai aenga pepa me kore makatini, maata te au tangata tei kite mai i te tikaanga o te tuatua mou e kua ariki mai i taua patianga ra. Ei akaraanga, i te mataiti 1882, kua tata tetai tangata no London mai, i Engarani, te tatau anga i tetai itiu o Te Punanga Tiaki e tetai puka rikiriki ta te Aronga Apii Pipiria i nenei ana e: “E apii mai ana iaku akapeea e eaa te ka tutu aereia kia akatupu meitakiia te angaanga ta te Atua e inangaro ra kia raveia.”

11, 12. (a) Eaa ra te akakoroanga o te au orometua tamou? (e) Akapeea te au orometua tamou i te akanoo anga i te “au pupu,” me kore te au putuputuanga?

¹¹ Tae anga ki te mataiti 1885, mei tetai 300 Aronga Apii Pipiria tei piri mai ki te angaanga orometua tamou. Aiteite te akakoroanga o teia au orometua tamou ki to  tatou akakoroanga i teia tuatau​—koia oki te akariro anga i te tangata ei pipi na Iesu Karaiti. Inara, tuke rai te tu e rave ana ratou i ta ratou apiianga ki ta tatou. I teia tuatau, ka apii tataki tai tatou i te Pipiria ki te tangata. E oti ka pati tatou i te tangata e apii ra i te Pipiria kia kapiti mai ki te putuputuanga tei akanooia. I te tuatau i topa, e oronga ana te au orometua tamou i te au puka, e oti ka pati atu i te aronga e inangaro maira kia kapiti mai ki roto i to ratou pupu i te apii i te au Tuatua Tapu. Kare ratou i apii ua ki te au tangata tataki tai, mari ra kua akanoo ratou i te “au pupu,” me kore au putuputuanga.

¹² Ei akaraanga, i te mataiti 1907, kua aere atu tetai pupu painia ki tetai oire i te kimi i te aronga kua tu ke ana i te puka Millennial Dawn (tei kapiki katoaia e ko te Studies in the Scriptures). Kua ripoti mai The Watch Tower e: “Kua akaputuputuia mai teia [aronga e inangaro maira] ki tetai uipaanga meangiti ua i roto i te kainga o tetai. Kua oronga te au Orometua Tamou i tetai akoanga kia ratou no runga i to te Atua akakoroanga i te ra katoa o te Tapati, e i tera mai Tapati kua akamaroiroi aia ia ratou kia akaputuputu ua rai.” I te mataiti 1911, kua tamata te au taeake i tetai mataara ke no te angaanga tutuanga. E 58 au taeake tutaka tei oronga i te au akoanga ki te katoatoa i roto ia Marike e Kanata. Kua tata teia au taeake i te au ingoa e te au ngai nooanga o te au tangata tei tae mai ki te au akoanga, e kua akanoo ia ratou kia uipa putuputu ki roto i te au kainga no te akamata anga i tetai “au pupu” ou. Tae anga ki te mataiti 1914, e 1,200 putuputuanga o te Aronga Apii Pipiria i te ao katoa.

13. Eaa taau e umere ra no runga i ‘te kite mou tikai’ i teia tuatau?

¹³ I teia tuatau, mei tetai 109,400 putuputuanga i te ao katoa, e mei tetai 895,800 au taeake e te au tuaine te tavini ra ei au painia. Vaitata rai e varu mirioni tangata tei ariki mai i ‘te kite mou tikai,’ e te taangaanga ra i te reira i roto i to ratou oraanga. (E tatau ia Isaia 60:22.) * E mea umere tikai teia, no te mea kua totou ana a Iesu ki tana au pipi e ‘ka makitakitaia mai ratou e te tangata ravarai’ no tona ingoa. Kua akakite katoa mai aia e ka takinokinoia tana au pipi, ka tapekaia e ka tamateia. (Luka 21:12-17) Noatu kua tauta a Satani, tana au temoni, e te au tangata e manganui i te patoi mai, te mataora nei rai te iti tangata o Iehova i te rave i ta ratou angaanga i te akariro anga i te tangata ei pipi. I teia tuatau, te tutu aere nei ratou i “te ao katoa,” mei te au ngai vera tikai ki te au ngai anu tikai, i te au maunga, i te au metepara, te au oire, e te au ngai kare e maata ana te au tangata. (Mata. 24:14) Kare teia e tupu naringa kare ta te Atua tauturu anga.

