1, 2. (a) Noai te akaipoipo anga te ka riro ei rekareka maata i te rangi? (e) Eaa te au uianga ta tatou ka uriuri?

E MAATA te taime ka pou me akateateamamao no tetai akaipoipo anga. I teianei, ka uriuri tatou i tetai akaipoipo anga ariki kua pou tetai 2,000 mataiti i te akateateamamao! Kare e roa atu, ka tae mai te tuatau no te tane akaipoipo kia piri atu ki tana vaine akaipoipo. I roto i te are Ariki, ka akarongoia te imene mataora e ka imene te au reo i te rangi e: “Aleluia: tei te Atu ra, tei te Atua mana katoatoa ra te au. Kia rekareka tatou, e kia pereperekavana e e akameitaki oki iaia: kua tae oki ki te akaipoipo anga a te Punua-mamoe, e kua akamanea tana vaine iaia uaorai.”​—Apo. 19:6, 7.

² I roto i teia irava, ko Iesu “te Punua-mamoe.” (Ioa. 1:29) Ka rekareka maata to te rangi i tona akaipoipo anga. Eaa te kakau tana ka aao no te akaipoipo? Koai tana vaine akaipoipo? Akapeea tana vaine akaipoipo te akamanea anga iaia uaorai? Aea teia akaipoipo e raveia ai? Ka rekareka to te rangi no teia akaipoipo, inara ka rekareka katoa ainei te aronga e manakonakoanga to ratou kia noo i te enua nei e tuatau ua atu? Te inangaro nei tatou i te kite i te pauanga ki teia au uianga. Ka uriuri ana ra tatou i te toenga o Salamo 45.

3, 4. (a) Eaa ta te tata taramo i tuatua no runga i te kakau akaipoipo o te Tane Akaipoipo, e eaa te tumu i rekareka maata ai te Tane Akaipoipo? (e) Koai ma te “aronga tamaine no te ui ariki” e te “ariki vaine” tei piri rekareka ki te Tane Akaipoipo?

³ E tatau ia Salamo 45:8, 9. Ka aao a Iesu Karaiti, te Tane Akaipoipo, i tona kakau no te akaipoipo. Kakara tona kakau mei ‘te au rakau kakara tu ke roa,’ mei te mura meitaki e te kasia, tei tukuia ki roto i te au inu no te akatainu anga i Iseraela.​—Exo. 30:23-25.

⁴ Me akarongo te Tane Akaipoipo i te imene e akatangiia ra i te rangi, ka rekareka maata aia e te vaitata maira te tuatau no tona akaipoipo. Ka rekareka katoa te “ariki vaine” koia oki, te tuanga o ta Iehova akaaerenga i te rangi, tei kapiti mai i te “aronga tamaine no te ui ariki” koia oki, te au angera tapu. Ka tuatua te au reo i te rangi e: “Kia rekareka tatou, e kia pereperekavana . . . kua tae oki ki te akaipoipo anga a te Punua-mamoe.”

5. Koai te vaine akaipoipo?

⁵ E tatau ia Salamo 45:10, 11. Kua kite tatou e koai te tane akaipoipo, inara koai oki te vaine akaipoipo? Kare aia i te vaine tika tikai. Mari ra, te akatutu ra aia i te katoaanga o te 144,000 Kerititiano akatainuia. Ko Iesu te Upoko o teia putuputuanga o te aronga akatainuia. (E tatau ia Ephesia 5:23, 24.) Ka tutara kapiti ratou e Karaiti i roto i te Patireia o te Atua i te rangi. (Luka 12:32) Ko ratou katoa tei “aru i te Punua-mamoe i tona au aerenga ravarai.” (Apo. 14:1-4) Ka riro ratou ei ‘vaine na te Punua-mamoe’ e ka noo kapiti ratou i te rangi.​—Apo. 21:9; Ioa. 14:2, 3.

6. Eaa te tumu i kapikiia ai te aronga akatainuia e ko “te tamaine a te ariki,” e eaa ra i akakiteia kia ratou kia akangaropoina i to ratou iti tangata?

⁶ E kapikiia ana te vaine akaipoipo e ko “tera ra tamaine,” pera katoa e kapikiia ana aia e ko “te tamaine a te ariki.” (Sala. 45:13) Koai teia “ariki”? Ko Iehova. Ka akatamariki aia i te au Kerititiano akatainuia ei “tamariki” nana. (Roma 8:15-17) Kua akakiteia ki te aronga akatainuia e: “E akapoina atu i toou ra au tangata, e te ngutuare o to metua ra.” I te mea e ka riro te aronga akatainuia ei vaine akaipoipo i te rangi, ka anoanoia ratou kia ‘akamou i to ratou ngakau i te au mea ki runga, auraka i to teianei ao.’​—Kolo. 3:1-4.

