1, 2. Koai ma ta Petero e tuatua ra e ko tei “ikiia,” e eaa ra aia i kapiki ei ia ratou e ko te ‘au tuitarere’?

MEI tetai 30 mataiti i muri ake i to Iesu oki anga ki te rangi, kua tata te apotetoro ko Petero i tetai reta ki ‘te au tuitarere i pueurikirikiia i Ponoto, i Galatia, i Kapadokia, i Asia, e i Bitunia, tei ikiia.’ (1 Pete. 1:1, 2) Taka ua ra e no runga i te tuatua “ikiia,” te tou ra a Petero ki te aronga, mei iaia rai, tei akatainuia ki te vaerua tapu e tei ‘akaanau akaouia kia rauka te manako ora’ e kia tutara kapiti kia Karaiti i runga i te rangi. (E tatau ia 1 Petero 1:3, 4.) Eaa ra aia i kapiki ei i teia aronga i ikiia ei ‘au tangata ke, e ei au tuitarere’? (1 Pete. 2:11) E eaa te aiteanga o teia kia tatou i teia tuatau i te mea e e okotai ua rai Kite i roto i te 650 Au Kite maroiroi i roto i teianei ao te karanga ra e kua akatainuia me kore kua ikiia ratou?

² E mea tau kia kapikiia te aronga akatainuia i te anere mataiti mua e e ‘au tuitarere.’ No runga i te toenga o te pupu e ora nei rai i teia tuatau, kare ratou e noo tinamou ki runga nei i te enua. Kua akamarama mai te apotetoro ko Paulo, e mema no te “anana iti” tei akatainuia e: “Kareka ta matou tuatua [me kore, “ngai nooanga, tei runga i te rangi,” NW]; e te tapapa atu nei i te Ora no reira mai, i te Atu ia Iesu Mesia.” (Luka 12:32; Phili. 3:20) I te mea e ‘tei runga i te rangi to ratou ngai nooanga,’ me mate te aronga akatainuia ka akaruke ratou i te enua no te oraanga mutu kore i te rangi. (E tatau ia Philipi 1:21-23.) Ka noo ratou i runga i te enua no tetai tuatau poto, no reira i kapikiia ai ratou e e au “tuitarere” i roto i ta Satani akatereanga.

3. Eaa te uianga e uiia ra i teianei no runga i te “mamoe ke atu”?

³ Akapeea ra te “mamoe ke atu”? (Ioa. 10:16) Kare ainei to ratou manakonakoanga i akatumuia ki runga i te Tuatua Tapu kia noo ei aronga tinamou i runga nei i te  enua? E tika rai, ka riro te enua ei kainga no ratou e tuatau ua atu! Noatu te reira, ka manakoia rai ratou ei aronga tuitarere. Na roto ra i teea tu?

4. Eaa te kare e rauka i te au tutara o teianei ao i te akakore atu?

⁴ Me ka akatika uaia rai te akaaereanga kino a Satani kia tupu ua rai, ka mamae ua rai te au tangata ravarai, kapiti mai te au Kerititiano no ta Satani meameaau anga ia Iehova. Te tatau ra tatou i roto ia Roma 8:22 e: “Kua kite oki tatou e, te ngunguru anake nei te au mea katoa i angaia mei te mamae anau ra e tae rava akenei i teianei rā.” Kare te au tutara, au taineti, e te au ravenga no te tauturu i te tangata, e rauka i te akakore atu i te reira.

5. Mei te mataiti 1914, eaa ta te au mirioni tangata e rave ra, e no teaa ra?

⁵ Mei te mataiti 1914, kua iki te au mirioni tangata kia riro mai ratou ei iti tangata no te Ariki akateronoia o te Atua, ko te Karaiti ko Iesu. Kare ratou e inangaro ana kia piri atu ki to Satani akatereanga. Kare ratou e turuturu ana i to Satani ao. Mari ra, te taangaanga ratou i to ratou oraanga e ta ratou au apinga i te turuturu i to te Atua Patireia, te akatupu anga i to te reira anoano.​—Roma 14:7, 8.

6. Na roto i teea tu e kapikiia ra te Au Kite o Iehova ei au tuitarere?

⁶ Ae, e akono ana te Au Kite o Iehova i te ture i roto i te 200 tuma enua, inara noatu te ngai e noo ra ratou, mei te au tuitarere rai ratou. Kare ratou e piri ana ki roto i te au angaanga poritiki e te au manamanata i roto i te au enua e noo ra ratou. I teia tuatau katoa, te manako nei ratou ia ratou uaorai ei aronga te ka noo i roto i tetai ao ou ta te Atua ka akatupu mai. Te rekareka ra ratou i te kite e te vaitata maira te openga o to ratou nooanga ei tuitarere i roto i teia akatereanga kino.

