1, 2. (a) Eaa tei tauturu ia koe kia rave i taau ikianga kia tavini i te Atua? (e) Eaa te au uianga no runga i to tatou tuanga akaperepere no ko mai ia Iehova ta teia atikara ka pau mai?

MIRIONI ua atu tei rave i te ikianga meitaki kia tavini i te Atua ko Iehova e kia aru i te akaraanga o Iesu Karaiti. (Mata. 16:24; 1 Pete. 2:21) E ikianga puapinga ta tatou akatapuanga ki te Atua. Kare tatou i rave i teia ikianga i muri ake i te apii anga i tetai au tuatua mou mei tetai nga irava. Mari ra, kua apii meitaki tatou i te Pipiria e kua akaketaketa i to tatou akarongo no te tuanga akaperepere ta Iehova i taputou mai. Ka oronga mai aia i teia tuanga akaperepere ki te katoatoa te apii ra no runga iaia e ia Iesu Karaiti.​—Ioa. 17:3; Roma 12:2.

² Me inangaro tatou i te akono i to tatou pirianga kia Iehova, ka rave ua rai tatou i te au ikianga meitaki te ka akamareka iaia. Te pau maira teia atikara i teia au uianga puapinga: Eaa to tatou tuanga akaperepere? Mei teaa ra te puapinga o te reira kia tatou? Akapeea tatou e akapapu ei e ka rauka ia tatou teia tuanga akaperepere? Eaa te ka tauturu ia tatou kia rave i te au ikianga meitaki?

3. (a) Eaa te tuanga akaperepere ka orongaia ki te aronga akatainuia? (e) Eaa te tuanga akaperepere ka orongaia ki te au “mamoe ke atu”?

³ Te manakonako ra tetai pupu meangiti ua o te au Kerititiano e ka orongaia kia ratou tetai oraanga mate kore i runga i te rangi, ko to ratou tuanga akaperepere te reira. Ka orongaia tetai tikaanga ngateitei tikai kia ratou kia tutara kapiti e Karaiti i roto i tona Patireia. (1 Pete. 1:3, 4) Kua ‘anau akaouia’ mai te aronga te ka orongaia te reira tuanga akaperepere. (Ioa. 3:1-3) Akapeea ra te au mirioni tangata o ta Iesu “mamoe ke atu” e angaanga kapiti ra ki te aronga akatainuia e tutu aere ra i te tuatua meitaki o te  Patireia o te Atua? (Ioa. 10:16) Ka rauka i te mamoe ke atu tetai oraanga mutu kore i runga nei i te enua parataito, kare e mamae, e mate, me kore e aue, tei kare i rauka ia Adamu raua ko Eva. (Apo. 21:1-4) Ia Iesu i runga i te rakau tamamaeanga, kua taputou aia ki tetai tangata e ka rauka iaia teia tuanga akaperepere. Kua akakite a Iesu e: ‘Te akakite tika atu nei au kia koe i teianei ra, ei Parataito taua e aravei ei.’​—Luka 23:43.

4. Eaa te au akameitakianga tei rauka mai ia tatou?

⁴ Te kapiti katoa maira to tatou tuanga akaperepere i tetai au akameitakianga e rauka katoa ra ia tatou i teia tuatau. No te mea te irinaki ra tatou i ‘te oko tei tutakiia e Karaiti ko Iesu,’ kite tatou i te tu ponuiaau e e pirianga vaitata to tatou ki te Atua. (Roma 3:23-25, NW) Kua marama meitaki tatou i ta te Pipiria e taputou maira no te tuatau ki mua. Te rekareka nei tatou i te aroa ta to tatou au taeake e te au tuaine takapini i teianei ao e akaari ra no tetai e tetai. E e akangateiteianga tikai i te akakitekite aere no runga ia Iehova. E au tumuanga meitaki to tatou kia ariki rekareka i to tatou tuanga akaperepere!

5. Eaa ta Satani e tauta ra i te rave ki te iti tangata o te Atua? Eaa te ka tauturu ia tatou kia kopae i te au ereere a Satani?

