‘Kua Kite Tatou i te Atua’—Eaa ta Tatou ka Rave i Teianei?
“Kua kite kotou i te Atua.”—GALA. 4:9.
1. Eaa ra te tangata akarere pairere ka taangaanga ai i tetai papaanga kia akara meitaki i te pairere?
I TE au taime i mua ake ka akarere ei tetai tangata i te pairere, ka akara meitaki aia i te reira. Ka taangaanga aia i tetai papaanga kia akapapu e kua akara meitaki aia i te au mea ravarai. Me kare aia e akara meitaki i te pairere, penei kare aia e kite i tetai manamanata te ka akatupu i te pairere kia u. Ka anoano katoaia te au tangata kua roa ratou i te akarere pairere kia akara meitaki i te au apinga i runga i te papaanga.
2. Eaa ta tatou ka anoanoia kia akara meitaki?
2 Mei te papaanga a te tangata akarere pairere rai, e papaanga tetai no te au apinga taau ka akara meitaki kia akapapu e kia ketaketa ua rai toou akarongo noatu te au turanga ngata. Noatu e koi papetito ua akenei tatou me kore kua roa tatou i roto i te tuatua mou, ka anoanoia tatou kia akara meitaki i to tatou akarongo. Me manako ua tatou e te ketaketa ra to tatou akarongo, penei ka takinoia to tatou pirianga kia Iehova me na roto tatou i tetai turanga ngata. Te akamatakite maira te Pipiria ia tatou e: “Ko te manako ra e te tu ra aia, kia matakite aia ko te inga aea.”—1 Kori. 10:12.
3. Eaa ta te au Kerititiano i Galatia ka anoanoia kia rave?
3 Kua riro te atinga oko o Iesu i te tauturu i te au Kerititiano kia kite i te Atua na roto i tetai mataara ou. Ka rauka i te au tangata kia iki i teianei ei au tamariki na te Atua! Inara, te anoanoia ra te au Kerititiano i Galatia kia akara meitaki ua rai i to ratou akarongo. (Gala. 4:9) Kua karanga tetai pae i roto i te putuputuanga e ka riro te au Kerititiano ei aronga tuatua tika me aru ua rai ratou i te Ture a Mose. Inara, kare te Atua e taangaanga akaou ana i taua Ture ra, e kare rava i orongaia ana te Ture ki te au Kenitara i roto i te au putuputuanga! Ka anoanoia te ngati Iuda e te au Kenitara i roto i te putuputuanga kia tere ki mua i roto i te tuatua mou. Ka anoanoia ratou kia marama e kare te Atua e umuumu akaou ana i te au tangata kia aru i te Ture.
AU TAKAINGA TA TATOU I RAVE KIA KITE I TE ATUA
4, 5. Eaa te akoanga ta Paulo i oronga ki to Galatia? Eaa ra i puapinga ai tana reta kia tatou?
4 Te akamaara maira te reta ta Iehova i oronga kia tata te apotetoro ko Paulo ki to Galatia i te au Kerititiano kia kore e akaruke i te tuatua mou Pipiria ta ratou i apii ana. Auraka rava tatou e rave akaou i te au mea ta tatou i akaruke. Ka rauka te reta tei orongaia ki to Galatia i te tauturu ia tatou katoatoa kia vai tiratiratu.
5 Ka anoanoia tatou katoatoa kia akamaara i te tuatau i iki ei tatou i te tavini ia Iehova. Akamanako ana i teia nga uianga: Te maara ra ainei ia koe i te au takainga taau i rave tei tauturu ia koe kia akapapa no te papetitoanga? Te maara ra ainei ia koe e akapeea koe te kite anga i te Atua e eaa toou manako te kiteaia mai anga koe e ia?
6. Eaa te papaanga ta tatou ka apii mai no runga?
6 E iva takainga ta tatou ka rave ana kia tomo mai ki roto i te tuatua mou. (Akara i te pia “Au Takainga ta Tatou ka Rave Kia Kite i te Atua Tei Tauturu ia Tatou Kia Tere ki Mua.”) Ka rauka ia tatou i te akamanako i teia au takainga ei papaanga no tetai au apinga ta tatou ka akara meitaki kia akaketaketa ua rai i to tatou akarongo e kia kore tatou e oki akaou ki te au mea o teianei ao. Mei tetai tangata akarere pairere rai e akara meitaki ana i tana au papaanga i mua ake ka akarere ei aia i te pairere, kia akara meitaki tatou i ta tatou papaanga.
