TE ANAU mai anga taku tamaiti a Gary i te mataiti 1958, kua kite au e e apinga tarevake tetai. Inara kua pou e tai ngauru marama i kite ei te au taote e eaa tona maki, e e rima mataiti akaou mai i rauka ai te au taote kite karape i London i te akapapu mai i te reira. E iva mataiti i muri ake ia Gary, i te anau mai anga au i taku tamaine ko Louise, taitaia tikai au te kitea mai anga e e kino roa atu tona maki i to Gary.

“Kua tuia taau nga tamariki e te maki LMBB syndrome, * e kare e vairakau no teia maki,” i akakite mai ei te au taote kiaku. I taua taime ra, kare i marama meitakiia no runga i teia tu maki no te genes. Tetai au tu o teia maki e matapo, matu, tai ngauru tuma mangamanga rima e te mangamanga vaevae, marie te tupu, toto vene, rumatiki, e te maki kitini (kidney). No reira ka riro te akono anga i taku nga tamariki ei mea ngata. Tetai kimikimianga tei raveia kua tamanakoia e e 1 i roto i te 125,000 tangata i Peritane tei tuia e teia maki, inara penei e maata atu rai te aronga kare i pakari roa to ratou maki.

Toku tuatua anga ki tetai Kite o Iehova i muri ua ake i toku akaipoipoanga, kite vave ua au e ko teia te tuatua mou. Inara kare taku tane e mareka ana. No tana angaanga, e neke ua ana matou, no reira kare e rauka iaku i te aere ki te au uipaanga. Noatu rai, kua tatau ua atu rai au i te Pipiria e te pure kia Iehova. Pumaana tikai au te tatau anga e “e akapuanga oki a Iehova no te aronga i takinga-kinoia, e akapuanga i te tuatau tumatetenga” e kare aia ‘e akaruke i te aronga i kimi iaia.’​—Sala. 9:9, 10.

Kare te mata o Gary e kite meitaki ana, no reira i te taenga tona mataiti ki te ono, kua tukuia atu aia ki tetai apii no tera tu tamariki, i te tua tonga o Engarani. E ringi ua mai ana aia iaku me manamanata tona no runga i tetai au mea, e me tuatua maua kua tauturu atu au iaia kia marama i te au kaveinga Pipiria. Tetai au mataiti i muri ake te anau mai anga a Louise, kua tuia au e te maki multiple sclerosis, e te maki fibromyalgia. E 16 o Gary mataiti, oki mai aia ki te kainga. Inara, te kino ua atura tona mata, e i te mataiti 1975 kua tukuia aia ki roto i te rekoti a te kavamani ei tangata matapo. I te mataiti 1977 kua akaruke taku tane ia matou.

Muri ua ake te oki mai anga a Gary, kua piri atu matou ki te au angaanga a te putuputuanga, e i te mataiti 1974 kua papetitoia au. Pumaana tikai au te tauturu a tetai tangata pakari ia Gary kia marama no runga i te au tauianga tana e kite ra i runga i tona kopapa iaia e mapu maira. Na tetai Au Kite e tauturu ana iaku i te rave i te au angaanga i te kainga, e i muri mai kua tutaki te kavamani e tokorima Au Kite ei akono ia matou. E akameitakianga tikai te reira!

Tupu meitaki to Gary turanga i te pae vaerua, e kua papetitoia aia i te mataiti 1982. Inangaro tikai aia i te painia tauturu. No reira, kua manako au e ka aru katoa au iaia, e kua rave atu rai maua i te reira no tetai au mataiti. Tetai taime i muri mai, mataora tikai taku tamaiti te ui mai anga to matou akaaere kotinga kiaia e, “Gary, kare koe inangaro i te painia tamou?” Tera tikai te akamaroiroianga  meitaki roa atu no Gary, e i te mataiti 1990 kua riro mai aia ei painia tamou.

