1, 2. Akapeea tatou e puapingaia ai me akamanako tatou i to te Atua anoano, e eaa ta tatou ka kite mai no runga i teia mei te Ariki ko Davida?

TE AERE ra koe na runga i tetai maunga. Kua tae mai koe ki tetai ngai e rua mataara. Ko teea mataara taau ka aru? Penei ka kake koe ki runga i tetai toka maatamaata kia akara e te aere ra te nga mataara kiea. Na te taangaanga anga i taua kaveinga ra ka tauturu mai te reira ia tatou kia rave i te au ikianga puapinga. Na te akara anga i te au mea mei te akaraanga a Tei Anga ra e tauturu ei ia tatou kia ‘aere na te ara’ ta Iehova e ariki ra.​—Isa. 30:21.

² I roto i tona oraanga katoa, kua akanoo te Ariki ko Davida o Iseraela taito i tetai akaraanga meitaki no te akamanako anga i to te Atua anoano. Ka akara ana tatou i tetai au mea i tupu ana i roto i to Davida oraanga te apii anga i te tu o tetai tangata te tau ra tona ngakau katoa ki te Atua ko Iehova.​—1 Ari. 11:4.

3, 4. (a) Eaa tei akakeu ia Davida kia tamaki atu ia Golia? (e) Eaa to Davida manako no runga i te ingoa o te Atua?

³ Akamanako ana i te tuatau te tamaki atu anga a Davida i te tumutoa Philiseti ko Golia. Eaa tei akakeu i te tamaiti mapu ko Davida kia tamaki atu i te tuputupua mei tetai iva e te apa tapuae (2.9 mita) te roaroa ma tana au apinga tamaki? (1 Samu. 17:4) No to Davida tu mataku kore ainei? Me no tona irinakianga ainei i te Atua? E tika e puapinga taua nga tu ra kiaia no tana tamaki anga ngakau toa. Inara, ko te akangateitei anga ia Iehova e tona ingoa maata i akakeu ei ia Davida kia tamaki atu i taua tuputupua ra. Ma te tu riri, kua ui a Davida e: “Koai oki teianei Philiseti peritome koreia ra, i akavaavaa mai ei aia i te au nuku a te Atua ora nei?”​—1 Samu. 17:26.

 ⁴ Te tuatua anga kia Golia, kua akakite te tamaiti mapu ko Davida e: “Te aere maira koe kiaku nei ma te koke, e te korare, e te paruru: te aere atu nei ra au kia koe ma te ingoa o Iehova Sabaota ra, te Atua no te au nuku o Iseraela ra, tei akavaavaaia e koe na.” (1 Samu. 17:45) Na te irinakianga i te Atua mou, kua tamate iora a Davida i te tumutoa Philiseti ki te toka okotai. E no te toenga o tona oraanga, kua irinaki a Davida ia Iehova e kua akangateitei i Tona ingoa. Tika rai, kua akamaroiroi a Davida i tona au taeake Iseraela kia ‘akapaapaa i te ingoa tapu o Iehova.’​—E tatau ia 1 Paraleipomeno 16:8-10.

5. Ko teea turanga taau ka aro atu tei aite ki te tuatua akavaavaa a Golia?

⁵ Mataora ainei koe e ko Iehova toou Atua? (Iere. 9:24) Eaa taau ka rave me tuatua akakino mai toou au tangata tupu, te au oa angaanga, te au oa apii, me kore toou kopu tangata ia Iehova e te aviri ra i tona Au Kite? Ka paruru ainei koe i to Iehova ingoa me akakinoia mai, e te irinaki anga kiaia no te turuturuanga? E tika, e “tuatau to te muteki ua” inara auraka tatou e akama no te mea e Au Kite tatou no Iehova e e au pipi na Iesu. (Kohe. 3:1, 7; Mare. 8:38) E mea tau kia akamanako meitaki e kia takinga meitaki i te aronga te patoi maira, auraka ra tatou kia riro mei te ngati Iseraela rai tei ‘taitaia e tei mataku maata’ i to ratou akarongo anga i te tuatua akavaavaa a Golia. (1 Samu. 17:11) Mari ra, kia viviki tatou i te paruru atu i te ingoa tapu o te Atua ko Iehova. Te inangaro nei tatou i te tauturu i te au tangata kia kite e koai tikai te Atua ko Iehova. No reira, ka taangaanga tatou i tana Tuatua i te tauturu i tetai ke kia kite mai i te puapinga no te akavaitata anga ki te Atua.​—Iako. 4:8.

