Kare e tumuanga tau kia manamanata roa no runga i te ngai ka noo tetai tangata tei akaateaia kia vao i roto i te Are Uipaanga Patireia. E akamaroiroi ua ana teia makatini i te au metua Kerititiano, me ka tau rai teia no ratou, kia oronga i te tauturu pae vaerua ki ta ratou tamaiti kua akaateaia ki vao e te noo ra rai i te kainga. Mei tei akakiteia i roto i Te Punanga Tiaki o Noema 15, 1988, kapi 19 e te 20, ka rauka i te au metua i te apii i te Pipiria kiaia. Te irinakiia nei e ka ariki te tamaiti i te akamaroiroianga e anoanoia ra kia akatikatika i tona oraanga.

No runga i te ngai ka noo i roto i te Are Uipaanga Patireia, e mea tau kia noo te tamaiti ki te pae i tona nga metua e kia kore aia e tuatua atu ki tetai ke. I te mea e kare e umuumuia kia noo tetai tangata kua akaateaia ki vao ki muri roa, kare e araiia me noo te tamaiti ki te pae i tona nga metua. No te mea na te nga metua e akono i te turanga pae vaerua o ta raua tamaiti, ka inangaro raua i te akapapu e te puapingaia ra aia mei te au uipaanga. Me noo te tamaiti i te pae ia raua, ka rauka ia raua i te tauturu iaia kia rave i te reira.

Akapeea me kare te tamaiti tei akaateaia kia vao e noo ana i te kainga ma tona nga metua? Ko te aiteanga ainei e kare aia e akatikaia kia noo ki te pae i tona nga metua? I mua ana, kua akataka meitaki teia makatini i ta te au Kerititiano ka rave no runga i te kapitianga ki tetai kopu tangata tei akaateaia ki vao e kare e noo ana i te kainga. * Inara, e aka tuke te turanga me noo tetai tamaiti tei akaateaia ki vao ki te pae i tona kopu tangata ma te kore e tuatua atu ki tetai ke, e te kapitianga kiaia. Me kare te kopu tangata e kimi kotoeanga kia kapiti atu ki te tamaiti tei akaateaia ki vao e te aru ra ratou i te akoanga Tuatua Tapu, kare e tumu kia manamanata.​—1 Kori. 5:11, 13; 2 Ioa 11.

Kare e manamanata me ka noo tetai tangata tei akaateaia ki vao ki te pae i tona kopu tangata me kore i tetai ua atu tangata i roto i te putuputuanga, me kare aia e tuatua atu ki tetai ke. Me ka araiia aia, ka akatupu te reira i te au manamanata tukeke. Me tauta te au taeake e te kopu tangata akarongo mou i te akangateitei i te au kaveinga Pipiria no te akaatea anga ki vao, e kare te reira e akaturori i te au taeake, eiaa e manamanata i te ngai ka noo te tangata tei akaateaia ki vao i roto i te Are Uipaanga Patireia. *