1. (a) Eaa te au tu o Iehova taau i kite? (e) Me apii koe no runga i te au tu o te Atua, akapeea teia te tauturu anga ia koe?

ME AKAMANAKO koe no runga ia Iehova, eaa te au tu taau e manako ra? Penei ko te aroa, te tu tika, te pakari, e te mana. Ae, kua kite tatou e e maata to Iehova au tu memeitaki. Tere atu i te 40 tu tukeke o Iehova i uriuriia i roto i ta tatou au puka i te au mataiti i topa. Me apii koe e toou pamiri no runga i teia au tu, ka maata atu taau ka kite mai no runga ia Iehova! Ka akaperepere maata atu koe i te reira e ka inangaro koe i te aru ia Iehova e kia akapiri vaitata atu kiaia.—Iosu. 23:8; Sala. 73:28.

2. (a) Akatutu mai e akapeea te apiianga no runga i to Iehova au tu te tauturu anga ia tatou kia akaperepere i te reira au tu. (e) Eaa ta tatou ka uriuri i roto i teia atikara e te nga atikara ka aru mai?

² Akapeea koe me akaperepere i tetai apinga? Ei akatutuanga, penei ka tamata koe i tetai kai ou. Te mea mua, ka ongi koe i tona kakara, e ka tongi koe kia kite i tona reka. E oti ka tunu koe i te kai. Mei te reira rai, ka rauka ia tatou i te akaperepere i tetai tu o Iehova na te apii anga, akamanako oonu anga e te akono anga i taua tu i roto i to tatou oraanga. (Ephe. 5:1) Ka uriuri teia atikara e te nga atikara ka aru mai i tetai au tu o Iehova. No runga i teia au tu tataki tai, ka uriuri tatou i teia au uianga: Eaa te aiteanga o teia tu? Akapeea a Iehova te akaari anga i teia? E akapeea tatou me aru ia Iehova i te akaari anga i teia tu?

3, 4. (a) Eaa te aiteanga o te tu oaoa? (e) Akapeea a Iehova te akaari anga i te tu oaoa?

³ Ka uriuri ana tatou na mua i te aiteanga o te tu oaoa. Tona aiteanga, kia takinga meitaki, e kia mama ua i te tuatua e te aravei atu. Te tangata oaoa, ka akaari aia na roto i tana au tuatua, tana e rave ra  e tona mata katakata e te inangaro ra aia i te akarongo e te tauturu mai.

⁴ E Atua oaoa a Iehova. Noatu koia Tei ririnui roa atu i te ao katoa, te pati maira aia ia tatou kia pure kiaia. Ka akarongo mai aia ki ta tatou pure e ka oronga mai aia i te tauturu ta tatou e anoano ra. (E tatau ia Salamo 145:18; Isaia 30:18, 19) Ka rauka ia tatou i te pure ki te Atua i tetai ua atu ngai, i tetai ua atu taime, e noatu eaa te roa. Kare aia e riri mai me pure tatou kiaia. (Sala. 65:2; Iako. 1:5) Te akataka maira te Pipiria ia Iehova na roto i te tu e kare tatou e emiemi i te pure kiaia. Ei akaraanga, kua tata a Davida e “tei [ia tatou] to Iehova mata,” e ka turuturu mai aia ia tatou ma tona “rima katau.” (Sala. 34:15; 63:8) Karanga katoa a Isaia e mei te tiaki mamoe rai a Iehova. Kua tata aia e: “E akaputu aia i te au punua i tona rima, e ei runga ratou i tona umauma kia apai.” (Isa. 40:11) Akamanako ana! Te inangaro ra a Iehova kia akavaitata tatou kiaia mei te punua mamoe rai i roto i te nga rima o tetai tiaki aroa. Me akamanako tatou i to tatou Metua na roto i te reira tu, ka maata atu to tatou inangaro iaia! Akapeea tatou me aru ia Iehova?

