Tetai tuaine kare i akaipoipo, ko Angela, e 30 ona mataiti. * Ka atoro mai te aronga pakari iaia, no reira manga ru aia. Te manako nei aia e, ‘Eaa ta te aronga pakari ka tuatua mai kiaku? Kite au e kare au e tae putuputu ana ki te au uipaanga, inara roiroi tikai au me oki mai mei taku angaanga i te akono anga i te aronga pakarikari.’ Kare ko teia ua, te manamanata katoa ra a Angela i te maki o tona mama.

Naringa ko koe tetai tangata pakari e atoro ra ia Angela, ka akapeea koe me akamaroiroi iaia? Te mea mua, eaa taau ka rave i mua ake ka atoro ei koe i te aronga “roiroi”?​—Iere. 31:25.

Tetai taime, e roiroi ana tatou no te angaanga me kore te au apainga i roto i te angaanga a te Atua. Ei akaraanga, kua “rere a mate ua,” me kore kua roiroi tikai te peroveta ko Daniela, te kite anga aia i tetai orama kare aia e marama ana. (Dani. 8:27) No reira kua tono te Atua i te angera ko Gaberiela kia akamarama e kia akakite kia Daniela e kua akarongo mai a Iehova i tana au pure. Akakite katoa te angera e e tangata “akaperepere maataia” aia kia Iehova. (Dani. 9:21-23) Muri mai, kua mama mai tetai angera ke kia Daniela e kua akamaroiroi iaia ma taua au tuatua ra.​—Dani. 10:19.

Ka rauka katoa ia koe i te rave i te reira me atoro koe i tetai tangata i roto i te putuputuanga tei roiroi me kore tei taitaia. Mua ake ka atoro koe i toou taeake, akamanako meitaki i tona turanga. Eaa tona au manamanata? Akapeea teia au manamanata te akaparuparu anga iaia? Eaa tona au tu meitaki?  Kua akakite mai a Richard, e tangata pakari no tetai 20 tuma mataiti e, e akamanako ana aia i te au tu meitaki o te taeake i mua ake ka atoro ei iaia. Ka akamanako meitaki katoa aia i te turanga o te taeake. Na roto i teia tu, mama atu i te oronga i te akamaroiroi anga ta te taeake e anoano ra. Me kua parani korua ko tetai tangata pakari i te atoro i tetai taeake, e mea meitaki kia uriuri korua na mua no runga i tona turanga i mua ake ka aere ei.

E mea akama no tetai taeake i te akakite i tona au turanga ki tetai tangata pakari. Ka akapeea i reira koe me tauturu i toou taeake kia kore e akama? Penei i te akamataanga, e mea meitaki kia akaari i te mata katakata e kia tuatua akamaroiroi atu. E akamata ana a Michael, e tangata pakari no tetai 40 tuma mataiti, na te tuatua anga e: “Tetai tikaanga manea rava atu no tetai tangata pakari, koia oki te atoro anga i te au taeake i ko i to ratou kainga e kia akamatau meitaki atu kia ratou. No reira mataora tikai au i te atoro mai ia koe i teia ra.”

Me atoro koe i te taeake, ka rauka ia koe i te rave i tetai pure. I roto i taau pure, e taiku koe i tona au tu meitaki, koia oki tona akarongo, tona inangaro, me kore tona tu akakoromaki. Ko te reira ta te apotetoro ko Paulo i rave te pure anga aia no tona au taeake. (1 Tesa. 1:2, 3) Me pure korua mei teia rai te tu, ka tauturu te reira ia korua kia rotai to korua manako. Te ka tupu mai, ka riro taau ka tuatua ei akamaroiroi iaia. Ka akapumaana katoa taau pure i te taeake. Karanga tetai tangata pakari tukatau ko Ray e, e ngaropoina ana ia tatou te au mea meitaki ta tatou e rave nei i te tavini i te Atua, me akamaara mai ana ra tetai tangata ia tatou no runga i te reira, maroiroi rava atu tatou.

Tetai mataara ka rauka ia koe i te ‘tuku atu i ta te vaerua’ me kore, kia akamaroiroi  atu i toou taeake, koia oki, na te akaari anga i tetai irava kiaia mei roto mai i te Pipiria. (Roma 1:11) Ei akaraanga, penei ka manako puapinga kore tetai taeake tei taitaia mei te tata taramo rai tei akaaite iaia ki te “ue kiri i roto i te auai” tei karukaru. Noatu e te manako akapera ra aia, kua tuatua te tata taramo e: “Kare rai i ngaropoina taau ra au akonoanga iaku.” (Sala. 119:83, 176) Muri ake i taau akamarama anga i te irava kiaia, ka akapapu koe e kare ta te Atua au akauenga i “ngaropoina” ana iaia.

Ka akapeea koe me taangaanga i te Pipiria ei akamaroiroi i tetai tuaine kare e maroiroi ana i te tavini i te Atua? Penei ka riro te akatutuanga no runga i te moni titerama tei ngaro, ei akamaroiroi iaia. (Luka 15:8-10) Penei no runga mai i tetai ei akaperepereia taua moni ra. Ia koe e uriuri ra i teia akatutuanga ki te tuaine, penei ka tauturu koe iaia kia kite e koia tetai mema akaperepereia o te putuputuanga Kerititiano. Penei ka tauturu koe iaia kia kite e koia tetai mamoe a Iehova e te manako tikai maira a Iehova iaia.

E reka ua ana te au taeake i te uriuri i te au irava ta ratou i tatau ana. No reira auraka e akariro e naau ua te tuatua! Muri ake te tatau anga i tetai irava ki te taeake, penei e iki i tetai tuatua mei roto mai i taua irava ra e e pati kiaia kia akakite mai i tona manako. Ei akaraanga, muri ake te tatau anga ia 2 Korinetia 4:16, penei ka ui koe e, “Maara ra ainei ia koe te au mataara i ‘akaou’ ei a Iehova ia koe, me kore i oronga mai ei aia i te maroiroi kia koe?” Ka riro teia tu uianga me pukapuka korua, ei akamaroiroi anga ia korua.​—Roma 1:12.

Penei ka akamaroiroi koe i toou taeake na te uriurianga no runga i tetai tangata i roto i te Pipiria, tei aiteite tona turanga. Penei te aiteite ra te manako o te taeake tei taitaia mei to Hana me kore to Epaperodito. Kua taitaia raua i tetai au taime, inara kua akaperepere rai te Atua ia raua. (1 Samu. 1:9-11, 20; Phili. 2:25-30) Maata te au akaraanga Pipiria ka rauka ia koe i te taangaanga.

Muri ake i te atoroanga, e akaari ua rai i toou inangaro no toou taeake. (Anga. 15:36) Ei akaraanga, penei ka rauka ia koe i te parani kia angaanga kapiti korua i roto i te angaanga tutu anga. Me aravei a Bernard, e tangata pakari tukatau, i tetai taeake tana i atoro ana, ka ui atu aia kiaia e, “Kua puapinga ainei ta taua i uriuri ana?” Na te akaarianga i toou inangaro na roto i teia tu, ka kite koe e me e apinga ke atu rai tetai te ka tauturu i te taeake.

Tei maata atu, ka inangaro to tatou au taeake e te au tuaine i te kite e te manako ra, te marama ra, e te inangaro ra koe ia ratou. (1 Tesa. 5:11) No reira, i mua ake ka atoro ei koe i toou taeake, e akamanako i tona turanga. Pure na mua. Iki meitaki i te au irava taau ka akaari. I reira koe e kite ei i te au tuatua te ka akamaroiroi i tei “roiroi”!