Te akamatakite maira te au Tuatua Tapu ia tatou e: “No roto mai oki i te ngakau te manako kikino, te ta tangata, te moeaana, te akaturi, te keia, te tapepe pikikaa, e te akakino Atua.” (Mata. 15:19) Ka rauka i to tatou ngakau akatutu i te pikikaa e te akanauru ia tatou kia maani kotoeanga no tetai arataa kare e tau ana ki to te Atua anoano. E penei kare tatou e kite e eaa tei tupu, mari ra i muri roa ake i to tatou rave anga i tetai mea tarevake. Eaa te ka tauturu ia tatou kia kite e eaa te akakoroanga o to tatou ngakau i mua ake ka aru ei tatou i tetai arataa tarevake?

Tatau i te Pipiria i te au ra ravarai e kia akamanako oonu i ta te reira e tuatua ra.

“E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau,” i tata ai te apotetoro ko Paulo. Te karere a te Atua i roto i te Pipiria ka rauka i ‘te akara matariki i te manako e te vananga o te ngakau.’ (Ebe. 4:12) Me marama tatou i ta te Pipiria e akakite maira no runga ia tatou ka riro te reira ei tauturu maata ia tatou kia kite eaa tikai te akakoroanga o to tatou ngakau. E mea puapinga tikai kia tatau tatou i te Tuatua a te Atua i te au ra ravarai, e kia akamanako oonu i ta te reira e tuatua ra, i reira tatou e kite ei i to Iehova au manako e tona au tu!

Ka riro te ariki anga i te akoanga Tuatua Tapu e te akono anga i te au kaveinga Pipiria, ei akakeuanga ririnui ki runga i to tatou akava ngakau​—tei “akakite  kapipiti” mai kia tatou. (Roma 9:1) Ka rauka i to tatou akava ngakau i te paruru ia tatou kia kore e maani kotoeanga no tetai angaanga tarevake. Tei roto katoa i te Pipiria tetai au akaraanga ei ‘ako mai ia tatou.’ (1 Kori. 10:11) Me tamou tatou, ka tauturu te reira ia tatou kia kore e arataki ke ia. Eaa ra ta tatou tataki tai ka rave?

Pure ki te Atua kia tauturu mai ia koe kia kite i te akakoroanga o toou ngakau.

Ko Iehova tei ‘unuunumou i te ngakau.’ (1 Para. 29:17) “E maata te Atua i to tatou ngakau, e kua kite aia i te au mea katoa nei.” (1 Ioa. 3:20) Kare e rauka kia pikikaa i te Atua. Me akakite ua tatou i to tatou au manamanata, manako ngakau, e to tatou au anoano na roto i te pure, ka tauturu mai a Iehova ia tatou kia kite eaa te akakoroanga o to tatou ngakau. Ka rauka katoa ia tatou i te pati i te Atua kia ‘anga i te ngakau mā i roto ia tatou nei.’ (Sala. 51:10) No reira e mea puapinga tikai te pure kia rauka ia tatou te kite i te vananga o to tatou ngakau.

Akarongo meitaki i ko i te au uipaanga Kerititiano.

Me akarongo meitaki tatou i te akoanga i ko i te au uipaanga Kerititiano ka tauturu te reira ia tatou kia kite tikai i te tangata i roto​—to tatou ngakau. Noatu kare e akakiteanga ou e orongaia mai ana i ko i te au uipaanga, na te tae anga ki reira ka maata atu to tatou marama i te au kaveinga Pipiria, e te au ako puapinga katoa te ka tauturu ia tatou kia atokotoko mari eaa tikai te akakoroanga o te ngakau. Ei akameitaki mai i to tatou ngakau, e mea puapinga katoa te au tuatua a te au taeake e te au tuaine. (Mase. 27:17) Me kare tatou e kapiti putuputu ki te au Kerititiano i ko i te au uipaanga, te akangere ra tatou ia tatou uaorai. Ka arataki atu te reira ia tatou kia ‘kimi i to tatou uaorai manako tika kore.’ (Mase. 18:1) No reira e mea tau kia ui kia tatou uaorai e, ‘E mea matau ainei naku kia aere ki te au uipaanga pouroa e kia rauka te puapinga mei te reira?’​—Ebe. 10:24, 25

E manganui te au mea i roto i te oraanga ka rauka i to tatou ngakau pikikaa i te arataki ke ia tatou. Ka makitoro marie ana tatou e a: te umuumu i te au apinga materia, te inu kava, te au oa ta tatou ka iki, e ta tatou e rave ana no te tamataora.

