KO TE mataiti 49 T.N. te reira. Kua oronga a Petero, Iakobo, e Ioane​—“ko tei manakoia ra e, e au pou”—​i tetai akauenga ki te apotetoro ko Paulo e tona oa rave angaanga ko Banaba. Ka akamanako raua i te au Kerititiano putaua ia raua e tutu aere ra ki te au pa enua. (Gala. 2:9, 10) Akapeea teia apainga me akatupuia?

Kua akaari mai ta Paulo au reta i tona manako no runga i teia apainga. Ei akaraanga, kua tata aia ki te au Kerititiano i Korinetia e: “I te tuatua i te apinga uipa na te aronga tapu ra, ko taku rai oki i poroaki i te au ekalesia i Galatia ra, e pera katoa kotou. Kia tae ki te rā mua o te ebedoma ra, e vaio ake kotou ravarai i tetai papaki moni ki roto i te vairanga ra, kia tau i ta te Atua akamanuia anga mai iaia ra; e kia tae atu au ra, eiaa ei akaputu anga apinga i reira. E kia tae atu au ra, ko tei tau ia kotou, ko taku ïa e tono ma te leta ei apai i ta kotou apinga oronga ua ki Ierusalema.”​—1 Kori. 16:1-3.

I roto i te rua o tana reta ki to Korinetia, kua akakite akaou a Paulo i te akakoroanga no te akaputu anga. Koia oki “kia aiteite ra, kia riro ta kotou apinga maata ei tauturu atu i to ratou ngere.”​—2 Kori. 8:12-15.

To Paulo tata anga ki te au Kerititiano i Roma mei te mataiti 56 T.N., kua tae ki te openga o te akaputuanga. Kua akakite aia e: “Te aere nei ra au ki Ierusalema, e tauturu i te aronga tapu ra. Kua uipa oki to Makedonia e to Akaia i te moni no to ratou uaorai anoano, na te aronga tapu apinga kore i Ierusalema ra.” (Roma 15:25, 26) Kua akatupu a Paulo i tana apainga i muri ua ake i te reira, e i tona oki atu anga ki Ierusalema e te opuia anga i reira, kua akakite aia ki te Tutara o Roma ko Feliki e: ‘I aere mai au i te apai mai i te apinga ki toku enua, e te au atinga.’​—Anga. 24:17.

Taka ua ra te tu ta te au Kerititiano o te anere mataiti mua i akaari mai mei ta Paulo i tuatua no te au taeake i Makedonia. Kua akakite mai aia e “kua pati akatenga ua mairai ratou kia matou i te tikaanga ngateitei kia oronga aroa atu.” Kua akamaroiroi atu te apotetoro i te au taeake Korinetia kia aru i taua akaraanga ra. Kua tuatua aia e: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” Eaa tei akakeu i te au putuputuanga kia akaari i taua tu oronga aroa ua? Kare e ko to ratou anoano ua te reira kia ‘akaki i te ngai toe o te aronga tapu, i te rave anga i taua angaanga ra, mari ra, kia maringi ua ra i te rai i te akameitaki i te Atua.’ (2 Kori. 8:4, NW; 9:7, 12) Penei aiteite katoa to tatou akakoroanga no te oronga aroa ua. Ka akameitaki mai te Atua ko Iehova i taua tu meitaki ra e te karapii kore​—e ka akariro tana akameitakianga i tetai tangata kia puapingaia.​—Mase. 10:22.

Mei te tuatau rai o te apotetoro ko Paulo, e manganui i teia tuatau tei ‘vaio i tetai papaki moni,’ me kore tei akapae i tetai moni no te tuku atu ki roto i te au pia akaputuanga tei akairoia “Akaputuanga no te Angaanga i Teianei Ao.” (1 Kori. 16:2) I te marama tataki tai, e tuku ana te au putuputuanga i teia au moni ki te opati o te Au Kite o Iehova e akono ra i to ratou au enua. Ka rauka katoa ia koe i te tuku tika atu i te moni ki te ingoa akamanaia e taangaangaia ra e te Au Kite o Iehova i toou enua. E kite ei koe i te ingoa akamanaia e taangaangaia ra e te Au Kite o Iehova i roto i toou enua, tata atu ki te opati manga e akono ra i toou enua. Ka kiteaia te ngai nooanga o te opati manga i runga i te Web site www.pr418.com. Teia tetai au ravenga me tuku tika atu koe i te moni tauturu:

AU APINGA ORONGA UA

• Te moni, te au apinga akamanea, me kore tetai atu au apinga puapinga.

• Kapiti mai i tetai reta i te akakite mai e e moni me kore e au apinga oronga ua te reira.