KETAKETA UA RAI TE ARONGA TEI KITEAIA E TE ATUA I ROTO I TE TUATUA MOU
7. Eaa te “akonoanga” me kore te tu ta tatou ka anoanoia kia aru? Eaa ra tatou ka akara meitaki ei me te aru meitaki ra tatou i te reira?
7 Mei tetai tangata akarere pairere rai e akara meitaki ana i te papaanga no tetai au apinga i te au taime ka akarere aia i te pairere, kia akara meitaki katoa tatou i to tatou tere anga ki mua i roto i te tuatua mou. Kua tata a Paulo kia Timoteo e: “E tāpu meitaki i te akonoanga tuatua tikai taau i kite iaku nei ra, ma te akarongo e te anoano i te Mesia ra ia Iesu.” (2 Timo. 1:13) Tei roto te “tuatua ora” tana e tuatua ra i te Tuatua a te Atua. (1 Timo. 6:3) Ka akaari mai tetai tutu mama ua tei toroia e mei teaa rai te akara anga o tetai apinga. Pera katoa, ka tauturu mai te “akonoanga tuatua tikai” ia tatou kia marama i ta Iehova e umuumu maira no tatou. Ka uriuri tatou i teianei i te au takainga ta tatou i rave i mua ake ka papetitoia ai tatou, e kia akara meitaki tatou me te aru meitaki ra tatou i te akonoanga o te tuatua mou.
8, 9. (a) Eaa ra tatou ka anoanoia ai kia akamaata atu i to tatou kite e te akarongo? (e) Eaa ra i puapinga ai kia tere tatou ki mua ei au Kerititiano? Eaa ra te reira i aiteite ei ki te tupu anga o tetai pu rakau?
8 Ko te takainga mua, ko te apii anga kia rauka mai te kite, te ka akatupu mai i te akarongo. Inara, ka anoanoia tatou kia apii ua rai kia kite e kia akaketaketa atu i to tatou akarongo. (2 Tesa. 1:3) Muri ake i to tatou papetitoanga, ka anoanoia to tatou pirianga ki te Atua kia tupu ua rai e kia ketaketa atu.
E tupu ua ana tetai pu rakau. Kia akapera katoa te au Kerititiano
9 Te aiteite ra teia ki te tupu anga o tetai pu rakau. E mea umere i te kite atu i te tu teitei o tetai pu rakau me te ketaketa ra tikai tona au aka. Ei akaraanga, e teitei atu tetai au pu rakau arezi manea i Lebanona i tetai are e 12 taua. E maatamaata tikai te reira e ka rauka tetai taura e 12 mita te roaroa i te takaiia takapini i tetai o te reira. (Peʼe 5:15) I te akamataanga, e tupu viviki ana tetai pu rakau. I te au aka e tupu oonu atura e te mamao mei te pu rakau, ka maatamaata atu e ka teitei atu te tumu. Muri mai, ka ngata i te kite atu i te pu rakau e tupu ra. Mei te reira katoa rai te tere anga ki mua o te au Kerititiano. Penei e maata ta tatou au tauianga i rave te akamataanga tatou i te apii i te Pipiria. E oti kua papetitoia tatou. E ka kite mai tetai ke i roto i te putuputuanga e te tere ra tatou ki mua i roto i te tuatua mou. Penei ka akamata tatou i te painia me kore ka rauka ia tatou tetai au apainga i roto i te putuputuanga. Aere ua rai, ka ngata i tetai pae i te kite mai e te tere ra tatou ki mua i roto i te tuatua mou. Inara ka anoanoia tatou katoatoa kia akamaata atu i to tatou kite e te akarongo, e riro ua atu ei tatou “ei tangata pakari,” koia oki ei Kerititiano tukatau. (Ephe. 4:13) No reira me tere tatou ki mua ei Kerititiano, te riro ra tatou mei tetai ua rikiriki rai tei tupu ei pu rakau ketaketa.
10. Eaa ra te au Kerititiano tukatau ka anoanoia ai kia tere ua rai ki mua i roto i te tuatua mou?
10 Inara kare to tatou tere anga ki mua e akamutu ua ki reira. Te aite ra to tatou kite no runga i te Tuatua a te Atua e te akarongo ki te au aka te akaketaketa ra ia tatou kia ngaueue kore. E ka anoanoia taua aka ra kia ketaketa ua atu rai. (Mase. 12:3) E maata te au taeake e te au tuaine te tere ra ki mua na roto i teia tu. Kua akakite mai tetai taeake tei riro ana ei tangata pakari no tetai 30 tuma mataiti e te tere nei rai aia ki mua. Kua akakite mai aia e kua maata atu tona ariki rekareka i te Pipiria. Kua apii ua rai aia i tetai au mataara ou kia tauturu te Pipiria i tetai tangata kia rave i te au ikianga, e kua maata atu tona mataora i roto i te angaanga orometua.
