1. Eaa te au tumu manako ta tatou e apii putuputu ana, e akapeea te apii anga i te reira i te tauturu anga ia tatou?

ME AKAPAPA koe i taau Apii Punanga Tiaki, e manako ana ainei koe e, ‘Kare ainei kua uriuri ana tatou i teia tumu manako?’ Me kua roa koe te aere anga ki te au uipaanga a te Au Kite o Iehova, kare e kore kua kite koe e e uriuri putuputuia ana tetai au tumu manako. E maata te taime e apii ana tatou no runga i te Patireia o te Atua, te atinga oko, te angaanga tutu aere, e te au tu mei te aroa e te akarongo. Na te apii putuputu anga i teia au tumu manako e akaketaketa i to tatou akarongo e te tauturu ia tatou kia riro “ei aronga rave i te tuatua nei, auraka ei aronga akarongo ua.”​—Iako. 1:22.

2. (a) I roto i te Pipiria, eaa te aiteanga o te “tuatua-akakite”? (e) Akapeea ra i tuke ei te au ture a Iehova ki ta te tangata?

² I roto i te Pipiria, te aiteanga o te “tuatua-akakite,” ko te au ture, te au akauenga, e te au kaveinga ta te Atua e oronga mai ana ki tona iti tangata. E tuke takiri te au ture a Iehova ki ta te tangata no te mea e tarevake ana ta te tangata e i tetai au taime ka anoanoia kia taui. E apa kore te au ture a te Atua, e ka rauka ia tatou i te irinaki e me akarongo tatou ki te reira ka riro ua rai ei meitaki no tatou. I te tuatau i topa, kua oronga mai te Atua i tetai au ture kare e anoanoia tona iti tangata i teia tuatau kia aru. Kare i te mea e kua tarevake taua au ture ra. Te na ko ra oki te tata taramo e: “Te tikaanga o taau ra au tuatua-akakite, e mea mutu kore ïa.”​—Sala. 119:144.

3, 4. (a) Tetai au taime, eaa te o mai ana ki roto i te au tuatua akakite a Iehova? (e) Eaa te puapinga ka rauka i to Iseraela me akono ratou i ta te Atua au akauenga?

³ Tetai au taime e au akamatakiteanga te o mai ana ki roto i te au tuatua akakite a Iehova. E na roto mai ana te reira i te au peroveta ki to Iseraela. Ei akaraanga, i mua ake ka tomo ei to Iseraela ki roto i te Enua Taputouia, kua akamatakite a Mose ia ratou e: “Kia matakite ia kotou uaorai, kia kore to kotou ngakau e vare, kia kore kotou e  tatipake i te araara anga i te au atua ke ra, e te akamori anga atu ia ratou ra; E kua tupu te riri o Iehova ia kotou.” (Deu. 11:16, 17) Ka kite tatou i roto i te Pipiria e, e maata te au tuatua akakite puapinga ta te Atua i oronga mai ki tona iti tangata.

⁴ E akakite putuputu ana a Iehova ki tona iti tangata kia mataku iaia, kia akarongo kiaia, e kia akangateitei i tona ingoa. (Deu. 4:29-31; 5:28, 29) Kua taputou te Atua e me akono ratou i teia au akauenga, e maata te au akameitakianga ka oronga mai aia na ratou.​—Levi. 26:3-6; Deu. 28:1-4.

5. Eaa ra te Atua i tauturu ei i te Ariki ko Hezekia?

⁵ I roto pouroa i te tuatua enua o Iseraela, e akatupu ua ana te Atua i tana taputou kia ratou. Ei akaraanga, te kaitamaki anga a Senakeriba te Ariki o Asura ia Iuda e kua tamataku i te Ariki ko Hezekia, kua tono mai a Iehova i tetai angera kia tauturu i Tona iti tangata. I tera po okotai ua, e 185,000 vaeau o Asura tei takoreia e te angera a te Atua. Kua oki a Senakeriba ki tona uaorai enua ma te akama. (2 Ari. 19:35; 2 Para. 32:21) Eaa ra te Atua i tauturu ei i te Ariki ko Hezekia? No tona tu tiratiratu e ‘kua akono aia i ta te Atua au akauenga.’​—2 Ari. 18:1, 5, 6.

