I te akamataanga o te au mataiti 1900, reka te tangata i te akarakara i tetai teata, te ingoa A Trip Down Market Street. Akaari mai te teata i te tu o te oraanga i San Francisco, i Marike, mei tei matauia i taua tuatau ra. Kua tuku te aronga taviri teata i tetai nenei ki mua i tetai bus e taka ra e kua akatano i te nenei ki runga i te mataara i mua ia ratou. Akaari mai te teata i te au oroenua e kika ra i te au pereoo pera te au apinga akaoro o taua tuatau ra, e te tangata e aere ra ki te toa, pera te au tamariki e tua nuti pepa ra.

Te mea akaaroa i teia teata me ka akara tatou i teia tuatau, penei i neneiia te reira i roto ia Aperira 1906 i mua ua ake i te ngaruerue enua e te ai ta te reira i akatupu i roto ia Aperira 18, tei tere atu i te 3,000 tangata i mate, e tei takore i te maataanga o tera tuanga o te oire. Tetai papaki tangata tei akaariia mai i roto i te teata penei e nga mea ra ua to ratou e vai nei. Karanga a Scott Miles, tetai kopu tangata o tetai tangata taviri teata e: “Akara ua rai au i te tangata i reira, e kare takiri ratou i kite ana e eaa te ka tupu kia ratou. Eaa ra oki taau ravenga, te akaaroa atu nei rai koe ia ratou.”

Me akaaite tatou i tei tupu i taua tuatau ra ki to tatou nei tuatau, ka akakeu te reira ia tatou kia akamanako meitaki. Te akaaroa katoa nei rai tatou i to tatou au tangata tupu. Pou ua to ratou taime ki te au mea noa ua o te oraanga e kare takiri i kite e, e tumatetenga maata te ka tupu, koia oki te akapouanga o teia ao kino e to ratou tu oraanga. Inara e tuke rai teia tumatetenga, kare i aite ki te ngaruerue enua no te mea ka tupu poitirere ua te reira ma te kore e akamatakiteanga. E tuatau poto ua to tatou i te akamatakite i to tatou au tangata tupu no runga i to Iehova ra akavaanga. Kare e kore, e aere ana koe i te au epetoma i te tutu mei tera are ki tera are, inara ka rauka ainei ia koe i te akamaata atu i te au atinga kia akamatakite i etai ke?

E mea puapinga tikai te akaraanga o Iesu no tatou. E papa ua ana aia i te tutu ki te au tangata ravarai e aravei ana aia, kapiti mai te aronga koi tero e aravei ana aia i runga i te mataara, e tetai vaine e uti vai ra. (Luka 19:​1-5; Ioane 4:​5-10, 21-24) Noatu e taime tona i te akangaroi, e papa ua ana aia i te taui i tana au parani kia rauka iaia i te apii atu etai ke. No tona aroa maata i te tangata, na te reira i akakeu iaia kia taangaanga i te au atianga ravarai i te apii ia ratou. (Mareko 6:​30-34) Te akapeea nei te au papuritia i teia tuatau i te aru anga i to Iesu tu papa ua i te tutu aere i teia karere rapurapu?

E noo ana a Melika i roto i tetai are tarau e ngata tikai e tae ei ki roto. Maata te aronga e noo ra i reira,  e au tamariki apii no te au enua ke mai. Ta ratou au tereponi apaipai rima kare te numero, pera to ratou au ingoa, i roto i te puka tereponi a tera are e noo ra aia. E reka ana aia i te taangaanga i te au atianga ravarai kia pukapuka atu no runga i te Pipiria ki te aronga e aravei ana aia i roto i te pia noonoo e te elevator. Karanga aia e, “Kiaku uaorai, naku teia ngai tutuanga.” E apai aere ana a Melika i tetai au puka i roto i te au reo tukeke, e e maata te aronga e ariki mai ana i te aenga pepa e te au makatini. E akaari katoa ana aia e ka akapeea me akara i ta tatou Web site, jw.org. E maata tana au apii Pipiria i akamata.

E kimi katoa ana a Sonia i tetai au atinga kia tutu aere. E angaanga ana aia i ko i te kiriniki o tetai taote, e kua akakoro aia kia akakitekite atu ki tona au oa angaanga. Te mea mua, e kimi ana aia e eaa te ka anoanoia no ratou e eaa ta ratou e reka ana. I reira me tae tona taime kaikai ka kimi aia i tetai ia ratou e oti kua pukapuka atu no runga i te Pipiria. Tei tupu mai e rua a Sonia apii Pipiria i akamata. Parani katoa aia i te aere ki roto i te pia noonoo o te kiriniki i tona taime kaikai, i te pukapuka atu ki te aronga e tiaki ra i te taote.

Akakite tetai tangata tei ora mai mei roto i te ngaruerue enua i te 1906 e, ko te tumatetenga kino roa atu teia tei tupu ana i roto i tetai oire maata, me kore i tetai tuanga enua. Inara, puapinga kore te au tumatetenga pouroa me akaaiteia atu ki te ra akaoko te ka tupu ki te “aronga kare i kite i te Atua.” (2 Tesalonia 1:⁠8) Inangaro tikai a Iehova kia taui te tangata i to ratou manako e to ratou ngakau e kia ariu mai ki te karere a tona au Kite e akamatakite aere nei i te tangata.​—2 Petero 3:9, tataanga i raro; Apokalupo 14:6, 7.

E tikaanga ngateitei toou i te tauturu i te tangata kia marama e te noo nei tatou i roto i te tuatau kino, e kia tauturu ia ratou kia tavini ia Iehova eiaa kia kimi i to ratou uaorai meitaki. (Zephania 2:2, 3) Ka rauka ainei ia koe i te taangaanga i te au atianga ravarai kia akakitekite ki toou oa angaanga, toou tangata tupu, e ki te au tangata e aravei ana koe i te au ra ravarai? Ka rauka ainei ia koe i te akamaata atu i taau ka rave i te akamatakite i etai ke?