1, 2. Eaa te ka anoanoia kia mareka mai te Atua ia tatou?

E INANGARO ua ana te tangata i te kite i ta tetai ke e manako ra no runga ia ratou. Inara ei au Kerititiano, e puapinga atu to Iehova manako no runga ia tatou. Koia Tei maata rava atu i te ao katoa e pini ua ake, e koia “te tumu o te ora.”​—Sala. 36:9.

² Kua akamarama mai te apotetoro ko Petero e ka anoano tatou i “te tuatua tapu” me kore te tu tapu, “e te akono i te Atua” kia mareka mai a Iehova ia tatou. (E tatau ia 2 Petero 3:11.) Ka riro to tatou tu ei mea tapu me ma to tatou oraanga. Kapiti mai ki teia, ko te tu me akamanako, me angaanga, e me akamori tatou i te Atua. Pera katoa, ka anoanoia tatou kia rave i te au angaanga ei “akono i te Atua,” tei akakeuia e to tatou aroa maata e te akangateitei anga i te Atua. No reira ko ta tatou au angaanga e rave ra e to tatou manako no runga i te Atua te mea puapinga kiaia. I te mea e ko Iehova tei ‘unuunumou i te ngakau,’ kua kite aia e me te rave ra tatou i te au angaanga tapu e te akamori ra tatou iaia.​—1 Para. 29:17.

3. Eaa te nga uianga ta tatou ka ui kia tatou uaorai?

³ Kare a Satani te Tiaporo e inangaro ana ia tatou kia akamareka i te Atua. Mari ra, te tauta nei aia i te akakore i to tatou pirianga kia Iehova. E pikikaa ua ana a Satani ei akavare ia tatou kia kore e akamori ia Iehova. (Ioa. 8:44; 2 Kori. 11:13-15) No reira, e ui tatou kia tatou uaorai e: ‘Eaa ta Satani e rave ana ei akavare i te tangata? Eaa taku ka rave kia paruru i toku pirianga kia Iehova?’

4. Ei akakore i to tatou pirianga ki te Atua, eaa ta Satani e tauta nei i te rave, e eaa te tumu?

⁴ Kua tata a Iakobo e: “Kia akatatipakeia tetai, e kia riro ua atu i te kino, kua pikikaaia te reira tangata  i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.” (Iako. 1:14, 15) Ei akakore i to tatou pirianga ki te Atua, te tauta nei a Satani i te akavare i to tatou ngakau, te tumu o to tatou au anoano.

5, 6. (a) Eaa ta Satani e rave ana ei akavare i to tatou ngakau? (e) Eaa te au ravenga e toru ta Satani e taangaanga ana kia akatupu i te au anoano tika kore i roto i to tatou ngakau, e mei teaa ra tona tu kikite?

⁵ Eaa ta Satani e rave ana ei akavare i to tatou ngakau? Te karanga ra te Pipiria e: “Te vai ua nei rai to te ao ravarai i raro ake i taua vaerua kino ra.” (1 Ioa. 5:19) Tetai ravenga kikite a Satani, te o maira “te au mea ravarai o teianei ao.” (E tatau ia 1 Ioane 2:15, 16) E tauatini ua atu mataiti te akariro anga te Tiaporo i teianei ao kia akavare i te tangata. E no te mea te noo nei tatou i roto i teianei ao, ka anoanoia tatou kia paruru ia tatou uaorai mei tana au ravenga kikite.​—Ioa. 17:15.

⁶ E tamata ana a Satani i te akatupu i te au anoano tika kore i roto i to tatou ngakau. E rave ana aia i teia na roto i te au mea e toru o “teianei ao” ta te apotetoro ko Ioane i taiku mai: (1) “te anoano tika kore o te kopapa,” (2) “te anoano tika kore o te mata,” e te (3) te “akatietie o te ora anga nei.” Kua rave a Satani i teia au mea te timata anga aia ia Iesu i roto i te metepara. I te mea kua roa a Satani te taangaanga anga i teia au ravenga kikite, kua tukatau aia e kua kite e ko teea te ravenga meitaki ei akavare i te tangata. I mua ake ka apii tatou akapeea me paruru ia tatou uaorai, ka akara ana tatou akapeea te Tiaporo te akavare anga ia Eva, inara kare aia i puapinga ana i te akavare i te Tamaiti a te Atua.

