I roto ia Titema 2009, kua turuturu te Akavaanga Teitei o Rutia i te ikianga kia tapiri i te akaaerenga o te akonoanga a te Au Kite o Iehova i Taganrog, Rutia, te raveia anga i te Are Uipaanga Patireia, e te akakiteanga e e 34 o ta tatou au puka tei manakoia e kino maata te reira. Kua tukuia teia tupuanga ki runga i te Web site akamanaia o te au Kite o Iehova kapiti atu te au tutu o te au Kite e ta ratou tamariki tei takinoia e taua ikianga ra.

I nga marama i muri mai, kua tae mai tetai pia e tetai reta ki te Ngai Akatereanga Maata o te Au Kite o Iehova i Rutia no ko mai i tetai pamiri Kite i Queensland, Autireria, tei kite i te ripoti o te ikianga a te Akavaanga. Kua karanga te reta e: “E te au Taeake, kua akakeuia te ngakau o ta maua nga tamariki, ko Cody raua ko Larissa, i te akarongo i te au timataanga o te au taeake i Rutia. Kua tata raua i te au kati e te au reta, e kua maani matou i tetai pia meangiti tei ki i te au apinga no te au tamariki i Taganrog, kia maara ua ratou e i tetai enua mamao, e au tamariki katoa tetai te tavini tiratiratu ra ia Iehova e te manako maira ia ratou. Te tuku atu nei raua i te takaveanga maata e to raua aroa.”

Te rauka anga mai te au reta, kua tata te au tamariki i Taganrog i tetai reta meitaki maata tei ki i te au tutu ki te pamiri i Autireria. Kua akakeuia tetai tangata Kite te tavini ra i te opati manga o Rutia e te au tuatua akamaroiroianga “no roto i te vaa o te tamariki mea ngiti,” e kua tata aia kia Cody raua ko Larissa e: “Ka rauka ia koe i te akamanako i te tu mareka kore no te au tamariki e te aronga mamaata me akautungaia ratou no tetai apinga kare ratou i rave ana. Kare te au taeake e te au tuaine i Taganrog i rave ana i te tarevake, inara kua raveia to ratou Are Uipaanga Patireia. Kua maromaroa ratou i teia. Ka akamaroiroiia ratou me kite ratou e te manako maira tetai tangata ia ratou i tetai enua mamao. Meitaki maata no toou tu pumaana e te oronga ua!”​—Sala. 8:2.

E tuanga tikai tatou no tetai taokotaianga taeake i te ao katoa, e ka tauturu to tatou aroa no tetai e tetai ia tatou kia akakoromaki i te au timataanga o te oraanga e te au turanga ngata. Noatu te taumaro nei te au akavaanga e me te akamaroiroi ra te au puka o te Au Kite o Iehova i te riri, te akakite ra ta tatou tamariki i to ratou manako aroa no tetai e tetai, te akaatea anga i te au arai o te pa enua e te au peu e te akaari anga i te tika o te tuatua a Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:35.