7. Akapeea te au tavini o te Atua te riro mai anga ei aronga noo tinamou, e kiea ra?

⁷ Kare e roa atu ana ka taangaanga a Karaiti i tona mana i te takore atu i to Satani akatereanga kino. Ka akamatara mai te kavamani apa kore o Karaiti i te au tangata mei te ara e te mii. Ka takore te reira i tetai ua atu e patoi ra i to Iehova turanga  ngateitei. Ka riro mai te au tavini tiratiratu o te Atua ei aronga noo tinamou ki runga i te enua Parataito. (E tatau ia Apokalupo 21:1-5.) I reira, ka “akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.”​—Roma 8:21.

8, 9. Akamarama mai i te aiteanga o ta Petero e tuatua ra e “auraka e akatika i to te kopapa nei au anoano.”

⁸ Kua akamarama mai a Petero eaa te umuumuia ra no te au Kerititiano te tuatua anga aia e: “E aku au akaperepere e, te ako atu nei au ia kotou, i te tangata ke, e te tuitarere, auraka e akatika i to te kopapa nei au anoano, ko tei tamaki mai ïa i te vaerua.” (1 Pete. 2:11) Kua orongaia te reira akoanga ki te au Kerititiano akatainuia na mua, inara te tau katoa ra te reira ki ta Iesu au mamoe ke atu.

⁹ Tetai au anoano, me akamerengoia na roto i te tu tei akanooia e Tei Anga mai, kare te reira i te mea tarevake. Ka apai mai te reira i te tu oraanga mataora. Ei akaraanga, te vai ra tetai au anoano kia matoara i te kaikai meitaki e te inu, te piri anga ki roto i te au tamataoraanga, e te kapiti atu ki te au oa meitaki. Ka riro katoa te anoano no te pirianga ainga ki te tokorua akaipoipo ei mea tau. (1 Kori. 7:3-5) Inara, te tuatua ra a Petero no runga i te ‘au anoano o te kopapa’ te ‘tamaki maira i te vaerua’ me kore ia tatou uaorai. Te akataka mai anga i te aiteanga tikai o tana tuatua, te akakite ra tetai au urianga Pipiria no runga i te ‘au anoano o te kopapa’ e ko te “inangaro pakari ia o te kopapa” (King James Version) me kore te “au anoano tau kore” (New International Version). Te taka ua ra e ko tetai ua atu anoano o te tangata te patoi ra i to Iehova akakoroanga e te takino ra i tona pirianga ki te Atua, ka tau kia akara meitakiia te reira. Me kare aia e rave tera, ka takinoia to tetai Kerititiano manakonakoanga e kare aia e ora mai.

10. Eaa tetai au mataara ta Satani e taangaanga ra kia riro mai te au Kerititiano ei tuanga no tona ao?

¹⁰ To Satani akakoroanga kia akaparuparu i te tautaanga a te au Kerititiano mou kia akamanako ia ratou uaorai ei ‘au tuitarere’ i roto i teia akatereanga. Te inangaro ra aia ia tatou kia inangaro i te au apinga materia, kia akavareia e te tu akono tau kore, kia inangaro i te turanga puapinga, kia tuku ia tatou i mua ake i te katoatoa, e te akaari anga i te tu parau no te enua. Inara, kia kite tatou e e au ereere teia au anoano na Satani. Na te tauta anga i te kopae i teia au anoano tau kore o te kopapa, te akaari ra tatou e kare tatou e inangaro ana kia riro mai ei tuanga no to Satani ao kino. Te akapapu ra tatou e te noo nei tatou i roto i teia ao no tetai tuatau poto ua. Ko ta tatou tikai e inangaro ra e te tauta pakari ra kia rauka mai, ko tetai ngai nooanga tinamou i roto i te ao ou tuatua tika o te Atua.

11, 12. Eaa te manako o tetai pae no runga i te au tangata ke, e eaa tei tuatuaia ana no runga i te Au Kite o Iehova?

