I te popongi Ruitoru, ra 5 o Tepetema, 2012, kua orongaia tetai akakiteanga ki te au taeake o Betela i Marike e Kanata. Akamata i te ra 1 o Tepetema, 2012, kua riro mai a Mark Sanderson ei mema ou no te Pupu Akaaere.

Na tona nga metua Kerititiano i utuutu mai i te Taeake Sanderson i San Diego, California, i Marike, e kua papetitoia aia i te ra 9 o Peperuare, 1975. I te ra 1 o Tepetema, 1983, kua akamata aia i te painia i Saskatchewan, i Kanata. I roto ia Titema, 1990, kua oti mai aia i te apii mei te pupu itu o te Apii Terenianga Orometua (teianei ko te Apii Pipiria no te au Taeake Kare i Akaipoipo) i Marike. I roto ia Aperira, 1991, kua ikiia te Taeake Sanderson kia tavini ei painia takake i te enua o Newfoundland, i Kanata. Muri ake tona tavini anga ei komono no te akaaere kotinga, kua patiia aia kia angaanga i roto i te Betela i Kanata i roto ia Peperuare, 1997. I roto ia Noema, 2000, kua tukuia atu aia ki te opati maata i Marike, e kua angaanga aia no te Tipatimani Kimikimi no te Are Maki e i muri mai no te Tipatimani Tavinianga.

I roto ia Tepetema, 2008, kua aere atu te Taeake Sanderson ki te Apii no te au Kumiti Manga e i muri mai, kua ikiia aia ei mema no te Kumiti Manga i te Philippine. Ia Tepetema, 2010, kua patiia aia kia oki ki Marike, kia tavini ei tauturu no te Kumiti Tavinianga o te Pupu Akaaere.