6. Eaa ta Davida e inangaro ra i te akatupu te tamaki atu anga aia ia Golia, e eaa ra te mea puapinga maata kia tatou?

⁶ Te apii maira to Davida tamaki atu anga ia Golia i tetai apiianga puapinga kia tatou. Te oro mai anga a Davida ki te ngai tamaki anga, kua ui aia e: “Akapeeaia te tangata e mate ei iaia teianei Philiseti, kore akera te akakino ia Iseraela nei?” Kua akakite akaou te au tangata i ta ratou i tuatua i mua atu ana e: “Te tangata e mate ei [a Golia] nei, e apinga maata tana i te ariki nei, e ka oronga oki aia i tana tamaine nana.” (1 Samu. 17:25-27) Inara kare ko te tutakianga i te pae materia ta Davida e manako maata ra. E akakoroanga maata atu tona. Te inangaro ra a Davida i te akakaka i te Atua mou. (E tatau ia 1 Samuela 17:46, 47.) Akapeea ra tatou? Te manako maata ra ainei tatou i te akakaka i to tatou uaorai ingoa na te akaputu anga i te au apinga nui e te riro mai anga ei aronga puapinga i teianei ao? Papu e te inangaro ra tatou kia aite tatou mei ia Davida rai, tei imene e: “E akamaata tatou ia Iehova; tatou katoa e akateitei i tona ingoa.” (Sala. 34:3) No reira kia irinaki ua rai tatou i te Atua, na te tuku anga i tona ingoa na mua ake i to tatou ingoa.​—Mata. 6:9.

7. Akapeea tatou me akaketaketa i to tatou akarongo me aravei tatou i te au tangata kare e ariki mai ana?

⁷ Te umuumuia ra a Davida kia irinaki papu kia Iehova ma te tu mataku kore no te tamaki atu anga ia Golia. E akarongo ketaketa to te tamaiti mapu ko Davida. Tetai mataara i akaketaketa ai aia i tona akarongo na te irinaki anga ki te Atua te rave anga aia i tana angaanga ei tiaki mamoe. (1 Samu. 17:34-37) Ka anoano katoa tatou i te akarongo ketaketa kia rave ua rai i te angaanga orometua, me aravei tatou i te au tangata kare e ariki mai ana. Ka rauka ia tatou i te akaketaketa i to tatou akarongo na te irinaki anga ki te Atua i roto i ta tatou e rave ana i te au ra ravarai. Ei akatauanga, ka rauka ia tatou i te pukapuka atu no runga i te tuatua mou Pipiria ki te au tangata tei noo mai i te pae ia tatou i runga i te apinga akaoro tari tangata. Eaa ra tatou kare e tuatua atu ki te au tangata ta tatou ka aravei i runga i te  mataara me tutu aere tatou mei tera are ki tera are?​—Anga. 20:20, 21.

8, 9. No runga i te Ariki ko Saula, akapeea a Davida i te akaari anga e te manako ua ra aia i to Iehova anoano?

⁸ Tetai akaraanga no to Davida tu ngakau puareinga i te irinaki anga kia Iehova, koia oki ko tona manako no runga ia Saula​—te ariki mua o Iseraela. E toru taime te tauta anga te tangata vareae ko Saula i te vero ia Davida ki te korare, inara kua kape a Davida i te reira, e kare i tupau atu ana i te kino. I te openga, kua oro aia mei ia Saula. (1 Samu. 18:7-11; 19:10) Kua iki a Saula e 3,000 tangata mei roto mai ia Iseraela katoa, e kua aere atu i te kimi ia Davida i roto i te metepara. (1 Samu. 24:2) Kua aere atu a Saula ma te kite kore ki roto i te ana tei roto i reira a Davida e tona au tangata. E atianga meitaki teia no Davida i te takore atu i te ariki te inangaro ra i te tamate iaia. I te mea e ko to te Atua anoano kia mono a Davida ia Saula ei ariki no Iseraela. (1 Samu. 16:1, 13) Tika rai, naringa a Davida i akarongo ki te tuatua a tana au tangata, ka rauka iaia i te tamate i te ariki. Inara, kua tuatua a Davida e: “Kia akakore mai oki a Iehova, auraka au kia pera ki toku pu, ki to Iehova ra tangata i akatainuia ra.” (E tatau ia 1 Samuela 24:4-7.) Ko Saula rai te ariki akatainuia na te Atua. Kare a Davida e inangaro ana i te apai i te taoonga ariki o Saula, no te mea kare a Iehova i akapae ake ia Saula mei tona taoonga. Na te tipu anga i te tapa kakau o Saula, kua akaari a Davida e kare aia e inangaro ana i te takino ia Saula.​—1 Samu. 24:11.