⁵ Ei akapapu anga kia kore tatou e ngere i to tatou tuanga akaperepere, kia kopae tatou i te au ereere a Satani. Kua tauta ua ana a Satani i te timata i te iti tangata o te Atua kia rave i te au ikianga tarevake kia ngere ratou i to ratou tuanga akaperepere. (Nume. 25:1-3, 9) Kua kite a Satani e kare e roa atu ana ka takoreia aia, no reira te tauta pakari nei aia i te timata ia tatou kia rave i te mea tarevake. (E tatau ia Apokalupo 12:12, 17.) Me inangaro tatou ‘kia patoi ua rai i te ravenga pakari a te diabolo,’ kia ariki rekareka ua rai tatou i to tatou tuanga akaperepere. (Ephe. 6:11) Ka kite tatou i te au apiianga puapinga mei ta te tamaiti mua a Isaaka ko Esau i manako no runga i tona tuanga akaperepere.

6, 7. Koai ra a Esau? Eaa te tuanga akaperepere te ka orongaia kiaia?

⁶ Mei tetai 4,000 mataiti i topa, kua anau mai a Rebeka i tetai maanga, ko Esau e Iakoba to raua ingoa. Kua mamaata mai te nga maanga e e tuke tikai to raua tu. “Riro aturā Esau ei tangata kite i te arumaki manu, e tangata noo ngangaere; karekā Iakoba e tangata maru ïa, e te noo puakapa.” (Gene. 25:27) Kua kapikiia a Iakoba e e tangata maru no te mea e tu tiratiratu tona, e kare aia i rave ana i te tarevake.

⁷ Te tae anga te mataiti o Esau e Iakoba ki te 15, kua mate to raua papa ruau ko Aberahama. Inara kua maara ia Iehova tana i taputou kia Aberahama. I muri mai, kua taiku akaou a Iehova i tana i taputou kia Isaaka. Kua karanga te Atua e ka akameitaki te au pa enua ravarai ia ratou uaorai na roto i te “uanga,” me kore te kopu tangata o Aberahama. (E tatau ia Genese 26:3-5.) Na roto i teia mataara, kua akakite te Atua e ka riro tetai i roto i te kopu tangata o Aberahama e ko te “uanga” tiratiratu i roto ia Genese 3:15, koia oki, te Mesia. No te mea ko Esau te tama mua a Isaaka, e tikaanga tona ki te taputou a te Atua kia Aberahama. No reira, tikaanga tikai ka na roto mai te Mesia i te kopu tangata o Esau. E tuanga akaperepere tikai teia no Esau. Inara, kua ariki rekareka ainei aia i te reira?

8, 9. (a) Eaa te ikianga ta Esau i rave no tona tuanga akaperepere? (e) No tetai au mataiti i muri mai, eaa ta Esau i kite mai no tana ikianga? Eaa tana i rave?

⁸ Tetai ra, te oki mai anga a Esau mei te arumaki manu, kua kite atu aia ia Iakoba ‘e tunu rā i te kai.’ Kua pati atu a Esau i tetai kai, te karanga anga e, “E angai mai koe iaku ki tenana kai muramura, kua mate oki au.” Kua tuatua atu a Iakoba e: “E oko mai koe i taau taoonga mataiapo i tenana.” Eaa ta Esau i iki i te rave? Kua akakite atu aia e kare e puapinga ana kiaia te taoonga mataiapo, e kua iki aia i te kai muramura ei mea puapinga atu i tona taoonga mataiapo! Kua inangaro a Iakoba i te  akapapu e te oko tikai maira a Esau i tona taoonga mataiapo, no reira kua pati aia kiaia kia taputou mai i te reira. Kua tuatua atu a Iakoba e: “Ka taputou mai ana i tenana”! Kare a Esau i akamanako meitaki ana, e kua oko atu i tona taoonga mataiapo. I muri ake i te reira, “kua apai aturā Iakoba i te areto e te pipi na Esau; e kua kai iora aia, e kua inu, tu akera aia ki runga, e aere atura.” Kua akaari mai a Esau e kare e puapinga ana tona taoonga mataiapo.​—Gene. 25:29-34.

