1, 2. Eaa ta te Patireia o te Atua ka rave, e akapeea tatou i kite ei e ka tae mai te Patireia?

I TE tuatau tupuanga rau i te mataiti 31 T.N., i runga i tetai maunga vaitata ki te oire o Kaperenauma, kua apii a Iesu i tana au pipi kia pure: “Kia tae toou basileia.” (Mata. 6:10) I teia tuatau, e maata te ekoko ra e ka tae mai te Patireia. Inara, papu tikai tatou e ka pau mai a Iehova i ta tatou pure kia tae mai tona Patireia.

² Na roto i te Patireia o Iehova ka taokotai mai aia i tona au tavini i te rangi e te enua. I reira e akatupuia ai to Iehova akakoroanga. (Isa. 55:10, 11) Te au tupuanga mataora tei tupu i te 100 mataiti i topa, te akapapu maira e kua riro ke ana a Iehova ei Ariki e te rave nei aia i te au mea umere tikai no te mirioni ua atu o tona au tavini. (Zeka. 14:9; Apo. 15:3) Tera ra, e tuke takiri te riro anga a Iehova ei Ariki ki ta Iesu i apii ia tatou kia pure e kia tae mai te Patireia o te Atua. Akapeea teia nga tupuanga i tuke ei, e akapeea te reira te akakeu anga ia tatou?

3. (a) Inaea a Iesu te akateronoia anga ei Ariki, e iea ngai? (e) Akapeea koe e akapapu ei e kua akamata a Iesu i te tutara i te mataiti 1914? (Akara i te tataanga rikiriki.)

³ Vaitata ki te openga o te 19 anere mataiti, kua akamata te au tavini o te Atua i te marama i te totou ta Daniela i tata e 2,500 tuma  mataiti i topa: “I te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu.” (Dani. 2:44) Mei tetai 20 mataiti, kua akakitekite te Aronga Apii Pipiria e ka riro te mataiti 1914 ei mataiti puapinga tikai. I tera tuatau, e manganui te tangata tei mataora i te ka tupu a te tuatau ki mua. Kua akakite tetai tangata tata e: “I te mataiti 1914 kua irinaki papu tikai te tangata e ko teia te mataiti puapinga roa atu i roto i to ratou oraanga.” Tera ra, i taua mataiti kua akamata te Tamaki I o te Ao, e kua tupu te totou Pipiria. Na roto i te onge, te ngaruerue enua, te au maki tukeke, e te au totou Pipiria tei akatupuia, kua akapapu te reira e kua akamata a Iesu Karaiti i te tutara i te rangi ei Ariki no te Patireia o te Atua i te mataiti 1914. * Na te akaterono anga i tana Tamaiti ei Ariki, kua riro a Iehova ei Ariki na roto i tetai mataara ke.

4. Eaa te angaanga mua ta Iesu i rave te riro anga aia ei Ariki, e eaa tana i rave i muri mai?

⁴ Te angaanga mua ta te Ariki ou o te Atua i rave, koia oki, te tamaki atu ia Satani, te enemi maata o tona Metua. Kua uri atu a Iesu e tana au angera i te Tiaporo e te au temoni ki te enua nei. Kua riro teia ei rekareka maata i runga i te rangi e ei mate i runga i te enua nei. (E tatau ia Apokalupo 12:7-9, 12.) Muri ake i te reira, kua akamata te Ariki i te tama, te apii atu, e te akaaere i tona au tavini i te enua kia rave i to te Atua anoano. Ka akara ana tatou e akapeea to ratou tu akarongo ki te aratakianga a Iesu te akanoo anga i te akaraanga no tatou i teia tuatau.

5. Eaa te tama anga tei akamata i rotopu i te mataiti 1914 e te 1919?

⁵ Muri ake te tama anga a Iesu i te rangi mei te au akakeuanga kino o Satani e te au temoni, kua tuku a Iehova ia Iesu kia tutaka e kia tama i tana au pipi i te enua nei. Kua akataka mai te peroveta ko Malaki i teia mei te tama anga pae vaerua. (Mala. 3:1-3) Akaari mai te tuatua enua e kua akamata teia tama anga i rotopu i te mataiti 1914 e te 1919. * Me ka inangaro tatou kia riro ei tuanga no te au tavini o Iehova i te rangi e te enua, ka anoanoia tatou kia riro ei aronga ma e te tapu. (1 Pete. 1:15, 16) Ka anoanoia tatou kia akapapu e kare te au akonoanga pikikaa e te au ravenga poritiki e akaviivii i ta tatou akamorianga.

