1. Eaa te akaaerenga ta te Atua i iki kia mono i te iti tangata o Iseraela? (Akara i te tutu mua o teia atikara.)

TE AKAMORI nei te iti tangata o Iehova iaia na roto i te tu Tana e mareka ra. I mua ana, ko te katoaanga o te iti tangata o Iseraela te aronga tei ikiia e te Atua. Inara kua patoi ratou i te au apiianga a Iehova. I reira, kua akanoo a Iehova i tetai iti tangata ou, ko te au pipi a Iesu. Kua riro mai ratou ei akaaerenga tei akapaapaa i te ingoa o Iehova. E noatu kua takoreia a Ierusalema i te mataiti 70 T.N., kare taua akaaerenga ra i takoreia. (Luka 21:20, 21) I teia tuatau openga, kua akanooia teia iti tangata ou kia akapaapaa ia Iehova. Ka akaoraia teia iti tangata ou i te tuatau me takoreia te ao o Satani. (2 Timo. 3:1) Akapeea tatou i papu ei?

2. Akapeea a Iesu te akataka anga i te “mate maata,” e eaa te ka tupu me akamata te reira?

² Teia ta Iesu i totou te ka tupu i te au ra openga: “E mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e kare oki a muri atu.” (Mata. 24:3, 21) Ka akamata te mate maata me takore a Iehova ia “Babulonia Maata,” te patireia o te au akonoanga pikikaa o  teianei ao. Ka taangaanga a Iehova i te au patireia o te tangata kia rave i te reira. (Apo. 17:3-5, 16) Eaa te ka tupu i muri mai?

3. Me takoreia te au akonoanga pikikaa, eaa te ka tupu ki te iti tangata o Iehova?

³ Me takoreia te au akonoanga pikikaa, ko te akaaerenga a te Au Kite o Iehova anake te ka vai rai i te enua nei. E oti, ka takinokino a Satani e tona ao i te au tavini o te Atua. I te akara anga, kare tetai ua atu apinga e rauka i te paruru i te iti tangata o Iehova. Te akakite maira te Pipiria no runga ia “Goga i te enua o Magoga” e: “Kua kake a uriia maira koe ki runga, ka riro koe mei te tumurangi e ngaro ei te enua ra, ko koe, e toou ra au motuanga ravarai, e te au tangata e manganui i te kapiti katoa anga kia koe.” Inara ka riro teia tamakianga ei mea tarevake no ratou!—Eze. 38:1, 2, 9-12.

4, 5. Eaa ta Iehova ka rave me takinokinoia tona iti tangata?

⁴ Me takinokino a Satani e tona ao i te iti tangata o Iehova, mei te mea rai e te takinokino ra ratou ia Iehova. (E tatau ia Zekaria 2:8.) Eaa ta Iehova ka rave? Ka akaora viviki te Atua Mana Katoatoa i Tona iti tangata. Kare roa ratou e takoreia. I muri ake te akaora anga i tona iti tangata, ka akamata te tamaki a Iehova ko Aramakito, e ka takore takiriia to Satani ao.—Apo. 16:14, 16.

⁵ Kua totou a Ieremia e ka tamaki atu a Iehova i te au iti tangata i te tuatau ia Aramakito. Kua akakite aia e: “E akava oki aia i te au tangata katoa ra; e tuku atu aia i te aronga kino i te koke, te tuatua mairā Iehova. Te na ko mairā Iehova Sabaota ra; I na, ka riro atura te kino mei tetai enua e tae atura ki tetai enua, e akatupuia tetai puaioio maata, mei te openga mai o te enua ra. E ko tei mate ia Iehova ra, kia tae ki te reira rā, e riro ïa mei tetai openga mai o te enua, e tae ua atu ki tetai openga o te enua ra; kare ratou e tangiia, e kare e akaputuia, e kare e tanumia; e riro ra ei teita ki runga i te enua nei.” (Iere. 25:31-33) Na roto ia Aramakito, ka ope te ao o Satani. Inara, ka vai rai te akaaerenga a Iehova.