⁹ No tetai au mataiti i muri mai, te manako anga a Isaaka e ka mate aia, kua akapapu a Rebeka e kia orongaia kia Iakoba te taoonga mataiapo ta Esau i oko kiaia. Te kite mai anga a Esau e kua rave aia i te ikianga tarevake na te oko anga i tona taoonga mataiapo, kua pati akatenga aia kia Isaaka e: “E akameitaki mai koe iaku, ko au katoa nei, e taku metua. . . . Kare aina koe i vaoo i tetai meitaki noku?” Te akakite anga a Isaaka kia Esau e kare e rauka iaia i te taui i te akameitakianga tana i oronga takere kia Iakoba, kua aue maata a Esau.​—Gene. 27:30-38.

10. Eaa to Iehova manako no runga ia Esau e Iakoba, e no teaa ra?

¹⁰ Eaa ta tatou ka kite mai no runga i to Esau tu mei teia papaanga? Kua akaari mai aia e e puapinga atu tona anoano pae kopapa i to te rauka mai anga te au akameitakianga ta Iehova i taputou kiaia no runga i tona tuanga akaperepere. Kare a Esau i ariki rekareka ana i tona taoonga mataiapo e kare aia i inangaro tikai ana i te Atua. E kare a Esau i akamanako ana eaa ta tana ikianga ka akatupu ki tona kopu tangata. E tuke ra a Iakoba. Kua ariki rekareka tikai aia i tona tuanga akaperepere e kua rave aia i te au ikianga meitaki ei paruru i te reira. Ei akaraanga, noatu kare i te mea mama kiaia, kua inangaro a Iakoba i te aru i te akoanga ta tona nga metua i oronga mai no te iki anga i tetai vaine nana. (Gene. 27:46–28:3) Kua akameitaki a Iehova i te tu akarongo o Iakoba na te tuku mai anga i te Mesia na roto i tona kopu tangata. Eaa ra to te Atua manako no runga ia Esau e Iakoba? Kua akakite mai a Iehova e: “I inangaro ra au ia Iakoba, Kare ra au i inangaro ia Esau.”​—Mala. 1:2, 3.

11. (a) Akapeea tatou ei au Kerititiano me puapingaia mei te papaanga o Esau? (e) Te akamarama mai anga a Paulo i ta Esau i rave, eaa ra aia i tuatua katoa ai no runga i te moeaana?

¹¹ Ka puapingaia tatou mei te papaanga o Esau. Kua akamatakite mai te apotetoro ko Paulo i te au Kerititiano kia matakite no runga i “tetai akaturi, e te tangata akono kore i te Atua, mei ia Esau ra, ko tei oko i tana tuanga tama mua i te kai anga kai okotai ra.” (Ebe. 12:16) Ka kite mai tatou i tetai apiianga mei teia akamatakiteanga. Kia ariki rekareka ua rai tatou i te au mea tapu kia rauka ia tatou i te patoi atu i te au timataanga e kia paruru i to tatou tuanga akaperepere. Te akamarama mai anga a Paulo i ta Esau i rave, eaa aia i tuatua  katoa ai no runga i te moeaana? No te mea me aru tatou i te tu o Esau i te tuku i to tatou au anoano pae kopapa ei akatere ia tatou, mama ua ia tatou i te rave i te ara mei te moeaana, e te ka tupu mai ka ngere tatou i to tatou tuanga akaperepere.

12. (a) Akapeea a Satani te tautaanga i te timata ia tatou tataki tai? (e) Eaa te au akaraanga Tuatua Tapu te ka tauturu ia tatou me timataia tatou kia rave i te tarevake?

