1. Eaa te ka tauturu ia tatou kia matakite ua rai e kia autu atu i te au timataanga?

KARE e roa atu ka tupu mai te au tupuanga tumatetenga. Te akapapu maira te tupuanga o te au totou Pipiria i teia, no reira kia matakite ua rai tatou. Eaa te ka tauturu ia tatou kia rave i te reira? Te raurau maira te apotetoro ko Paulo e kia akamou tatou i to tatou nga mata ki runga i “te au mea akara koreia ra.” Ae, ka anoanoia tatou kia akamaara i te tutaki o te oraanga mutu kore i runga i te rangi me kore i te enua nei. Mei ta te aerenga manako e akaari maira, kua tata a Paulo i teia au tuatua ei akamaroiroi i te au taeake irinaki kia akamanako i te au tupuanga mataora no to ratou tu tiratiratu. Ka riro te reira ei tauturu ia ratou kia autu atu i te au timataanga e te au takinokinoanga.​—2 Kori. 4:8, 9, 16-18; 5:7.

2. (a) E rauka ai i te akono i to tatou manakonakoanga, eea ta tatou ka rave? (e) Eaa ta tatou ka uriuri i roto i teia atikara e te atikara ka aru mai?

² Tei roto i te akoanga a Paulo tetai kaveinga puapinga: E rauka ai i te akono i to tatou manakonakoanga, e akara tatou ki te au mea i mua ua atu ia tatou. Ka anoanoia tatou kia akamanako meitaki i te au mea puapinga akara koreia ka tupu mai. (Ebe. 11:1; 12:1, 2) Ka uriuri tatou i roto i teia atikara e te atikara ka aru mai e tai ngauru au mea ka tupu mai a te tuatau ki mua te piri maira ki to tatou manakonakoanga no te oraanga mutu kore.

3. (a) Eaa te au mea ka tupu mai e taikuia ra i roto ia 1 Tesalonia 5:2, 3? (e) Eaa ta te au arataki porotiki ka rave, e koai ma te ka piri atu kia ratou?

³ Kua taiku mai a Paulo i tetai tupuanga a te tuatau ki mua i roto i tana reta ki to Tesalonia. (E tatau ia 1 Tesalonia 5:2, 3.) Te akakite maira aia i te ‘rā o Iehova.’ Te tou ra te ‘rā o Iehova’ ki te tuatau e akamata ai te takoreanga o te akonoanga pikikaa, te ka taopenga atu ki te tamaki o Aramakito.  I mua ake ka akamata ai taua ra ra o Iehova, ka tuatua te au arataki o teianei ao e “e au, e kare e kino”! Penei te taiku ra teia ki etai tupuanga me kore ki tetai au tupuanga. Penei ka manako te au patireia e te vaitata ra ratou i te akatikatika i to ratou au manamanata mamaata. Akapeea ra te au arataki akonoanga? E tuanga ratou no teianei ao, no reira ka piri atu ratou ki te au arataki porotiki. (Apo. 17:1, 2) Ka aru te au orometua i te tu o te au peroveta pikikaa o Iuda i taito. Kua tuatua a Iehova no runga ia ratou e: ‘E te na ko ra ratou e, E au, e au; e kare ua e au.’​—Iere. 6:14; 23:16, 17.

4. Eaa ra ta tatou e marama nei kare tetai au tangata e marama ana?

⁴ Noatu e koai ma ka piri ki te tuatua anga e “e au, e kare e kino”! ka akaari mai taua tupuanga ra e ka akamata te ra o Iehova. Ka rauka i reira ia Paulo kia tuatua e: “E te au taeake, kare ïa i roto i te poiri, ka rokoia mai ei kotou e taua rā ra mei te keia. E tamariki anake kotou no te mārama.” (1 Tesa. 5:4, 5) Te marama nei tatou i te puapinga o te au mea e tupu nei, kare mei tetai au tangata rai. Akapeea ra teia totou no runga i te tuatua e “e au, e kare e kino”! e akatupuia ai? Ka tiaki ua tatou e kite ei tatou i te reira. No reira, ka tauta tatou ‘kia vai araara ua e kia matakite.’​—1 Tesa. 5:6, NW; Zepha. 3:8.