6. Eaa ta te Ariki ko Iosia i rave ei akaari e e irinaki tikai tona i roto ia Iehova?

⁶ Ko te Ariki ko Iosia tetai akaraanga meitaki i te akono i te au akauenga a Iehova. Mei tona mapuanga, “kua rave aia i te mea tika i mua i te aroaro o Iehova.” (2 Para. 34:1, 2) Kua akaari a Iosia e e irinaki tikai tona i roto ia Iehova e kua takore i te au itoro, e kua tauturu i te iti tangata kia akamori akaou ia Iehova. No ta Iosia i rave, kua akameitaki a Iehova iaia e te katoaanga o te iti tangata.​—E tatau ia 2 Paraleipomeno 34:31-33.

7. Eaa tei tupu no tei akarongo kore to Iseraela kia Iehova?

⁷ Te mea tangi ra, kare te iti tangata o te Atua e irinaki ua ana ki ta Iehova au tuatua akakite. I te au anere mataiti tei aereia, kua akarongo kore ratou kia Iehova. Te paruparu anga to ratou akarongo, ngoie ua i etai ke i te akanauru ia ratou kia akamori i te au atua pikikaa. (Ephe. 4:13, 14) E mei ta te Atua i akamatakite ia ratou, te kore anga ratou i tuku i to ratou irinaki ki roto i te Atua, kua rokoia ratou e te kino.​—Levi. 26:23-25; Iere. 5:23-25.

8. Akapeea to tatou turanga i aite ei ki to Iseraela?

⁸ Akapeea ra to tatou turanga i aite ei ki to Iseraela? Te apii e te ako mai nei te Atua ia tatou mei tana rai i rave i to Iseraela. (2 Pet. 1:12) Me tatau tatou i te Pipiria, ka akamaaraia mai kia tatou te au akauenga a te  Atua. Oronga mai a Iehova i te tikaanga kia iki tatou e me ka akono tatou i tana au akauenga e me ka rave ua i ta tatou e manako ra e ko te tika. (Mase. 14:12) Ka akamanako ana tatou eaa te tumu ka irinaki ei tatou i te au tuatua akakite a Iehova e te puapinga ka rauka ia tatou me akono i te reira.

9. Te aere anga to Iseraela na roto i te metepara, akapeea a Iehova i te akamaara anga kia ratou e te paruru ra aia ia ratou?

⁹ Te akamataanga to Iseraela i te aere na roto i te metepara no te 40 mataiti, kare a Iehova i akamarama ana kia ratou e ka akapeea aia me arataki, me paruru, e me akono ia ratou. Inara e maata te au mataara tana i akaari te ka puapingaia ratou me irinaki ratou kiaia e me akono i tana au ikuikuanga. Na te tuku anga i tetai tumurangi i te ao e te ai i te po ei arataki ia ratou, te akamaara ra a Iehova ki to Iseraela e te paruru ra aia ia ratou i to ratou aerenga ngata. (Deu. 1:19; Exo. 40:36-38) Kua akapapu katoa aia e kua tu ratou i te au mea katoatoa tei anoanoia no ratou. “Kare rava ratou i ngere; kare akerai to ratou kakau i piro, e kare to ratou vaevae i ē.”​—Nehe. 9:19-21.

