1, 2. Eaa te manako o tetai au apotetoro i mua ake i to Iesu tere openga ki Ierusalema?

‘MANEA a runga i te rangi, e ka kite matou i te marama ou. Inapo, papu e kua kite katoa te au tiaki i Ierusalema i teia. Te kite anga te Sunederi no runga i teia, kua akakite aere ratou e kua akamata te marama ou, ko Nisana. E oti, kua viviki te aronga apai karere i te akatotoa i teia nuti. Kua tae katoa mai te nuti kia matou. Papu e ka inangaro a Iesu i te aere ki Ierusalema i mua ake ka akamata ai te Pasa.’

² Penei ko te manako teia o tetai au apotetoro ia ratou i te pae ia Iesu i mua ake i tona tere openga ki Ierusalema. I tera taime, tei roto ratou i te oire ko Perea i tetai tua mai i te Kauvai Ioridana. (Mata. 19:1; 20:17, 29; Mare. 10:1, 32, 46) Me kite te ngati Iuda i te ra tikai o Nisana 1, ka tiaki ratou e 13 ra e oti ka akono i te Pasa i muri ake i te opunga ra, ia Nisana 14.

3. Eaa ra te au Kerititiano i inangaro ei i te kite i te ra o te Pasa?

³ Ka topa te ra no te Kaikai Anga Aiai a te Atu ia Aperira 14, 2014, i muri ake i te opunga ra, tei aiteite ki te ra o te Pasa. E ra puapinga tikai teia no te au Kerititiano mou e te aronga tei akaari mai i te inangaro. No teaa ra? Ka kite tatou i te tumu i roto ia 1 Korinetia 11:23-25: “Kua rave te Atu ra ko Iesu i te manga i te po i pikikaaia mai ei aia ra: E oti akera iaia te akameitaki, vavaʼi iora, na ko atura, Ka rave mai, ka kai, ko taku kopapa teia, i atiatiia no kotou nei: e pera kotou ei manako anga iaku. E kua pera katoa oki i te kapu.”

4. (a) Eaa te au uianga ka tau kia ui kia koe uaorai no runga i te Akamaaraanga? (e) Akapeea tatou i kite ei i te ra tikai ka akonoia ai te Akamaaraanga i te au mataiti ravarai? (Akara katoa i te pia  “Akamaaraanga no te Mataiti 2014.”)

⁴ Ko te Akamaaraanga anake ta Iesu i akakite ki tana au pipi kia akono i te au mataiti ravarai, e kare e kore ka inangaro rai koe kia tae ki reira. I na, i mua ake i te reira, e ui kia koe uaorai e: ‘Ka akapeea au me akateateamamao no te Akamaaraanga? Eaa te au mea ka taangaangaia no te Akamaaraanga? Eaa te ka raveia ki reira? Eaa i puapinga ai kiaku te Akamaaraanga, te varaoa e te uaina?’

5. Eaa ta Iesu i akakite ki te au apotetoro kia rave ei akateateamamao no te Pasa?

⁵ Te akakite anga a Iesu ki tana au apotetoro kia akateateamamao i tetai ngai no te kaikai anga Pasa, kare aia i karanga ana e kia akamanea ratou i te ngai. Mari ra, inangaro aia i tetai ngai tau ua e te ma, kia o aia e tana au apotetoro. (E tatau ia Mareko 14:12-16.) Ka akapapa katoa te au apotetoro i te au apinga ka anoanoia no te kaikai anga, kapiti mai i te varaoa opue koreia e te uaina muramura. I muri ake i te kaikai anga Pasa, kua tuatua a Iesu no runga i te varaoa e te uaina. Ko te nga apinga teia ka taangaangaia no te Akamaaraanga.

6. (a) Muri ake i te kaikai anga Pasa, eaa ta Iesu i tuatua no runga i te varaoa? (e) Eaa te tu o te varaoa ka taangaangaia i ko i te Akamaaraanga?

⁶ Kua tae atu te apotetoro ko Mataio ki reira e kua tata aia i muri mai e: “Kua rave iorā Iesu i te manga, e kua akameitaki atura, vavaʼi iora, tuku atura ki te au pipi, na ko atura, Ka rave, ka kai.” (Mata. 26:26) Ko teia “manga,” e varaoa opue koreia tei aite ki te varaoa tei taangaangaia no te Pasa. (Exo. 12:8; Deu. 16:3) Kua maaniia ki te varaoa titona e te vai. Kare te opue i kairoia ki roto, no reira kare te varaoa i kake ana. Kare katoa tetai apinga akareka kai mei te miti rai i kairoia ana ki roto. Maroka ua te varaoa, e ka rauka i te atiati. I teia tuatau i mua ake i te ra no te Akamaaraanga, penei ka pati te aronga pakari i tetai tangata kia maani i teia varaoa. Ka maani aia ki te varaoa titona e te vai e penei ka tunu ki roto i tetai pa paraa e manga inu to roto. Ka rauka katoa i te taangaanga i te varaoa a te ngati Iuda e kapikiia ana e e Jewish matzoth, kare e morota, uamoa, e te oniani i roto. I te au enua e ngata kia rauka mai te varaoa titona, ka rauka i te taangaanga i te varaoa mata tei maaniia mei roto mai i te raiti, te kerite, e te koni.