¹¹ Kua akamarama atu a Petero eaa te umuumuia maira no tetai Kerititiano kia riro ei ‘au tuitarere’ na te tuatua anga i roto i te irava 12 e: “Kia meitaki [to kotou tu] i rotopu i te au etene: ta ratou oki i akakino mai ia kotou, mei te mea e aronga rave tuatua kino, kia akara ra ratou i ta kotou tuatua meitaki, kia akameitaki ratou i te Atua i te rā e rokoia mai ei ra.” I roto i tetai enua kare no ratou, e akakinoia ana te au tangata ke e te au tuitarere. I te mea e e tuke rai ratou mei to ratou au tangata tupu, e manako katoaia ana ratou ei aronga rave kino. Penei e tuke ta ratou tuatua, au angaanga, kakau, e to ratou akamaneaanga. Inara me  rave ratou i te angaanga meitaki, me akaari i te tu meitaki, ka riro te au tuatua akaapa no to ratou tu tuke ei mea puapinga kore.

¹² Pera katoa e tuke ana te au Kerititiano mei te maataanga o to ratou au tangata tupu i roto i tetai au tu, mei te pukapuka anga me kore mei te ikianga i te tamataoraanga. E akaari mai ana to ratou tu kakau e te akamaneaanga ia ratou ei aronga tuke rai mei te maataanga o te au tangata. Kua akatupu teia au tu tuke i tetai ke kia tuatua akakino ia ratou ei aronga rave kino. Inara, e akameitaki ana tetai aronga ia ratou no to ratou tu oraanga.

13, 14. Eaa te aiteanga o te tuatua ‘te akatikaia ra te pakari e tana ra au angaanga’? Akatutu mai.

¹³ Ae, e akakore ana te tu meitaki i te au tuatua akakino. Kua akaapa tarevake katoaia a Iesu, te tangata okotai tei aru apa kore e tei tiratiratu ki te Atua. Kua kapiki ana tetai pae iaia “e tangata kakai e te inu wina, e oa no te au telona e te tangata ara.” Inara te tikaanga, no tona tu pakari i te tavini anga i te Atua, kua akakore atu te reira i te akaapaanga e e tangata kino aia. No te mea kua tuatua a Iesu e: ‘Te akatikaia ra te pakari e tana ra au angaanga.’ (Mata. 11:19) Te tupu katoa ra te reira i teia tuatau. Ei akaraanga, e manako ana tetai aronga e noo ra i te pae i te Betela i Selters, i Tiamani, e e tuke rai te tu oraanga o te au taeake e te au tuaine i Betela. Inara kua tuatua te akaaere o te oire no runga ia ratou e: “Ko te tu oraanga rai ia o te Au Kite e tavini ra i reira, inara kare te reira e tamanamanata ana i te oraanga o tetai ke i roto i te oire.”

¹⁴ Tetai akaraanga ke mai, kua akaapaia te Au Kite o Iehova e noo ra i Moscow, i Rutia, no te rave anga i te au mea kino. Kua karanga tetai pae e e akatakake ana te Au Kite i te pamiri, e akamaroiroi ana i te tangata kia tamate ia ratou uaorai, e kare e ariki ana i te tauturu a te taote. Inara i roto ia Tiunu 2010, kua akakite mai te Akavaanga no te Au Tika Anga o te Tangata i Europa i Strasbourg, i Varani e kua tarevake te akavaanga o Moscow i te tamanamanata i te akamorianga a te Au Kite o Iehova i reira e kare o ratou tikaanga kia akamutu i ta ratou uipaanga. Kua karanga te Akavaanga no te Au Tika Anga o te Tangata i Europa e kare e akapapuanga a te au akavaanga i Rutia e kua apa te Au Kite no te rave anga i te tarevake. Kua karanga te reira e kua aru teia au akavaanga i te au ture pakari a Moscow na roto i te tu kare e tau ana ki te Au Kite o Iehova.

15. Eaa te kaveinga Pipiria ta te au Kerititiano mou i te ao katoa e aru ra?

¹⁵ Te rave katoa nei te Au Kite o Iehova i Moscow e i te ao katoa i tetai umuumuanga ta Petero e akakite ra ki te au Kerititiano kia rave. Kua tuatua aia e: “E kauraro i te au taoonga katoa o te tangata i te Atu ra; i te ariki ra ei runga rava atu ïa; E te  au tutara ra.” (1 Pete. 2:13, 14) Noatu kare ratou i to teianei ao, ka kauraro puareinga ua te au Kerititiano mou ki te aronga mana o te kavamani ‘tei akanooia,’ mei ta Paulo rai i ako mai ia ratou.​—E tatau ia Roma 13:1, 5-7.

