1, 2. Eaa te manako o te au tavini o te Atua no runga i teia ao? Eaa to ratou au kainga?

 TE NOO meitaki ra e te mataora ra ainei koe i roto i teia ao kino, mei te mea rai e tei te kainga koe? Me kare ia, te aiteite ra toou tu ki te au tavini o Iehova. Mei ito mai kua manako ana te katoatoa tei inangaro tikai ia Iehova e e au tangata tuitarere ratou i roto i teia ao. Ei akaraanga, kua manako akapera rai te aronga akamori o te Atua tei neke ana mei tetai ngai ki tetai ngai i roto i te enua o Kanaana. Te karanga ra te Pipiria e “kua aaki ua [ratou] e, e tangata ke ke ratou e te tuitarere ua i teianei ao.”​—Ebe. 11:13.

² Kua rauka i te au pipi akatainuia a Karaiti tetai ‘ngai noo anga’ i runga i te rangi. Te manako katoa ra ratou ia ratou ei ‘au tangata ke, e te tuitarere’ i roto i teia ao. (Phili. 3:20; 1 Pete. 2:11) Kare ta Karaiti “mamoe ke atu” e no “to teianei ao,” mei ia Iesu rai “kare i to teianei ao.” (Ioa. 10:16; 17:16) Inara, e kainga to te iti tangata o te Atua. Kare i te kainga mei ta tatou e kite mata nei, inara e ngai noo anga meitaki tikai e te mataora. Eaa teia kainga? Kua tata mai a Mose e: “E te Atu [Iehova], ko koe to matou akapuanga i tera uki i tera uki.” * (Sala. 90:1) Ko Iehova to tatou “akapuanga,” me kore e kainga aia no tona au tavini tiratiratu. Kua kite ainei koe akapeea a Iehova te riro anga ei akapuanga no tona au tavini i mua ana? Akapeea aia te riro anga ei akapuanga no tona iti tangata i teia tuatau? E akapeea aia te riro anga e ko te akapuanga meitaki anake ua no tona au tavini a te tuatau ki mua?

3. Te akaaiteia ra a Salamo 90:1 ia Iehova ki teaa, e no teaa ra?

³ I tetai taime e akaaite ana te Pipiria ia Iehova ki  te au mea ta tatou e kite nei kia marama meitaki atu tatou i tona au tu. Ei akaraanga, te akaaite ra a Salamo 90:1 ia Iehova ki tetai ngai “akapuanga,” me kore ki tetai kainga. Me akamanako tatou i tetai kainga, ka akamanako tatou i tetai ngai e tupu ana te aroa, te au e te paruruanga. Eaa ra a Iehova i akaaiteia ai ki tetai kainga? No te mea te karanga ra te Pipiria e ko Iehova te aroa. (1 Ioa. 4:8) Te karanga katoa ra te reira e e Atua aia no te au e te paruru ra aia i tona au tavini. (Sala. 4:8) Ei akaraanga no te reira, ka akamanako ana tatou e akapeea a Iehova i riro ei mei tetai kainga no tona au tavini tiratiratu ko Aberahama, Isaaka, e Iakoba.

4, 5. Akapeea te Atua te akameitaki anga e te paruru anga ia Aberahama?

⁴ Penei kua akamanako a Aberahama e eaa ra a Iehova i akakite ei kiaia e: “E aere ke mai koe i to enua na, e toou kopu-tangata, e te ngutuare o toou metua, ki te enua taku e akakite atu kia koe na.” Inara papu e kua akapumaana mai te au tuatua a Iehova iaia: “E akariro oki au ia koe ei iti-tangata maata, e ka akameitaki au ia koe, e akamaata atu au i to ingoa.” Kua tuatua katoa a Iehova e: “E ko te aronga e akameitaki ia koe ra, ko taku ia e akameitaki; e ko te akakino ia koe ra, ko taku ïa e taumaa.”​—Gene. 12:1-3.