7. Eaa to roto i te kapu ta Iesu i taangaanga no te Kaikai Anga Aiai a te Atu, e eaa te tu uaina ka rauka i te taangaanga no te Akamaaraanga?

⁷ Kua karanga katoa a Mataio e “kua rave iora [a Iesu] i te kapu, akameitaki atura, tuku atura kia ratou ra, na ko atura, Ka inu na kotou ravarai.” (Mata. 26:27, 28) E uaina muramura to roto i te kapu a Iesu. I na, akapeea tatou i kite ei e kare teia i te vai vine? No te mea kua oti ke ana te tuatau kokoti anga vine. Kare te uaina i taangaangaia ana no te Pasa mua i Aiphiti. Inara noatu te reira, kare  a Iesu i karanga ana e e tarevake kia inu i te uaina i ko i te Pasa. Kua taangaanga aia i te uaina i te tuatau o te Kaikai Anga Aiai a te Atu. No reira i teia tuatau, e taangaanga ana te au Kerititiano i te uaina no te Akamaaraanga. Eaa te tu o te uaina e taangaangaia ana? Kare e tukuia ana tetai ua atu apinga, mei te brandy rai e tetai au apinga takakara kai, ki roto i te uaina no te Akamaaraanga. Me akamanako tatou, kare i anoanoia kia tuku i tetai ua atu apinga ki roto i te toto o Iesu kia puapinga atu tona toto. No reira e taangaangaia ana te uaina muramura. Ka rauka i te maani i te reira i te kainga, me kore ka rauka i te oko mai i te uaina Beaujolais, Burgundy, me kore te Chianti.

8. Eaa ra te au Kerititiano i inangaro ei i te kite e eaa ta te varaoa e te uaina e akatutu maira?

⁸ Kua akakite te apotetoro ko Paulo i tetai mea tei akaari e ka anoano katoaia te au Kerititiano kia akono i te Kaikai Anga Aiai a te Atu. Kua tata a Paulo ki te au taeake i Korinetia e kua rave mai a Iesu i tetai varaoa “e oti akera iaia te akameitaki, vavaʼi iora, na ko atura, Ka rave mai, ka kai, ko taku kopapa teia, i atiatiia no kotou nei: e pera kotou ei manako anga iaku.” (1 Kori. 11:23, 24) No te mea kua akaueia te au Kerititiano i teia tuatau kia akono i te Akamaaraanga e tai taime i te au mataiti tataki tai, ka inangaro ratou i te kite e eaa ta te varaoa e te uaina e akatutu maira.

9. Eaa tetai irinakianga tarevake a tetai pae no runga i te varaoa ta Iesu i taangaanga?

⁹ Manako tetai au akonoanga e kua tuatua a Iesu e: ‘Teia oki toku kopapa.’ No reira kua irinaki ratou e na roto i tetai temeio i riro mai ei te varaoa e ko te kopapa o Iesu. Inara kare ko te reira tei tupu, no te mea tei mua a Iesu i te au apotetoro akarongo mou, e pera katoa te varaoa opue koreia. * Taka ua e te karanga  ra a Iesu e te akatutu ra te varaoa i tona kopapa. Kua taangaanga putuputu a Iesu i te au akatuke anga mei teia rai i roto i tana apii anga i te tangata.​—Ioa. 2:19-21; 4:13, 14; 10:7; 15:1.

