“E MEA ora oki te tuatua a te Atua, e te ririnui.” (Ebe. 4:12) Te akakite maira a Paulo na roto i teia au tuatua, i te mana o te tuatua a te Atua kia akakeu i te ngakau e te akatuke i te oraanga.

Inara kua akaekokoia te manako no runga i te mana o te karere Pipiria, te totoa anga te apiianga apoteiti i muri ake i te matenga o te au apotetoro. (2 Pete. 2:1-3) Kare i roa, akamata te au arataki akonoanga i te karanga e i akatumuia te peu manamana ki roto i te Tuatua a te Atua. Kua tata te Poropeta ko Harry Y. Gamble no runga i “te kapiti anga i te au peu manamana ki roto i te au tataanga Kerititiano.” Akakite aia e i te toru o te anere mataiti, kua karanga te Church Father ko Origen e “e puapinga te akarongo i te tangi o te au tuatua tapu: me e mana to te au tuatua i roto i te peu manamana a te peikani, e maata atu ia te mana o te au tuatua tikai a te Atua i roto i te au irava.” Tata a John Chrysostom i te pae openga o te a anere mataiti e “kare te tiaporo e vare i te akavaitata atu ki tetai are e vaira tetai tataanga Evangeria.” Akakite katoa aia e e akatautau ana tetai aronga i tetai tataanga poto ua o te au Evangeria ki runga i to ratou kaki, ei paruru ia ratou. Akakite mai rai te Poropeta Gamble e ko te tangata kite karape o te Katorika no runga i te Atua, kua “manako aia e me mamae te mimiti, ka tau kia tuku i tetai kopi o te Evangeria a Ioane ki raro i te pute urunga me moe”! No reira e taangaangaia ana te au irava Pipiria no te au akakoroanga peu manamana. Ka karanga ainei koe e e apinga manamana te Pipiria te ka paruru ia koe mei te kino?

Penei ko tetai peu matau roaia atu i te taangaanga pikikaa i te Pipiria koia oki, e angaanga purepure na roto i te puka. Eaa ra te reira? Te tuatua ra te reira no runga i te akatuera anga i tetai ua atu puka, ko te Pipiria te mea taangaanga putuputuia, e oti, tatau i te tuatua mua ua ka kitea atu, i te irinaki anga e na tera e oronga mai i te aratakianga. Ei akaraanga, karanga te Poropeta Gamble e i tetai atianga, te rongo anga a Aukuteine i te reo o tetai tamaiti i roto i te are i te pae mai e karanga ra e: “Apai e oti tatau, apai e oti tatau,” manako a Aukuteine e e akauenga tera na te Atua kia eeu i te Pipiria e kia tatau i te tuatua mua ua tana ka kite.

I akarongo ana rai koe i te tangata e pure ra ki te Atua me o ki roto i te turanga manamanata, e oti, eeu i tetai ua atu ngai i roto i te Pipiria, te irinaki anga e ka riro te irava mua ua ta ratou ka kite ei tauturu ia ratou kia akakoromaki i te manamanata? Noatu e e akakoroanga meitaki ua to ratou, kare ra tera i te mataara tau no te au Kerititiano kia kimi i te aratakianga mei te au Tuatua Tapu.

Kua akapapu a Iesu ki tana au pipi e ka tono mai aia i ‘te akapumaana, ko te vaerua tapu.’ Karanga katoa atu aia e: “Nana e apii mai ia kotou i te au mea katoa, ka akakite akaou mai oki kia kotou i te au tuatua katoa, taku i karanga atu kia kotou na.” (Ioa. 14:26) Te tuke o te angaanga purepure na roto i te puka, kare e anoanoia te kite no runga i te au Tuatua Tapu.

E mea matauia te angaanga purepure na roto i te puka e tetai atu au peu taangaanga pikikaa i te Pipiria. Inara te akaapa ra te Tuatua a te Atua i te au peu purepure. (Levi. 19:26; Deu. 18:9-12; Anga. 19:19) “E mea ora oki te tuatua a te Atua, e te ririnui,” inara kia taangaanga tatou i te reira ma te tu karape. Na te kite tau tikai o te Pipiria e akameitaki atu i te oraanga o te tangata, kare na te taangaanga pikikaa anga i te reira. Na taua kite ra i tauturu i te manganui kia akono ngaueue kore i te au kaveinga mou, kia akaruke i te au tu oraanga kino, kia akamatutu i te oraanga pamiri, e kia akamou i tetai pirianga meitaki kia Iehova.