1, 2. Eaa tatou ka kore ei e akaapa ia Iehova no te au manamanata i te enua nei? Akatutu mai.

AKAMANAKO ana, kua oki mai tetai tangata akaipoipo ki te kainga e kua vavaiia te au apinga pouroa i roto i tona are. Kua takinoia tona are manea. I toou manako, koai tana ka akaapa? Ka karanga ainei aia e, “Eaa ra taku vaine i akapera ei? Kare, ka karanga aia e, “Naai i rave i teia?” Kua kite oki aia e kare tana vaine e takino i to raua kainga.

² I teia tuatau, kua takinoia te enua. Kua taeroia te one, te vai, e te reva. Te akatupu nei te tangata i te kino. Inara kua apii tatou i roto i te Pipiria e kare no Iehova te apa. Kua anga aia i te enua ei kainga parataito no tatou. (Gene. 2:8, 15) E Atua aroa a Iehova. (1 Ioa. 4:8) Te akakite maira te au Tuatua Tapu e ko Satani te Tiaporo “te ariki o teianei ao,” e te akatupu nei aia i teia au manamanata.​—Ioa. 14:30; 2 Kori. 4:4.

3. Eaa te ka tupu me manako tarevake tatou no runga i to tatou au manamanata?

³ Kare ra tatou e akaapa ia Satani no te au manamanata pouroa e tupu nei kia tatou. No teaa ra? No te mea, na tatou rai e akatupu ana i tetai au manamanata. (E tatau ia Deuteronomi 32:4-6.) Penei ka irinaki tatou i teia. Inara, no to tatou tu apa, ka akamata tatou i te manako tarevake no runga i to tatou au manamanata te ka taki atu ki te tumatetenga. (Mase. 14:12) Penei kare tatou e akaapa ia tatou uaorai me kore ia Satani, ka akaapa ra tatou ia Iehova, koia oki, ka ‘riri tatou iaia.’​—Mase. 19:3.

4, 5. Akapeea tetai Kerititiano te ‘riri anga ia Iehova’?

⁴ Ka rauka ainei ia tatou i te ‘riri ia Iehova’? Kare tatou e puapingaia me riri tatou iaia. (Isa. 41:11) Tika, penei kare roa tatou e karanga e kua riri tatou ia Iehova. Inara te akakite maira a Maseli 19:3 e ko te manako neneva o te tangata “i akamingi i tona aerenga” e no reira “kua riri iora tona ngakau ia Iehova.” Koia  oki, ka riri tetai tangata i te Atua i roto i tona ngakau. Ka taui teia i ta te tangata ka rave. Ei akaraanga, penei ka akamarie mai aia i tana tavinianga ia Iehova me kore kare aia e piri akaou ki te akamorianga a te putuputuanga.

⁵ Eaa te au mea e akanauru ana ia tatou kia ‘riri ia Iehova’? Akapeea tatou me kopae i teia ereere? Ka anoanoia tatou kia kite i te pauanga ki teia nga uianga kia paruru i to tatou pirianga ki te Atua ko Iehova!

6, 7. Eaa ra te ngati Iseraela i to Mose tuatau i urutoe ei ia Iehova?

⁶ Eaa ra tetai tavini akarongo mou o Iehova ka akamata ai i te urutoe i te Atua i roto i tona ngakau? Ka uriuri teia atikara e rima au mea e akanauru ana ia tatou kia riri i te Atua, e ka akara tatou i te au akaraanga Pipiria o tetai aronga tei ‘riri ia Iehova.’​—1 Kori. 10:11, 12

⁷ Ka akaparuparuia tatou e te tuatua kino a tetai ke. (E tatau ia Deuteronomi 1:26-28.) Akamanako ana i ta Iehova i rave no te ngati Iseraela. Kua tuku mai aia i te mate ngauru ki runga ia Aiphiti e kua takore aia ia Pharao e tona nuku vaeau i roto i te Tai Muramura. Kua akarangatiraia te ngati Iseraela! (Exo. 12:29-32, 51; 14:29-31; Sala. 136:15) Kua papa ua te iti tangata o te Atua i te tomo ki roto i te Enua Taputouia. Inara, kua akamata ratou i te urutoe ia Iehova. Eaa tei akatupu i teia? Kua taitaia ratou e kua mataku no te tuatua kino a te aronga tutaka e tai ngauru. (Nume. 14:1-4) Tei tupu mai, kare a Iehova i akatika ana ia ratou kia tomo ki roto i taua “enua meitaki” ra i te reira taime. (Deu. 1:34, 35) Eaa ta tatou i mou mai? Penei ka akaparuparuia to tatou akarongo no te tuatua kino a tetai ke, e ka akamata tatou i te urutoe i te tu e arataki ra a Iehova i tona iti tangata.