7. Akapeea a Satani te timata anga ia Eva na roto i “te anoano tika kore o te kopapa”?

⁷ Ka anoanoia te kai no te tangata kia ora ratou. No reira, kua anga te Atua i te enua kia tupu te kai. Na roto i to tatou anoano no te kai, penei ka timata a Satani ia tatou kia rave i ta te Atua kare e mareka ana. Ka akara ana tatou akapeea aia te timata anga ia Eva. (E tatau ia Genese 3:1-6.) Kua akakite a Satani kia Eva e kare aia e mate me kai aia mei “te rakau e kite ei i te meitaki e te kino.” Kua karanga aia e me kai aia i te reira, ka riro aia mei te Atua rai te tu. (Gene. 2:9) Te aiteanga o te tuatua a te Tiaporo, koia oki, kare a Eva e anoanoia kia akarongo ki te Atua kia ora aia. E pikikaa te reira! Kua akatupu te Tiaporo i teia manako ki roto ia Eva, no reira e rua a Eva ikianga: Me ka kopae aia i taua manako ra, e me ka akamanako ua atu i te reira kia tupu tona inangaro no taua kai ra. Noatu ka rauka iaia i te kai i to te au rakau  i roto i taua kainga ra, kua iki aia i te akamanako ua i te rakau i rotopu i te kainga. Tei tupu mai, kua kai aia i te ua rakau. Kua akatupu a Satani i te anoano i roto iaia no tetai mea tei tureia e te Atua.

8. Akapeea a Satani te timata anga ia Iesu na roto i “te anoano tika kore o te kopapa,” e eaa te tumu kare aia i puapinga ana?

⁸ Ia Iesu i roto i te metepara, kua timata a Satani iaia na roto i taua ravenga kikite. Kare a Iesu i kai manga ana no tetai 40 ra e te 40 po. Karanga a Satani e: “E Tamaiti koe na te Atua ra, ka karanga atu koe ki teianei toka kia riro ei kai.” (Luka 4:1-3) E rua a Iesu ikianga: Me ka taangaanga aia i tona mana i te akamerengo i tona anoano no te kai, e me kare. Kua kite a Iesu e kare aia e tau kia taangaanga i tona mana no tona uaorai akakoroanga. Noatu kua matepongi aia, kare ko te kai te mea puapinga atu kiaia, mari ra ko tona pirianga ki te Atua. Kua pau a Iesu e: “Kua tataia oki, ‘Kare o te manga anake ra te mea e oraʼi te tangata nei, ko te au tuatua katoa a te Atua ra.’”​—Luka 4:4.

9. Eaa “te anoano tika kore o te mata,” e akapeea a Satani te timata anga ia Eva na roto i teia ravenga kikite?

⁹ Tetai atu ravenga kikite a Satani ta Ioane i taiku mai, ko “te anoano tika kore o te mata.” Ka rauka i te tangata i te inangaro atu i tetai apinga na te akara ua anga i te reira. Ko teia ta Satani ravenga kikite i te timata anga ia Eva. Kua karanga aia kiaia e: “Ka puera ïa to korua mata.” Te maata atu to Eva akara anga i taua kai, maata atu tona inangaro i te reira. Kua kite a Eva ‘e e taurekareka taua pu rakau ra no te mata.’

