Akamanako ana i te turanga i tuatua ai a Iesu no runga i te tu kare i akaipoipo. Te tuatua anga te au Pharisea kia Iesu no runga i te kopaeanga, kua akataka meitaki atu a Iesu kia ratou i to Iehova turanga no runga i te akaipoipo. Noatu e te akatika ra te Ture i tetai tangata kia tata i tetai pepa tikaanga no te kopaeanga i tana vaine me kua kite aia e kua rave tana vaine i ‘tetai mea kino,’ tei kare i tupu ana i mua ana. (Deu. 24:1, 2) Kua akakite mai a Iesu i reira e: “Tei kopae i tana vaine, auraka ra no te akaturi, ka akaipoipo ei i tetai, kua akaturi ïa: e ko tei akaipoipo i taua vaine i kopaeia ra, kua akaturi ïa.”​—Mata. 19:3-9.

Te akarongo anga te au pipi i teia, kua tuatua ratou e: “Ko ta te tane ïa akono anga i te vaine, kare e meitaki te akaipoipo.” Kua pau atu a Iesu e: “Kare te tangata ravarai e tika kia āriki mai i te reira tuatua, ko te aronga ra i orongaia atu te tika ia ratou. E eunuka tetai aronga mei to ratou anau anga mai: e i akaeunukaia tetai aronga e te tangata: i akaeunuka oki tetai aronga ia ratou uaorai no te basileia o te ao ra. Ko te tika iaia kia āriki i teianei tuatua, nona ïa.”​—Mata. 19:10-12.

Ko te au eunuka tika tikai, e aronga tei anauia mai na roto i te reira tu me kore tei teeia. Inara, te vai ra tetai pae tei iki kia noo ua ei eunuka kare e akaipoipo. Noatu e kua tau ratou i te akaipoipo, kua tauta ratou i te akakoromaki e kia noo ua kare e akaipoipo ‘no te basileia o te rangi ra.’ Kua iki ratou i te turanga kare e akaipoipo mei ia Iesu rai, kia rauka ia ratou i te akapou i to ratou taime ki te angaanga Patireia. Kare ratou i anauia mai ma te tikaanga kia noo ua kare e akaipoipo me kore kua orongaia taua tikaanga ra kia ratou. Mari ra, kua ariki ratou i te reira tikaanga. Koia oki, kua akakoro ratou kia rauka mai ia ratou te reira tikaanga.

Na te tuatua anga no runga i ta Iesu i tuatua, kua akamarama mai te apotetoro ko Paulo e ka rauka i te au Kerititiano ravarai i te tavini tau i te Atua, me kare ratou i akaipoipo e me kua akaipoipo ratou, ko te aronga ra tei kare i akaipoipo te ‘maroiroi ra to ratou ngakau’ e tei ariki i to ratou turanga, ka ‘meitaki roa atu ratou.’ Akapeea ra? Ka akapou te aronga akaipoipo i to ratou taime e te maroiroi i te akamareka e te akono i to ratou tokorua. Tetai tua, ka rauka i te au Kerititiano kare i akaipoipo i te akapou i to ratou taime i roto i te angaanga a te Atu ma te kore e tamanamanata anga. Te manako ra ratou i to ratou turanga ei ‘mea orongaia mai’ e te Atua.​—1 Kori. 7:7, 32-38.

No reira, te akakite maira te au Tuatua Tapu kia tatou e kare i orongaia mai te tikaanga ki tetai Kerititiano kia kore e akaipoipo na roto i tetai tu umere. Mari ra, ka rauka mai iaia te reira na te noo ua anga kare e akaipoipo kia rauka iaia i te akamaata atu i te au anoano o te Patireia ma te kore e tamanamanata anga. Maata i teia tuatau tei iki kia noo ua kare e akaipoipo no teia tumu, no reira kia akamaroiroi atu tetai pae ia ratou.