8. Eaa ra te ngati Iuda i to Isaia tuatau i akaapa ai ia Iehova no to ratou manamanata?

⁸ Ka taitaia tatou no te au tumatetenga e te au turanga ngata. (E tatau ia Isaia 8:21, 22) I to Isaia tuatau, kua o te ngati Iuda ki roto i te au turanga ngata. Kua koropiniia ratou e te au enemi. E maata tei matepongi no te rava kore o te kai. Inara, e manamanata maata atu tetai. Kare ratou i akarongo ana ki te tuatua a Iehova e kua paruparu to ratou turanga pae vaerua. (Amo. 8:11) Kare ratou i pati ana ia Iehova no te tauturu, mari ra kua akaapa ratou iaia e te ariki no to ratou au manamanata. Mei te reira katoa, me taitaia tatou no tetai tumatetenga me kore tetai atu manamanata o te oraanga, penei ka akamata tatou i te akaapa ia Iehova e ka manako e kare aia e inangaro ana i te tauturu mai ia tatou.

9. Eaa ra te ngati Iseraela i to Ezekiela tuatau i manako tarevake ei no runga i to Iehova au aerenga?

⁹ Kare tatou i kite i te au tumu. No te mea kare te ngati Iseraela i to Ezekiela tuatau i kite ana i te au tumu, kua manako ratou e kare ta Iehova au aerenga e tau ana. (Eze. 18:29) Mei te mea rai e kua tika ia ratou kia akava i te Atua e kia iki me kua tau rai tona au aerenga, noatu kare ratou i marama ana i te au tumu i akapera ei aia. Ka akapera ainei tatou? E maata te au tua i roto i te Pipiria kare tatou e marama ana, me kore e ngata ia tatou i te kite i te tumu i tupu ei tetai au mea i roto i to tatou oraanga. Ka rauka ua ia tatou i te manako e kare to Iehova au aerenga e tau ana.​—Iobu 35:2.

10. Akapeea tetai tangata te aru anga i te akaraanga o Adamu?

¹⁰ Akaapa tatou i tetai ke no ta tatou au ara e te au tarevake. Kua akaapa a Adamu  i te Atua no tana uaorai ara. (Gene. 3:12) Kua kite a Adamu e te aati ra aia i te ture a te Atua e ka akautunga te Atua iaia no tana i rave. Inara, kua akaapa aia ia Iehova no te mea na Iehova i oronga mai i tana vaine. Kua aru tetai ke i te akaraanga o Adamu na te akaapa anga i te Atua no to ratou uaorai tarevake. No reira, e ui kia tatou uaorai e, ‘Ka taitaia ainei au no taku uaorai tarevake e ka manako au e e pakari roa to Iehova au turanga?’

11. Eaa te apiianga ta tatou ka mou mai mei te akaraanga o Iona?

¹¹ Akamata tatou i te manako ua ia tatou uaorai. Kua riri te peroveta ko Iona te akaari anga a Iehova i te tu tangi no te iti tangata o Nineve. (Iona 4:1-3) No teaa ra? Kua manako aia e ka karanga te tangata e e peroveta pikikaa aia no te mea kare te oire o Nineve i takoreia mei tana rai i akakite. I te akara anga, maata atu to Iona manako no runga iaia uaorai, kare i runga i te tangata. Ka aru ainei tatou i to Iona tu? Me manako ua tatou ia tatou uaorai, penei kare tatou e akamanako atu i te tangata. Ei akaraanga, penei kua roa tatou te tutu aere anga e te vaitata maira te ra o Iehova. Inara, me aviri mai tetai tangata ia tatou no te mea kare taua ra i tae mai ake, ka akaapa ainei tatou ia Iehova?—2 Pete. 3:3, 4, 9.

12, 13 Eaa ta tatou ka rave me kare tatou e reka ana i ta Iehova au angaanga e tana e akatika ra kia tupu?

