1. I te mea kua angaia mai tatou i to te Atua uaorai tu, eaa ta tatou ka rauka i te rave?

“A TOOU papa rai koe.” Ko teia ta tetai aronga e karanga ana no runga i te tamariki tei aiteite ki to ratou metua. E tika rai teia, no te mea kua iri mai te tu o te papa e te mama ki runga i ta raua tamaiti. Ko Iehova to tatou Metua i te rangi Tei Oronga mai i to tatou ora. (Sala. 36:9) Ei tamariki nana, e maata to tatou au tu tei aiteite ki tona. I te mea kua angaia mai tatou i tona uaorai “tu,” ka rauka ia tatou i te akamanako meitaki, te rave i te au ikianga, e te akatupu i te au pirianga vaitata.​—Gene. 1:26.

2. Akapeea a Iehova i riro ei Oa meitaki rava atu no tatou?

² Ka rauka ia Iehova kia riro ei Oa meitaki rava atu no tatou. Ka rauka teia pirianga oa no te mea te aroa maira te Atua ia tatou e te irinaki ra tatou i roto iaia e tana Tamaiti. Akakite a Iesu e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioa. 3:16) E manganui te tangata tei rauka i tetai pirianga vaitata kia Iehova. Ka akara ana tatou e rua.

3, 4. Eaa ra to Aberahama pirianga kia Iehova i tuke ei ki to Iseraela pirianga Kiaia?

³ Kua akataka a Iehova i te metua o to Iseraela e ko ‘toku oa ko Aberahama.’ (Isa. 41:8) I roto ia 2 Paraleipomeno 20:7 e kapiki katoaia ana a Aberahama ei oa no te Atua. Eaa ra te tumu i riro ei a Aberahama ei oa piri vaitata ki te Atua? No te mea e ketaketa tona akarongo.​—Gene. 15:6; e tatau ia Iakobo 2:21-23.

⁴ Kua riro katoa to Aberahama uanga koia oki, te iti tangata o Iseraela i taito, ei Oa no to ratou Metua ko Iehova. Te mea taitaia ra, kua ngere to ratou pirianga vaitata ki te Atua. Te tumu? Kare ratou i irinaki akaou ana i te au taputou a Iehova.

5, 6. (a) Akapeea a Iehova i riro ei Oa noou? (e) Eaa te nga uianga ka ui tatou?

⁵ Me akamaata koe i toou kite no runga ia Iehova, ka ketaketa atu toou akarongo i roto iaia e ka oonu atu toou inangaro nona. Akamanako ana i te tuatau i akamata ai koe i te kite e e tika tikai te Atua e ka rauka ia koe kia riro ei oa nona. Kua apii koe e kua iri mai te ara ki runga ia tatou pouroa no to Adamu akarongo kore. Kua marama katoa koe i te tumu kare te tangata e akaau ana ki te Atua. (Kolo. 1:21) E oti kua kite mai koe e kare to tatou Metua aroa i te rangi i mamao ke mei ia tatou, e te manako maira aia ia tatou. Te apii anga tatou e kua akaatinga a Iehova i tana Tamaiti e te irinaki anga tatou i roto i te atinga oko, kua akamata tatou i te akatupu i tetai pirianga vaitata ki te Atua.

⁶ Me akamanako tatou e akapeea tatou i rauka i te kite no runga ia Iehova, ka anoanoia kia ui kia tatou uaorai e: ‘E ririnui atu ainei toku pirianga ki te Atua? Te tupu ua ra ainei toku irinaki e toku inangaro no Iehova i te au ra ravarai?’ Ko Gideona tetai oa piri vaitata no te Atua. Ka apii ana tatou no runga iaia kia kite e akapeea me aru i tona akaraanga.

7-9. (a) Eaa te mea umere tei tupu kia Gideona, e eaa tei tupu i muri mai? (Akara i te tutu mua o teia atikara.) (e) Akapeea tatou me riro ei oa no te Atua?