Te umuumu i te au apinga materia.

E mea natura ua i te akamerengo i to tatou au anoano pae kopapa. Inara, kua oronga mai a Iesu i tetai akaraanga ei akamatakite ia tatou no runga i te inangaro maata i te au apinga materia. I roto i tetai akatutuanga, te pati maira a Iesu ia tatou kia akamanako i te turanga o tetai tangata apinganui, kua ki tona au are i te kai. No reira, kare ana ngai ei vairanga kai me kokoti akaou i te mou. Kua akakoro taua tangata i te vavai i tona au are kai e kia akatu i tetai au are mamaata atu. Kua na ko akera aia: “Ei reira akaputuputu ei au i taku kai ravarai e toku apinga: Ka karanga atu ei ki toku vaerua, E taku vaerua e, e apinga maata toou, kua uipa ïa ki te vairanga no te au mataiti e manganui; e akaangaroi marie, e kaikai, e inu, e kia rekareka marie.” Inara kare teia tangata apinganui i akamanako ana i teia, koia oki: Penei ka mate aia i tera po tikai.​—Luka 12:16-20.

Ia tatou e pakari maira, penei ka manako ua tatou i te parani kia rava te au apinga materia no te tuatau ka pakari ei, ka maani tatou i reira i tetai kotoeanga kia angaanga roa atu i te au po uipaanga e kare e akono i ta tatou au apainga Kerititiano. Kare ainei i te mea tau kia matakite tatou i taua tu  manako ra? Me kore penei te mapu nei rai tatou e te kite ra e ko te angaanga orometua tamou te ngai meitaki roa atu no tatou. Inara, ka tuku atu ainei tatou i te angaanga painia, i te manako anga e kia meitaki atu tatou i te pae moni na mua? Kare ainei ka tauta pakari tatou i teianei kia maata te apinga ki te Atua? Koai tei kite e me ka ora rai tatou apopo?

Te inu kava.

“Auraka koe e kapiti katoa ki te aronga i kona i te wina,” i karanga ai a Maseli 23:20. Me pakari te kaki kava o tetai tangata, penei ka maani kotoe aia e ka meitaki ua i te inu putuputu. Penei e inu ana aia ei akaanga i tona roi kare kia kona. Me te anoanoia ra te kava ei akaanga i to tatou roi, penei ko te taime tau teia i te atokotoko mari e eaa tikai to roto i to tatou ngakau.

Te au oa ta tatou ka iki.

E tika, kare e rauka i te kopae i te aronga kare i roto i te tuatua mou​—i te apii, ngai angaanga, e me aere tatou i roto i te angaanga orometua. E apinga ke ra i te kapiti atu kia ratou no te tamataora, pera katoa te akatupu i te pirianga oa vaitata kia ratou. E maani ana ainei tatou i tetai kotoeanga kia karanga e e maata to ratou au tu meitaki? “Auraka e vavare,” i akamatakite mai ei te Pipiria. “E kino te tuatua meitaki i te kapiti anga kikino ra.” (1 Kori. 15:33) Mei te manga poitini rai ka rauka i te taviivii i te vai ma, ka rauka katoa i te pirianga oa ki te aronga kare e akamori ana i te Atua, i te taviivii i to tatou turanga pae vaerua e te akanauru ia tatou kia ariki i te aerenga manako, te akamanea, te tuatua, e te tu o teianei ao.