¹² Ei au tavini no Iehova, ka rave tatou i te au mea ravarai kia kopae i te au turanga te ka timata ia tatou kia rave i te mea tau kore. E me ka timata mai tetai tangata ia tatou, ka pure tatou e kia tauturu mai te Atua ko Iehova ia tatou kia patoi i te timataanga. (Mata. 6:13) Ka tauta pakari tatou kia vai tiratiratu i roto i teia ao kino, inara ka tauta ua rai a Satani i te akaparuparu i to tatou pirianga kia Iehova. (Ephe. 6:12) Ko Satani te atua o teia akatereanga kino, e kua kite aia e akapeea me taangaanga i te au timataanga kia rave te au tangata i te au anoano tarevake. (1 Kori. 10:8, 13) Te tauta ra aia i te rave i teia kia tatou tataki tai. Akapeea me tei roto koe i tetai turanga te ka timata ia koe kia akamerengo i toou au anoano na roto i te tu tarevake? Eaa taau ikianga ka rave? Ka aru ainei koe i te tu o Esau tei tuku viviki i te au kia rave i te timataanga? Me kore ka patoi ainei koe i te timataanga e ka oro ke mei te reira mei ta te tamaiti rai a Iakoba ko Iosepha i rave, te timataia anga aia e te vaine a Potiphara?​—E tatau ia Genese 39:10-12.

13. (a) I teia tuatau, akapeea te maataanga te aru anga i te tu o Iosepha, inara akapeea tetai pae te aru anga i te tu o Esau? (e) Eaa ta tatou ka rave kia kore tatou e aru i te tu o Esau?

¹³ Maata to tatou au taeake e te au tuaine tei aro atu i te au timataanga e kua umuumuia ratou kia iki e me ka aru ratou i te tu o Esau me kore te tu o Iosepha. Maata tei rave i te mea meitaki e kua akamareka ratou i te ngakau o Iehova. (Mase. 27:11) Inara kua iki tetai pae i te aru i te tu o Esau e kare i paruru ana i to ratou tuanga akaperepere. E maata te aronga tei akoia me kore tei akaateaia mei te putuputuanga i te au mataiti no tei rave i te ainga tau kore. E mea puapinga tikai kia akapapa i to tatou ngakau i teianei kia rauka ia tatou i te patoi atu i tetai ua atu timataanga a te tuatau ki mua! (Sala. 78:8) Ka uriuri tatou e rua nga mea ta tatou ka rave kia akapapa ia tatou uaorai no te patoi anga i te au timataanga e no te rave anga i te au ikianga meitaki.

14. Eaa te au uianga te ka tauturu ia tatou kia rikarika i te kino e kia inangaro i te mea meitaki?

¹⁴ Te takainga mua, koia oki kia akamanako eaa te ka tupu me rave tatou i te ara. Me inangaro maata tatou ia Iehova, ka ariki rekareka maata atu tatou i to tatou tuanga akaperepere. Me inangaro tatou i tetai tangata, kare tatou e tamamae iaia. Mari ra, ka rave tatou i ta tatou ka rauka kia akamareka iaia. No reira kia akapou tatou i tetai taime kia akamanako eaa te ka tupu me rave tatou i te ara, koia oki, eaa te mamae te ka tupu kia tatou uaorai e ki tetai ke me rave tatou i te au angaanga tarevake. E ui tatou kia tatou uaorai e: ‘Akapeea toku tu noinoi te takino anga i toku pirianga kia Iehova? Akapeea taku ara te takino anga i toku pamiri? Akapeea te reira me takino i toku au taeake e te au tuaine i roto i te putuputuanga? Ka akariri ainei toku tu i tetai ke?’ (Phili. 1:10) Kia ui katoa tatou kia tatou uaorai e: ‘E puapinga ainei i te rave i te navenave poto ua o te ara e kia mamae a muri ake? Te inangaro tikai ra ainei au i te aru i te tu o Esau tei aue maata i tona kite anga eaa tei tupu te rave anga aia i te ara?’ (Ebe. 12:17) Me akamanako meitaki tatou i teia au uianga, ka rikarika tatou i te kino e ka inangaro i te mea meitaki. (Roma 12:9) Me inangaro tikai tatou ia Iehova, ka tauta pakari tatou i te paruru i to tatou tuanga akaperepere.​—Sala. 73:28.