10. Te akapeea nei a Iehova i te arataki anga i tona iti tangata i teia tuatau?

¹⁰ Kare e roa atu ka tomo te au tavini o te Atua i teia tuatau ki roto i tetai ao ou e te tuatua tika. Te irinaki ra ainei tatou e te oronga mai nei a Iehova i te au mea pouroa tei anoanoia no tatou, kia ora atu i te “mate maata”? (Mata. 24:21, 22; Sala. 119:40, 41) E tika, kare a Iehova e tuku mai i tetai tumurangi me kore i tetai ai ei arataki ia tatou ki roto i te ao ou. Inara, na roto i tona akaaerenga te oronga maira aia i tana au tuatua akakite kia tatou. Ei akaraanga, e akamaroiroiia ana tatou kia akaketaketa i to tatou pirianga oa kia Iehova na te tatau anga i te Pipiria, te Akamorianga a te Ngutuare i te aiai, pera katoa te aere putuputu ki te au uipaanga e te angaanga orometua. Kua rave ainei tatou i tetai au tauianga i roto i to tatou oraanga kia rauka ia tatou i te aru i teia au ikuikuanga? Ka tauturu teia ia tatou i te akaketaketa i to tatou akarongo kia ora atu ki roto i te ao ou.

11. Eaa te au mataara e akaari maira te Atua e te manako maira aia ia tatou?

¹¹ Te oronga katoa maira te akaaerenga o te Atua i te aratakianga ei tauturu ia tatou i te rave i te au ikianga meitaki i roto i to tatou oraanga. Ei akaraanga, e akamaroiroiia ana tatou kia akamanako meitaki no runga i te au apinga o te kopapa e kia akamama i to tatou oraanga kia kore e maata te apiapi. Te apiiia mai nei tatou no runga i te tu o to tatou akamanea, te tamataora ka iki tatou, e mei teaa te tu o te apiianga ka anoanoia. Kua oronga katoaia mai te au ikuikuanga e ka akapeea tatou me akapapa no te au tuatau kitea koreia. Akamanako katoa i te au tuatua akakite ei tauturu ia tatou kia kore e tumatetenga e tupu i roto i te ngutuare, i roto i te motoka, e i ko i te Are Uipaanga Patireia. Te akaari maira teia au akoanga e te manako maira te Atua ia tatou.

12. (a) Eaa tetai tumu manako ta Iesu e tuatua putuputu ua ana ki tana au pipi? (e) Eaa te apiianga no runga i te tu akaaka tei kore roa i ngaropoina ana ia Petero, e eaa ta tatou i mou mai mei te akaraanga o Iesu?

¹² I te anere mataiti mua, e oronga putuputuia ana te au tuatua akakite ki te iti tangata o te Atua. E tuatua putuputu ana a Iesu ki tana au pipi no runga i te puapinga o te akaari i te tu akaaka. Inara, kare aia i akamarama ua kia ratou i te aiteanga o te akaari i te tu akaaka. Kua akaari katoa ra aia na roto i tana akaraanga. Te po i mua ake i tona matenga, kua uipa kapiti mai a Iesu e tana au apotetoro no te Pasa. I tana au apotetoro e kaikai ra, kua tu mai a Iesu e kua orei i to ratou vaevae. E angaanga teia na te au tavini. (Ioa. 13:1-17) Ta Iesu i rave i taua po ra, kua  riro ei apiianga puapinga tikai no tana au apotetoro te kare roa e ngaropoina ia ratou. Tetai 30 mataiti i muri mai, kua oronga te apotetoro a Petero, ko tei piri ana ki taua kaikaianga ra, i tetai akoanga no runga i te tu akaaka ki etai atu au Kerititiano. (1 Pete. 5:5) Kia riro te akaraanga o Iesu ei akamaroiroi ia tatou kia akaari i te tu akaaka na roto i to tatou tu ki etai ke.​—Phili. 2:5-8.