⁷ Kua tavini a Gideona ia Iehova i tetai tuatau ngata i muri ake te tomo anga to Iseraela ki roto i te Enua Taputouia. Kua akakino to Midiana i to Iseraela. Ko te tumu teia i pāpā ei a Gideona i te titona i roto i te taomianga vine, kare i ko i te ngai atea ua, kia rauka iaia i te uuna i te titona meitaki. Te akakite maira Te Au Akava pene 6 e kua atoro mai te angera a Iehova ia Gideona i Ophera. Kua poitirere a Gideona e kua kapiki mai te angera iaia e ko tetai “tangata ririnui.” Noatu kua akaora a Iehova i to Iseraela mei Aiphiti mai, kua ekoko a Gideona e ka tauturu mai a Iehova ia ratou i te reira tuatau. Na roto i te angera, kua taputou mai a Iehova e ka tauturu Aia ia Gideona.

⁸ Kua akamanako a Gideona e akapeea e rauka ai iaia i te “akaora ia Iseraela i te rima o Midiana.” Kua pau mai a Iehova e: “Ei vaitata tikai au ia koe, e naau e ta i to Midiana, mei te mea e tangata okotai nei.” (Aka. 6:11-16) Penei kua manako a Gideona e ka akapeea teia i tupu ei, no reira kua pati aia ki te Atua no tetai akairo. I roto i ta raua tuatua anga, kare rava a Gideona i ekoko e e Atua tika tikai a Iehova.

⁹ No tei tupu kia Gideona i muri mai, kua akaketaketaia tona akarongo e kua akavaitata atu aia ki te Atua. Kua akapapa e kua oronga a Gideona i te kai na te angera. Na roto i tetai temeio kua tutungi te angera i te kai ki te ai na te tukia anga i te reira ki tana rakau. Te kite anga a Gideona e na te Atua i tono i teia angera, kua mataku aia. Kua tuatua a Gideona e: “Aue, e te Atu, e Iehova e! ko au i kite i te Angela a Iehova,  toku mata e tona mata.” (Aka. 6:17-22) Kua kino ainei to Gideona pirianga kia Iehova no tei tupu? Kare! Kua kite a Gideona i te au i rotopu iaia e te Atua. Kua kite tatou i teia no te mea kua tapaia te atarau ta Gideona i akatu i reira e ko “Iehova-saloma,” te aiteanga “Ko Iehova te tumu o te au.” (E tatau i Te Au Akava 6:23, 24; akara i te matamata.) Me akamanako oonu tatou no runga i ta Iehova e rave ra no tatou i te au ra ravarai, ka kite tatou e e Oa mou aia. Me pure putuputu tatou kia Iehova, ka kite tatou i te au i rotopu ia tatou e ia Iehova e ka ketaketa atu to tatou pirianga kiaia.

10. Kia tau kia Salamo 15:3, 5, eaa te nga umuumuanga ta Iehova i akanoo no te aronga tei inangaro kia riro ei oa nona?

¹⁰ Kua akanoo a Iehova i te umuumuanga kia riro tetai ua atu tangata ei oa nona. I roto ia Salamo 15, kua imene a Davida no runga i ta tatou ka anoano i te rave kia riro ei tuitarere i roto i te puakapa o Iehova koia oki, kia riro ei oa no te Atua. (Sala. 15:1) I teianei ka uriuri tatou i tetai nga umuumuanga. Te mea mua, te kopae anga i te urutoe, e te rua, te akakite anga i te tika. Teia ta Davida i tuatua no runga i tetai tangata te ka riro ei oa no Iehova: “Ko tei kore i urutoe tona arero.” Akakite katoa a Davida e: “Ko tei kore i rave i te tutaki ei akaapa i te tangata ara kore.”​—Sala. 15:3, 5.

11. Eaa ra tatou ka kopae ei i te tuatua urutoe?

¹¹ I roto i tetai taramo ke, kua akamatakite a Davida e: “E tāpu i to arero i te kino.” (Sala. 34:13) Me kopae tatou i teia akoanga, ka akakinoia to tatou pirianga oa ki to tatou Metua i te rangi. Te tikaanga, e akairo te urutoe no te enemi maata o Iehova, ko Satani te Tiaporo. Ko te tuatua “Tiaporo,” no roto mai te reira i te tuatua Ereni “pikikaa.” Me matakite tatou i ta tatou ka tuatua ki etai ke e ta tatou ka tuatua no runga ia ratou, ka tauturu teia ia tatou kia piri vaitata ua rai kia Iehova. Ka inangaro tikai tatou kia matakite i to tatou tu ki te au taeake ta te Atua i iki kia arataki i te putuputuanga.​—E tatau ia Ebera 13:17; Iuda 8.