⁵ Kua taputou mai a Iehova e ka akameitaki e ka paruru aia ia Aberahama e tona uanga, e kua rave katoa aia i te reira. (Gene. 26:1-6) Ei akaraanga, kua arai aia ia Pharao o Aiphiti e te Ariki ko Abimeleka o Gerara mei te tamate anga ia Aberahama e te apai anga i tana vaine ko Sara. E kua paruru aia ia Isaaka raua ko Rebeka na roto i taua tu ra. (Gene. 12:14-20; 20:1-14; 26:6-11) Kua akakite mai te Pipiria e “kare ratou i tukua e [Iehova] kia takinga-kinoia e te tangata ra; e ui ariki oki tei akoia e ia ia ratou, ka na ko ei ra e, Auraka e akatukia ua mai i tei akatainuia e au, e taku ra au peroveta, auraka e takinga-kinoia.”​—Sala. 105:14, 15.

6. Eaa ta Isaaka i akakite kia Iakoba kia rave? Eaa ra to Iakoba manako?

⁶ Kua akono katoa a Iehova i te mokopuna a Aberahama ko Iakoba. Te taeanga ki te tuatau ka akaipoipo ei a Iakoba, kua akakite mai tona metua ko Isaaka kiaia e: “Auraka koe e akaipoipo i te vaine no te au tamaine a Kanaana nei. Ka tu, e aere ki Padana-arama, ki te ngutuare o Betuela, ki te metua tane o to metua vaine nei; ka akaipoipo ei i tetai vaine no reira, no te au tamaine a Labana ra.” (Gene. 28:1, 2) Kua rave a Iakoba i ta tona metua i akakite kiaia. Kua akaruke aia i tona pamiri i Kanaana e kua teretere atu mei tetai au anere kiro mita i te mamao ki Harana, penei koia anake ua. (Gene. 28:10) Penei kua manako ana aia e: ‘Eaa te roa o toku noo anga ki tetai ngai ke? Ka rekareka ainei te tungane o toku mama me kite mai aia iaku? Ka kite mai ainei au i tetai vaine te inangaro ra ia Iehova?’ Inara  kua tupu mai tetai mea tei tauturu ia Iakoba kia kore e manamanata i Luza, e 100 kiro mita i te mamao mei ia Bere-seba. Eaa ra te reira?

7. Eaa te akapumaana anga ta te Atua i oronga kia Iakoba?

⁷ Kua mama mai a Iehova kia Iakoba i Luza i roto i tetai moemoea e kua tuatua mai e: “Tei vaitata au ia koe, e naku koe e tiaki i toou na au aerenga katoa, e ka akaoki mairai au ia koe ki teianei enua; kare oki au e akaruke ia koe, e kia ope roa taku i akakite kia koe i te akatupuia e au ra.” (Gene. 28:15) Papu e kua akapumaana maata taua au tuatua ra ia Iakoba! I muri mai, kua inangaro a Iakoba i te kite e akapeea e tupu ei ta Iehova taputou. Me kua akaruke koe i toou kainga no te tavini anga i tetai enua ke, penei kua manamanata ana koe mei ia Iakoba rai. Inara, papu e kua kite mai koe i ta Iehova akono anga ia koe na roto i te au tu e manganui.

8, 9. Akapeea a Iehova te riro anga ei “akapuanga” no Iakoba? Eaa ta te akaraanga o Iakoba e apii maira kia tatou no runga ia Iehova?