6. Akapeea me orongaia mai te kai vaerua, e eaa ra teia i puapinga ai?

⁶ Kua taangaanga a Iesu i tona mana Ariki kia iki i te “tavini akono meitaki e te pakari.” Ka oronga teia tavini i te kai vaerua memeitaki ki te katoatoa i roto i te ‘anana okotai’ a Iesu. (Mata. 24:45-47; Ioa. 10:16) Mei te mataiti 1919, e pupu meangiti tetai o te au taeake akatainuia tei akono i te apainga puapinga maata koia oki, te angai anga i te “ngutuare.” Te oronga maira te tavini akono meitaki e te pakari i te kai vaerua e manganui kia tupu to tatou akarongo. Na te reira e akakeu ia tatou kia ma ta tatou akamorianga, ta tatou au angaanga, to tatou manako, e to tatou kopapa, kia tau ki te au turanga o te Atua. Na teia kai vaerua e apii mai e e akateateamamao ia tatou kia rave maroiroi i te angaanga puapinga rava atu i te enua nei, te angaanga tutuanga. Te ariki ra ainei koe i teia kai vaerua?

7. Eaa te angaanga puapinga ta Iesu i akamata iaia i runga i te enua, e aea e akamutu ei teia angaanga?

⁷ Te akamata anga a Iesu i tana angaanga orometua i te enua nei, kua tuatua aia e: “E tutu aere rai au i te evangelia o te basileia o  te Atua i te au oire ke atu e tikaʼi; i tonokia mai ei oki au.” (Luka 4:43) No te toru e te apa mataiti, ko te angaanga puapinga roa atu teia i roto i to Iesu oraanga. Kua apii aia i tana au pipi e: “E tutu aere kotou, na ko atu, Te vaitata mai nei te basileia o te ao.” (Mata. 10:7) I muri ake i tona tuakaouanga, kua totou a Iesu e ka apai tana au pipi i teia karere “e tae ua atu ki te openga o te enua.” (Anga. 1:8) Kua taputou aia kia ratou e ka turuturu aia i teia angaanga puapinga e tae ua atu ki te openga o teia akatereanga.—Mata. 28:19, 20.

8. Akapeea te Ariki te akakeu anga i tana au pipi i te enua nei kia tutu aere?

⁸ I te mataiti 1919, kua kapiti mai “te evangelia o te basileia nei” i tetai akamaramaanga ou. (Mata. 24:14) Te tutara ra te Ariki i runga i te rangi, e kua akaputuputu aia i tetai pupu meangiti o te au pipi tei tamaia i te enua nei. Kua akarongo teia pupu ki ta Iesu akauenga kia tutu i te tuatua meitaki i te ao katoa, te akakite anga e te tutara ra te Patireia o te Atua i te rangi! (Anga. 10:42) Ei akaraanga, i roto ia Tepetema 1922, vaitata ki te 20,000 aronga turuturu i te Patireia tei tae ki te uruoaanga pa enua i Cedar Point, Ohio, i Marike. Akamanako ana i to ratou rekareka te oronga anga te Taeake Rutherford i te akoanga “Te Patireia,” e te na ko anga e: “I na, te tutara nei te Ariki! Ko kotou tona aronga akakitekite. No reira e akakite, e akakite, e akakite, i te Ariki e tona patireia.” Tera mai ra, e rua tauatini ia ratou tei aere ki roto i te angaanga tutuanga, e kua aere tetai pae mei te 72 kiro mita te mamao i te tutu aere. Kua akakite tetai taeake e: “Kare roa au e akangaropoina i te kapikianga kia akakite i te Patireia, pera katoa te maroiroi o te au taeake e te au tuaine!” E maata rai tei manako akapera.

9, 10. (a) Eaa te au apii tei tereni ia tatou no te angaanga orometua? (e) Akapeea koe i puapinga ai mei teia terenianga?