5. (a) Akapeea te “mate maata” e akamata ai? (e) Koai te “ariki vaine” tei manako tarevake e ka ora aia?

⁵ Eaa te au mea akara koreia ka tupu mai kare i tupu ake? Kua akakite mai a Paulo e: “E tuatua oki te tangata e, e au, e kare e kino; ei reira ratou e rokoia uaia mai ei e te mate viviki.” Ko te tuanga mua o teia “mate viviki” ko te tamaki atu anga ia “Babulonia maata,” te patireia o te akonoanga pikikaa o teianei ao, tei kite katoaia e ko te “vaine akaturi.” (Apo. 17:5, 6, 15) Ko te akamataangaia o te “mate maata” me tamakiia atu te au tu akonoanga pikikaa ravarai, kapiti mai ia Kerititome. (Mata. 24:21; 2 Tesa. 2:8) Maata te au tangata ka poitirere me tupu mai teia. No teea ra? No te mea, me tae ki te reira tuatau, ka manako papu te vaine akaturi e e “ariki vaine” aia e ‘kare rava aia e kite i te aue.’ Inara, ka kite mai aia e kua manako tarevake aia e ka ora aia. Ka takore vivikiia atu aia mei te mea rai e e ‘tai ua rai rā.’​—Apo. 18:7, 8.

6. Naai e takore atu i te akonoanga pikikaa?

⁶ Kua akakite mai te Tuatua a te Atua e na te “puaka taae” e ‘raungauru tara’ e tamate i te vaine akaturi. Kua akaari mai te apiianga o te puka o Apokalupo e ko te Taokotaianga Enua (UN) te puaka taae. Te akatutu maira te ‘raungauru tara’ i te au mana poritiki katoatoa te turuturu ra i teia “puaka taae kutekute.” * (Apo. 17:3, 5, 11, 12) Mei teaa ra te kino o teia tamate anga? Ka raveia e te au patireia o te UN te au apinga nui a te vaine akaturi, ka akaari puia mai tona au tu tikai, ka takoreia atu aia, e ka ‘tutungiia ki te ai.’ Ko tona takore anga opengaia.​—E tatau ia Apokalupo 17:16.

7. Naai e akakeu i te “puaka taae” kia tamate atu i te vaine akaturi?

⁷ Te akakite katoa maira te totou Pipiria e naai e akakeu i teia tamate anga? Ka tuku a Iehova ki roto i te ngakau o te au tutara poritiki ‘kia rave i tona manako’ koia oki kia takore atu ratou i te vaine akaturi. (Apo. 17:17, NW) E riro ua ana te au akonoanga akatupu pekapeka ei akakeuanga kino i teianei ao; inara ka manako te au patireia e te rave ra ratou i to ratou uaorai anoano me takore ratou i te vaine akaturi. E tika, me takino atu te au tutara i te vaine akaturi, ka manako ratou e te rave ra ratou i to ratou uaorai “manako okotai.” Te tikaanga, te taangaangaia ra ratou e te Atua kia takore atu i te au akonoanga pikikaa katoatoa. Na roto i tetai ravenga umere, ka tamaki atu tetai tuanga o ta Satani akatereanga i tetai o tona uaorai tua, e kare e rauka ia Satani i te arai i te reira.​—Mata. 12:25, 26.

8. Eaa te tamakianga a “Goga i te enua o Magoga”?

⁸ Muri ake me takoreia te akonoanga pikikaa, ka kiteaia atu te iti tangata o te Atua e ‘noo ra ma te ora, e te patu kore.’ (Eze. 38:11, 14) Eaa te ka tupu ki teia pupu tangata paruru koreia e akamori ua ra ia Iehova? Akaraanga e ka tamaki mai “te au tangata e manganui” ia ratou. Te akamarama maira te Tuatua a te Atua e ko te reira tupuanga, ko te tamakianga a ‘Goga o te enua o Magoga.’ (E tatau ia Ezekiela 38:2, 15, 16.) Eaa to tatou manako no runga i taua tamakianga ra?

9. (a) Eaa te mea puapinga maata ki tetai Kerititiano? (e) Eaa te au takainga ta tatou ka rave ei akaketaketa anga i to tatou akarongo?