¹² Eaa ta tatou ka rave me kare tatou e reka ana i ta Iehova au angaanga e tana e akatika ra kia tupu? Kia akamaara e kare i te mea tau kia manako akapera. Te akakite maira a Maseli 19:3 e, no to tatou tu neneva, ka akaapa tatou ia Iehova no te au manamanata ta tatou i akatupu. No reira, ka akamanako tatou e rima au mataara ei tauturu ia tatou kia kore rava e riri ia Iehova.

¹³ Akaketaketa i toou pirianga kia Iehova. Me e pirianga vaitata to tatou kia Iehova, kare tatou e riri iaia. (E tatau ia Maseli  3:5, 6) Ka anoanoia tatou kia irinaki ia Iehova. Auraka rava tatou e manako e e kite atu tatou ia Iehova me kore, e puapinga atu to tatou au anoano. (Mase. 3:7; Kohe. 7:16) Ka tauturu teia ia tatou kia kore e akaapa atu iaia me tupu te kino.

14, 15 Eaa te ka tauturu ia tatou kia kore te au tuatua kino a tetai ke e akaparuparu ia tatou?

¹⁴ Auraka e tuku i te tuatua kino a tetai ke kia akaparuparu ia koe. E maata te au tumu no te ngati Iseraela i to Mose tuatau kia irinaki e ka arataki a Iehova ia ratou ki roto i te Enua Taputouia. (Sala. 78:43-53) Inara, te tuatua anga te aronga tutaka e tai ngauru i te au mea kino no runga i taua enua ra, karanga te Pipiria e “kare [te ngati Iseraela] i manako i tona rima,” koia oki, kua ngaropoina ia ratou ta Iehova i rave no ratou. (Sala. 78:42) Me akamanako oonu tatou no runga i te au mea umere ta Iehova i rave no tatou, ka akavaitata atu tatou kiaia. Te ka tupu mai, kare tatou e akatika i ta tetai ke ka tuatua kia akatakake ia tatou mei ia Iehova.​—Sala. 77:11, 12

¹⁵ Eaa te ka tupu me manako kino tatou no runga i to tatou au taeake e te au tuaine? Penei ka akatakake teia ia tatou mei ia Iehova. (1 Ioa. 4:20) Ei akaraanga, te ikiia anga a Aarona ei taunga maata, kua urutoe te ngati Iseraela iaia. Inara, kia Iehova, mei te mea e kua urutoe ratou Iaia. (Nume. 17:10) Mei te reira katoa, me urutoe tatou i te aronga ta Iehova i akanoo kia akaaere i tana angaanga i te enua nei, te urutoe ra tatou ia Iehova.​—Ebe. 13:7, 17

16, 17 Eaa te tumu kare tatou e akaapa ia Iehova no to tatou au manamanata?

¹⁶ Kia akamaara e kare a Iehova e akatupu ana i to tatou au manamanata. I to Isaia tuatau, kua akaruke te ngati Iseraela ia Iehova, inara kua inangaro rai Aia i te tauturu ia ratou. (Isa. 1:16-19) Me aro atu tatou i te au manamanata i teia tuatau, e mea pumaana i te kite e te manako maira te Atua ia tatou e ka inangaro aia i te tauturu mai. (1 Pete. 5:7) Te taputou maira a Iehova e ka akamaroiroi aia ia tatou kia vai tiratiratu kiaia.​—1 Kori. 10:13.

¹⁷ Kua tupu te au manamanata kia Iobu noatu tona tu tiratiratu kia Iehova. Me tupu te manamanata kia tatou, kia akamaara tatou e kare na Iehova te reira i akatupu. Te karanga ra te Pipiria e e rikarika ana a Iehova i te tu tika kore e te inangaro ra aia i te tuatua tika. (Sala. 33:5) Ka inangaro tatou kia aite to tatou tu mei te taeake rai o Iobu, ko Eliu, tei karanga e: “E atea ke te tuatua kino ia Iehova e te ara.” (Iobu 34:10) E oronga mai ana a Iehova i ‘te au mea memeitaki, e te au mea tika ravarai’ kia tatou. Kare rava aia e akatupu ana i to tatou au manamanata.​—Iako. 1:13, 17

18, 19 Eaa tatou ka kore ei e ekoko ia Iehova? Akatutu mai.