15. Eaa te ka tauturu ia tatou kia papa ua no te patoi anga i tetai ua atu timataanga e kia paruru i to tatou pirianga ki te Atua?

¹⁵ Te takainga rua, koia oki kia akapapa  ia tatou uaorai kia patoi i te timataanga. Kua oronga mai a Iehova i te au ravenga kia akapapa ia tatou uaorai kia patoi i te au timataanga o teianei ao e kia paruru i to tatou pirianga kiaia. Ei akaraanga, kua akaari mai aia e akapeea tatou me puapingaia mei te apii Pipiria, te au uipaanga, te angaanga tutu anga, e te pure. (1 Kori. 15:58) I te au taime ravarai e akakite ana tatou kia Iehova na roto i te pure eaa to roto i to tatou ngakau, e me angaanga pakari tatou i roto i te angaanga orometua, te akapapa ra tatou ia tatou uaorai kia patoi i te au timataanga. (E tatau ia 1 Timoteo 6:12, 19.) Me ka inangaro tatou kia puapingaia tatou, ka anoanoia tatou kia tauta ua rai i te rave i teia au mea. (Gala. 6:7) Ka uriuriia teia i roto i te pene rua o Maseli.

16, 17. Eaa te ka tauturu ia tatou kia rave i te au ikianga meitaki?

¹⁶ Te akamaroiroi ra a Maseli pene 2 ia tatou kia angaanga pakari kia rauka mai te tu pakari e te tu kite. Ka tauturu mai teia nga tu ia tatou kia iki i te mea tika me kore i te mea tarevake, kia akatere ia tatou uaorai e kia kore e akamerengo i to tatou au anoano tarevake. Inara ka rauka ua ia tatou i te rave i teia me tauta pakari tatou. Te akamarama maira te Pipiria e: “E taku tamaiti, kia āriki mai koe i taku nei tuatua, e kia vaio marie i taku au akauenga ia koe; Kia ariu mai koe i to taringa ki te pakari, e kia kimi marie to ngakau i te kite ra; Kia kapiki nui koe i te kite, e kia akateitei i to reo kia rauka te kite ra; Kia kimi pu tikai koe iaia mei te ario ra, e kia makitoro marie koe iaia, mei te apinga uunaia ra: Ei reira koe e kite ei i te mataku ia Iehova, e e rauka ia koe te kite i te Atua. Ko Iehova oki tei oronga mai i te pakari: no roto i tona vaa te kite e te karape.”​—Mase. 2:1-6.

¹⁷ Me rave tatou i te au mea tei akatakaia i roto i taua au irava ra, ka rave tatou i te au ikianga meitaki. Ka patoi tatou i te au timataanga me akatika tatou i ta Iehova au tuatua kia taui i to tatou tu, me pure ua rai tatou no ta te Atua aratakianga, e me kimi ua rai tatou i te kite o te Atua mei te mea rai e te kimi ra tatou i te au apinganui tei uunaia.

18. Eaa taau ka tauta ua rai i te rave, e no teaa ra?

¹⁸ Te oronga ra a Iehova i te kite, te marama, te kite karape, e te tu pakari ki te aronga e tauta ra i te kimi i te reira. Me kimi maata tatou e me taangaanga i te reira, ka meitaki atu to tatou pirianga ki te Atua ko Iehova. E ka riro to tatou pirianga vaitata kiaia ei paruru ia tatou me aro atu tatou i te timataanga. Me noo vaitata ua rai tatou kia Iehova e me mataku tatou iaia, ka tauta pakari tatou kia kopae i te rave i te ara. (Sala. 25:14; Iako. 4:8) Ka riro to tatou pirianga oa kia Iehova e te tu pakari tana i oronga mai kia tatou ei tauturu ia tatou kia rave i te au ikianga meitaki te ka akamareka iaia, e te ka paruru i to tatou tuanga akaperepere.