16, 17. (a) Eaa te akapapuanga e kare tatou e patoi ana i te au kavamani? (e) Eaa ta tetai au arataki poritiki i akakite mai?

¹⁶ Me aru te Au Kite o Iehova i te tu o te ‘au tuitarere’ i roto i teia akatereanga, kare i te mea e te patoi ra ratou i te kavamani; e kare katoa ratou e patoi ana me kore e tamanamanata ana i te au ikianga a tetai ke no runga i te pae poritiki e te pirianga tangata. Kare ratou mei tetai au pupu akonoanga rai, kare te Au Kite o Iehova e piri atu ana ki roto i te au angaanga poritiki. Kare rava ratou e tauta ana i te akakeu i te au arataki poritiki kia taui i ta ratou akatere anga i te au tangata. Kare katoa te Au Kite o Iehova e inangaro ana i te patoi i te kavamani me kore e akakeu ana i te au tangata kia patoi i te reira.

¹⁷ Na te akarongo anga ki te aronga mana kia tau ki ta Petero akoanga e kia “akateitei i te Ariki,” te akaari ra te au Kerititiano i te tu kauraro e te akangateiteianga no taua aronga mana ra. (1 Pete. 2:17) E ariki ana te aronga mana i tetai au taime e kare o ratou tumuanga tau kia manamanata no runga i te Au Kite o Iehova. Ei akaraanga, kua karanga a Steffen Reiche, e mema no te kavamani i roto i te oire o Brandenburg, i Tiamani, e tei riro mai i muri mai ei minita no te kavamani o Tiamani, e e meitaki tikai te au tu o te Au Kite o Iehova i te tuatau e takinokinoia ra ratou e te Nazi. Kua vai ngaueue kore rai te Au Kite noatu to ratou takinokinoia anga, e kua takinga meitaki ratou i tetai atu au mouauri. Kua karanga aia e e puapinga tikai teia au tu no tetai enua mei ia Tiamani rai, no te mea kare tetai aronga e takinga meitaki ana i te aronga no tetai au enua ke, me kore te aronga e akonoanga ke e e manako poritiki ke to ratou.

18. (a) Eaa ra i riro ei ei tu natura no tatou kia aroa i te au taeake? (e) Eaa ta tetai aronga kare i te Au Kite i kite mai?

¹⁸ Kua tata mai te apotetoro ko Petero e: “E aroa atu i te au taeake. Ka mataku i te Atua.” (1 Pete. 2:17) E mataku ana te Au Kite o Iehova i te akamareka kore i te Atua, e te tauturu ra teia ia ratou kia rave i tona anoano. Te mataora ra ratou i te tavini ia Iehova ei tuanga no te taokotaianga o te au taeake e te au tuaine i teianei ao te aiteite ra to ratou inangaro. No reira, e tu natura no ratou i te “aroa atu i te au taeake.” E e poitirere ana te aronga kare i te Au Kite me kite ratou i teia tu aroa o te au taeake. Ei akaraanga, kua umere tikai tetai vaine arataki manuiri e angaanga ana na tetai pitiniti i Marike e parani ana i te au orote, te kite anga i te aroa ta te Au Kite i akaari ki te au tereketi mei te pa enua ke mai i ko i tetai uruoaanga pa enua i Tiamani i te mataiti 2009. Kua karanga aia e kare rava aia i kite ana i tetai mea mei teia rai i tona angaanga anga ei vaine apai aere i te au manuiri. Muri mai, kua tuatua tetai Kite e: “Pouroa te au apinga tana i tuatua no runga ia tatou, kua akakite aia na roto i te tu umere tikai e te oraora.” Kua akarongo ana ainei koe i tetai aronga e tuatua akapera ana no te tu o te Au Kite i ko i te uruoaanga?

19. Eaa ta tatou ka tauta i te rave, e no teaa ra?

¹⁹ Mei ta tatou i kite mai i runga akenei, te akaari maira te Au Kite o Iehova na roto i te au mataara e manganui e te noo ra ratou ei ‘au tuitarere’ i roto i te akatereanga o Satani. E te mataora tikai nei ratou i te aru i te reira tu. Te ketaketa ra to ratou manakonakoanga e kua papu tikai ia ratou e kare e roa atu ana, ka riro ratou ei aronga tinamou i roto i te ao ou tuatua tika o te Atua. Kare ainei koe e tapapa atu ana i te reira?