AKAKETAKETA I TOOU PIRIANGA KI TE ATUA
11. Akapeea tatou me akaketaketa ua rai i to tatou pirianga kia Iehova?
11 Me ka inangaro tatou kia tere ki mua ei au Kerititiano, ka anoanoia tatou kia akavaitata ua rai kia Iehova. Te inangaro ra aia kia kite mai tatou e te paruruia ra e te inangaroia ra tatou, mei ta tetai tamaiti rai ka kite mai mei tona nga metua aroa me kore mei ta tatou ka kite mai me kapiti tatou ki to tatou oa vaitata. E tika, ka roa rai te tuatau e ka anoanoia te tauta anga kia vaitata atu kia Iehova e kia kite mai i tana paruru anga e tona aroa. No reira kia akapapu e te tatau ra koe i te Pipiria i te au ra ravarai, e kia tatau i te au makatini, au puka, e te au poroutia ou ta Iehova i oronga mai na tatou. Ka tauturu teia ia koe kia kite meitaki atu Iaia e kia akaketaketa i toou pirianga kiaia.
12. Eaa ta tatou ka rave me inangaro tatou kia ketaketa ua rai to tatou pirianga ki te Atua?
12 Ka tauturu katoa mai ta tatou au pure e te au kapitianga meitaki ia tatou kia akaketaketa i to tatou pirianga ki te Atua. (E tatau ia Malaki 3:16.) Me pure te au oa o te Atua kiaia, ka akarongo mai aia ki ta ‘ratou kapikianga.’ (1 Pete. 3:12) Te akarongo maira a Iehova me kapiki tatou kiaia na roto i te pure, no reira kia pure ua rai tatou. (Roma 12:12) Ka anoanoia te tauturu a te Atua kia riro ua rai tatou ei oa nona. Me akamutu tatou i te pure kiaia, kare e rauka ia tatou te maroiroi ta tatou e anoano ra. Penei ka akaparuparuia tatou e teia akatereanga kino me kore ka timataia tatou kia rave i tetai mea tarevake. Inara, ka oronga puareinga mai aia i te tauturu ta tatou e anoano ra me pati tatou i te reira kiaia. Te pure ra ainei koe kia Iehova mei te tu rai e te tuatua ra koe ki toou oa irinakiia? E au mataara ke ainei tetai ka rauka ia koe i te akameitaki mai i taau au pure?—Iere. 16:19.
13. Eaa ra tatou ka anoanoia ai kia aere putuputu ki te au uipaanga me ka inangaro tatou kia ketaketa ua rai to tatou pirianga ki te Atua?
13 Ka anoanoia tatou kia noo vaitata ki te putuputuanga e kia piri atu ki tetai ke, e au oa ratou no Iehova. Te inangaro ra aia ia ratou no te mea ‘te irinaki ra ratou iaia.’ (Nahu. 1:7) No te kino tikai o teianei ao, ka anoanoia tatou kia piri atu ki to tatou au taeake e te au tuaine. E kia tauturu tatou i tetai e tetai e kia ketaketa ua rai, e ka akakeu te reira ia tatou kia akaari i te aroa ki tetai ke e kia rave i te “angaanga memeitaki.” (Ebe. 10:24, 25) Kare e rauka i te akono i te akoanga a Paulo me kare tatou e piri atu ki te putuputuanga. No reira kia akapapu koe e te aere putuputu ra koe ki te au uipaanga. E kia piri atu ki roto i te uipaanga na te paupau anga.