‘MAATA TE KITE MOU TIKAI’

14. Akapeea ‘te kite mou tikai’ te akatotoa maataia anga na roto i ta tatou au puka?

¹⁴ Kua tupu maata mai te ‘kite mou tikai’ na roto i te manganui tei akakitekite  aere i te tuatua meitaki. Kua totoa maata katoa te reira na roto i te au puka e te makatini tei neneiia. I roto ia Tiurai i te mataiti 1879, kua nenei te Aronga Apii Pipiria i te itiu mua o teia makatini, tei kapikiia e ko te Zion’s Watch Tower and Herald of Christ’s Presence. Kua tutaki te Aronga Apii Pipiria i tetai kamupani kia nenei e 6,000 kopi o taua itiu mua ra i roto i te reo Papaa. Kua ikiia a Charles Taze Russell, e 27 ona mataiti, ei tangata akaaere, e e 5 taeake tei tata putuputu mai i te au atikara no te makatini. Te neneiia nei Te Punanga Tiaki i roto i te 195 reo. Ko te makatini tua maataia te reira i te enua nei, e e 42,182,000 kopi o te makatini tei neneiia. Te rua o te makatini e tua maataia ra ko te makatini E Ara!, e e 41,042,000 kopi o te reira tei neneiia i roto i te 84 reo. Pera katoa, mei tetai 100 mirioni au puka e te au Pipiria e neneiia ana i te au mataiti ravarai.

15. Akapeea ta tatou angaanga neneianga te tutakiia anga?

¹⁵ Na te au moni oronga uaia mai e turuturu ana i teia angaanga maata. (E tatau ia Mataio 10:8.) Kua umere te au pitiniti neneianga i teia tu, no te mea kua kite ratou e e aka moni te tutaki i te au matini nenei, te pepa, te inika, e tetai atu au apinga. Kua akakite mai tetai taeake nana e oko ana i te au apinga no te matini nenei i Betela e: “Kua umere te aronga pitiniti tei atoro mai i to tatou ngai nenei anga e na te au moni oronga uaia mai e tutaki ana i taua au matini tekinoroti ou e te meitaki tikai. Kua umere katoa ratou e e aronga mapu ua e te mataora te aronga angaanga i Betela.”

KA KI TE ENUA I TE KITE O TE ATUA

16. Eaa ra te akakoroanga no te akakitekite anga i ‘te kite mou tikai’?

¹⁶ No tetai akakoroanga meitaki i tupu maata mai ei ‘te kite mou tikai.’ E ko to te Atua anoano koia oki, ‘kia ora te tangata katoatoa, e kia rauka te kite mou tikai i te tuatua-mou.’ (1 Timo. 2:3, 4) Te inangaro ra a Iehova i te au tangata kia kite i te tuatua mou kia akamori tau tikai ratou iaia e kia rauka mai tana akameitakianga. Na te akakitekite anga i ‘te kite mou tikai,’ kua tavaitai mai a Iehova i te toenga o te aronga akarongo mou Kerititiano akatainuia. Mei roto mai i “te au iti-tangata ravarai, e te au reo katoa,” te akaputuputu katoa maira aia i te “aronga maata rava,” te manakonako ra i te noo i te enua nei e tuatau ua atu.​—Apo. 7:9.

17. Eaa ta te tupuanga maata o te akamorianga mou e akaari maira?

¹⁷ Te tupu maata anga te akamorianga mou tere atu i te 130 mataiti i topa, te akaari maira te reira e e tauturu ua ana te Atua e tona Ariki ikiia, ko Iesu Karaiti, i te au tavini o Iehova i te enua nei​—na te arataki anga, paruru anga, akaaere anga e te apiianga ia ratou. Te akaari katoa maira teia tupuanga e ka akatupuia ta Iehova au taputou no te tuatau ki mua. “Ka ki te enua i te kite ia Iehova, mei te vairanga tai e ki i te tai ra.” (Isa. 11:9) Akamanako ana i te au akameitakianga ta te au tangata ka kite mai i taua tuatau ra!

[Au Tataanga Rikiriki i Raro]

[Au Uianga Apii]

[Tutu i te kapi 6]

E aronga akaaka te Aronga Apii Pipiria mua tei inangaro tikai i te rave i to te Atua anoano

[Tutu i te kapi 7]

Akaperepere a Iehova i taau tauta anga i te akatotoa anga i ‘te kite mou tikai’ o te Atua