5. Eaa ra i puapinga ai kia akaari te aronga pakari i te tu oaoa?

⁵ Kua uiia ki tetai Au Kite no tetai au enua ke mai e, “Ko teea tu taau e akaperepere ana no runga i tetai tangata pakari?” Kua pau mai te maataanga e, “Ko te tu oaoa.” E tika, ka inangaroia tatou katoatoa kia akatupu i teia tu, inara e mea puapinga no te aronga pakari tikai kia akaari i te reira. (Isa. 32:1, 2) Eaa ra i puapinga ai kia akaari te aronga pakari i te tu oaoa? Kua akakite mai tetai tuaine e me akaari te tangata pakari i te tu oaoa, ka kite koe i tona au tu meitaki e kare koe  e emiemi i te tuatua atu kiaia. Tika rai teia au tuatua. No reira eaa taau ka rave kia kore te tangata e emiemi i te tuatua mai kia koe?

6. Eaa taau ka rave kia kore te tangata e emiemi i te tuatua mai kia koe?

⁶ Tetai mataara, na te akaari anga e te manako tikai ra koe i tetai ke e te inangaro ra koe i te tauturu ia ratou. Kare i reira te au taeake, te au tuaine, te au tamariki e te au mapu e emiemi i te tuatua kia koe. (Mare. 10:13-16) Kua tuatua a Carlos, e 12 ona mataiti e: “E akara ana au i te mata katakata o te aronga pakari e to ratou tu takinga meitaki, ko taku te reira e reka ana.” No reira kare e tau i tetai tangata pakari kia tuatua ua e ka akarongo aia e ka oronga aia i te tauturu. E akaari ra aia i te reira. (1 Ioa. 3:18) Ka akapeea aia me rave i te reira?

7. Eaa ra te au tangata kare e emiemi ana i te tuatua kia tatou me tamou tatou i te kati uruoaanga? Eaa te apiianga no tatou?

⁷ Ei akatutuanga: Kua aere tetai taeake ki te uruoaanga i tetai enua ke. Tona oki anga ki tona enua na runga i te pairere, kua tamou aia i tona kati uruoaanga ma te au tuatua e “Kia Tae Mai te Patireia o te Atua!” Kua akara te tuati o te pairere i te kati e kua tuatua, “Ae, kia tae mai te reira!” Kua pukapuka raua, e kua ariki taua tangata ra i te makatini. Eaa ra te au tangata kare e emiemi ana i te tuatua mai kia tatou me tamou tatou i te kati uruoaanga? No te mea te kite ra ratou i runga i te kati e te aere nei tatou kiea e te akaari ra e ka inangaro tatou i te akakite atu i to tatou irinakianga. Mei te reira katoa, e mea tau kia akaari tetai tangata pakari e te inangaro ra aia i te tuatua ki te au taeake. Eaa tetai au mataara ka rauka i te aronga pakari i te rave i te reira?

8. Akapeea te aronga pakari me akaari i to ratou inangaro no te au taeake? E eaa ta teia ka akatupu i roto i te putuputuanga?

⁸ I tetai au enua, ka rauka ia koe i te akaari i toou inangaro no toou au taeake na roto i te mata katakata, mou rima, e te tuatua aroa. Koai ma te ka akaari i teia na mua? Ia Iesu e tana au pipi e uipa ra, te karanga ra te Pipiria e ‘kua akavaitata atu aia e kua tuatua kia ratou.’ (Mata. 28:18) Mei te reira katoa, ka tauta te aronga pakari i te aravei i te au taeake e te tuatua kia ratou. Eaa ta teia ka akatupu i roto i te putuputuanga? Kua tuatua tetai tuaine painia, e 88 ona mataiti e: “Me tomo atu au ki roto i te Are Uipaanga, te riro ra te mata katakata e te au tuatua akamaroiroi a te aronga pakari ei mea akaperepere naku.” Karanga mai tetai tuaine e: “E mea puapinga tikai me aravei mai tetai tangata pakari iaku i ko i te uipaanga ma te mata katakata.”

9, 10 (a) Akapeea a Iehova i riro ei ei akaraanga meitaki no tatou? (e) Akapeea te aronga pakari me aru i to Iehova akaraanga?

