Kua tatau meitaki ainei koe i te au itiu ou o Te Punanga Tiaki? Akara ana me ka rauka ia koe i te pau i te au uianga ka aru mai:

Inaea a Iesu i ‘ako atu i te au vaerua i vai i roto i te tapekaanga’? (1 Pete. 3:19)

I te akara anga, no muri ake i to Iesu akatuakaou anga i akakite ei aia ki te au vaerua kino e ka akautungaia ratou.​—6/15, kapi 23.

Eaa te au apiianga puapinga ka rauka ia tatou no runga ia Iehova mei te au tuatua a Paulo ki te iti tangata o Lusetera?

Te mea mua, kua oronga mai a Iehova i te tikaanga no tatou kia iki. Te rua, inangaro a Iehova ia tatou kia kite no runga iaia. E te toru, inangaro a Iehova kia mataora tatou.​—9/1, kapi 9.

Aea a Iesu e akava ai i te tangata ei mamoe me kore ei puakanio? (Mata. 25:32)

Ka raveia te reira me tae mai a Iesu i te akava i te tangata i te tuatau o te mate maata, i muri ake i te takoreia anga o te au akonoanga pikikaa.​—7/15, kapi 6.

I roto i te parapore o te titona e te titania, aea te aronga tei rave i te tuatua kino e aue ei ma te pakati i to ratou nio? (Mata. 13:36, 41, 42)

Ka rave ratou i te reira i te tuatau o te mate maata me kite ratou e kare e rauka ia ratou i te oro mei te takoreanga.​—7/15, kapi 13.

Ta Iesu au tuatua no runga i te tavini akono meitaki e te pakari, inaea i akamata ai i te akatupuia? (Mata. 24:45-47)

Kua akamata i te akatupuia i teia tuatau openga, kare i te Penetekote 33 T.N. I te mataiti 1919, kua orongaia te tikaanga ki te tavini kia akaaere i te ngutuare, koia oki ki rungao i te au Kerititiano pouroa e angaiia nei ki te kai vaerua.​—7/15, kapi 21-23.

Aea a Iesu e akanoo ei i te tavini akono meitaki kia akaaere i tana au apinga ravarai?

Ka raveia te reira i te tuatau o te mate maata me orongaia atu te tutaki no te tavini akono meitaki i runga i te rangi.​—7/15, kapi 25.

Ko te tumu ainei kare i taikuia mai te ingoa o tetai au tangata i roto i te Pipiria e, e aronga kino me kore kare o ratou puapinga?

Kare. Kare te Pipiria i taiku mai i te ingoa o tetai aronga meitaki e tetai aronga kino. (Ruta 4:1-3; Mata. 26:18) E rua ua rai angera tiratiratu tei taikuia to raua ingoa.​—9/1, kapi 8.

Noatu kua tauturu te mana o te Atua i te 230 Au Kite kia ora i to ratou mati anga mei te puakapa takinokinoanga i Sachsenhausen, eaa atu tetai tei tauturu ia ratou?

Noatu te maki e te rava kore o te kai, kua akamaroiroi ua atu rai ratou i tetai e tetai.​—8/15, kapi 18.

Eaa ra i riro ei to Iseraela aere anga ki tetai tua mai o te Kauvai Ioridana ki roto i te Enua Taputouia, ei akamaroiroi anga no tatou?

Noatu kua oonu te kauvai, kua arai a Iehova i te vai kia kore e tae e kia rauka i tona iti tangata i te aere ki tetai tua. Papu e kua akaketaketa te reira i to ratou akarongo e to ratou irinakianga i roto iaia, e ka rekareka katoa tatou mei te reira.​—9/15, kapi 16.

Me taangaanga te Pipiria i te au tu kara, eaa ta te reira e akaari maira?

Te akaari maira te tu e taangaanga ra te Pipiria i te au tu kara e kua kite te Atua e ka akakeu te reira i te tangata e ka rauka i te tauturu ia tatou kia akamaara i tetai au mea.​—11/1, kapi 14-15.

Akapeea te totou i roto ia Mika 5:5 no runga i te nga tangata ariki toko varu e te nga tiaki mamoe toko itu te akatupuia anga i teia tuatau?

Te marama ra tatou e ko te “nga tiaki mamoe toko itu, e nga tangata ariki toko varu” i roto ia Mika 5:5, ko te aronga pakari i roto i te au putuputuanga tei akaketaketa i te iti tangata o te Atua no te tamaki anga ki runga ia ratou a te tuatau ki mua.​—11/15, kapi 20.