⁸ Te tae anga a Iakoba ki Harana, kua ariki pumaana mai te tungane o tona mama ko Labana iaia, e i muri mai kua oronga mai aia ia Lea raua ko Rahela ei nga vaine nana. Inara, i muri mai kua akamata a Labana i te akono tau kore ia Iakoba e kua taui i tana tutaki anga e tai ngauru taime! (Gene. 31:41, 42) Kua akakoromaki a Iakoba i teia au mea no te mea kua irinaki aia e ka akono mai a Iehova iaia. Tei tupu mai kua akameitaki mai a Iehova ia Iakoba. Te tae anga ki te tuatau i akakite ei a Iehova kia oki aia ki Kanaana, “e manganui [ta Iakoba] puaka, e te tavini vaine, e te tavini tane, e te kamela, e te asini.” (Gene. 30:43) Kua ariki rekareka a Iakoba ia Iehova e kua pure e: “E mea ngiti rava au nei i te au takinga-meitaki katoa, e te tuatua-mou katoa, taau i akatupu mai ki toou tavini nei; i na teianei Ioridana oki au ma toku tokotoko ra; e teianei, e rua katoa oku motuanga.”​—Gene. 32:10.

⁹ Te akaari maira teia au akaraanga i te tika no runga i ta Mose au tuatua e: “E te Atu [Iehova], ko koe to matou akapuanga i tera uki i tera uki”! (Sala. 90:1) Kare a Iehova i taui ana. Te inangaro ra, te paruru ra e te akono ra rai aia i tona au tavini akarongo mou. (Iako. 1:17) Ka akamanako ana tatou e akapeea.

10. Eaa i papu ei ia tatou e ka riro ua rai a Iehova ei “akapuanga” no tona au tavini?

¹⁰ Akamanako ana i teia turanga: Te riro ra koe ei kite i roto i te are akavaanga no te patoi anga i tetai tangata e taoonga teitei tona e e kite karape aia. E tangata pikikaa kino aia e te ta tangata, e te angaanga ra te au tangata takapini i teianei ao nana. Eaa taau ka manako me aere mai koe ki vao i te are akavaanga? Ka manako au ainei koe? Kare! Mari ra ka kimi koe i te paruruanga. Na roto i te reira tu, ei au tavini no Iehova, te akakitekite mataku kore ra tatou no runga i te enemi kino o Iehova ko Satani. (E tatau ia Apokalupo 12:17.) Kua tauta ana a Satani i te arai i te iti tangata o te Atua. Kua rauka ainei iaia i te rave i te reira? Kare! Te tutu aere nei rai tatou ki te au tangata e manganui takapini i teianei ao. Akapeea teia i rauka ai? E tai rai akamaramaanga: Ko Iehova to tatou “akapuanga.” Te paruru e te akameitaki maata nei aia i tona iti tangata i teia tuatau openga. (E tatau ia Isaia 54:14, 17.) Inara, ka riro ua rai a Iehova ei “akapuanga” no tatou me kare tatou e akatika ia Satani kia akavare ia tatou.

11. Eaa tetai atu apiianga ta tatou ka kite mai mei ia Aberahama, Isaaka e Iakoba?

¹¹ Ka apii tatou i tetai atu apiianga mei ia Aberahama, Isaaka e Iakoba. Noatu e kua noo ana ratou ki te enua Kanaana, kua akatakake mai ratou ia ratou mei te au tangata o te enua e kua rikarika ratou i te au mea kino ta te au tangata i rave. (Gene. 27:46) Kare ratou i anoanoia kia aru i tetai  papaanga ture roangarere kia kite i te mea tika e te mea tarevake. Kua kite ratou eaa ta Iehova e inangaro ra e e rikarika ra. No reira kua rave ratou i ta ratou ka rauka kia kore ratou e riro mai ei tuanga no teianei ao. E akaraanga meitaki tikai ratou no tatou! Te tauta tikai ra ainei koe i te aru i taua au tavini tiratiratu o Iehova? Te akaari ra ainei koe e kare koe e inangaro ana kia riro mai ei tuanga no teianei ao na te iki meitaki anga i toou au oa e te tamataoraanga? Mea mii ra, te manako ua ra tetai pae i roto i te putuputuanga Kerititiano e te meitaki ua ra ratou i roto i to Satani ao. Me te manako akapera ra koe, noatu e tuanga meangiti ua, e pure no ta Iehova tauturu. E kia akamaara e no Satani teia ao, e e tu noinoi tona e kare aia e manako mai ana ia tatou.​—2 Kori. 4:4; Ephe. 2:1, 2.