 ⁹ E tika, me ka inangaro tatou i te au taeake kia kore e emiemi i te tuatua mai kia tatou, e tuku tatou i tetai taime no ratou. Ko Iehova te akaraanga meitaki no tatou. Te karanga ra te Pipiria e: ‘Kare aia i atea ke atu ia tatou katoa nei.’ (Anga. 17:27) Tetai mataara ka rauka i te aronga pakari i te aru i to Iehova akaraanga, kia pukapuka ratou ki te au taeake, te au tuaine, te tamariki, te mapu e te aronga pakarikari, i mua ake e i muri ake i te uipaanga. Kua tuatua tetai taeake painia e: “Mataora tikai au me ui mai tetai tangata pakari e te peea nei au, e oti ka akarongo mai aia ki taku ka pau atu.” Karanga tetai tuaine tei tavini ana ia Iehova no tetai  50 mataiti e: “E mea akaperepere kiaku me tuku te aronga pakari i tetai taime i te tuatua mai kiaku i muri ake i te uipaanga.”

¹⁰ Tika rai, maata te au apainga a te aronga pakari. Inara, e mea tau kia tuku ratou i te taime kia pukapuka ki te au taeake i ko i te uipaanga.

11, 12 (a) Eaa te aiteanga o te tu papakitai kore? (e) Akapeea te Pipiria te akaari mai anga e kare a Iehova e papakitai ana?

¹¹ Tetai atu tu meitaki o Iehova, kare aia e papakitai ana. (Anga. 10:34) Eaa ra te aiteanga o te tu papakitai kore? Koia oki kia akono meitaki i te katoatoa. Me te inangaro ra tatou i te akono papakitai kore i tetai ke, ka anoanoia tatou kia irinaki e ka akono meitakiia te katoatoa. Ko te tangata papakitai kore, kare aia e akono atu i tetai ke no to ratou turanga meitaki, me kore e maata ta ratou moni, mari ra ka akono meitaki ua aia ia ratou.

¹² Ko Iehova te akaraanga meitaki rava atu no te akaari anga i te tu papakitai kore. Te akakite maira tana Tuatua e “kare te Atua e akono i te tu o te tangata.” (E tatau ia Angaanga 10:34, 35; Deuteronomi 10:17.) Ka uriuri tatou i tetai akaraanga te akaari maira i teia.

13, 14 (a) Eaa te manamanata o te au tamaine toko rima a Zelophehada? (e) Akapeea a Iehova te akaari anga e kare aia e papakitai ana?

 ¹³ I mua ake ka tomo ei te ngati Iseraela ki roto i te Enua Taputouia, kua tupu tetai manamanata ki te au tamaine toko rima a Zelophehada. Eaa te manamanata? Kua mate to ratou metua tane, e kare tona potonga enua i orongaia ana kia ratou. No teaa ra? No te mea kia tau ki te Ture, ka oronga uaia te enua ki te tamariki tamaroa. Kua mate to ratou metua tane e kare ana tamariki tamaroa. (Nume. 26:33, 52-55) Ka orongaia ainei te enua ki tetai kopu ke? Eaa ta te au tamaine a Zelophehada ka rave?

¹⁴ Kua aere atu ratou kia Mose e kua ui kiaia e: “Eaa e tangaroiaʼi te ingoa o to matou metua tane i tona kopu-tangata, i te mea kare ana e tamariki tamaroa?” Kua pau ainei a Mose e, ‘Ko ta te ture ia, e kare e rauka iaku i te tauturu atu ia kotou’? Kare, kua akakite aia i te manamanata kia Iehova. (Nume. 27:2-5) Eaa ta Iehova pauanga? Kua akakite aia kia Mose e: “E tuatua tika ta te au tamaine a Zelophehada e apai rai koe i tetai tuanga kainga no ratou i roto i te au taeake o to ratou metua tane; e ūē me kore, e oronga koe i te kainga o to ratou metua tane no ratou.” Kua akakite katoa aia kia Mose kia kapiti atu i teia tuatua ki roto i te Ture: “Kia mate te tangata  ra, e kare ana e tamaroa, e ūē me kore, e oronga kotou i tona kainga no te tamaine.” (Nume. 27:6-8; Iosu. 17:1-6) Mei reira mai, kua orongaia tetai potonga enua ki te au vaine ngati Iseraela i roto i taua turanga ra.