7. (a) Ka akapeea a Karaiti me akateateamamao i tana vaine akaipoipo? (e) Eaa te manako o te vaine akaipoipo no runga i te tane tana ka akaipoipo?

⁷ No te au anere mataiti i topa, kua akateateamamao a Karaiti i te vaine tana ka akaipoipo no te akaipoipo anga i te rangi. Kua tata te apotetoro ko Paulo e “i aroa [te Mesia] i te ekalesia, e kua oronga iaia uaorai ei oko; Kia akatapu aia i te ekalesia, e kia orei i te orei anga vai, i te tuatua ra; Kia tuku aia iaia i mua i tona aroaro ei ekalesia kakā, e te topata kore, e te korokoromingo kore, e te au mea katoa mei te reira te tu; kia tapu ra e te apa kore.” (Ephe. 5:25-27) Kua akakite a Paulo ki te au Kerititiano akatainuia i Korinetia e: “Te mataku nei au ia kotou i te mataku Atua: kua momokoia kotou e au i te tane okotai, kia tuku atu au ia kotou ei paretenia viivii kore i te Mesia ra.” (2 Kori. 11:2) Ki te Ariki ko Iesu Karaiti, e vaine purotu aia no te mea e ma tana akamorianga e te tau i mua i te Atua. Pera katoa, e kauraro ana te vaine akaipoipo ki tana tane te ka akaipoipo iaia, e e kapiki ana i tana tane ei “Atu” nona.

8. Eaa te tumu i karangaia e e “manea maata” te vaine akaipoipo?

⁸ E tatau ia Salamo 45:13, 14a. Kua “akamaneaia [te vaine akaipoipo] no te akaipoipo anga ki tana tane” e e “manea maata” tona. I roto ia Apokalupo 21:2, te akaaiteia ra te vaine akaipoipo ki tetai oire, ko Ierusalema Ou. Te kanapanapa ra teia oire i te  rangi “ma te kakā no ko mai i te Atua” e ko “tona mārama mei to te toka meitaki rava ra, mei te toka iasepe, mei te io i te areare ra.” (Apo. 21:10, 11) Te akatakaia ra te kaka o Ierusalema Ou i roto i te puka o Apokalupo. (Apo. 21:18-21) Kare e ekoko, e vaine akaipoipo “manea maata” teia! Papu e ko teia rai ta tatou ka tapapa atu no tetai akaipoipo anga Ariki i te rangi.

9. Ka aratakiia te vaine akaipoipo kiaai, e eaa te tu o tona akamanea anga?

⁹ Ka aratakiia te vaine akaipoipo ki tana Tane Akaipoipo, te Ariki o te Patireia o te Atua. Kua akateateamamao e kua tama aia i tana vaine ma “te tuatua.” E vaine ‘tapu aia e te apa kore.’ (Ephe. 5:26, 27) Pera katoa, ka anoanoia tana vaine akaipoipo kia akamanea meitaki no te akaipoipo anga. E ko teia rai tei tupu! “Kua akamaneaia tona kakau i te auro,” e “ka aratakiia aia ki te ariki ra ma te kakau manea maata.” No te akaipoipo anga o te Punua mamoe, “kua tukuia iaia te kakau i te kakau meitaki, e mea viivii kore, e te teatea e taua kakau meitaki ra, ko te tuatua-tika ïa a te aronga tapu.”​—Apo. 19:8.

10. Eaa te ka tupu i mua ake ka raveia te akaipoipo anga o te Punua mamoe?

¹⁰ E tatau ia Apokalupo 19:7. Aea te akaipoipo anga o te Punua mamoe e raveia ai? Noatu te karanga ra a Apokalupo 19:7 e “kua akamanea tana vaine iaia uaorai,” kare te au irava i muri mai e akataka mai ana i te akaipoipo anga. Mari ra, te akataka maira teia au irava i te tuanga openga o te mate maata. (Apo. 19:11-21) Ko te aiteanga ainei e ka raveia te akaipoipo anga i mua ake ka upokotu atu rai te Ariki? Kare. Te tumu, no te mea kare te au tupuanga i roto i te puka o Apokalupo i akapapaia mei te akamataanga tae ua atu ki te openga. I roto ia Salamo 45:1-17, ka tatua te Ariki ko Iesu Karaiti i tana koke e ka takore i tona au enemi na mua, e oti ka raveia te akaipoipo anga ariki.​—Sala. 45:3, 4.