¹⁸ Auraka e ekoko ia Iehova. E Atua apa kore a Iehova, e e teitei atu tona manako i to tatou. (Isa. 55:8, 9) Me akaari tatou i te tu akaaka e te tu tau, ka rauka ia tatou i te karanga e kare tatou e marama roa ana i te au mea katoa. (Roma 9:20) Maataanga o te taime, kare tatou i kite i te au tumu i tupu ei tetai au manamanata. Penei kua kite koe i roto i toou oraanga i te tikaanga o teia materi: “Ko tei na mua i te akakite i tana tuatua, e ana nei e te tika ra tana, te aere maira ra tei patoi iaia, ei reira aia e kiteaʼi.”​—Mase. 18:17.

¹⁹ Tetai akaraanga, penei ka rave tetai oa mou i tetai angaanga kare tatou e marama ana, me kore kua manako tatou e kare te reira i tano ana. Ka viviki ainei tatou i te manako e kua rave aia i te tarevake? Kare. Mari ra, ka manako tatou e kare tatou i kite i te au tumu. Me ka irinaki  tatou i to tatou oa mou, kare ainei e ka irinaki tatou i to tatou Metua i te rangi? E teitei atu tona au manako e tona au aerenga i to tatou!

20, 21 Eaa tatou ka kore ei e akaapa ia Iehova no to tatou au manamanata?

²⁰ Akamaara i te tumu tikai i tupu ei te au manamanata. Ka anoanoia tatou kia kite e na tatou rai e akatupu ana i tetai au manamanata. (Gala. 6:7) Eiaa tatou e akaapa ia Iehova. No teaa ra? Ei akaraanga, eaa te ka tupu me akaoro viviki tetai tangata i tona motoka i runga i te ngai amingi o te mataara? Ka u aia. I toou manako ka tau aia i te akaapa i te aronga tei maani i te motoka? Kare! Mei te reira katoa, kua oronga mai a Iehova i te tikaanga kia tatou kia rave i ta tatou uaorai au ikianga. Inara, kua apii katoa aia ia tatou akapeea me rave i te au ikianga meitaki. No reira kare tatou e tau kia akaapa ia Iehova me rave tatou i te au tarevake.

²¹ Inara, kare to tatou au manamanata e na tatou uaorai e akatupu ana. E tupu ana tetai au manamanata no te au tupuanga kitea koreia. (Kohe. 9:11) Pera katoa, auraka e akangaropoina e ko te Tiaporo ko Satani te tumu maata i tupu ei te kino i teianei ao. (1 Ioa. 5:19; Apo. 12:9) Ko Satani te enemi, kare ko Iehova!​—1 Pete. 5:8.

22, 23 Eaa ta tatou ka akamaara me taitaia tatou?

²² Me aro atu koe i te au turanga ngata, e akamaara i te akaraanga o Iosua e Kaleba. Kua akakite te au tutaka e tai ngauru i te au mea kino no runga i te Enua Taputouia, inara kua akakite a Iosua e Kaleba i te au mea meitaki. (Nume. 14:6-9) Kua akaari raua i to raua irinaki ia Iehova. Noatu rai, kua aaere raua e to Iseraela i roto i te metepara no tetai 40 mataiti. Kua kopekope ainei me kore kua riri ainei a Iosua e Kaleba no tei akautungaia raua? Kare. Kua irinaki raua ia Iehova, e kua akameitaki mai aia ia raua. Noatu e maata te ngati Iseraela tei mate i roto i te metepara, kua akatika a Iehova ia Iosua e Kaleba ki roto i te Enua Taputouia. (Nume. 14:30) Mei te reira katoa, ka akameitaki mai a Iehova ia tatou me kare tatou “e akaparuparu” i te rave i tona anoano.​—Gala. 6:9; Ebe. 6:10.

²³ Me taitaia koe no te au tarevake a tetai ke me kore i toou uaorai au manamanata, eaa taau ka rave? Akamaara i te au tu umere o te Atua ko Iehova. Akamanako i te au mea manea ta Iehova i taputou i te oronga mai kia koe. Ui kia koe uaorai e mei teaa ra te tu o toku oraanga me kare oku pirianga vaitata kia Iehova? Kia piri vaitata ua rai kiaia, auraka e riri iaia i roto i toou ngakau!