AKANOOANGA KIA AKAOKIIA MAI TEI ORONGAIA

• Te moni oronga ma te akakoroanga kia akaokiia mai ki te tangata nana te moni me inangaro aia i te reira.

• Kapiti mai i tetai reta i te akakite mai e me ka patiia mai te moni, kia akaokiia atu te reira.

PARANIANGA ORONGA UA

Kapiti mai i te au moni oronga aroa ua, e te au apinga puapinga, te vai ra tetai atu au ravenga oronga anga no te akapuapinga anga i te angaanga Patireia i teianei ao. Kua tataia teia i raro akenei. Noatu eaa te ravenga ka inangaro koe i te taangaanga, e ringi atu i te opati manga e akono ra i toou enua kia akara e ko teea te au ravenga te ka tau ki toou enua. I te mea e e tukeke te au umuumuanga a te ture e te au ture no te tero, e mea puapinga i te aravei atu i te aronga tero kite karape e te aronga tauturu i te pae ture i mua ake ka iki ei koe i te mataara meitaki atu no te oronga anga.

Initureni: E moni oronga teia na te tata anga i te ingoa akamanaia e taangaangaia ra e te Au Kite o Iehova, kia koi i te moni initureni tei koreromotuia no te oraanga me kore no te ritaea anga/moni pakari.

Moni i Roto i te Pangika: Puka pangika, au pepa no te tuku anga i te moni, me kore te moni ritaea anga tei akanooia i roto i te reta akamanaia e te ture, me kore te ka tutakiia i roto i te ingoa akamanaia e taangaangaia ra e te Au Kite o Iehova me mate te reira tangata, kia tau ki te au ture a te pangika o te reira ngai.

Au Tuanga Pitiniti e te Au Poni: Te au tuanga pitiniti e te au poni tei orongaia i roto i te ingoa akamanaia e taangaangaia ra e te Au Kite o Iehova ei apinga oronga ua me kore na te akanoo anga kia Orongaia me Mate te reira tangata.

Are e te Enua: Te are e te enua te ka rauka i te okoia, kia orongaia i roto i te ingoa akamanaia e taangaangaia ra e te Au Kite o Iehova, na te oronga ua anga i te reira, me kore e are e nooia ra e te tangata, kia vaooia te reira no te tangata tei oronga mai i te reira, kia noo ua aia ki roto i te are no te tuatau e ora ra rai aia.

Moni me Kore Apinga Oronga no te au Mataiti: Kia tutakiia te moni me kore te au apinga puapinga tei orongaia i roto te ingoa akamanaia e taangaangaia ra e te Au Kite o Iehova mei tei akanoonooia e te tangata tei oronga mai, me kore e tetai tangata tei akamanaia e taua tangata tei oronga mai i te apinga, no te au mataiti o tona oraanga. Ka akaoki akaouia mai tetai moni tero o te mataiti ki te tangata tei oronga i te reira i te au mataiti i akanooia ai te moni me kore apinga oronga.

Au Koreromotu e te Reta Akamanaia e te Ture: Te enua, te are, me kore te moni te ka orongaia i roto i te ingoa akamanaia e taangaangaia ra e te Au Kite o Iehova na roto i tetai koreromotu akamanaia e te ture, me kore na te taiku anga i te ingoa akamanaia te ka akaaere i te reira. Penei ka puapingaia koe mei teia akanoonooanga no te moni tero.

Mei ta te tuatua “paranianga oronga ua” e akataka maira, ka anoanoia te tangata oronga kia parani e akapeea aia me oronga i tana apinga. E tauturu ei i te aronga te inangaro ra kia puapingaia mei te angaanga a te Au Kite o Iehova i teianei ao na roto i tetai ravenga no te paranianga oronga ua, kua akapapaia tetai poroutia e Charitable Planning to Benefit Kingdom Service Worldwide. Kua tataia te poroutia ei akakiteanga i te au ravenga tukeke no te oronga anga i te au apinga i teia taime me kore i muri mai, mei tei koreromotuia e te tangata me mate aia. Penei kare te au akakiteanga i roto i teia poroutia e tau ki te au turanga o te tero me kore te au ture i roto i toou enua. No reira, muri ake te tatau anga i te poroutia, e tuatua atu ki toou roia me kore ki tetai tangata e angaanga ra no te tero. Na te taangaanga anga i te au ravenga no te paranianga oronga anga, e manganui te turuturu nei i ta tatou angaanga akonoanga e te au angaanga tauturu anga i te au tangata i teianei ao e te taangaanga meitaki anga i ta ratou moni tero. Me e poroutia akapera tetai i roto i toou enua, e pati atu i tetai kopi mei te tekeretere o te putuputuanga.

No tetai atu au akakiteanga, e tata atu me kore e ringi atu i te opati manga e akono ra i toou enua.