E mea tau kia irinaki tatou e te tuatua ra teia no runga i te au tamariki vaerua a te Atua. Eaa ra te akapapuanga?

Te akakite nei te irava mua e: “Kua akara akera te tamariki a te Atua ra i te au tamaine a te tangata nei, e te purotu ra; kua rave iora ratou i ta ratou i anoano ra, ei vaine.”​—Gene. 6:2.

I roto i te au Tuatua Tapu Epera, te au tuatua “te au tamariki a te Atua,” e te “au tamariki a tei mana ra,” tei roto ia Genese 6:2, 4; Iobu 1:6; 2:1; 38:7; e Salamo 89:6. Eaa ta teia au irava e akakite maira no runga i teia “au tamariki a te Atua”?

“Te au tamariki a te Atua” ta tatou i tatau i roto ia Iobu 1:6, taka meitaki ua e e au angera ratou tei akaputuputu mai ki mua i te aroaro o te Atua. Ko Satani tetai i rotopu ia ratou tei ‘oriori aere ana i te enua nei.’ (Iobu 1:7; 2:1, 2) Mei te reira katoa i roto ia Iobu 38:4-7, te na ko ra e “kua maeva ua te au tamariki a te Atua i te rekareka” i te akatumu anga te Atua i te enua. Tau rai e e au tamariki angera ratou no te mea kare te tangata i angaia ake. No reira ko “te au tamariki a tei mana ra” e taikuia ra i roto ia Salamo 89:6, papu tikai e e au angera ratou i runga i te rangi ma te Atua, e kare i te tangata.

Koai ma i reira “te tamariki a te Atua” tei taikuia i roto ia Genese 6:2, 4? Kia tau ki te au tuatua mou Pipiria tei taikuia mai, taka meitaki ua e e au tamariki vaerua ratou na te Atua tei aere mai ki te enua nei.

Ngata i tetai aronga i te ariki e e inangaro ana te au angera i te rave i te ainga. Te akaari maira te au tuatua a Iesu i roto ia Mataio 22:30 e kare te akaipoipo e te pirianga ainga e raveia ana i runga i te rangi. E oti akera, kua akariro ana te au angera ia ratou ei tangata i tetai au taime, e kua kaikai e kua inu kapiti ratou e te tangata. (Gene. 18:1-8; 19:1-3) No reira, e tumuanga tau kia irinaki e, i roto i to ratou tu tangata, ka rauka ia ratou i te akatupu i te pirianga ainga ki te au vaine.

E au tumuanga tau tetai i roto i te Pipiria i te irinaki e kua akapera rai tetai au angera. Kua akaaite a Iuda 6, 7 i te ara a te au tane o Sodoma tei umuumu i te anoano tika kore o te kopapa, ki to “te au angela katoa ko tei kore i akono i ta ratou orai taoonga ra, akaruke iora ra i to ratou nooanga tikai.” Aiteite ua taua au angera e te au tangata Sodoma, ‘tei tuku ua ia ratou uaorai i te ravenga kanga ra, e te anoano tika kore,’ koia oki kua rave ratou i te ainga viivii. I roto ia 1 Petero 3:19, 20 e pirianga tetai i rotopu i te au angera akarongo kore e ki te “tuatau ia Noa.” (2 Pete. 2:4, 5) No reira kua akaaiteia te au peu a te au angera akarongo kore i te tuatau o Noa, ki te ara a to Sodoma e Gomora.

Taka meitaki ua i reira e ko “te tamariki a te Atua” i roto ia Genese 6:2, 4, ko te au angera tei akariro mai ia ratou ei au tangata kopapa e tei akaturi ki te au vaine.

Akataka maira te apotetoro ko Petero i teia au vaerua e ko ratou “tei kore i akarongo i muatangana, i te akakoromaki anga roa o te Atua, ka tatari ei aia i te tuatau ia Noa.” (1 Pete. 3:20) Taka ua ra e te tuatua ra a Petero no runga i te au angera tei kapiti atu kia Satani i te meameaau. Te akakite maira a Iuda e ko te au angera ‘tei kore i akono i ta ratou taoonga, akaruke iora i to ratou nooanga tikai, kua tapekaia ratou e te Atua ki te pirianganaoa matara kore i raro ake i te poiri tangotango, e tae ua atu ki te akavaanga i te rā maata.’​—Iuda 6.

Na roto i teea tu i akarongo kore ei te au angera i to Noa tuatau? I mua ake i te Tiruvi, kua taui teia au vaerua kino ei kopapa tangata​—kare te Atua i akakoro ana i te reira no ratou. (Gene. 6:2, 4) Tetai katoa, te rave ra taua au angera i te au mea tika kore, na te piri atu anga ki te au vaine. Kare te Atua i anga mai ana i te au angera kia rave i te pirianga ainga ki te au vaine. (Gene. 5:2) Ka takoreia teia au angera kino e te akarongo kore i to te Atua tuatau. Teianei, mei ta Iuda i akakite mai, tei roto ratou i te ‘poiri tangotango,’ mei te mea rai tei roto ratou i te ngai tapekaanga.

Inaea e akapeea a Iesu te ako atu anga i teia ‘au vaerua i roto i te ngai tapekaanga’? Kua tata a Petero e kua tupu teia i muri ake te ‘akaoraia mai anga a Iesu ei vaerua.’ (1 Pete. 3:18, 19) Akamanako katoa e kua karanga a Petero e kua “ako atu” a Iesu. Te tuatua ra a Petero no runga i te ako anga tei tupu i mua ake ka tata ei aia i tana reta mua. I te akara anga, no muri ake i to Iesu akatuakaou anga, i akakite ei aia ki te au vaerua kino e ka akautungaia ratou. No reira, kare a Iesu i oronga ana i tetai manakonakoanga no ratou. Mari ra e akoanga akavaanga. (Iona 1:1, 2) Te akaari anga a Iesu i tona akarongo e te tu tiratiratu e tae ua atu ki tona mate, e te akatuakaouia mai anga, kua rauka iaia te tikaanga no te akakite i te utunga, i te akapapu anga e kare o te Tiaporo mana i rungao iaia.​—Ioa. 14:30; 16:8-11.

A te tuatau ki mua, ka tapeka e ka titiri a Iesu ia Satani e tana au angera ki roto i te vaarua takere kore. (Luka 8:30, 31; Apo. 20:1-3) Kia tae roa ki taua tuatau ra, tei roto teia au angera akarongo kore i te poiri tangotango, e e mea papu roa to ratou akapouanga.​—Apo. 20:7-10.