⁹ Kua akaari akaou a Davida i te tu akangateitei no te tangata ta te Atua i akatainuia i tona kite openga anga i te ariki. I taua tuatau ra, kua tae mai a Davida raua ko Abisai ki te ngai e moe ra a Saula i roto i te puakapa. Noatu e kua manako a Abisai e kua tuku mai te Atua i teia enemi ki roto i te nga rima o Davida, kua pati aia kia Davida e kia akatika mai iaia kia tamate atu ia Saula ki te korare, kare ra a Davida i akatika ana i teia. (1 Samu. 26:8-11) No te mea kua kimi ua rai a Davida i te aratakianga a te Atua, kua vai ngaueue kore ua rai aia i te aru rotai i to Iehova anoano noatu ta Abisai maro anga.

10. Eaa tetai turanga ngata ka aro atu tatou, e eaa te ka tauturu ia tatou kia vai ngaueue kore?

¹⁰ Penei ka aro katoa atu tatou i tetai turanga ngata me maro mai te au oa ia tatou kia aru i to ratou manako e kare e turuturu mai ana ia tatou kia rave i to Iehova anoano. Mei ia Abisai rai, ka akamaroiroi mai tetai pae ia tatou kia rave i tetai ikianga ma te  kore e manako atu i to te Atua anoano no runga i te reira. Kia vai ngaueue kore ua rai, ka anoanoia tatou kia akamanako ua rai i to Iehova manako no runga i te reira e kia tauta i te aru i tona au arataa.

11. Eaa taau i kite mai mei te tu o Davida no te akamanako maata anga i to te Atua anoano?

¹¹ Kua pure a Davida ki te Atua ko Iehova e: ‘E apii mai koe iaku kia rave au i toou anoano.’ (E tatau ia Salamo 143:5, 8, 10.) Kare a Davida i irinaki ana ki runga i tona uaorai manako me kore i aru i to tetai ke manako, kua inangaro a Davida kia apiiia mai aia e te Atua. Kua ‘akamaaraara aia i ta Iehova au angaanga katoa; te akaeatu anga i te au angaanga a te rima o te Atua.’ Ka kite katoa tatou i to te Atua anoano na te akara anga ki roto i te au Tuatua Tapu e te akamanako oonu anga i te au papaanga Pipiria no ta Iehova i rave no te au tangata.

12, 13. Eaa ra a Davida i riringi ei i te vai ta tona au tangata e toru i apai mai nona?

¹² E mea tau no tatou kia aru i to Davida ariki meitaki anga i te au kaveinga i roto i te Ture e tona inangaro i te akono i te reira. Akamanako ana i tei tupu mai te akakite anga a Davida e te inangaro ra aia i te inu i te “vai i te ruavai i Betelehema.” Kua tuku te au tangata e toru o Davida i to ratou oraanga ki roto i te kino na te aere anga ki roto i te oire e noo ra te au vaeau Philiseti i te tiki i te vai. ‘Kare ra a Davida i inu i te reira, kua riringi ra ki mua ia Iehova.’ No teaa ra? Kua akamarama mai a Davida e: “Auraka rava au, e taku Atua, kia akapera; ka inu ainei oki au i te toto o eianei puke tangata, ko tei akaruru ua i to ratou mate?”​—1 Para. 11:15-19.

¹³ Kua kite a Davida e i roto i te Ture, ka riringiia te toto ki mua ia Iehova e kare e inuia. Kua marama katoa aia i te tumu ka rave ei aia i teia. Kua kite a Davida e “tei te toto oki te ora e oraʼi te au mea katoa ra.” Inara, e vai ua teia, kare i te toto. Eaa ra a Davida i patoi ei i te inu i te vai? Kua ariki meitaki aia i te kaveinga no runga i te ture. E puapinga tikai te vai mei te toto rai o te au tangata e toru ra kia Davida. No reira, kua patoi pakari a Davida i te inu i te vai. Kare aia i inu i te reira, kua riringi ra aia i te  reira ki runga i te one.—Levi. 17:11; Deu. 12:23, 24.