13. Eaa te tu puapinga ta Iesu i apii te ka anoanoia kia rauka i tana au pipi?

¹³ Tetai tumu manako ta Iesu e tuatua putuputu ana ki tana au pipi, koia oki ko te anoano no te akarongo ngaueue kore. Tetai atianga, kare i rauka ana i te au pipi i te akaora i tetai tamaiti tei uruia e te temoni. Kua ui ratou kia Iesu e: “Eaa i kore ei i tika ia matou nei kia tuaru atu iaia ki vao?” Pau atu a Iesu e: “No to kotou akarongo kore.” E oti kua akakite aia e naringa e akarongo to ratou mei te tu o ‘te ua sinapi,’ kare rava e mea e kore e tika ia ratou i te rave. (Mata. 17:14-20) Te tuatau o ta Iesu angaanga orometua i te enua nei, kua apii aia i tana au pipi e e mea puapinga tikai kia rauka te akarongo. (E tatau ia Mataio 21:18-22.) Te aere ra ainei tatou ki te au uruoaanga, akaputuputuanga, e te au uipaanga kia rauka ia tatou te akaketaketa i to tatou akarongo? E maata atu te o maira ki teia au akaputuputuanga. E au atianga teia kia akaari i to tatou irinaki ia Iehova.

14. Eaa i puapinga ai kia akaari i te tu aroa akaatinga i teia tuatau?

¹⁴ E maata te tuatua akakite no tatou i roto i te au Tuatua Tapu Ereni Kerititiano ei apii ia tatou kia akaari i te aroa no tetai e tetai. Akakite a Iesu e ko te rua o te akauenga maata, koia oki kia ‘aroa atu i toou tangata tupu mei te aroa ia koe uaorai.’ (Mata. 22:39) Kua kapiki a Iakobo te teina o Iesu i te aroa, e ko te “ture ariki.” (Iako. 2:8) E kua tata a Ioane: “E aku au akaperepere e, kare i te akauenga ou taku e tata atu kia kotou na, ko te akauenga taito ra, ta kotou i kite mei muatangana mairai.” (1 Ioa. 2:7, 8) Eaa te aiteanga o ta Ioane tuatua no te “akauenga taito”? Te tuatua ra aia no runga i te akauenga o te aroa. E akauenga “taito” teia no te mea, kua oronga ke ana a Iesu i te reira i te au mataiti e manganui i topa, “mei muatangana mairai.” Inara e akauenga “ou” katoa teia no te mea, kare e roa atu ka anoanoia te au pipi kia akaari i te tu aroa akaatinga i roto i te au turanga ou. Teia tuatau, rekareka tatou i te au akamatakiteanga e tauturu nei ia tatou kia kore e akatupu i te au anoano tika kore o to teianei ao. Mari ra, ka akaari tatou i te tu aroa akaatinga.

15. Eaa te tumu maata i aere mai ei a Iesu ki te enua nei?

¹⁵ E inangaro mou tikai to Iesu no te tangata. Akaari aia i teia na te rapakau anga i te aronga maki e te akatuakaou anga i tei mate. Inara kare ko tera te tumu maata i aere  mai ei aia ki te enua nei. Riro tana angaanga tutu e te apii ei tauturu i te tangata na roto i tetai mataara meitaki rava atu. Mei teaa ra te tu? Ei akaraanga, pouroa te aronga tana i rapakau e i akatu mai mei te mate, kua ruaine e kua mate akaou i muri mai, te aronga ra tei ariki i te karere tana i akakite, kua rauka ia ratou te tikaanga no te oraanga mutu kore.​—Ioa. 11:25, 26

16. Akapeea te Au Kite o Iehova i teia tuatau i te akono anga i te akauenga a Iesu kia akariro i te tangata ei pipi?

¹⁶ Kua akaue a Iesu i tana au pipi e: “Ka aere kotou, e akariro i to te pa enua katoa ei pipi.” (Mata. 28:19) Kua rave ua atu rai te au Kerititiano o te anere mataiti mua i te angaanga ta Iesu i akamata, teia tuatau e maata atu ta tatou tangata e te au ngai e tutu aere nei i to mua ana. Tere atu i te itu mirioni Au Kite o Iehova i roto i te 230 tuma enua e tutu aere nei i te Patireia o te Atua, e te apii putuputu i te Pipiria ki te mirioni ua atu tangata. Te akapapu maira teia angaanga tutu aere e tei roto tatou i te tuatau openga.