10. Akapeea a Satani te timata anga ia Iesu na roto i “te anoano tika kore o te mata,” e eaa ta Iesu i pau atu?

¹⁰ Akapeea a Satani te timata anga ia Iesu na roto i “te anoano tika kore o te mata”? “Kua [akaari a Satani kia Iesu] i te au basileia katoa o te ao nei, i te kamoanga mata nei. Kua tuatua maira te diabolo kiaia, E oronga atu au i te au, e te inuinu i teianei pa enua, kia koe.” (Luka 4:5, 6) Kare a Iesu i kite ana i te au patireia katoa o te ao, mari ra e tutu ua no to ratou tu mekameka. Papu e kua manako a Satani e ka timataia a Iesu na roto i tana e kite atura. Akakite aia kia Iesu e: “E teianei kia tika ia koe i te akamori mai iaku, noou anake ïa.” (Luka 4:7) Kare rava a Iesu e inangaro ana kia riro tona tu mei ta Satani e inangaro ra. No reira, kua pau tika atu aia e: “Kua tataia oki e, ‘Ko toou Atua ra ko Iehova taau e akamori, e koia anake rai taau e akarongo.’”​—Luka 4:8.

11. Akapeea a Satani te akavare anga ia Eva?

¹¹ Te mea openga ta Ioane i taiku mai, ko te “akatietie o te ora anga nei.” I te  tuatau ia Adamu raua ko Eva i te enua nei, kare a raua tangata ei akaari akatietie i ta raua apinga. Inara, kua ngakau parau raua. Kua akanauru a Satani ia Eva kia irinaki e ka tau kia orongaia tetai apinga meitaki kiaia, kare ra te Atua e inangaro ana i te oronga i te reira. Kua akakite te Tiaporo kiaia e, me kai aia mei “te rakau e kite ei i te meitaki e te kino,” “ka riro aia mei te Atua ra te tu, i te kite i te meitaki e te kino.” (Gene. 2:17; 3:5) Kua inangaro a Satani ia Eva kia manako e, kare aia e anoanoia kia irinaki ia Iehova. Penei ko te tu parau tetai tumu i ariki ei a Eva i taua pikikaa ra. Kua kai aia i te ua rakau tei tureia i te irinaki anga e kare aia e mate. Inara, kua tarevake tikai aia!

12. Eaa tetai ravenga i timata ai a Satani ia Iesu, e eaa ta Iesu i pau atu?

¹² Kua akanoo a Iesu i te akaraanga meitaki tikai no te tu akaaka, kare mei ia Eva rai! Kua timata a Satani ia Iesu kia akamareka i tetai ke e kia akakoko i te Atua. Inara, kua patoi pakari a Iesu i tana timataanga no te mea ka akaari te reira i te tu parau! Taka meitaki tikai ta Iesu pauanga: “Kua tuatuaia mai e, ‘Auraka koe e akakoko atu i toou Atua ra ia Iehova.’”​—E tatau ia Luka 4:9-12.

13, 14 Eaa ta Satani e rave ana ei akavare ia tatou i teia tuatau?

¹³ I teia tuatau, te taangaanga nei a Satani i tana au ravenga kikite, mei tana rai i rave kia Eva e Iesu. Ka timata aia i te tangata na roto i “te anoano tika kore o te kopapa nei,” kia rave i tetai angaanga tau kore me kore kia kaikai maata e kia inu maata i te kava. E timata ana aia i te tangata na roto i “te anoano tika kore o te mata nei,” kia akara i te au ravenga ainga viivii i runga i te Initaneti. E taangaanga ana aia i te anoano kia akaari i te tu “akatietie o te ora anga nei” kia ngakau parau te tangata, kia inangaro i tetai taoonga rongonui, e kia maata ta ratou au apinga.

¹⁴ E taangaanga ana a Satani i “te au mea ravarai o teianei ao,” mei te maunu rai a te tangata ravakai. Akara anga manea te maunu ki te ika, inara e matau to roto. Mei te reira katoa, e taangaanga ana a Satani i te au mea e anoanoia ra no te oraanga ei akanauru ia tatou kia patoi i te au ture a te Atua. Inangaro a Satani ia tatou kia irinaki e ko to tatou anoano e to tatou oraanga te mea puapinga rava atu, kare ko te anoano  o te Atua. Ka akavareia ainei koe e taua au ravenga kikite a Satani?