10. Eaa ta te varaoa i ko i te Akamaaraanga e akatutu maira?

¹⁰ Te varaoa ta te au apotetoro e kite mata ra e ta ratou ka kai, te akatutu maira i to Iesu kopapa. I mua ana, kua irinaki te au Kerititiano mou e te akatutu maira te varaoa i te putuputuanga o te au Kerititiano akatainuia, tei kapikiia ana i roto i te Pipiria e ko “te kopapa o te Mesia.” Kua irinaki ratou i teia no te mea kua atiati a Iesu i te varaoa, inara kare tona au ivi i atiatiia. (Ephe. 4:12; Roma 12:4, 5; 1 Kori. 10:16, 17; 12:27) Inara i muri ake i tetai kimikimianga, kua kite ratou e te akatutu maira te varaoa i to Iesu kopapa tangata. E tuatua putuputuia ana i roto i te au Tuatua Tapu e akapeea a Iesu te ‘mate anga i te mate kopapa nei,’ e kua tamateia i runga i te tatauro. No reira ko te varaoa i ko i te Akamaaraanga, te akatutu maira i te kopapa tangata o Iesu, tana i akaatinga no ta tatou au ara.​—1 Pete. 2:21-24; 4:1; Ioa. 19:33-36; Ebe. 10:5-7.

11, 12. (a) Eaa ta Iesu i tuatua no runga i te uaina? (e) Eaa ta te uaina i ko i te Akamaaraanga e akatutu maira?

¹¹ Me kite tatou i ta te varaoa e akatutu maira, ka marama tatou i ta Iesu i tuatua no runga i te uaina. Te tatau nei: “E kua pera katoa oki i te kapu, kia oti ake tana kai anga, na ko atura, Teianei kapu, ko te koreromotu ou ïa i toku nei toto.” (1 Kori. 11:25) No reira, ko te kapu ainei ta Iesu e mou ra te koreromotu ou? Kare. Te tuatua ra a Iesu no runga i te uaina i roto i te kapu. No reira, mei ta Iesu i tuatua, eaa ta te uaina e akatutu maira? Te akatutu maira i tona toto, te ka akamaringiia ei atinga.

¹² Ka tatau tatou i ta Iesu i tuatua i roto i te Evangeria a Mareko: “Ko toku toto teia, no te koreromotu ou ra, tei akamaringiia no te tangata e manganui.” (Mare. 14:24) I roto katoa i te puka o Mataio, te akakite ra e ka ‘akamaringiia te toto o Iesu no te tangata e manganui, kia matara te ara.’ (Mata. 26:28) No reira te akatutu maira te uaina i te toto o Iesu. Na roto i tona toto i rauka ai te oko ei akakore i ta tatou ara.​—E tatau ia Ephesia 1:7.

13. Eaa te tupu ana i ko i te Akamaaraanga o te mate o Karaiti?

¹³ Me ko toou taime mua teia ki te Akamaaraanga ma te Au Kite o Iehova, eaa taau ka tapapa atu? Ka raveia te Akamaaraanga ki roto i tetai ngai manea e te ma, kia o meitaki te katoatoa e kia mataora ratou i te uipaanga. Penei ka kite koe i tetai ruru tiare, kare e maata te au apinga akamanea, e kare mei te ngai tamataoraanga rai. Na tetai tangata pakari tei tau e oronga i te akoanga akatumuia ki runga i ta te Pipiria e tuatua ra no runga i te Kaikai Anga Aiai a te Atu. Ka akamarama mai aia e kua mate a Karaiti ei oko, kia rauka ia tatou te ora. (E tatau ia Roma 5:8-10.) Ka tuatua katoa aia no runga i te nga manakonakoanga tei akatakaia i roto i te Pipiria.

14. I te tuatau o te Akamaaraanga, eaa te nga manakonakoanga ta te vaa tuatua ka akamarama mai?

¹⁴ Tetai manakonakoanga, kia tutara kapiti e Karaiti i runga i te rangi. Tokoiti ua te au Kerititiano te ka rauka i teia manakonakoanga, mei te au apotetoro akarongo mou rai. (Luka 12:32; 22:19, 20; Apo. 14:1) Te rua, ko te manakonakoanga no te maataanga o te au Kerititiano tiratiratu. To ratou manakonakoanga, kia ora e tuatau ua atu i runga i te enua parataito. Ka riro te turanga i runga i te enua nei mei ta te Atua i anoano, e ko ta te au Kerititiano teia e pure ua ana. (Mata. 6:10) Te akataka maira te au Tuatua Tapu i te oraanga umere tikai ta ratou ka kite e mutu kore ua atu.​—Isa. 11:6-9; 35:5, 6; 65:21-23.

15, 16. Eaa te raveia ana ki te varaoa opue koreia i ko i te Akamaaraanga?