Ta tatou e rave ana no te tamataora.

Rauka mai te au tu tamataoraanga na roto i te au apinga ou o teia tuatau, te maataanga e viivii e te tau kore no te au Kerititiano. ‘Auraka te au tuatua viivii ravarai, e akaikiia ki o kotou na,’ i tata ai a Paulo. (Ephe. 5:3) Akapeea me te inangaro ra to tatou ngakau i te akara me kore i te akarongo i tetai apinga viivii? Penei ka karanga tatou e te anoanoia ra tetai manga tuatau akangaroi me kore tamataoraanga, tei runga ra i tetai e ka akapeea aia i te rave anga i te reira. Inara e akamanako meitaki tatou i ta Paulo akoanga e auraka e akatika i to tatou mata e to tatou taringa kia akara e kia akarongo i te au mea viivii.

Me e ngakau pikikaa to tatou e kua matau ua i te maani kotoeanga no to tatou tu tarevake, ka rauka ua ia tatou i te taui. (Ephe. 4:22-24) Akamanako ana e rua akaraanga o teia tuatau.

Anoanoia a Miguel * kia akatikatika i tona manako no runga i te au apinga materia. Akakite aia e: “I noo ana matou ko taku vaine, e taku tamaiti i tetai enua tei riro te rauka anga mai o te au apinga ou takiri e te meitaki, ei mea puapinga roa atu. No reira, kua pou ua toku taime i te angaanga kia rauka mai te au mea o teianei ao, i te manako anga e kare e o mai te tu noinoi apinga me rave au i teia. Kare i roa ana kua kitea mai iaku e me ka aruaru atu rai au i te au apinga materia kare opengaanga mai o te reira mataara. Kua pure au kia Iehova no runga i toku aerenga manako e te akakoroanga o toku ngakau. Kua akakite au kiaia e te inangaro nei to matou pamiri i te tavini iaia ma te ngakau katoa. Kua rave matou i tetai ikianga kia akamama mai i to matou oraanga e kia neke ki te ngai e anoano maataia ra te tauturu. Muri ua mai, kua rauka ia matou te painia. Kite mai i reira matou e kare tikai e anoano maataia te au apinga materia kia mataora te oraanga.”

Te akaari maira tei tupu kia Lee e akapeea te unuunumou mari anga i tona uaorai ngakau, te tauturu anga iaia kia akaruke i te kapitianga kino. “No taku angaanga moni,” i karanga ai a Lee, “e aravei putuputu ana au i te aronga okooko mei te au enua ke mai. Kua kite au e ka maata te inu kava i ko i taua au uipaanga ra, inara e mataora ana au i te aere ki reira. Maata te taime e kona ana au, e i muri mai i reira kua tataraapa au. Anoanoia au kia unuunumou mari i toku ngakau. Kua riro te ako a te Tuatua a te Atua e te akamaroiroianga a te aronga pakari ei tauturu iaku kia kite e, ko taku tikai e umuumu ra koia oki, kia piri atu ki te aronga kare e inangaro ana ia Iehova. Teianei e rave ana au i taku angaanga pitiniti na runga i te tereponi e kua akaiti mai toku taime e pou ana i te aravei i te aronga okooko.”

Ka anoanoia tatou kia makitoro marie ia tatou uaorai kia kite e eaa tikai te akakoroanga o to tatou ngakau. Ia tatou e akapera ra, e kimi tatou i te tauturu a Iehova na roto i te pure, te akamaara anga e ‘te kite maira aia i te au munangaro katoa o te ngakau.’ (Sala. 44:21) Kua oronga katoa mai te Atua i tana Tuatua, kia riro mei tetai io rai no tatou. (Iako. 1:22-25) Puapinga katoa te au akamaaraanga e te ako e rauka mai ana ia tatou na roto i te au puka Kerititiano e ta tatou au uipaanga! Na roto i teia au apinga nei, ka rauka ia tatou i te paruru i to tatou ngakau e kia aaere ua rai na te au arataa tuatua tika.