12, 13. (a) Eaa ra tatou ka akakite i te tika i roto i te au mea ravarai? (e) Eaa te ka tupu me akakite tatou i te tika?

¹² Kua kiteaia te au tavini o Iehova ei aronga tei akakite i te tika. Kua tata te apotetoro ko Paulo e: “E pure ia matou: kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.” (Ebe. 13:18) No te mea te tauta nei tatou i te ‘akono meitaki i te au mea katoa nei,’ kare tatou e pikikaa i to tatou au taeake Kerititiano. Ei akaraanga, me angaanga tetai taeake na tatou, ka akapapu tatou e kia akono e kia tutaki meitakiia aia. Ei au Kerititiano, e akakite ua ana tatou i te tika ki te au oa angaanga e ki tetai ua atu. E me angaanga tatou na tetai taeake Kerititiano, eiaa tatou e manako e ka taviniia mai tatou.

¹³ E akameitaki ua ana to teianei ao i te Au Kite o Iehova no te akakite anga i te tika. Ei akaraanga, kua kite te akaaere no tetai kamupani e e akatupu ua ana te Au Kite o Iehova i ta ratou i papau. Karanga aia e, “E rave ua ana kotou i ta kotou i akakite mai.” (Sala. 15:4) Na te akakite anga i te tika, ka riro ua rai a Iehova ei Oa no tatou e ka akangateitei te reira Iaia.

14, 15. Akapeea tatou me tauturu i etai ke kia riro ei oa no Iehova?

¹⁴ Noatu e irinaki ana te tangata ta tatou e aravei ana e e tika tikai te Atua, kare te Atua i riro ei Oa meitaki rava atu no ratou. Ka akapeea tatou me tauturu ia ratou? Teia te au ikuikuanga ta Iesu i oronga ki tana au pipi e 70 te tono anga ia ratou kia tutu  aere: “Te are ta kotou e tomo ra, e akamata na i te karanga atu, Ei au to teianei ngutuare. E tei reira te tamaiti no te au, e vai rai ta kotou au ra i rungao iaia: kare ra, ka oki akaou mai ïa ki rungao ia kotou.” (Luka 10:5, 6) Penei ka inangaro te tangata kia kite maata atu no runga i te tuatua mou me akaari tatou i te tu oaoa kia ratou. Me akaari tatou i teia tu ki te aronga e patoi ra ia tatou, penei ka akamaru atu te reira ia ratou e ka inangaro ratou i te akarongo ki te tuatua mou a tetai tuatau ke.

¹⁵ Me aravei tatou i te aronga aere pure me kore te aronga e akono ra i te au peu a te au akonoanga pikikaa, e akaari ua rai tatou i te tu oaoa e te tu au. Te ariki pumaana atu nei tatou i te tangata katoatoa ki ta tatou au uipaanga, ko te aronga tikai te taitaia ra no te au turanga o teianei ao e tei inangaro i te kite maata atu no runga i te Atua ta tatou e akamori ra. Ka kite tatou no runga i te aronga mei teia rai i roto i te au atikara “Taui te Pipiria i te Oraanga.”

16. Akapeea tatou i riro ei “oa rave angaanga” no Iehova?

¹⁶ Maata te taime e riro ana te aronga tei angaanga kapiti ei oa piri vaitata. Ko te aronga tei akatapu i to ratou oraanga kia Iehova, e au “oa rave angaanga” ratou nona. (E tatau ia 1 Korinetia 3:9.) Ia tatou e tutu aere ra e e akariro ra i te tangata ei pipi, e maata ta tatou ka kite no runga i te au tu manea o to tatou Metua i te rangi. Ka kite tatou e akapeea tona vaerua tapu i te tauturu anga ia tatou kia akakitekite i te tuatua meitaki.