⁹ Me kite vave tatou i teia tamakianga i runga i te iti tangata o te Atua, kare tatou e taitaia maata. To tatou manako maata ra, kare e kia ora mai tatou, mari ra ko te akatapuanga i to Iehova ingoa e te paruru anga i tona turanga ngateitei. E tika rai, i roto i te reo Epera mua, kua akakite mai a Iehova tere atu i te 60 taime e : “E kite oki kotou e ko Iehova au.” (Eze. 6:7) No reira te tapapa atu nei tatou ma te inangaro i te kite i te tupuanga o taua tuanga puapinga ra o ta Ezekiela totou, te irinakianga e “kua kite mari te Atu [Iehova] i te akaora i te aronga akono i te Atua i roto i te timataanga ra.” (2 Pete. 2:9) Teia taime, ka taangaanga tatou i te au atianga ravarai kia akaketaketa i to tatou akarongo kia vai tiratiratu tatou kia Iehova noatu eaa te au timataanga ta tatou ka aro atu. Eaa ta tatou ka rave? Ka pure tatou, ka apii i te Tuatua a te Atua, ka akamanako oonu i te reira, e ka akakite atu i te karere Patireia ki tetai ke. Me rave tatou i te reira, ka vai ketaketa to tatou manakonakoanga no te oraanga mutu kore, mei tetai “tutau” rai.​—Ebe. 6:19; Sala. 25:21.

10, 11. Eaa te akairo no te akamataanga o Aramakito, e eaa te ka tupu i taua tuatau ra?

¹⁰ Eaa te tumatetenga i te enua nei ka tupu mai me tamakiia atu te au tavini o Iehova? Ka tauturu mai a Iehova na roto ia Iesu e te au nuku tamaki o te rangi i Tona iti tangata. (Apo. 19:11-16) Ka na roto mai te reira i te ‘tamaki o te rā maata o te Atua mana katoatoa ra,’ tei kapikiia e ko Aramakito.​—Apo. 16:14, 16.

¹¹ No runga i te tamaki anga ia Goga, kua akakite mai a Iehova na roto ia Ezekiela e: “E naku e kapiki ki te koke ei rave iaia, e pini ua ake toku au maunga katoa nei, te tuatua maira te Atu ra ko Iehova: te koke a tera tangata tera tangata, ei rave ïa i tona uaorai taeake.” No te mataku, ka oripu ua te manako o te au tangata o to Satani tua e ka tanga atu ta ratou au apinga tamaki ki to ratou uaorai nuku​—te ta atu anga i tetai e tetai. E ka takore katoaia atu a Satani. Kua akakite mai a Iehova e: ‘E naku e akatopa i te ai e te teio, ki runga ia Goga, e ki runga i te au mutuanga nona ra, e ki runga i te au tangata e manganui tei iaia ra.’ (Eze. 38:21, 22) Eaa te ka tupu mai mei teia tamakianga a te Atua?

12. Eaa ta te au patireia ka maroia kia kite mai?

¹² Ka kite mai te au patireia e kare ratou e autu i te tamaki no te mea na Iehova i akaue mai i te reira kia raveia. E mei te aronga kaitamaki rai o Aiphiti taito ra tei arumaki i te ngati Iseraela i ko i te Tai Muramura, ka kapiki mai te nuku tamaki o Satani e: ‘Te tamaki ra a Iehova no ratou’! (Exo. 14:25) Ka maroia te au patireia kia kite mai ia Iehova. (E tatau ia Ezekiela 38:23.) Mei teaa ra te vaitata e akamata ai teia au mea i te tupu mai?

