Te arumaki ra te ariki o Suria ia Elisaia, te peroveta o te Atua. Kua akarongo aia e tei roto a Elisaia i tetai oire i runga i te maunga, ko Dotana. I te reira po, kua tono te ariki i tana nuku vaeau ki Dotana ma te au oroenua e te au kariota tamaki. I te popongi roa, kua akapini ratou i taua oire ra.​—2 Ari. 6:13, 14

Te ara anga te tavini o Elisaia i te akirata e kua aere ki vao, kua kite aia i te au enemi e kua mataku aia. Kua kapiki aia e: “Aue, e taku pu e! Akapeea tatou nei?” Kua na ko a Elisaia e: “Auraka e mataku: e maata oki to tatou pae, e iti to ratou.” E oti kua pure te peroveta e: “E Iehova e, teia taku tuatua kia koe, e akapuera koe i tona mata kia kite aia.” Karanga katoa te irava e: “Kua akapuera akerā Iehova i te mata o taua tangata ou ra; kite atura aia: e i na, kua ki te maunga i te oroenua e te kariota ai i te akapini anga ia Elisaia.” (2 Ari. 6:15-17) Eaa ta tatou i apii mai mei teia?

Noatu kua koropiniia a Elisaia e te nuku o Suria, kare aia i mataku ana. Kua irinaki aia ia Iehova e kua kite i tona paruruanga. I teia tuatau, kare tatou e tapapa ana i tetai au temeio, inara, taka ua kia tatou e te paruru nei a Iehova i tona iti tangata. Ka rauka ia tatou i te karanga e te kite ra tatou i te au oroenua e te au kariota ai e paruru maira ia tatou. Me papu ia tatou e te paruru maira a Iehova i tona iti tangata e me irinaki ua rai tatou kiaia, ka rauka ia tatou te tu tinamou e tana akameitakianga. (Sala. 4:8) Ka akara ana tatou akapeea tatou e puapinga ai mei tetai au mea ke tei tupu i roto i te oraanga o Elisaia.

Tetai ra, te arote ra a Elisaia, kua aere mai te peroveta ko Elia e kua tuku i tona kakau ki runga iaia. Tona rave anga i teia, te pati ra a Elia ia Elisaia kia tavini iaia. Kua pati a Elisaia i tona au oa ki tetai umu kai, kua ongi atu i tona nga metua, e kua akaruke aia i tona ngutuare kia aru ia Elia. (1 Ari. 19:16, 19-21) No te mea kua rave puareinga ua a Elisaia i ta te Atua i inangaro, kua rauka ia Iehova i te taangaanga iaia, e kua ikiia aia ei mono atu ia Elia ei peroveta i muri mai.

 Penei, e ono mataiti to Elisaia tavini anga ia Elia. I taua tuatau ra, te karanga ra te Pipiria e ko Elisaia “tei riringi i te vai ki runga i te rima o Elia.” (2 Ari. 3:11) Eaa te aiteanga o te reira? E mea matau no te tangata i taua tuatau ra i te kai manga ki to ratou rima. Me oti ratou i te kai manga, na te tavini e apai mai i te vai kia tama i te rima o tona pu. No reira e au angaanga akaaka tetai ta Elisaia i rave. Inara kiaia, e tikaanga ngateitei teia kia riro mai ei tavini no Elia.

Mei te reira katoa i teia tuatau, e maata te au Kerititiano tei rave puareinga ua i te au angaanga tukeke i roto i te tavinianga tamou. Te tumu? No to ratou irinaki ia Iehova e te inangaro i te rave i ta ratou ka rauka. Ei akaraanga, e akaruke ana tetai pae i to ratou kainga kia angaanga i roto i te Betela me kore te angaanga patu are. Penei ka rave ratou i te au angaanga ta te maataanga e manako ana e e puapinga kore e te akaaka roa. Inara, auraka tatou e manako akapera. E akaperepere ana a Iehova i te angaanga a tona au tavini.​—Ebe. 6:10.

I mua ake ‘ka apai ei te Atua ia Elia na roto i tetai puaioio ki runga i te rangi,’ kua tono aia iaia kia aere mei Gilagala ki Betela. Kua akakite a Elia kia Elisaia e eiaa e aru iaia, inara kua pau mai a Elisaia e: “Kare au e akaruke ia koe.” I to raua aere anga, e rua taime to Elia raurau anga ia Elisaia kia kore e aru iaia, kare ra a Elisaia i akarongo ana. (2 Ari. 2:1-6) Kua aru rai a Elisaia ia Elia, mei ia Ruta rai te aru anga ia Naomi. (Ruta 1:8, 16, 17) Kua ariki rekareka a Elisaia i te tikaanga ngateitei kia tavini ia Elia, no te mea ko tana angaanga te reira i orongaia mai e te Atua.

Kua akanoo a Elisaia i te akaraanga meitaki no tatou. Ka akaperepere tatou i tetai ua atu angaanga ka orongaia mai kia tatou i roto i te akaaerenga o te Atua, me akamaara tatou e te tavini nei tatou ia Iehova. Kare atu e tikaanga ngateitei mei teia rai.​—Sala. 65:4; 84:10.