E rua taime te vaiia anga te kaokao o Gary, te mea mua i te mataiti 1999 e te rua i te mataiti 2008, inara e kino roa atu te maki o Louise i tona. Matapo aia te anau mai anga, e i toku kite anga e e ono ona mangamanga vaevae, kite au e kua tu katoaia aia e te maki LMBB. Kitea mai i roto i te au kimikimianga e kua kino tetai au mero i roto i tona kopapa. Te au mataiti tei aereia, kua raveia tetai au vavaianga mamaata, kapiti mai e rima i runga i tona kitini. Kua tuia aia e te toto vene mei ia Gary rai.

I te mea kua kite aia e eaa te au manamanata e o maira me ka anoanoia te vavai, i reira kua na mua a Louise i te tuatua atu ki te au taote vavai, te au taote tamoe, e te aronga na ratou e akanoonoo i te au mea ka raveia, i te akamarama i te tumu kare aia e ariki i te pamu toto. Tei tupu mai, mataora ua tona pirianga ki te aronga e akono ra i tona au maki.

E maata ta matou angaanga e rave ana i roto i to matou kainga i te akamori ia Iehova. I mua ake ka rauka mai ei te au apinga erikitoroniki mei te CD e te DVD te tu, e tatau ua ana au kia Gary raua ko Louise. Teianei, ka rauka ia matou i te tatau e te akarakara i te au CD, DVD, e te au rekotianga i roto i te www.pr418.com no ta matou apii Pipiria i te au epetoma, e ka rauka ia matou i te paupau i ko i te au uipaanga Kerititiano.

Tetai taime e tamou ngakau ana a Gary i tana au pauanga, e me e akoanga tana i roto i te Apii Orometua Teokaratiki, mataratara ua me oronga mai aia i tona manako. Kua ikiia aia ei tavini orometua i te mataiti 1995, e e maata tana angaanga i ko i te Are Uipaanga Patireia i te turou mai i te au mema o te putuputuanga, e te tauturu i te akatangi mai i te imene.

E angaanga kapiti putuputu ana te Au Kite kia Gary i roto i te angaanga orometua i te opara aere i tona pereoo no te mea e maki rumatiki tona. Kua tauturu tetai taeake iaia kia rave i tetai apii Pipiria ki tetai tangata tei inangaro i te apii. E kua tauturu katoa a Gary i tetai tuaine, kare e maroiroi ana i te pae vaerua, no tetai 25 mataiti. Te aere mai nei raua ki te au uipaanga Kerititiano i teianei.

E iva rai o Louise mataiti i apii ei tona mama ruau iaia i te taviriviri, e na maua ko tona vaine tiaki i apii iaia i te tuitui. No tona reka i te taviriviri, kua maani aia i tetai au parangikete karakara no te au pepe e te aronga pakarikari i roto i te putuputuanga. E maani katoa ana aia i tetai au kati tei tapiripiriia te au tutu ki runga. E akaperepere ana te au taeake i te au kati tei tukuia atu. Tona mapu tamarikianga, apii a Louise i te taipu. Teianei me taipu aia ki runga i tana komupiuta, ka tuatua mai te reira, e e imere putuputu ana aia ki tona au oa na teia mataara. E 17 ona mataiti i papetitoia ai a Louise. Te tuatau o te au kamupeini tutu aere, e painia tauturu kapiti ana maua. Mei ia Gary rai, e tamou ngakau ana a Louise i te au irava kia rauka iaia i te akakitekite aere i te au taputou a te Atua no tetai ao “e akapueraiaʼi te mata o te matapo” e “kare oki to reira e karanga e, Kua maki au.”​—Isa. 33:24; 35:5.

Akameitaki matou ia Iehova no tana Tuatua akauruia! Rekareka maata tikai matou i te aroa takinga meitaki o te putuputuanga i te turuturu mai ia matou, naringa kare, ka puapinga kore ua ta matou angaanga. No te tauturu a Iehova i meitaki ei to matou oraanga.