11. Eaa ta Karaiti ka rave i mua ake te akaipoipo anga?

¹¹ I roto i te Pipiria, ka kite tatou e eaa te ka tupu mei te akamataanga tae ua atu ki te openga: Mea mua, ka takoreia “te vaine akaturi maata” ko Babulonia Maata koia oki, te au akonoanga pikikaa. (Apo. 17:1, 5, 16, 17; 19:1, 2) Aru mai, ka takore a Karaiti i te toenga o to Satani ao kino i Aramakito, “te tamaki i taua rā maata o te Atua mana katoatoa.” (Apo. 16:14-16; 19:19-21) I te openga, ka upokotu atu rai te Ariki na te uri anga ia Satani e te au temoni ki roto i te vaarua takere kore, e kare e rauka ia ratou i te takinokino akaou i tetai ua atu tangata. Mei te mea rai e kua mate ratou.​—Apo. 20:1-3.

12, 13. (a) Aea e raveia ai te akaipoipo anga o te Punua mamoe? (e) Koai ma i te rangi te ka rekareka no te akaipoipo anga o te Punua mamoe? (Akara i te tutu mua o teia atikara.)

¹² I te au ra openga, te aronga akatainuia tei vai tiratiratu e tae ua atu ki te openga, ka akatuakaouia ratou ki te rangi. I muri ake te takoreia anga a Babulonia Maata, e i mua ake ia Aramakito, ka akaputuputu a Karaiti i te katoaanga o te 144,000 Kerititiano akatainuia kia kapiti atu kiaia i te rangi. (1 Tesa. 4:16, 17) E oti, i muri ake ia Aramakito, ka raveia te akaipoipo anga o te Punua mamoe. E atianga mataora tikai te reira! Te akakite maira a Apokalupo 19:9 e: “E ao to tei tuatuaia e aere mai ki te kaingakai po no te akaipoipo anga a te Punua-mamoe.” Ae, ka mataora tikai te vaine akaipoipo. Ka rekareka katoa te Ariki no te mea kua kapiti mai tona au oa akatainuia kiaia i te rangi. (Luka 22:18, 28-30) Inara, kare ko te vaine akaipoipo e te Tane Akaipoipo anake te ka mataora.

¹³ Mei ta tatou i tatau i mua ana, ka imene te au reo i te rangi e: “Kia rekareka tatou,  e kia pereperekavana e e akameitaki oki iaia: kua tae oki ki te akaipoipo anga a te Punua-mamoe, e kua akamanea tana vaine iaia uaorai.” (Apo. 19:6, 7) Akapeea ra te au tavini o Iehova i te enua nei? Ka rekareka katoa ainei ratou?

14. Mei tei akatakaia i roto ia Salamo 45, koai te “au oa paretenia” o te vaine akaipoipo?

¹⁴ E tatau ia Salamo 45:12, 14e, 15. Kua totou te peroveta ko Zekaria e e iti tangata tetai mei te au tuanga tataki tai o te pa enua te ka tavini mataora ia Iehova ma te toenga o te aronga akatainuia i te au ra openga. Kua tata aia e: “Ei taua au rā ra e opu mai ei nga tangata tino ngauru, no roto i te au reo katoa o te pa enua ra, i te tapa kakau o tetai ngati Iuda ta ratou e opu, ka na ko atu ei, Ka aere katoa tatou: kite akenei oki matou e tei ia kotou te Atua.” (Zeka. 8:23) I roto ia Salamo 45:12, te akatutu maira te “nga tangata tino ngauru” i te “tamaine a Turia” e te “aronga apinga nui.” Ka oronga ratou i te apinga aroa ki te aronga akatainuia, e ka kimi ratou i te akamarekaanga e te tauturu a te aronga akatainuia kia tavini ia Iehova. Mei te mataiti 1935, kua apii atu te toenga o te aronga akatainuia i te mirioni ua atu tangata kia kite i “te tuatua-tika” koia oki, kia kite i te tuatua mou no runga ia Iehova. (Dani. 12:3) Ko teia mirioni ua atu tangata, me kore “nga tangata tino ngauru,” e au oa tiratiratu ratou no te aronga akatainuia tei tama i to ratou oraanga mei te akamorianga pikikaa. No reira ratou i kapikiia ai e ko te “au oa paretenia.” Kua akatapu ratou i to ratou oraanga kia Iehova e kua akapapu e e au tavini tiratiratu ratou no te Ariki ko Iesu Karaiti.