6, 7. (a) Noea mai te “aronga maata rava”? (e) Eaa te au tupu anga i te au mataiti i topa akenei?

⁶ I teia tuatau, te tupu ua atura te akaaerenga a te Atua no te mea kua ki te reira i te aronga tuatua tika tei akamareka ia Iehova. Te akakite maira te Pipiria e: “Tei te aronga tuatua-tika ra to Iehova mata, e tei ta ratou kapiki tona taringa.” (1 Pete. 3:12) Kapiti mai ki teia aronga tuatua tika, ko te “aronga maata rava,” ko ratou te ka akaoraia mai mei “te mate maata.” (Apo. 7:9, 14) Akamanako ana e mei teaa rai toou tu rekareka me akaoraia koe mei te mate maata ei mema no te aronga maata rava!

⁷ Kapiti mai ki teia aronga maata rava, ko te aronga mei te au pa enua ravarai. Kua akaputuputuia ratou na roto i te angaanga tutuanga. Kua akakite a Iesu e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira.” (Mata. 24:14) Ko te tumu teia e ko te angaanga puapinga rava atu a te iti tangata o te Atua koia oki, kia tutu aere i te tuatua meitaki o te Patireia o te Atua. Na roto i teia angaanga, e mirioni ua atu tangata te akamori ra ia Iehova “ma te vaerua e te tuatua-mou.” (Ioa. 4:23, 24) Ei akaraanga, mei te mataiti 2003  ki te mataiti 2012, tere atu i te 2,707,000 tangata tei akatapu i to ratou oraanga kia Iehova na roto i te papetitoanga. I teia tuatau, tere atu i te 7,900,000 Au Kite o Iehova, e i te au mataiti ravarai, e mirioni ua atu aronga tei tae mai ki te Akamaaraanga no te matenga o Iesu. Te rekareka nei tatou no tei tupu ua atura te aronga maata rava, e te kite nei tatou e na Iehova e akatupu i te reira.—1 Kori. 3:5-7.

8. Eaa te tumu e tupu ua atura te akaaerenga a Iehova?

⁸ Kua iki a Iehova i tetai akaaerenga kia tavini iaia, e te tupu viviki ra teia akaaerenga. (E tatau ia Isaia 43:10-12.) Kua totou a Isaia no runga i te tuatau openga e: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.” (Isa. 60:22) Ko te aronga akatainuia “te Iseraela o te Atua,” ko ratou “te mea ngiti okotai,” inara kua akameitaki a Iehova i ta ratou angaanga tutuanga. Kua maata atura to ratou numero no te mea e maata te aronga akatainuia tei tomo ki roto i te akaaerenga a te Atua. (Gala. 6:16) I te au mataiti i topa akenei, e mirioni ua atu tangata e manakonakoanga to ratou kia noo i te enua nei tei ariki i te tuatua mou.

9. Eaa ta tatou ka rave kia puapingaia mei te taputou a te Atua no tetai oraanga umere tikai a te tuatau ki mua?

⁹ Kua taputou mai a Iehova i tetai oraanga umere tikai no tatou pouroa a te tuatau ki mua, noatu me kua akatainuia tatou me kore e aronga maata rava tatou. Kia puapingaia mei teia taputou, ka anoanoia tatou kia aru i tana au akauenga. (Isa. 48:17, 18) Ei akaraanga, kua akaue a Iehova i te ngati Iseraela kia aru i tana Ture. Na roto i teia Ture, ka paruruia e ka apiiia ratou e akapeea e mataora ai to ratou ngutuare tangata, akapeea me riro ei aronga tuatua tika i roto i ta ratou angaanga, e akapeea me akono meitaki i etai ke. (Exo. 20:14; Levi. 19:18, 35-37; Deu. 6:6-9) E aite rai te reira no tatou i teia tuatau. Ka paruru te au akauenga a te Atua ia tatou e ka riro te reira ei mea meitaki no tatou. Kare tana au akauenga i te mea ngata i te aru. (E tatau ia 1 Ioane 5:3.) Me aru tatou i te reira, ka mataora to tatou oraanga e tei maata rava atu, ka akaketaketaia to tatou akarongo ki roto ia Iehova.—Tito 1:13.

