NO TE au raungauru mataiti, rekareka tikai te au tane e te au vaine takapini i te ao e kua puapingaia ratou mei te apiianga akatumuia ki roto i te Pipiria tei neneiia i roto i Te Punanga Tiaki. Roto ia Tiurai mataiti 2011, kua neneiia te itiu mua o te tuanga apii mama ua o teia makatini i roto i te reo Papaa. Akamarama mai taua itiu e: “Ka tamataia te tuanga ou no tetai mataiti, e me ka puapingaia, ka nenei uaia atu rai te reira.”

Te rekareka nei matou i te akakite atu e, ka nenei uaia atu rai te reira. Tetai katoa, a te au taime ka aereia ka neneiia tetai tuanga reo mama ua i roto i te reo Paniora, Portugal, e te Varani.

Muri ake te rauka anga te tuanga reo mama ua, e maata to te tua Tonga o te Patipika tei ripoti mai e: “Teianei, marama meitaki tikai te au taeake i Te Punanga Tiaki.” Akakite mai tetai reta e: “Taime mua e pou ua ana te taime i te kimi i te au tuatua e te akamarama i te reira, teianei e akapouia ana tera taime kia marama i te au irava e kia kite i to ratou pirianga ki te apiianga.”

Akakite tetai vaine kua pati i tana apii i Marike e: “E 18 mataiti i toku tuatua anga e te tata anga i roto i te reo o te aronga apii teitei. Kua matau au i te tuatua e i te akamanako na roto i te mataara ngata atu te kare tikai e anoanoia. I na kua kite mai au e ka anoanoia au kia taui i toku aerenga manako e te tu e tuatua ana au.” Teianei kua riro aia ei vaine tutu evangeria e kua tata aia e: “Kua riro te Punanga Tiaki reo mama ua ei tauturu maata kiaku. Riro te reo mama ua ei akaraanga meitaki noku kia kite e ka akapeea me akamarama ngoie ua i tetai apinga.”

 Tetai tuaine i Peritane tei papetitoia i te mataiti 1972, kua tata mai no runga i te Punanga Tiaki reo mama ua e: “Toku tatau anga i te itiu mua, mei te mea rai e te noo maira a Iehova i te pae iaku, ma te takave mai iaku, e te tatau kapiti ra maua. Mei te mea rai e e metua tane tikai teia e tatau maira i tetai tua ki tana tamaiti i te taime moe.”

Tetai tuaine e noo ana i te Betela i Marike tei papetitoia e 40 mataiti i topa, karanga aia e i tetai au taime na te tuanga reo mama ua e tauturu ana iaia kia marama i tetai mea ou. Ei akaraanga, i roto i te pia “Tetai au Tuatua Tei Akamaramaia” i roto i te itiu o Tepetema 15, 2011, kua akataka mai te reira i te tuatua ‘urupu maata o te au kite’ i roto ia Ebera 12:1 na roto i teia au tuatua: “E maata ua atu ratou kare e rauka kia tareia.” Karanga aia e: “Kua akamaata atu teia i toku marama no runga i teia irava.” No runga i te au uipaanga epetoma, akakite katoa aia e: “Noatu no roto tika mai i te tuanga reo mama ua te pauanga a tetai tamaiti, kare te au tuatua i aiteitei ki to roto i te tuanga apii tikai o Te Punanga Tiaki ta te maataanga e aru ra i mua ia ratou. No reira ko te pauanga a te tamaiti, e mea ou te reira ki te aronga e akarongo maira.”

Kua tata mai tetai tuaine i Betela e: “E reka ana au i te tapapa atu i te au pauanga a te tamariki i roto i te putuputuanga. Riro te Punanga Tiaki reo mama ua ei tauturu ia ratou kia akakite papu mai i to ratou uaorai manako. Riro tikai ta ratou tuatua ei akamaroiroi iaku.”

Akakite tetai tuaine tei papetitoia i te mataiti 1984 i tona rekareka i te tuanga o te reo mama  ua: “Mei te mea e i tataia te reira noku. Mama ua kia marama i taku e tatau ra. Teianei, irinaki au e ka rauka iaku i te paupau i te taime o te Apii Punanga Tiaki.”

Akakite te mama o tetai tamaiti e itu mataiti e: “Me akapapa maua i ta maua Apii Punanga Tiaki, e roa ana te akamarama anga kiaia i te au tuatua, e te roiroi katoa.” Akapeea te tuanga reo mama ua i te tauturu anga? Tata mai aia e: “Umere tikai au e ka rauka iaia te piri ki roto i te tatau anga i te au parakarapa e te marama katoa i to ratou aiteanga. I te mea e mama ua te au tuatua e te potopoto i te au raini tuatua, kare aia e emiemi ana. Kua akamata aia i te akapapa i tana uaorai pauanga no te uipaanga ma te kore e tauturu mei konei iaku, e tei runga ua tona manako i te makatini i te katoaanga o te apii.”

Tata mai te mama o tetai tamaine e iva mataiti e: “Te taime mua e tauturu ana maua iaia kia paupau. Teianei nana rai e akapapa ana i tana au pauanga. Taime ua ake ka inangaroia kia akamarama atu maua i te au manako. No te mea kare e ngata ana, teianei ka rauka iaia te piri tika atu ki te Apii Punanga Tiaki.”

Maata te tamariki tei manako e i orongaia mai te Punanga Tiaki reo mama ua no ratou. Pati mai a Rebecca e 12 ona mataiti e: “Me ka tika e nenei ua mai rai i te tuanga ou o te Punanga Tiaki!” Akakite aia e: “E reka ua atu ana au i te tuanga o ‘Tetai au Tuatua Tei Akamaramaia.’ Mama ua no te tamariki.”

Mei te reira rai te manako o Nicolette e itu ona mataiti: “Taime mua e ngata tikai iaku i te marama i Te Punanga Tiaki. Teianei ka rauka ua iaku i te oronga i taku uaorai pauanga.” Tata mai a Ema e iva ona mataiti e: “Tauturu maata tikai te reira iaku e toku tungane, e ono ona mataiti. Marama meitaki atu maua i teianei! Meitaki maata!”

Te taka ua ra e e maata te puapingaia nei mei te tuanga ou o Te Punanga Tiaki e taangaanga ana i te au tuatua maramarama ua. Te akatupu ra te reira i tetai mea e anoanoia nei, e ka nenei kapiti uaia atu rai ma te tuanga apii tikai, tei riro mai ana ei mea puapinga mei te mataiti 1879 mai.