15. Mei ia Iesu rai, akapeea tatou me patoi i ta Satani akavare anga?

¹⁵ Kua vare a Eva ia Satani, inara kare a Iesu i vare ana. Te timata anga a Satani ia Iesu, kua pau aia mei roto i te au Tuatua Tapu e: “Kua tataia oki” me kore, “Kua tuatuaia mai e.” Me apii meitaki tatou i te Pipiria, ka marama tatou i te au Tuatua Tapu e ka tauturu te reira ia tatou kia akamaara i te au irava me rokoia tatou i te timataanga. (Sala. 1:1, 2) Na te akamanako anga i te akaraanga o te au tavini akarongo mou o te Atua e tauturu ei ia tatou kia vai tiratiratu. (Roma 15:4) Ka paruruia tatou na te akangateitei anga ia Iehova, koia oki, te inangaro anga i tana e inangaro ra e te rikarika anga i tana e rikarika ra.​—Sala. 97:10.

16, 17 Akapeea te akamanako oonu anga ki runga i te Pipiria te tauturu anga ia tatou kia akamareka i te Atua?

¹⁶ Te akamaroiroi maira te Pipiria ia tatou kia akamanako oonu i te reira kia riro tatou ei aronga te ka manako mei te Atua rai, kare mei to teianei ao. Te akamaara maira a Paulo ia tatou kia akaaere meitaki i ta tatou e manako ra. Kua tuatua aia e: “I te uri anga atu i te au eumiumianga ra ki raro, e te au mea teitei katoa ko tei akateitei kia kore e rauka te kite i te Atua, e te akatuikaa anga atu i te au manako ravarai i te akarongo i te Mesia.” (2 Kori. 10:5) Ka riro ta tatou e manako ra ei akakeuanga ririnui ki runga ia tatou, no reira kia akamanako ua rai tatou i te au mea e akamareka ra i te Atua.​—Phili. 4:8.

¹⁷ Me ka inangaro tatou kia riro ei aronga tapu, ka anoanoia tatou kia patoi i te au manako e te au anoano tarevake. Ka anoanoia tatou kia inangaro ia Iehova ma “te ngakau mā.” (1 Timo. 1:5) Inara, e pikikaa to te ngakau, e penei kare tatou e kite mei teaa ra te akakeuanga o “te au mea ravarai o teianei ao” ki runga ia tatou. (Iere. 17:9) No reira e mea puapinga kia aru i te akoanga a Paulo e: “E kimi matatio ia kotou uaorai i to kotou akarongo; e akara matariki ia kotou uaorai.” Ia tatou e apii ra i te Pipiria, ka tau tatou kia ui e, ‘Te akamareka ra ainei au ia Iehova?’​—2 Kori. 13:5.

18, 19 Eaa ra tatou ka angaanga pakari ei kia akamareka to tatou tu ia Iehova?

¹⁸ Tetai apinga ke te ka tauturu ia tatou kia patoi i “te au mea ravarai o teianei ao,” koia oki kia akamaara i te au tuatua a Ioane e: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.” (1 Ioa. 2:17) Akara anga rai e, kare te akatereanga a Satani e ope, inara, ka takoreia te reira a tetai ra. Na te akamaara anga i teia e tauturu ei ia tatou kia kore e akavareia e Satani.

¹⁹ Te akamaroiroi maira a Petero ia tatou kia akamareka to tatou tu i te Atua i “te tatari anga, e te rapurapu anga atu, kia tae mai taua rā o te Atua ra, te rā e ngaro ei te rangi i te tutungiia i te ai, e e taravai ei te au tumu o te enua i te veravera maata?” (2 Pete. 3:12) Kare e roa atu ana, ka takore a Iehova i te au tuanga pouroa o te ao o Satani. E tae mai ei ki taua taime ra, ka timata rai a Satani ia tatou na roto i “te au mea ravarai o teianei ao,” mei tana rai i rave kia Eva e Iesu. No reira, auraka tatou e aru i to Eva tu i te akamerengo anga i to tatou uaorai au anoano. Me akapera tatou, mei te mea rai e ko Satani to tatou atua. Kia aite ra tatou mei ia Iesu rai e kia patoi i teia au timataanga, noatu eaa te manea e te meitaki o te reira me akaariia mai e Satani. Kia angaanga pakari tatou pouroa kia akamareka to tatou tu ia Iehova.