12. (a) Akapeea a Iehova te tauturu anga i tona au tavini? (e) Eaa toou manako no runga i te tauturu ta Iehova e oronga maira?

¹² Me kare tatou e inangaro ia Satani kia akavare ia tatou, ka anoanoia tatou kia puapingaia mei te au tauturu ta Iehova i oronga mai no tona au tavini. Ei akaraanga, te oronga maira aia i te tauturu na roto i te au uipaanga Kerititiano, te akamorianga a te ngutuare, e te aronga pakari te akapumaana maira e te turuturu maira ia tatou kia akakoromaki i te au manamanata o te oraanga. (Ephe. 4:8-12) Kua tata te Taeake ko George Gangas, e mema no te Pupu Akaaere no tetai au mataiti e manganui i tona manako iaia i rotopu i te iti tangata o te Atua e: “Me noo au ki rotopu ia ratou, mei te mea rai e tei rotopu au i toku pamiri i te kainga.” Te manako akapera ra ainei koe?

13. Eaa te apiianga puapinga ta tatou i kite mai mei ia Ebera 11:13?

¹³ Tetai akaou mai apiianga ta tatou ka kite mai mei ia Aberahama, Isaaka e Iakoba, koia oki kare tatou e mataku e e tuke rai tatou mei te au tangata takapini ia tatou. Mei ta tatou rai i tatau ana i te  parakarapa 1, “kua aaki ua [taua aronga akarongo mou ra] e, e tangata ke ke ratou e te tuitarere ua i teianei ao.” (Ebe 11:13) Te akaari ra ainei koe e e tuke rai koe mei te au tangata o teianei ao? E ngata ana teia i tetai taime. Inara ka rauka ia koe i te rave i teia ma te tauturu a te Atua e toou au taeake e te au tuaine. Akamaara e kare e ko koe anake ua. Te aronga katoatoa te inangaro ra i te tavini ia Iehova, te tamaki ra ratou ia Satani e teianei ao! (Ephe. 6:12) Inara ka autu tatou i teia tamaki me irinaki tatou kia Iehova e me akariro tatou iaia ei akapuanga no tatou.

14. Eaa ra te “oire” ta Aberahama e tiaki ra?

¹⁴ Kia aru tatou ia Aberahama e kia akamanako ua rai no runga i te tutaki. (2 Kori. 4:18) Kua tata te apotetoro ko Paulo e ‘te maara ra ia Aberahama e kia rauka te oire tumu mou, ko te akatu e te tutara o taua oire ra, ko te Atua ïa.’ (Ebe. 11:10) Ko te Patireia  o te Atua taua “oire” ra. Ka anoanoia a Aberahama kia tiaki i taua “oire” ra kia tae mai. Kare ra tatou e anoanoia kia tiaki no te mea te tutara ra te Patireia i teianei i runga i te rangi. E te akaari maira te totou Pipiria e kare e roa atu ana ka tutara mai te reira i te enua katoa. Te akaari maira ainei te tu o toou oraanga e te irinaki tiaki ra koe i taua Patireia ra? Te tuku ra ainei koe i te Patireia ei mea mua i roto i toou oraanga e te akatakake maira ainei koe mei teianei ao?​—E tatau ia 2 Petero 3:11, 12.