To raua aere anga, kua karanga a Elia kia Elisaia e: “E pati mai e akapeea atu au ia koe, ka rave keia atu ei au ra.” Kua pau atu a Elisaia e: “Kia rua mairai taku i tenana vaerua i roto ia koe na.” Mei ta Solomona i rave i mua ana, kua pati a Elisaia i te mea te ka tauturu iaia kia tavini meitaki ia Iehova. (1 Ari. 3:5, 9; 2 Ari. 2:9) Eaa ta Elisaia i pati? I Iseraela, ka orongaia e rua tuanga o te au apinga a tetai tangata ki tana tama mua. (Deu. 21:15-17) No reira, te pati ra a Elisaia kia mono aia ia Elia ei peroveta. Kua pati katoa aia i te vaerua o Elia, no te mea kua inangaro aia i te ngakau toa e te maroiroi no te akamorianga mou mei to Elia rai.​—1 Ari. 19:13, 14

Akapeea a Elia te pau anga i te patianga a tona tavini? Karanga aia e: “E mea rauka ngata taau i pati mai na: kia kite mai koe iaku, kia raveia mai au ra, ka akaperaia mai koe, kia kore ra, kare e akaperaia.” (2 Ari. 2:10) E rua tuanga i roto i te pauanga a Elia. Te mea mua, ko te Atua anake te ka iki me ka orongaia ta Elisaia i pati. Te rua, me ka orongaia te reira kia Elisaia, ka anoanoia aia kia aru ia Elia, noatu eaa te ka tupu.

Kua oronga ainei te Atua i ta Elisaia i pati? Te na ko ra te Pipiria e: “Te aere ua ra raua, karangaranga uaʼi, e i na, e kariota ai, e te au oroenua ai, taka ke akera raua; riro aturā Elia na roto i te puaioio ki runga i te rangi. Te kite aturā Elisaia.” * Ko ta Iehova pauanga te reira ki te patianga a Elisaia. Kua kite a Elisaia i te apaiia anga a Elia, kua orongaia e rua tuanga o te vaerua o Elia kiaia, e kua mono aia ia Elia ei peroveta.​—2 Ari. 2:11-14.

Kua mou mai a Elisaia i te kakau o Elia e kua aao i te reira. Te kite anga te tangata ia Elisaia i roto i taua kakau ra, kua kite ratou i teianei e koia te peroveta o te Atua. I muri mai, kua akaari akaou aia e koia te peroveta o te Atua na te vee anga i te vai i roto i te Kauvai Ioridana.

Kare ekoko e kare a Elisaia i ngaropoina ana i tana i kite te aere anga a Elia na roto i te puaioio. Ka umere rai te tangata me kite ratou i tetai kariota e te au oroenua ai! E akapapuanga teia kia Elisaia e kua oronga a Iehova i tana i pati. Me pau mai te Atua i ta tatou au pure, kare tatou e kite i tetai orama no tetai kariota ai e te au oroenua. Inara te taka ua ra kia tatou e te taangaanga nei te Atua i tona mana ei tauturu ia tatou e kia akatupu i tona anoano. Me kite tatou i te akaaerenga o Iehova i te enua nei e tupu  ra, mei te mea e te kite nei tatou i tona kariota i runga i te rangi e tere ra ki mua.​—Eze. 10:9-13.

E maata ta Elisaia i kite tei akapapu kiaia i to Iehova mana ririnui. Ei akaraanga, kua tauturu te vaerua tapu o te Atua iaia kia rave e 16 temeio. E rua taime maata atu i ta Elia i rave. * Te koropiniia anga te nuku o Suria i Dotana, ko te rua taime te reira to Elisaia kite anga i te au oroenua e te au kariota ai.

Noatu kua koropiniia aia e te au enemi i Dotana, kare a Elisaia i mataku ana. Eaa te tumu? No tona akarongo ketaketa i roto ia Iehova. Ka anoano katoa tatou i taua tu akarongo. No reira, e pure tatou no te vaerua tapu o te Atua kia rauka ia tatou i te akaari i te akarongo e tetai au tuanga ke o te ua o te vaerua.​—Luka 11:13; Gala. 5:22, 23

Kua riro te au mea tei tupu i Dotana ei tumuanga tau no Elisaia kia irinaki ia Iehova e tona nuku angera. Kua tono te Atua i tana au angera kia koropini i te oire e kia paruru iaia mei tona au enemi. E oti kua akaora mai te Atua ia Elisaia e tona tavini na te ta anga i te au enemi kia matapoia. (2 Ari. 6:17-23) I taua tuatau e tetai au tuatau ke mai, kua akaari a Elisaia i tona akarongo e tona irinakianga ia Iehova.

Mei ia Elisaia rai, kia irinaki tatou ki te Atua ko Iehova. (Mase. 3:5, 6) Me akapera tatou, ‘ka aroa mai, e ka akameitaki mai te Atua ia tatou.’ (Sala. 67:1) E tika, kare tatou e koropiniia ana e te au oroenua e te au kariota ai, inara te paruru nei a Iehova i tona iti tangata i teia tuatau. I te tuatau o te “mate maata,” ka paruru rai a Iehova i tona iti tangata. (Mata. 24:21; Apo. 7:9, 14) E tae mai ei taua tuatau ra, kia akamaara ua rai tatou e “ko te Atua anake ra to tatou akapuanga.”​—Sala. 62:8.