 ¹⁵ Me oti i te vaa tuatua i te akamarama mai i teia nga manakonakoanga, ka akakite aia e kua tae te tuatau kia akono i ta Iesu i akakite i ko i te Kaikai Anga Aiai a te Atu. Ka kite koe i te varaoa opue koreia e te uaina i runga i te kaingakai i te pae iaia. Ka tatau aia i tetai tuanga i roto i te Pipiria te akataka maira i ta Iesu i rave ki te varaoa. Penei ka tatau aia i te tuanga i roto ia Mataio e karanga ra e: “Kua rave iorā Iesu i te manga, e kua akameitaki atura, vavaʼi iora, tuku atura ki te au pipi, na ko atura, Ka rave, ka kai; ko toku kopapa teia.” (Mata. 26:26) Kua vavai a Iesu i te varaoa e kua oronga ki te au apotetoro. I ko i te Akamaaraanga i roto ia Aperira 14, ka kite koe i te varaoa opue koreia i runga i te au mereki.

¹⁶ I mua ake ka apai aereia te au mereki varaoa, ka pure tetai taeake. Ka rava ua te au mereki kia rauka i te apai aere ki te katoatoa i roto i te tuatau poto ua ma te tu mako tikai. Ka raveia te reira kia tau ki te ngai akaputuputuanga e kare e peu e raveia. Penei e tokoiti ua me kore kare e tangata e kai i te varaoa, mei tei raveia i roto i te maataanga o te au putuputuanga i ko i te Akamaaraanga i te mataiti 2013.

17. I ko i te Akamaaraanga, ka akapeea me aruia te aratakianga a Iesu no runga i te uaina?

¹⁷ Aru mai, ka tatau te vaa tuatua i ta Iesu i rave ki te uaina: “Kua rave iora aia i te kapu, akameitaki atura, tuku atura kia ratou ra, na ko atura, Ka inu na kotou ravarai; Ko toku ïa toto teia, no te koreromotu ou ra, tei akamaringiia no te tangata e manganui, kia matara te ara.” (Mata. 26:27, 28) Na te aru anga i te aratakianga a Iesu, ka rave akaouia tetai pure e oti ka apai aereia te kapu uaina muramura ki te katoatoa.

18. Me e tokoiti ua me kore kare e tangata e kai i te varaoa e e inu i te uaina, eaa ra i puapinga ai kia tae ki te Akamaaraanga?

¹⁸ Ko te aronga anake te ka tutara kapiti e Karaiti i runga i te rangi te ka kai i te varaoa e te ka inu i te uaina. No reira ko te maataanga o te tangata i ko i te Akamaaraanga, ka mou ratou e ka oake i te varaoa e te uaina ki te tangata i te pae mai. (E tatau ia Luka 22:28-30; 2 Timo. 4:18) Noatu kare te maataanga o te au Kerititiano e kai i te varaoa e e inu i te uaina, e mea puapinga tikai kia tae ratou ki te Akamaaraanga. No teaa ra? No te mea ka akaari te reira i to ratou tu akangateitei no te atinga oko o Iesu. I te tuatau o te Akamaaraanga, ka rauka ia ratou i te akamanako no runga i te au akameitakianga ka rauka mai mei te oko. Ei akaraanga, e manakonakoanga to ratou i te piri atu ki te “aronga maata rava” te ka ora mai i “te mate maata.” No to ratou akarongo ki roto i te atinga o Iesu, ka riro ratou ei aronga tuatua tika i mua i te aroaro o te Atua, mei te mea rai e ‘kua orei ratou i to ratou kakau, e kua akateatea i te reira ma te toto o te Punua-mamoe.’​—Apo. 7:9, 14-17.

19. Eaa ta tatou ka rave ei akateateamamao e kia puapingaia mei te Akamaaraanga?

¹⁹ Akapeea ana te Au Kite o Iehova i te ao katoa me akateateamamao no te Akamaaraanga? Tetai au epetoma i mua ake i te Akamaaraanga, e maata te aronga ta tatou ka pati kia aere mai no te reira. I te au ra i mua ake i teia uipaanga puapinga, ka tatau tatou i te au irava no runga i ta Iesu i rave e te au mea tei tupu i te au ra i mua ake i te Kaikai Anga Aiai a te Atu i te mataiti 33 T.N. E rave ana tatou i te au akanoonooanga kia tae ki te Akamaaraanga. Ka tae vave tatou ki te uipaanga kia rauka ia tatou i te turou mai i te au manuiri e kia akarongo ki te katoaanga o te porokaramu. Ka puapingaia tatou katoatoa, te putuputuanga e te au manuiri, me aru tatou i roto i ta tatou Pipiria me tatau e me akamarama mai te vaa tuatua i te au irava. Tei maata rava atu, me tae tatou ki te Akamaaraanga, ka akaari te reira i to tatou ariki rekareka no te atinga o Iesu e to tatou tu kauraro ki tana akauenga: “E pera kotou ei manako anga iaku.”​—1 Kori. 11:24.