15. Eaa ta te aronga te irinaki ra i teianei ao e tapapa atura i te tuatau ki mua?

¹⁵ Ka kino ua atu te au manamanata i roto i teianei ao i mua ake ka tae mai ei te openga. (Mata. 24:7, 8) E i te tuatau o te mate maata, ka ngata rava atu te oraanga. Takapini i teianei ao, ka tupu mai te takoreanga e te tu oripu ua, e ka mataku tikai te au tangata. (Haba. 3:16, 17) Te akakite maira te Pipiria e ka mataku tikai ratou e ka kimi ratou i te paruruanga i roto i “te au ana, e ki roto i te au mato, o te maunga.” (Apo. 6:15-17) Inara kare e ana, kare katoa tetai ua atu pitiniti mamaata me kore tetai akaereanga poritiki e paruru mai ia ratou.

16. Eaa ta tatou ka akamanako no runga i te putuputuanga? No teaa ra?

¹⁶ Ka paruru ua rai a Iehova ia tatou i te tuatau o te mate maata. Ka rekareka tatou i to tatou Atua no te ora mei te peroveta rai ko Habakuka. (Haba. 3:18) Na roto i teea au mataara ka paruru mai ei a Iehova ia tatou i taua tuatau ngata ra? Ka tiaki tatou e kite ei tatou i te reira. Inara papu ia tatou e ka akanoonoo meitakiia te iti tangata o Iehova e ka rauka mai te au ikuikuanga no ko mai iaia, mei te ngati Iseraela rai te akaruke anga ratou ia Aiphiti. (E tatau ia Exodo 13:18; Apo. 7:9) Akapeea a Iehova me oronga mai i teia au ikuikuanga? Papu e ka taangaanga aia i te putuputuanga kia akakite mai eaa ta tatou ka rave. Te taiku ra a Isaia 26:20 i te “au pia” te ka oronga mai i te paruruanga no te iti tangata o te Atua. Te akaaiteia ra teia ki te au putuputuanga takapini i teianei ao. (E tatau ia Isaia 26:20.) Te akaperepere ra ainei koe i te au uipaanga a te putuputuanga? E rave ua ana ainei koe i te au mea ta Iehova e akakite maira kia koe na roto i te putuputuanga?​—Ebe. 13:17.

17. Akapeea a Iehova te riro anga ei “akapuanga” no tona au tavini tiratiratu tei mate?

¹⁷ E “akapuanga” a Iehova no te aronga akarongo mou te ka mate i mua ake i te mate maata. Akapeea ra? Ka akatuakaou mai aia ia ratou. Kua roa te tuatau i muri ake te mate anga a Aberahama, Isaaka e Iakoba te akakite anga a Iehova kia Mose e koia rai to ratou Atua. (Exo. 3:6) Kua ripiti a Iesu i taua au tuatua ra e kua akakite katoa aia e: “Kare oki aia i te Atua no tei mate, no tei ora ra; te ora katoatoa ra iaia.” (Luka 20:38) Papu tikai e ka tupu te akatuakaou anga o te au tavini tiratiratu o Iehova, mei te mea rai e te ora ra ratou i teianei no Iehova.​—Kohe. 7:1.

18. Akapeea a Iehova te riro anga ei “akapuanga” no tona iti tangata i roto i te ao ou?

¹⁸ I roto i te ao ou, ka riro mai a Iehova ei “akapuanga” no tona iti tangata na roto i tetai tu takake. Te karanga ra a Apokalupo 21:3 e: “I na, tei ko te tangata ra te puakapa o te Atua e e noo aia ki rotopu ia ratou.” Ka taangaanga a Iehova ia Iesu Karaiti kia tutara ki rungao i te enua no te okotai tauatini mataiti mua. E i muri ake i te openga o te tauatini mataiti, ka akaoti a Iesu i te rave i te akakoroanga a tona Metua no te enua, e ka akaoki aia i te Patireia kia Iehova. (1 Kori. 15:28) E oti ka tutara tika mai a Iehova i te au tangata apa kore. E oraanga meitaki tikai to tatou a te tuatau ki mua! Kia aru tatou i te au tavini akarongo mou i mua ana na te akariro anga ia Iehova ei “akapuanga” no tatou i teianei.