13. Eaa ta tatou i kite mai no runga i te tuanga rima o te tiki ta Daniela i akataka mai?

¹³ Te tauturu maira te totou i roto ia Daniela ia tatou kia kite e teiea tatou i teia tuatau. Kua akamarama mai a Daniela i tetai tiki mei te tangata te tu tei maaniia ki te au apinga tukeke. (Dani. 2:28, 31-33) Te akatutu maira te reira i te au mana tutara te taomi maata ra i te iti tangata o te Atua i mua ana e i teia tuatau. Ko Babulonia, Madai e Peresia, Ereni e Roma teia au patireira​—e ko te openga, ko tetai mana tutara mai o te ao i to tatou tuatau. Te akaari maira te apiianga i te totou a Daniela e te akatutu maira teia mana tutara openga o te ao i te nga vaevae e te au mangamanga vaevae o te tiki. I te tuatau o te Tamaki I o te Ao, kua kapiti atu a Peritane kia Marike. Ae, ko te Mana Tutara o Peritane e Marike te tuanga rima o te tiki a Daniela. Ko te vaevae te tuanga openga o te tiki, te akaari maira e kare e mana tutara o te ao e tutara akaou mai. Te akatutu maira te nga vaevae e te au mangamanga vaevae tei maaniia ki te auri e te karakaraea i te turanga paruparu o te Mana Tutara o Peritane e Marike.

14. Ko teea mana tutara te tutara ra me tupu mai a Aramakito?

¹⁴ Te akaari maira taua totou ra e kua tipuia mai te Patireia o te Atua, tei akatutuia mai e te toka mamaata, mei runga mai i te maunga o to Iehova turanga teitei i te mataiti 1914. Te akatano maira taua toka ra​—ki te nga vaevae o te tiki. Me tupu mai a Aramakito, ka akapueurikirikiia atu te nga vaevae e te toenga o te tiki. (E tatau ia Daniel 2:44, 45.) Te tutara ra rai te Mana Tutara o Peritane e Marike me tupu mai a Aramakito. E mea mataora tikai te kite atu anga i teia totou me akatupu meitakiia mai! * Eaa ta Iehova ka rave kia Satani?

15. Muri ake ia Aramakito, eaa te ka raveia kia Satani e tana au temoni?

¹⁵ Mea mua, ka kite a Satani me takoreia tona akaaerenga katoa mei te akamataanga ki te openga o te enua nei. E oti ka uri mai te reira ki runga ia Satani. Kua ripoti mai te apotetoro a Ioane eaa te ka tupu i muri mai. (E tatau ia Apokalupo 20:1-3.) Ka opu a Iesu Karaiti, te “angela . . . tei iaia te taviri o te vaarua takere kore” ia Satani e tana au temoni e ka uri atu ia ratou ki roto i te vaarua takere kore, e ka noo ratou ki reira e tai tauatini mataiti. (Luka 8:30, 31; 1 Ioa. 3:8) Ko te akatupu anga te reira i te tuanga mua o te akaparuparu anga i te mimiti o te ovi. *​—Gene. 3:15.

16. Eaa te ka tupu kia Satani me uriia aia ki roto i te “vaarua takere kore”?

¹⁶ Eaa te “vaarua takere kore” tei uriia a Satani e te au temoni ki roto? E ngai te reira kare e itae ia atu e tetai tangata, mari ra ko Iehova anake ua e tana angera ikiia ma “te taviri o te vaarua takere kore.” Kare e rauka ia Satani te rave i tetai ua atu angaanga i reira, e kare aia e “pikikaa akaou i te pa enua.” No reira, ka akamutekiia taua “liona ngunguru ra”!​—1 Pete. 5:8.

17, 18. (a) Eaa te au mea akara koreia ka tupu mai ta tatou i uriuri ana? (e) Muri ake i teia au tupuanga, eaa te tuatau ta tatou ka mataora?

¹⁷ Tei mua ia tatou te au tupuanga puapinga e te tumatetenga. Te tapapa atu nei tatou i te tuatau e tupu ei te tuatua e “e au, e kare e kino”! E oti, ka kite tatou te takoreia anga a Babulonia Maata, te tamakianga a Goga e Magoga, te tamakianga a Aramakito, e te uriia anga a Satani e tana au temoni ki roto i te vaarua takere kore. Muri ake i teia au tupuanga, me takoreia atu te au kino ravarai, ka taui takiri to tatou oraanga e ka mataora tatou i tetai oraanga ‘maata te au’ i te tuatau o to Karaiti Tutaraanga Tauatini Mataiti.​—Sala. 37:10, 11.

¹⁸ Kapiti mai ki te au tupuanga e rima ta tatou i akara meitaki ana, te vai ra tetai atu “au mea akara koreia” ka akamou tatou i to tatou nga mata ki runga. Ka uriuriia teia au mea ka tupu mai i roto i te atikara ka aru mai.