17. Akapeea te au akaputuputuanga e te au uruoaanga te akaari mai e ko Iehova to tatou Oa?

¹⁷ Me maata to tatou taime i te angaanga tutuanga, ka akavaitata atu tatou kia Iehova. Ka kite tatou e akapeea a Iehova me tapu i te tangata kia kore e arai i te angaanga tutuanga. E mea papu tikai e te arataki ra aia ia tatou, e e poitirere ana tatou i te tu i apii mai ei aia ia tatou na roto i ta tatou au uipaanga e te au puka. I ko i te au uruoaanga e te au akaputuputuanga, kite tatou e te marama maira a Iehova i to tatou au manamanata e ta tatou e anoano ra. Muri ake i tetai uruoaanga, kua tata tetai ngutuare tangata e: “Kua akakeuia to matou ngakau. Mei te mea rai e te aroa maira a Iehova ia tatou tataki tai e te inangaro ra aia ia tatou kia puapingaia.” Muri ake te aere anga ki tetai uruoaanga takake i Ireland, kua rekareka tetai nga tokorua no Tiamani mai no te tu i arikiia e i akonoia mai ei raua. Karanga katoa raua e: “Tera ra kia akameitaki ia Iehova e tona Ariki ko Iesu Karaiti, no te mea kua pati raua ia maua kia riro ei tuanga no teia taokotaianga taeake, e te kite nei maua i teia tu taokotaianga  i te au ra ravarai. Ka akamaara ua rai te au tupuanga ta maua i kite i ko i te uruoaanga takake i Dublin i to tatou tikaanga ngateitei kia tavini kapiti i to tatou Atua ngateitei.”

18. Eaa ta tatou ka ui no runga i te komunikeitianga kia Iehova?

¹⁸ Ka piri vaitata te au oa me komunikeiti meitaki ratou. I teia tuatau, e komunikeiti ana te tangata i runga i te Initaneti e na roto i te tuku karere. Inara eaa te tuke i rotopu i te reira e te komunikeiti anga ki to tatou Oa meitaki rava atu, ko Iehova? Koia “tei akarongo i te pure.” (Sala. 65:2) E pure ua ana rai tatou kiaia i te au taime ravarai?

19. Me ngata ia tatou i te akakite i to tatou manako ngakau kia Iehova, eaa te ka tauturu ia tatou?

¹⁹ Kare e mama ana no tetai au tavini o te Atua kia akakite ki etai ke i to ratou manako ngakau. Inara, ko teia ta Iehova e inangaro ra ia tatou kia rave me pure tatou kiaia. (Sala. 119:145; Aue 3:41) Me e ngata ia tatou i te akakite i to tatou manako ngakau, te oronga maira aia i te tauturu. Kua tata a Paulo ki te au Kerititiano i Roma e: “Kare oki tatou i kite meitaki i te mea e tau kia pure tatou: na te Vaerua uaorai e pati i ta tatou ma te ngunguru e kore e tika kia tuatua ra. Kua kite ra aia, ko tei kimi matatio i te ngakau ra, i to te Vaerua anoano, ko tei pati i ta te aronga tapu ra, i tei tau i to te Atua ra anoano.” (Roma 8:26, 27) Me tatau tatou i te puka o Iobu, Salamo, e Maseli, ka rauka ia tatou te au manako tauturu e akapeea me akakite i to tatou manako ngakau kia Iehova.

20, 21. Eaa te akapumaanaanga ka rauka ia tatou mei ia Philipi 4:6, 7?

²⁰ Me aro atu tatou i te au akaaoanga, e akamaara i te au tuatua a Paulo ki to Philipi: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” Me pure tatou kia Iehova na roto i teia tu, ka akapumaanaia tatou. Kua tata a Paulo e: “Na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Phili. 4:6, 7) Ka anoanoia tatou kia akaari i te ariki rekareka no te “au o te Atua” tei paruru i to tatou ngakau e to tatou manako.

²¹ Na te pure e tauturu ia tatou kia akaketaketa i to tatou pirianga kia Iehova. No reira, “auraka e tukutuku i te pure.” (1 Tesa. 5:17) Ka anoanoia tatou kia akaketaketa ua rai i to tatou pirianga ki te Atua e kia rave i tana e umuumu maira. E ka anoano katoaia tatou kia akamanako no runga i te au akameitakianga tei rauka ia tatou no te mea ko Iehova to tatou Metua, to tatou Atua, e to tatou Oa.