10. No teaa ra ka akapapu ei ia tatou kia apii putuputu i te Pipiria e kia rave i te akamorianga a te ngutuare?

¹⁰ Te tupu ua atura te tuanga o te akaaerenga a te Atua i te enua nei na roto i te au mataara tukeke. Te tauturu maira te reira ia tatou kia marama meitaki i te au tuatua mou Pipiria. Ko tera tikai tei taputouia mai i roto i te Pipiria, te na ko ra e: “Ko te arataa oki o te aronga tuatua-tika ra, e tau ïa ki te mārama kakā ra, ko tei tupu ua kakā anga e tae ua atu ki te avatea tikai.” (Mase. 4:18) Inara ka anoanoia tatou kia ui kia tatou uaorai e: ‘Te kite ra ainei au i te au akamaramaanga ou i roto i te au irava? Te tatau ra ainei au i te Pipiria i te au ra ravarai? E inangaro maata ainei toku kia tatau i te au puka ou? Te rave ra ainei au i te akamorianga a te ngutuare i te au epetoma?’ Kare teia au mea i te mea ngata i te rave, inara ka anoanoia tatou kia akanoo i tetai tuatau kia rave i te reira. E mea puapinga tikai kia apii ua rai tatou i te Tuatua a te Atua, kia taangaanga i te reira i roto i to tatou oraanga, e kia aru vaitata i te akaaerenga a te Atua. Ko teia tikai te tuatau kia rave i te reira no te mea te vaitata mai nei te mate maata!

11. Eaa ra te iti tangata o Iehova i aere ei ki te au uipaanga, te au akaputuputuanga, e te au uruoaanga?

 ¹¹ Te akamaroiroi maira te akaaerenga a Iehova ia tatou kia aru i te akoanga a Paulo: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebe. 10:24, 25) Kua uipa putuputu to Iseraela i taito i te akamori ia Iehova e kia akoia mai e ïa. I to Nehemia tuatau, ko te Oroa Patia Anga Puakapa tetai akaputuputuanga rekareka tikai. (Exo. 23:15, 16; Nehe. 8:9-18) I teia tuatau, e uipa ana tatou i ko i te au uipaanga, au akaputuputuanga, e te au uruoaanga. E mea puapinga kia tae tatou ki teia au akaputuputuanga no te mea te tauturu maira te reira ia tatou kia piri vaitata kia Iehova e kia tavini iaia ma te mataora.—Tito 2:2.

12. Eaa to tatou manako no runga i te angaanga tutuanga?

¹² Ei au mema no te akaaerenga a Iehova, ka anoanoia tatou kia tutu aere i te tuatua meitaki. E tikaanga ngateitei teia no tatou. Te akakite maira te Pipiria e e “angaanga tapu” teia. (Roma 15:16; NW) Me tutu aere tatou, te angaanga kapiti ra tatou kia Iehova, ko Tei Tapu. (1 Pete. 1:15; 1 Kori. 3:9) E tikaanga ngateitei to tatou kia akapaapaa i te ingoa tapu o Iehova. E rekareka katoa tatou i te tutu aere “i te evangelia kakā o te Atua kakā.”—1 Timo. 1:11.

13. Kua akatumuia to tatou oraanga e to tatou pirianga oa kia Iehova ki runga i teaa?

¹³ Te inangaro ra a Iehova i tei meitaki rava atu no tatou pouroa. Ko te tumu teia i inangaro ei aia ia tatou kia piri vaitata atu kiaia e tana akaaerenga. Ka anoanoia tatou kia rave i tetai ikianga mei ta te ngati Iseraela i rave te akakite anga a Mose kia ratou e: “Kua tuku au i te ora e te mate, i te meitaki e te kino, ki mua ia koe: e tenana, ka rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia; ko toou ïa ora aia.” (Deu. 30:19, 20) No reira, e iki i te ora. Tuku i toou inangaro ki roto ia Iehova, e kia vai tiratiratu kiaia e tana akaaerenga.

