I te mataiti 1985, e tai ngauru rai oku mataiti. Kua aere mai tetai au tamariki no Cambodia mai ki taku apii i Columbus, Ohio, i Marike. Tetai tamaiti kua kite aia i tetai au tuatua Papaa. Na roto i te toro anga i tetai au tutu, kua akakite mai aia i te vinivini tei tupu ki te aronga tei tamamaeia e tei tamateia, e no te au tangata tei oro ki te au enua ke kia ora mai ratou. I te po, kua aue au te akamanako anga i teia au tamariki. Kua inangaro au i te akakite kia ratou no runga i te Parataito e te tuakaouanga, tera ra kare ratou e marama ana i toku reo. Noatu e tamaiti ua au, kua inangaro au i te apii i te reo Cambodia kia rauka iaku i te tuatua ki toku au oa apii no runga ia Iehova. Kare roa au i kite ana e ka riro teia ikianga ei akatuke i toku oraanga me mamaata mai au.

E ngata i te apii i te reo Cambodia. Kua inangaro au i te akamutu e rua taime, inara na roto i toku nga metua i akamaroiroi ei a Iehova iaku. Muri mai, kua akamata te au puapii e toku au oa i te maro mai iaku kia aruaru i tetai angaanga moni meitaki. Inara, kua inangaro au i te painia, no reira kua iki au i te au terenianga i te apii te ka tauturu iaku kia kimi i tetai ngai angaanga moni no tetai au ora ua i te au epetoma. Me oti te apii, kua aere matou e tetai au painia i te tutu aere. Kua tauturu katoa au i te tamariki apii kia kite i te reo Papaa. Kua riro teia ikianga ei tauturu iaku i muri mai.

I toku 16 mataiti, kua rongo au no runga i tetai pupu reo Cambodia i Long Beach, California, i Marike. Kua aere au i te atoro ia ratou e kua apii au i te tatau i te reo Cambodia. Te oti mai anga taku apii, kua riro au ei painia. Kua tutu aere au ki te aronga Cambodia vaitata mai ki toku kainga. I toku 18 mataiti, kua manako au i te neke atu ki Cambodia. Te tupu ra rai te kino i reira, inara mei te tai ngauru mirioni tangata e noo ra i Cambodia e kare te maataanga ia ratou i rongo ana no runga i te tuatua mou. I taua tuatau ra, e tai rai putuputuanga i tera enua e e 13 papuritia i roto. Te tae anga au ki te 19 mataiti, ko toku taime mua teia i te aere ki Cambodia. E rua mataiti i muri mai, kua neke au ki reira. Kua rauka iaku tetai ngai angaanga moni no tetai au ora ua i te au epetoma no te uri e te apii atu i te reo Papaa. Muri mai, kua akaipoipo au i tetai tuaine e aiteite ua to maua akakoroanga. Kua rekareka maua i te angaanga kapiti anga i te tauturu i tetai au tangata Cambodia kia riro mai ei Au Kite no Iehova.

Kua oronga mai a Iehova i ta toku ngakau i anoano. (Sala. 37:4) Te angaanga mataora rava atu ka rauka i tetai ua atu tangata i te rave, ko te akariro anga i te tangata ei pipi. I roto i te 16 mataiti iaku i Cambodia, kua tupu mai taua putuputuanga meangiti e 13 papuritia, ki te 12 putuputuanga e te 4 pupu!—Akakiteia e Jason Blackwell.