15. Akapeea te “au oa paretenia” te angaanga kapiti anga ki te toenga o te aronga akatainuia?

 ¹⁵ E ariki rekareka ana te toenga o te aronga akatainuia i teia “au oa paretenia” no te tutu maroiroi anga i “te evangelia o te basileia nei, e kako rava ake te ao katoa nei.” (Mata. 24:14) Te tuatua nei te vaerua e te vaine akaipoipo e, “E aere mai,” pera katoa te aronga e akarongo ra, te tuatua nei ratou e: “E aere mai.” (Apo. 22:17) Tera te aiteanga, kua akarongo ana te “mamoe ke atu” i te aronga akatainuia e tuatua ra e, “E aere mai,” e kua kapiti ratou ki te aronga akatainuia i te tuatua anga ki te ao nei, “E aere mai.”​—Ioa. 10:16.

16. Eaa te tikaanga ngateitei ta Iehova i oronga ki te mamoe ke atu?

¹⁶ E inangaro maata to te toenga o te aronga akatainuia no te mamoe ke atu. E mataora katoa te aronga akatainuia e kua oronga a Iehova i te tikaanga ngateitei ki te mamoe ke atu kia rekareka no te akaipoipo anga. “Ka aratakiia [teia “au oa paretenia”] ma te rekareka e te pereperekavana.” Ae, ko te au mamoe ke atu koia oki, te aronga e manakonakoanga to ratou no te oraanga mutu kore i te enua nei, ka rekareka maata ratou kapiti atu i te ao katoa me raveia te akaipoipo anga o te Punua mamoe i te rangi. Te akataka maira te puka o Apokalupo i te “aronga maata rava” tei akamori ia Iehova i te enua nei, e te tu ua ra ratou “ki mua i te terono, e ki mua i te Punua-mamoe.” Te tavini nei ratou ia Iehova i roto i te paepae o te iero pae vaerua i te enua nei.​—Apo. 7:9, 15.

17, 18. Akapeea te akaipoipo anga o te Punua mamoe te apai mai anga i te puapinga ki te aronga ka noo i roto i te ao ou? I roto i te Tutaraanga no te Tauatini Mataiti, koai ma ka ariki ia Karaiti ei metua no ratou?

¹⁷ E tatau ia Salamo 45:16. E maata te au tumu no te “au oa paretenia” o te vaine akaipoipo a Karaiti kia rekareka me kite ratou i te puapinga ta te akaipoipo anga ka apai mai i roto i te ao ou. Ka akatuakaou te Ariki ko Iesu Karaiti i tona “ai metua” i te enua nei. I te mea e na Karaiti e akatuakaou ia ratou, ka riro mai ratou ei “tamariki” nana. (Ioa. 5:25-29; Ebe. 11:35) Ka iki a Karaiti i tetai o teia “tamariki” kia riro ei ‘ariki i te pa enua katoa.’ Ka irinaki katoa tatou e ka iki aia i tetai pae o te aronga pakari akarongo mou o teia tuatau kia riro ei “ui ariki” i roto i te ao ou.​—Isa. 32:1.

¹⁸ I roto i ta Karaiti Tutaraanga no te Tauatini Mataiti, ka riro katoa aia ei metua no etai ke. Akapeea ra? Te aronga tei tuku atu i to ratou akarongo ki roto i te atinga oko o Iesu, ka noo ratou i te enua nei e tuatau ua atu. (Ioa. 3:16) I reira, ka riro a Karaiti ei “Metua no te tuatau mutu kore.”—Isa. 9:5, 6.

19, 20. Akapeea te au tuatua i roto ia Salamo 45 te akakeu anga ia tatou?

¹⁹ E tatau ia Salamo 45:1, 17. Ka tau te au Kerititiano kia akamanako i te au mea tei tataia i roto ia Salamo 45. Te maeva nei te toenga o te aronga akatainuia i te enua nei i te kite e kare e roa atu, ka piri atu ratou ki to ratou au taeake e ki te Tane Akaipoipo ko Iesu Karaiti, i te rangi. Te akakeuia nei te mamoe ke atu kia kauraro ua atu rai ki to ratou Ariki kaka. Te mataora katoa nei ratou kia riro mai ei au oa no te toenga o te au mema o te vaine akaipoipo i te enua nei. Ko te au akameitakianga ta Karaiti e tana vaine akaipoipo ka oronga mai ki te tangata pouroa, e mea umeremere tikai.​—Apo. 7:17; 21:1-4.

²⁰ Ia tatou e tapapa atu nei i te akatupu anga o te au totou no runga i te Ariki o te Patireia o te Atua, papu e te akakeuia nei tatou kia akakitekite i tona ingoa. No reira, te inangaro nei tatou i te akapaapaa i te Ariki “e tuatau e tuatau ua atu.”