⁹ I te mataiti 1922, kua tere atu i te 17,000 papuritia e tutu aere ra i roto i te 58 enua i te ao katoa. Tera ra, kua anoanoia ratou kia tereniia. I te anere mataiti mua, kua oronga te Ariki ikiia i te au ikuikuanga taka meitaki ki tana au pipi no runga i ta ratou ka tuatua, te ngai ka aere ratou, e ka akapeea me tutu aere. (Mata. 10:5-7; Luka 9:1-6; 10:1-11) I teia tuatau katoa, te akapapu ra a Iesu e kua orongaia te au ikuikuanga ki te katoatoa tei piri atu ki roto i te angaanga tutuanga, e kua rauka ta ratou au apinga ka anoanoia kia riro ei au puapii meitaki. (2 Timo. 3:17) Te taangaanga ra a Iesu i te putuputuanga Kerititiano kia tereni i tana au pipi i roto i te angaanga orometua. Tetai mataara e tereni ra aia ia ratou koia oki na roto i te Apii Orometua Teokaratiki i roto i te 111,000 tuma putuputuanga i te ao katoa. Te tereni ra teia apii i te itu mirioni tuma  papuritia e ka akapeea ratou me tutu aere e me apii na roto i te tu te ka tauturu i te “tangata ravarai.”​—E tatau ia 1 Korinetia 9:20-23.

¹⁰ E au apii terenianga katoa tetai no te aronga pakari, au painia, au taeake kare i akaipoipo, au tokorua Kerititiano, au mema o te Kumiti Manga e ta ratou vaine, au akaaere tutaka e ta ratou vaine, e no te au mitinari. * Kua akakite tetai pupu o te Apii Pipiria na te au Tokorua Akaipoipo Kerititiano e: “Na roto i teia terenianga, kua oonu atu to matou inangaro no Iehova e kua akateateamamao teia ia matou kia tauturu i etai ke.”

11. Akapeea i rauka ai te au pipi a Iesu i te tutu aere noatu te au akakino anga a Satani?

¹¹ Te kite nei te enemi ko Satani i teia au tautaanga kia tutu aere e kia apii atu i te tuatua meitaki. Inangaro aia i te tapu i te angaanga tutuanga e ka kimi aia i tetai ravenga kia akakino i te karere o te Patireia e te aronga e akakitekite ra. Inara kare te tautaanga a Satani e puapingaia. Kua tuku a Iehova i tana Tamaiti “ki runga rava atu i te au ariki ravarai, e te aronga mana, e te marōrō, e te maata.” (Ephe. 1:20-22) Ei Ariki, te taangaanga ra a Iesu i tona mana ei paruru e ei arataki i tana au pipi kia akapapu e ka raveia te anoano o tona Metua. * I teia tuatau, te tutu aereia nei te tuatua meitaki, e e mirioni ua atu tangata tei apiiia kia akamori ia Iehova. E tikaanga ngateitei no tatou kia piri atu ki roto i teia angaanga umere tikai!

12. Mei te mataiti 1914, akapeea te au tavini o te Atua te akanoo meitakiia?

¹² Mei to Iesu akamataanga i te tutara i te mataiti 1914, kua akatikatika aia i te tu e akaaereia ra te au tavini o te Atua kia rave i te anoano o tona Metua. (E tatau ia Isaia 60:17.) I te mataiti 1919, kua ikiia tetai akaaere tavini i roto i te au putuputuanga ei arataki i te angaanga tutuanga. I te mataiti 1927, kua akamata te au putuputuanga i te angaanga tutu aere i te au ra Tapati. I te mataiti 1931, kua tapaia te au tavini o Iehova i te ingoa ko te Au Kite o Iehova, e kua akakeu teia ia ratou kia rave maata atu i te angaanga Patireia. (Isa. 43:10-12) Akamataanga i te mataiti 1938, kare te au akaaere i roto i te au putuputuanga i ikiia e te katoatoa. I te mataiti 1972, kua orongaia te apainga kia akaaere i te putuputuanga ki te pupu o te aronga pakari, kare na tetai taeake okotai ua. Ko te au taeake tei tau kia riro ei tangata  pakari e ei tavini tauturu, kua akamaroiroiia ratou kia puareinga ua i te tiaki i te putuputuanga. (1 Pete. 5:2) I te mataiti 1976, kua akanooia te Pupu Akaaere ki roto i te au kumiti e ono ei akaaere i te angaanga Patireia i te ao katoa. Mei tera mataiti mai to Iesu akaaere anga i tana au pipi kia rave i ta ratou angaanga mei ta te Atua i akaue atu

