“I NA, te tamariki ra, e tuanga ïa no ko ia Iehova ra; ta te kopu i anau ra, e tutaki ïa,” i karanga ai te Pipiria. (Sala. 127:3) No reira kare i te mea poitirere me rekareka tikai te nga metua Kerititiano i ta raua pepe ou.

Kapiti atu ki te rekareka, e au apainga maata tetai me anau mai te pepe. E tupu meitaki ei tetai tamaiti, ka anoano aia kia kai putuputu i te kai meitaki. Kia ngaueue kore aia no te akamorianga mou, ka anoano aia i te kai vaerua e te aratakianga a tona nga metua. Kia tauta katoa raua i te apii i te au kaveinga a te Atua kiaia. (Mase. 1:8) Eaa te taime meitaki i te tereni i tetai tamaiti, e eaa te au mea te ka kapitiia mai ki te reira?

Akamanako ana i te turanga o te tangata ngati Dana ko Manoa, e noo ra i te oire o Zora i Iseraela taito. Kua akakite te angera a Iehova ki te vaine pa a Manoa e ka anau aia i tetai tamaiti. (Aka. 13:2, 3) Kare ekoko e kua rekareka a Manoa e tana vaine i taua nuti ra. Inara, e au manamanata katoa to raua. No reira kua pure a Manoa e: “E taku Atu e, e tuku akaou mai koe kia maua nei i taua tangata no te Atua taau i tono maira, e akakite mai kia maua i ta maua e rave i taua tamaiti te ka anau ra.” (Aka. 13:8) Kua apii a Manoa e tana vaine i ta raua tamaiti ko Samasona i te au ture a te Atua, e kua puapingaia ta raua apii anga. ‘Kua akamata maira te vaerua o Iehova i te akamaroiroi ia Samasona,’ i karanga ai te Pipiria. Tei tupu mai, e maata te au angaanga ririnui ta Samasona i rave ei akava no Iseraela.​—Aka. 13:25; 14:5, 6; 15:14, 15.

Eaa te taime meitaki no te nga metua i te tereni i ta raua tamaiti? ‘Mei te tamariki anga mai,’ kua tereniia a Timoteo e tona metua vaine ko Eunike, e tona mama ruau ko Loi, i “te au tataanga tapu.” (2 Timo. 1:5; 3:15) Ae, kua apii a Timoteo i te au Tuatua Tapu mei tona pepe anga mai.

Ka tau te au metua Kerititiano kia pure no te aratakianga a te Atua e kia parani na mua kia rauka ia raua i te tereni i ta raua tamaiti ‘mei te tamariki anga mai.’ “Te kimianga o te aronga maroiroi ra, tei runga ïa i te apinga maata,” ta Maseli 21:5 e akakite maira. Mua ake ka anau ei ta raua pepe, kare ekoko ka akapapa meitaki te nga metua. Penei e akapapaanga ta raua no te au mea ka anoanoia no te pepe. Inara, e puapinga katoa kia parani raua no te au mea pae vaerua. To raua akakoroanga, kia apii i ta raua pepe i muri ake i te anau mai anga.

Te taiku maira tetai puka no runga i te puapinga o te au marama i muri ake te anau anga te pepe no te mea te pakari maira tona roro. No reira, ko teia te tuatau no te nga metua kia apii i te au mea pae vaerua kiaia!

No runga i tana tamaine, kua karanga tetai metua vaine painia tamou e: “E tai rai ona marama, kua apai au iaia ki roto i te angaanga orometua. Noatu kare aia i marama i te au mea e tupu ra, irinaki tikai au e ka puapingaia aia. Te maata mai anga aia, kua rauka iaia i te oronga i te au aenga pepa ki te aronga ta maua i aravei i roto i te angaanga tutuanga.”

Na te tereni anga vave i tetai tamaiti e rauka mai ei te puapinga. Inara, te kite ra te au metua e kare te reira i te angaanga mama ua i te rave.

E akaaoanga maata ki te nga metua me kare te manako o te tamaiti e mou ana. E taui viviki ua ana te manako o te au tamariki mei tetai apinga ki tetai no te mea, ka inangaro ratou i te akara aere i te au angaanga e tupu ra. Eaa ta te nga metua ka rave ei tauturu i ta raua tamaiti kia mou tona manako ki runga i ta raua e apii ra kiaia?

Akamanako ana i ta Mose i tuatua. Te akakite ra a Deuteronomi 6:6, 7 e: “E teianei au tuatua taku e akaue atu kia koe i teianei rā, ei roto i toou ngakau vai ei; E ka apii tamou tikai koe i te reira ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga.” Te aiteanga o te tuatua “apii tamou,” koia oki, kia apii putuputu. Mei te pu rakau ou ua tetai tamaiti meangiti, e ka anoanoia kia akainu putuputu iaia ki te vai. I te mea e me apii putuputu te aronga mamaata i te akamaara i tetai au mea puapinga, papu e ka tauturu katoa te reira i te tamariki!

Ka anoanoia te au metua kia taporoporo i te tuatau kia apii i te tamariki i te au tuatua mou a te Atua. Inara e akaaoanga tikai i te akanoo anga i tetai tuatau no te maata o te au mea e tupu ra. Tera ra, kua akamaroiroi mai te apotetoro ko Paulo kia “taporoporo marie i te tuatau” no te au angaanga puapinga pae vaerua. (Ephe. 5:15, 16) Akapeea te au metua me rave i teia? Kua akanoo meitaki tetai akaaere Kerititiano, tana vaine te painia tamou ra, i tetai tuatau no te tereni anga i ta raua tamaine, te akono anga i te au apainga teokaratiki, e te rave anga i tana angaanga moni. Akapeea raua te taporoporo anga i te tuatau kia tereni i ta raua tamaine? Karanga te  papa e: “I te au popongi i mua ake ka aere au ki te angaanga, ka tatau maua ko taku vaine i Taku Puka Tua Pipiria me kore te Examining the Scriptures Daily kiaia. I te aiai i mua ake ka moe aia, ka tatau maua i tetai puka kiaia, e te taime no te angaanga orometua, ka aere matou pouroa ki vao. Kare maua e inangaro ana kia ngere maua i teia au mataiti mua o tona oraanga.”

Papu e ka inangaro tatou kia riro mai ta tatou tamariki ei aronga mako. Inara, te tumu maata ka tereni ei tatou ia ratou, koia oki kia akatupu i te inangaro no te Atua i roto i to ratou ngakau.​—Mare. 12:28-30.

Te na ko ra a Salamo 127:4 e: “Mei te kakao i te rima o te aronga ririnui ra, koia katoa te tamariki o te ou anga ra.” Te akaaiteia ra te tamariki ki te kakao tei akatanotanoia kia puta te takete. Me akarere te tangata ana i tana kakao, kare roa e rauka iaia i te akaoki mai. E ‘au kakao’ ta te au metua​—ta ratou tamariki—​no tetai tuatau poto ua. No reira, kia taangaangaia taua tuatau ra i te apii i te au kaveinga a te Atua kia mou ki roto i te manako e te ngakau o ta ratou tamariki.

No runga i tana au tamariki i roto i te tuatua mou, kua tata te apotetoro ko Ioane e: “Kia kite au e, te aere ra taku au tamariki na te tuatua-mou, kare oku e rekareka anga maata atu.” (3 Ioa. 4) Ka rauka i te au metua Kerititiano i te akakite katoa i to ratou rekareka me kite ratou i ta ratou tamariki ‘e aere ra na te tuatua-mou.’