Maara Ainei ia Koe?
Kua tatau meitaki ainei koe i te au itiu ou o Te Punanga Tiaki? Akara ana me ka rauka ia koe i te pau i te au uianga ka aru mai:
Eaa te angaanga purepure na roto i te puka, e eaa te manako o te au Kerititiano no runga i te reira?
Ko te angaanga purepure na roto i te puka, koia oki, ko te akatuera anga i te Pipiria e te irinaki anga e ko te irava mua te ka kiteaia, ko te reira te tauturu. Kare te au Kerititiano mou e rave ana i taua au peu purepure. Mari ra, ka apii ratou i te Pipiria kia rauka i te kite tika tikai, e te aratakianga a te Atua.—12/15, kapi 3.
Eaa ‘teia ao’ te ka ngaro ke?
Ko te au tangata ua nei kare to ratou oraanga e rotai ana ki te anoano o te Atua. (1 Ioa. 2:17) Ka ora te aronga akarongo mou e kare te enua e takoreia.—1/1, kapi 5-7.
Noatu kua mate aia, akapeea ana a Abela me tuatua mai kia tatou? (Ebe. 11:4)
E tuatua mai ana aia na roto i tona akarongo. Me apii tatou mei tona akarongo e te tauta i te aru i te reira, mei te mea rai e te tuatua maira aia kia tatou. Te vai nei rai tona akaraanga maroiroi.—1/1, kapi 12.
Eaa te au tuanga o te oraanga ka matakite tatou, kia kore e akamamao atu ia tatou mei ia Iehova?
Teia tetai au tuanga: ta tatou angaanga moni, te tamataoraanga e te tarekarekaanga, te kapitianga ki tetai kopu tangata tei akaateaia ki vao, te taangaanga anga i te au mea tekinoroti, te manamanata anga i to tatou oraanga kopapa, te manako tarevake no runga i te moni, e te manako anga maata no runga i to tatou uaorai manako me kore to tatou turanga.—1/15, kapi 12-21.
Eaa ta tatou ka kite mai mei to Mose tu akaaka?
Kare a Mose i akaparau ana te orongaia anga tetai mana taoonga kiaia. Kua irinaki aia i te Atua, kare ki runga iaia uaorai. Kare tatou e inangaro i te mana taoonga, me kore te tu kite karape ei akaparau anga no tatou; mari ra, kia irinaki tatou ia Iehova. (Mase. 3:5, 6)—3/1, kapi 5.
Eaa te tu ngateitei te ka rauka mai ia tatou no ko mai i te Atua? (Mase. 29:23)
E akangateitei ana a Iehova i tona au tavini akaaka na te tauturu anga ia ratou kia marama i tona anoano e kia rauka tetai pirianga vaitata kiaia. Ka akangateiteiia ratou ma te ingoa meitaki i mua i te Atua e tetai au tavini ke, e te tapapa anga i te oraanga mutu kore.—2/15, kapi 25, 26.
Ka noo te aronga tei akatuakaouia mai kiea?
E tokoiti ua—e 144,000—te ka noo i runga i te rangi. Te maataanga ra, ka noo ki runga nei i te enua ma te manakonakoanga no te oraanga e tuatau ua atu.—5/1, kapi 6.
Kua taputou ainei a Iesu ki te tangata kino i tetai oraanga i te rangi?
Kare. Kia tau ki te tuatua tapu, kare te tangata kino i tau ana no te oraanga i runga i te rangi. Kua rave ua ana aia i te au mea kino e kua mate aia ei tangata kino. Pera katoa, tei roto a Iesu i te vaarua mate e toru ra, no reira, kare e tau ana e kua aere aia ki runga i te rangi ki ko ia Iesu i taua ra ra. Te parataito ta Iesu i tuatua kiaia, ko te Parataito i te enua nei ta Iesu ka tutara.—5/1, kapi 11.
Eaa te aiteanga e e “ngakau peritome kore” to te ngati Iseraela? (Iere. 9:26)
E ngakau meameaau to ratou e kua anoanoia ratou kia takore i te au mea te ariu ke ra i to ratou ngakau—to ratou manako, au anoano, me kore au akakoroanga e patoi ra i to te Atua au akauenga. (Iere. 5:23, 24)—3/15, kapi 29.
Eaa te kapiti maira ki te tuanga akara mataia o te akaaerenga o te Atua?
Te kapiti maira te Pupu Akaaere, te au kumiti manga, te au akaaere tutaka, te au pupu o te aronga pakari, te au putuputuanga, e te Au Kite o Iehova.—4/15, kapi 29.
E ri ana rai te ngati Iseraela i te aronga rave ara ki runga i te rakau e mate ua atu?
Kare. Maata te au pa enua i te tuatau taito tei rave i te reira, inara kare te ngati Iseraela e akapera ana. I te tuatau i tataia te Tuatua Tapu Epera, kua tamateia te aronga kino na mua na te pepei anga ia ratou ki te toka. (Levi. 20:2, 27) E oti, penei kua riia te kopapa mate ki runga i te rakau ei akamatakiteanga ki etai ke.—5/15, kapi 13.
