Maata te au pa enua i te tuatau taito e tamate ana i te aronga aati ture na te ri anga ia ratou ki runga i te rakau me kore i tetai pou. E tapeka ana me kore e patiti ana to Roma i tera tu tangata ki runga i te rakau, e ka vaooia aia ki reira no tetai au ra e mate ua atu no te mea, kare e rauka akaou i te akakoromaki i te mamae, te kaki vai, te mate pongi, e te kino o te reva. Ki to Roma e utunga akama tikai kia akatatauroia no te mea kua akataka uaia te reira tu mate no te aronga aati ture kino roa atu.

E akapeea ana ra to Iseraela i taito? E ri ana rai te ngati Iseraela i te aronga rave ara ki runga i te rakau e mate ua atu? Kua akaue te Ture a Mose e: “Kia rave te tangata i te ara e tau iaia te mate, e kia tamate ravaia aia, e kua ri atura koe iaia ki runga i te rakau; Auraka tona kopapa e vaooia ki runga i taua rakau ra e kia ao te po ra, ei taua rā ra koe e tanu ei iaia.” (Deu. 21:22, 23) No reira, te taka ua ra e i te tuatau i tataia ai te au Tuatua Tapu Epera ko te tangata tei tau i te utunga o te mate, ka tamateia aia na mua e oti ka riia ai ki runga i te rakau.

No runga i teia, te akakite ra a Levitiku 20:2 e: “Ko te tangata e apai i tana i anau ra no Moloka, to te tamariki a Iseraela, e to te aronga tangata ke ke i tuitarere i roto ia Iseraela ra; ka mate roa ïa aia: na te tangata o te enua na e peî ki te toka.” Ka tamate katoaia te aronga “purepure.” Akapeea ra? Ka ‘pepeiia ratou ki te toka.’​—Levi. 20:27.

I roto ia Deuteronomi 22:23, 24, ka tatau tatou e: “Kia momokia tetai paretenia ki te tane, i rokoia iora aia e tetai tangata i roto i te oire, e kua moe iora kiaia; E arataki kotou ia raua ravarai ki vao i te ngutupa o taua oire ra, ka peî ei kotou ia raua ki te toka, e kia mate takiri raua; taua paretenia ra, no te mea i roto aia i te oire e kare rai aia i kapiki; e taua tane ra, no te mea kua moe aia i te vaine a tona taeake ra: pou atura ia koe i reira te kino i roto ia kotou.” No reira, i roto i te iti tangata Iseraela i taito, ko te tu matauia no te tamate i te aronga tei rave i te ara kino, ka pepeiia ratou ki te toka. *

Akakite maira a Deuteronomi 21:23 e “ko te tangata oki i riia ra, kua taumaaia ïa e te Atua.” Ka riro te ri anga i te kopapa mate o tetai tangata kino tei ‘taumaaia e te Atua,’ ei akamatakiteanga ki etai ke.