17. Eaa te akoanga ta Paulo e Petero i oronga ki te au Kerititiano i te anere mataiti mua?

¹⁷ Riro te au tuatua akakite ei tauturu i te au Kerititiano i te anere mataiti mua kia akaketaketa i to ratou akarongo. Ei akaraanga, te tuatau ia Paulo i roto i te are auri i Roma, kua akakite aia kia Timoteo: “E tāpu meitaki i te akonoanga tuatua tikai taau i kite iaku nei.” (2 Timo. 1:13) Kare e kore, kua riro teia au tuatua ei akamaroiroi ia Timoteo. I muri katoa ake i to Petero akamaroiroi anga i te au Kerititiano kia tauta i te akatupu i te tu akakoromaki, te aroa taeake, e te noo marie, kua karanga atu aia e: “E teianei kare ua au e vata i te akakite ia kotou i teianei au tuatua, kite ua rai kotou, e tinamou ua rai kotou i taua tuatua-mou nei.”​—2 Pete. 1:5-8, 12

18. Eaa te manako o te au taeake i te anere mataiti mua te tae atu anga te au tuatua akakite?

¹⁸ E tika rai e ko te au tuatua ta Paulo e Petero i tata ki te au putuputuanga, kua aite ki tei “tuatuaia mai e te au peroveta tapu i muatangana.” (2 Pete. 3:2) Inara, kua mareka kore ainei to tatou au taeake i te anere mataiti mua i te tae atu anga te au tuatua akakite? Kare. Kua kite ratou e na te Atua teia tuatua, no tona aroa ia ratou e tona inangaro i te tauturu ia ratou kia vai tiratiratu.​—2 Pete. 3:18.

19, 20 Eaa ka rauka ai ia tatou te irinaki e ko te aru i te au tuatua akakite a Iehova te mea meitaki rava atu no tatou, e ka akapeea tatou e puapingaia ai?

¹⁹ Teia tuatau, e maata ua atu te tumuanga tau no tatou kia irinaki e me aru tatou i te au tuatua akakite a Iehova i roto i tana Tuatua te Pipiria, ka puapingaia tatou. Kare rava te akoanga i roto i tana Tuatua e tarevake ana. (E tatau ia Iosua 23:14.) Te apii maira te Pipiria ia tatou i to te Atua tu ki te tangata i te au tauatini mataiti i aereia mai ana. Kua tataia teia ei puapinga rai no tatou. (Roma 15:4; 1 Kori. 10:11) Kua kite katoa ana tatou i te au totou i roto i te Pipiria e akatupuia nei i teia tuatau. Aite rai te au totou ki te au tuatua akakite tei orongaia mai i te au mataiti i mua ake ka tupu ei. Ei akaraanga, e mirioni ua atu tangata tei riro ei aronga akamori ia Iehova, mei ta te totou i akakite e ka tupu i “te au rā openga.” (Isa. 2:2, 3) Te aere ua atura teia ao ki te kino maata. Te akatupu katoa ra teia i te totou a te Pipiria. E mei ta tatou i uriuri mai ana, te akatupu nei te angaanga tutuanga i te ao katoa nei i te au tuatua a Iesu.​—Mata. 24:14.

²⁰ I te au anere mataiti i aereia mai ana, kua akaari mai te Atua e ka rauka ia tatou i te irinaki iaia. Te puapingaia ra ainei tatou no tana au tuatua akakite? Karanga mai tetai tuaine ko Rosellen e: “Te akamataanga au i te irinaki tikai ia Iehova, kite meitaki au i tona rima aroa i te akono anga e te akaketaketa anga iaku.” Ka puapinga katoaia tatou me akarongo meitaki ki te au tuatua akakite a Iehova.