14. Eaa tei tauturu ia Davida kia rave i te au ikianga tei akamareka ia Iehova?

¹⁴ E tuanga puapinga tikai te ture a te Atua kia Davida i roto i tona oraanga. Kua imene aia e: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau.” (Sala. 40:8) Kua apii a Davida i te ture a te Atua e kua akamanako oonu i te reira. Kua irinaki aia i te tu pakari o te au akauenga a Iehova. Tei tupu mai, kua akono a Davida i te ture e te au kaveinga a te Ture a Mose. Me apii tatou i te Pipiria, e mea meitaki kia akamanako oonu i ta tatou i tatau ana e kia tamou ngakau i te reira, kia kite tatou eaa te akamareka ra ia Iehova.

15. Na roto i teea mataara kare a Solomona i akangateitei ana i te Ture a te Atua?

¹⁵ Kua mareka maata te Atua ko Iehova i te tamaiti a Davida ko Solomona. Inara, i muri mai kare a Solomona i akangateitei ana i te Ture a te Atua. Kare aia i akarongo ana ki ta Iehova akauenga, e auraka tetai ariki o Iseraela e “akamaata i te vaine nana.” (Deu. 17:17) Inara, kua akaipoipo a Solomona i te au vaine ke. I tona ruaine anga, “kua akaanga keia iora tona ngakau e te au vaine nana ki te au atua ke.” Noatu eaa tana au kotoeanga, ‘kua rave a Solomona i te kino i mua i te aroaro o Iehova, kare akerai i aru totomapu tikai ia Iehova, mei tona metua rai ko Davida.’ (1 Ari. 11:1-6) E puapinga tikai no tatou kia aru i te au ture e te au kaveinga i roto i te Tuatua a te Atua! Ei akatauanga, e mea puapinga teia me akamanako tatou i te akaipoipo.

16. Akapeea te akamanako anga i te ture kia akaipoipo ki tei ‘tau ki te Atu ra’ te akakeu anga i te aronga te inangaro ra i te akaipoipo?

¹⁶ Me akameamea mai tetai kare i roto i te tuatua mou ia tatou, te aru ra ainei tatou i te tu manako o Davida me kore i te tu manako o Solomona? Kua akakiteia ki te aronga akamori mou e kia akaipoipoi ratou ki tei ‘tau ki te Atu.’ (1 Kori. 7:39) Me iki tetai Kerititiano i te akaipoipo, kia akaipoipo aia i tetai i roto i te tuatua mou. Me akamanako tatou i te reira ture o te Tuatua Tapu, kare tatou e akaipoipo i tetai kare i roto i te tuatua mou, kare katoa tatou e akameamea atu i taua aronga ra.

17. Eaa te ka tauturu ia tatou kia kore e akara i te au tutu ainga viivii?

¹⁷ Akamanako katoa e akapeea to Davida akaraanga no te kimi ngakau tae anga i ta te Atua aratakianga te tauturu anga ia tatou kia patoi i te timataanga no te akara anga i te au tutu ainga viivii. E tatau i te au irava e aru maira, akamanako i te au kaveinga i roto i reira, e kia akamanako i to Iehova anoano no runga i teia manamanata. (E tatau ia Salamo 119:37; Mataio 5:28, 29; Kolosa 3:5.) Na te akamanako oonu anga i tona au turanga teitei kare tatou e akara i te au tutu ainga viivii.

18, 19. (a) Noatu e tu apa tona, eaa tei tauturu ia Davida kia marekaia mai e te Atua? (e) Eaa taau ka tauta i te rave?

¹⁸ Noatu e maata te akaraanga meitaki o Davida, kua rave rai aia i te au ara kino. (2 Samu. 11:2-4, 14, 15, 22-27; 1 Para. 21:1, 7) Inara, i roto i tona oraanga katoa, kua tataraara ua rai a Davida no tana ara. Kua aaere aia ‘ma te ngakau tiratiratu’ ki mua i te Atua. (1 Ari. 9:4) Eaa ra tatou ka tuatua akapera ai? No te mea kua tauta a Davida i te aru rotai i to Iehova anoano.

¹⁹ Noatu to tatou turanga apa, ka mareka ua rai a Iehova ia tatou. Na te akamanako anga i teia, kia apii maroiroi tatou i te Tuatua a te Atua, kia akamanako oonu i ta tatou i apii mai, e kia rave papu tikai i ta tatou i tamou mai ki roto i to tatou ngakau. E kia pure tatou kia Iehova mei te tata taramo rai tei pati akaaka e: ‘E apii mai koe iaku kia rave au i toou anoano.’