13. Akapeea koe te puapinga anga mei ta te Ariki i akatupu i te tuatau o tona tutaraanga?

¹³ E akamanako ana e eaa ta te Ariki i akatupu i te 100 mataiti mua o tona tutaraanga. Kua tama aia i tetai pupu tangata kia riro ei au tavini no Iehova. Kua akaaere aia i te angaanga tutuanga i roto i te 239 enua, e kua apii i te mirioni ua atu tangata kia akamori ia Iehova. Kua taokotai aia i te itu mirioni tuma pipi tei oronga puareinga ua i to ratou oraanga kia rave i te anoano o tona Metua. (Sala. 110:3) Na roto i te Patireia, kua rauka ia Iehova i te rave i te au mea umere tikai, e e maata te au mea umere te ka tupu a te tuatau ki mua!

14. (a) Eaa ta tatou e pati ra ki te Atua me pure tatou e: “Kia tae toou basileia”? (e) Eaa te irava no te mataiti 2014, e eaa ra te reira i tau ei?

¹⁴ I te mea kua akakorona a Iehova i tana Tamaiti ko Iesu Karaiti ei Ariki i te mataiti 1914, kare teia i te pauanga ki ta tatou pure e “kia tae toou basileia.” (Mata. 6:10) Kua totou te Pipiria e ka tutara a Iesu ‘ei ariki i rotopu i tona au enemi.’ (Sala. 110:2) I teia tuatau, te patoi nei te au kavamani a te tangata i raro ake i te akatereanga a Satani i taua Patireia ra. Me pure tatou kia tae mai te Patireia o te Atua, te pati nei tatou i te Ariki e te 144,000 ariki i runga i te rangi, kia takore atu i te tutaraanga a te tangata pera katoa te aronga e patoi ra i taua Patireia i te enua nei. Me raveia teia, ka akatupuia te totou i roto ia Daniela 2:44. Te akakite ra tera irava e na te Patireia o te Atua “e akapueurikiriki e e akapou i taua au basileia katoa.” Ka takore te reira i te au enemi pouroa o te Patireia o te Atua, kapiti atu i te au kavamani. (Apo. 6:1, 2; 13:1-18; 19:11-21) No te mea kare e roa atu ka tupu te reira, kua tau te irava no te mataiti 2014 i roto ia Mataio 6:10 koia oki: “Kia tae toou basileia.” E 100 mataiti i teianei mei te tuatau i akamata ai a Iesu i te tutara i runga i te rangi!

15, 16. (a) Eaa te au tupuanga puapinga ka raveia i te tuatau o te okotai tauatini mataiti o to Karaiti tutaraanga? (e) Eaa te mea openga ta Iesu ka rave ei Ariki, e eaa te aiteanga o te reira no to Iehova akakoroanga?

¹⁵ Me oti a Iesu i te takore i te au enemi o te Atua, ka uri aia ia Satani e te au temoni ki roto i te vaarua takere kore no te okotai tauatini mataiti. (Apo. 20:1-3) Me kare taua akakeuanga kino, ka rauka i te Patireia i te takore takiri i te au kino no te ara a Adamu e ka tauturu i te tangata kia puapingaia mei te atinga oko o Iesu. Ka akatuakaou mai te Ariki i te mirioni ua atu tangata e ka akanoo aia i tetai apii i te ao katoa kia kite ratou no runga ia Iehova. (Apo. 20:12, 13) Ka riro te enua ei parataito mei te kainga rai i Edene, e ka riro te au tangata akarongo mou ei aronga apa kore.

¹⁶ I muri ake i te okotai tauatini mataiti o to Karaiti tutaraanga, ka akatupuia to Iehova akakoroanga no te enua. I reira a Iesu e akaoki ei i te Patireia ki tona Metua. (E tatau ia 1 Korinetia 15:24-28.) Kare roa tatou e anoano akaou i tetai komono i rotopu ia tatou e Iehova. Ka taokotaiia te au tamariki a te Atua i te rangi e te enua ki to ratou Metua.

17. Eaa taau ka tauta i te rave no te Patireia?

¹⁷ Te akaari maira te au tupuanga puapinga i roto i te 100 mataiti o te tutaraanga o te Patireia e ko Iehova te akaaere, e ka akatupuia tona akakoroanga no te enua. No reira kia tavini tiratiratu tatou iaia e kia akakitekite no runga i te Ariki e tona Patireia. Papu ia tatou e kare e roa atu ka pau mai a Iehova i ta tatou pure: “Kia tae toou basileia”!