15. (a) Akapeea a Iehova te akono anga i tona iti tangata e te aronga katoa kare o ratou tauturu? (e) Eaa tetai atu au akaraanga Pipiria te akaari maira e kare a Iehova e papakitai ana?

¹⁵ Kua riro teia tukuanga tika ei akaraanga meitaki no te tu papakitai kore! Kare e tangata ke atu i te tauturu i teia au tamaine, inara kua akono meitaki e kua akangateitei a Iehova ia ratou, mei tana i rave ki tetai au ngati Iseraela. (Sala. 68:5) Ko teia tetai akaraanga i roto i te Pipiria te akaari maira e te akono meitaki ra a Iehova i tona iti tangata.—1 Samu. 16:1-13; Anga. 10:30-35, 44-48.

16. Akapeea tatou me aru i to Iehova tu papakitai kore?

¹⁶ Akapeea tatou me aru i to Iehova tu papakitai kore? Kia akamaara e, ka akono papakitai kore tatou i tetai ke me irinaki tatou e kia akono meitakiia te katoatoa. Penei ka manako koe e kare koe i te tangata papakitai. Inara e mea ngata ia tatou i te kite tikai i to tatou uaorai manako no runga i tetai ke. No reira, akapeea koe e kite ei e kare koe i te tangata papakitai? Ko Iesu te akaraanga meitaki no tatou. I tona inangaro anga i te kite i ta te tangata e tuatua ra no runga iaia, kua ui aia ki tona au oa e: “Koai au nei, te Tamaiti a te tangata, i ta te tangata tuatua anga?” (Mata. 16:13, 14) Penei ka iki koe i tetai oa taau e irinaki ra kia akakite tika mai i tona manako na te ui anga kiaia e, ‘I toou manako e akono tau ana ainei au i te tangata? Te manako ra ainei tetai ke e te akaari ra au i te tu papakitai kore?’ Penei ka akakite mai aia e, tetai taime e meitaki atu toou tu ki tetai iti tangata i to tetai, me kore meitaki atu toou tu ki te aronga e maata ta ratou moni e te aronga kite karape. Me akakite mai aia i teia kia koe, eaa taau ka rave? Pure akatenga kia Iehova kia tauturu mai ia koe kia taui i toou manako no runga i tetai ke, kia aite toou tu ki tona e kia akono meitaki koe i te katoatoa.—Mata. 7:7; Kolo. 3:10, 11

17. Eaa tetai au mataara kare tatou e papakitai ana?

 ¹⁷ I roto i te putuputuanga, ka rauka ia tatou i te aru i to Iehova tu na te akangateitei anga e te akaari anga i te takinga meitaki ki te katoatoa. Ei akaraanga, me pati koe i te au taeake kia aere mai ki toou kainga, e pati koe i te au taeake e tukeke to ratou turanga. Penei te aronga kare e maata ana ta ratou moni, te aronga kua mate to ratou tokorua, me kore te au mapu kare to ratou pamiri i roto i te tuatua mou. (E tatau ia Galatia 2:10; Iakobo 1:27.) I roto i te angaanga tutuanga, e tuatua ana tatou ki te au tangata ravarai, e te aronga no te au enua ke mai. E nenei ana te akaaerenga o Iehova i te au puka Pipiria i roto i tetai 600 reo. No reira, e tikaanga ngateitei to tatou kia akaari e kare tatou e papakitai ana!

18. Me akamanako koe no runga i to Iehova tu oaoa e tona tu papakitai kore, eaa taau ka rave?

¹⁸ Me akamanako tatou i to Iehova tu oaoa e tona tu papakitai kore, ka akaperepere maata atu tatou i teia nga tu. Te ka tupu mai, ka inangaro tatou i te aru ia Iehova e te akaari i teia nga tu na roto i te tu me akono tatou i te au taeake e te aronga ka aravei tatou i roto i te angaanga tutuanga.