14. Eaa ra tatou ka anoanoia ai kia papa ua i te tataraara e kia rave i te au tauianga i roto i to tatou oraanga?
14 Te riro mai anga tatou ei Kerititiano, kua tataraara e kua akamutu tatou i te rave i te ara i roto i to tatou oraanga. Inara kia papa ua tatou i te tataraara e kia rave i te au tauianga i roto i to tatou oraanga. No te mea e aronga apa tatou e e au tu paruparu to tatou, ka mama ua ia tatou i te rave i te ara. Te akaaiteia ra te ara ki tetai ovi, te papa ua ra i te kakati mai ia tatou. (Roma 3:9, 10; 6:12-14) No reira kare e rauka ia tatou kia manako e kare o tatou tu paruparu. Te akakoromaki maira a Iehova ia tatou, ia tatou e kopae pakari ra i to tatou tu paruparu. (Phili. 2:12; 2 Pete. 3:9) E taangaanga meitaki i toou taime e toou maroiroi i te tavini anga ia Iehova, kare no te au akakoroanga kia akamareka ia koe uaorai. Kua manako tetai tuaine tei utuutuia i roto i te tuatua mou e ka anoanoia aia kia mataku tikai ia Iehova, e kua manako aia e kare rava e rauka iaia i te akamareka i te Atua. Kare aia i piri vaitata ana ki te Atua e kua rave aia i te au mea tarevake i roto i tona oraanga. Kua karanga aia e, “Kare no te mea e kare au e inangaro ana ia Iehova, mari ra no te mea kare au i kite tikai iaia.” No reira kua pure aia kia tauturu mai te Atua iaia e kua rave aia i te au tauianga. Kua karanga aia e, “Kua kite mai au e te arataki ra a Iehova iaku mei tetai tamaiti meangiti rai, te tauturu anga iaku kia autu tataki tai i te au arairai anga, e te akaari maru mai anga kiaku eaa taku ka anoano i te rave.”
15. Eaa ta Iesu raua ko Iehova e kite maira e e ariki rekareka maira?
15 Kua akakite te angera a te Atua kia Petero e tetai au apotetoro kia “akakite atu” i te tuatua meitaki. (Anga. 5:19-21) Ko ta tatou angaanga orometua i te au epetoma tetai apinga ta tatou ka akara meitaki kia akaketaketa ua rai i to tatou akarongo. Te kite maira a Iesu raua ko Iehova mei teaa te maata o to tatou akarongo, e te ariki rekareka maira raua i ta tatou e rave ra i roto i te angaanga orometua. (Apo. 2:19) Kia riro te angaanga orometua ei tuanga maata i roto i to tatou oraanga.
16. Eaa ra tatou ka akamanako putuputu ei i to tatou akatapuanga?
16 Akamanako putuputu i toou akatapuanga. Ko to tatou pirianga kia Iehova te mea puapinga rava atu ia kia tatou. Kua kite aia e koai tona au tangata. (E tatau ia Isaia 44:5.) Akara meitaki i toou pirianga kia Iehova, e kia pure no tana tauturu kia vai ketaketa ua rai te reira. Akamanako katoa i toou papetitoanga, e eiaa e akangaropoina i taua ra puapinga ra. Te akaari ra toou papetitoanga ki tetai ke e kua akatapu koe ia koe uaorai kia Iehova. Ko teia te ikianga puapinga rava atu taau ka rave.
KA ANOANOIA TATOU KIA AKAKOROMAKI E KIA NOO VAITATA KIA IEHOVA
17. Eaa ra tatou ka anoanoia ai kia akakoromaki me te inangaro ra tatou i te noo vaitata kia Iehova?
17 Kua akakite a Paulo ki to Galatia e kia kore ratou e tuku i te au. (Gala. 6:9) Ka anoano katoaia tatou kia akakoromaki, no te mea ka tupu mai te manamanata kia tatou. Inara ka tauturu mai a Iehova ia tatou. Kia pure ua rai no te vaerua tapu o te Atua, e ka tauturu mai aia ia koe kia rekareka e kia au, noatu kare te manamanata e ngaro. (Mata. 7:7-11) Akamanako ana i teia: E akono ana a Iehova i te au manu rere, inara e maata rava atu tona inangaro ia koe i te au manu rere. Te inangaro maira aia i te akono ia koe no toou inangaro iaia e kua akatapu koe ia koe uaorai kiaia. (Mata. 10:29-31) Noatu e au manamanata kino toou, auraka rava e tuku i te au. Auraka rava e akaruke i te tuatua mou no te au mea taau i akaruke ki muri. E maata ta tatou au akameitakianga, no te mea kua kiteaia tatou e Iehova i teianei.
18. Eaa ta te katoatoa tei kite i te Atua ka rave i teianei?
18 Noatu e koi papetito ua akenei koe me kore kua roa toou papetitoia anga, eaa taau ka rave i teianei? Kia kite meitaki ua rai ia Iehova, e kia tere ua rai ki mua i roto i te tuatua mou. Kia matakite koe i te manako e kua kite meitaki koe i te Atua e kare koe e anoanoia kia akameitaki mai i toou pirianga kiaia. E akara akaou i tetai au taime i te au mea ta tatou i uriuri ana i roto i teia atikara kia rauka ia koe i te noo vaitata kia Iehova, to tatou Metua, Oa e te Atua aroa.—E tatau ia 2 Korinetia 13:5, 6.