14. Eaa ta tetai taeake i manako no runga i te akaaerenga a te Atua?

¹⁴ Tetai akaraanga, ko te Taeake Pryce Hughes, kua apii aia i te tuatua mou i mua ake i te mataiti 1914, e kua vai tiratiratu aia kia Iehova e Tana akaaerenga no te katoaanga o tona oraanga. Te akakite anga aia i tona tua oraanga, kua karanga aia e ko te apiianga puapinga rava atu tana i mou mai koia oki, kia piri vaitata atu ki te akaaerenga a Iehova e kia kore e irinaki ki roto i to tatou uaorai manako. Kua tauturu teia iaia kia akakoromaki i te timataanga i tona akarongo. Kua akakite te Taeake Hughes e ko te mataara anake ua kia akamareka ia Iehova koia oki, kia aru vaitata i te au aratakianga o tana akaaerenga.

15. Eaa te akaraanga Pipiria te akaari maira i ta tatou ka rave me akatanotanoia to tatou marama anga?

¹⁵ Te inangaro ra a Iehova ia tatou kia turuturu i tana akaaerenga e kia ariki i te au akatanotanoanga no runga i to tatou marama anga i te au tuatua mou Pipiria e te angaanga tutuanga. I te anere mataiti mua, kua inangaro tetai au Kerititiano ngati Iuda i te aru i te Ture. (Anga. 21: 17-20) Inara, kua akatikatika a Paulo i to ratou manako e kua tauturu aia ia ratou kia kite e na te atinga o Iesu e rauka ai i te akakore i ta ratou ara, kare na te au atinga manu. (Ebe. 10:5-10) E manganui o teia au Kerititiano ngati Iuda tei ariki i te akoanga a Paulo e tei akatikatika i to ratou manako. E apiianga puapinga ta tatou i mou mai mei to ratou akaraanga. Ka anoanoia tatou kia apii meitaki i te Pipiria e ta tatou au puka, e me rave te akaaerenga a Iehova i te au akatikatikaanga, kia ariki tatou i te reira ma te tu akaaka.

16. (a) Eaa te tumu ka riro te oraanga ei mea umere tikai i roto i te Parataito? (e) Eaa taau e tapapa atura i roto i te ao ou?

¹⁶ Ko te aronga pouroa tei vai tiratiratu kia Iehova e tana akaaerenga, ka rauka te au akameitakianga. Ka riro te aronga akatainuia ei au ariki kapiti atu kia Iesu i runga i te rangi. (Roma 8:16, 17) Te aronga e manakonakoanga to ratou kia noo i runga i te enua nei, ka tapapa atu ratou i te oraanga mutu kore i roto i te Parataito. E tikaanga puapinga tikai to te iti tangata o Iehova takapini i teianei ao, kia akakitekite i teia manakonakoanga ki etai ke. (2 Pete. 3:13) “Te aronga maru ra, ka noo ïa i te enua, e ka rekareka ratou i te maata o te au.” (Sala. 37:11) Ka rauka ia ratou te angaanga meitaki rava atu. “E patu ratou i te au are, e na ratou uaorai e noo.” (Isa. 65:21, 22) Kare tetai ua atu tangata e takinokino i tetai ke. Kare e aronga putaua, e ka rava te kai na te katoatoa. (Sala. 72:13-16) Kare te au akonoanga pikikaa e apii akaou i te au pikikaa no runga i te Atua no te mea ka takoreia te reira. (Apo. 18:8, 21) Ka akatuakaouia mai te aronga tei mate e ka ora ratou e mutu kore ua atu. (Isa. 25:8; Anga. 24:15) Me akaketaketa tatou i to tatou pirianga kia Iehova e me aru vaitata i tana akaaerenga, ka tupu tikai teia au totou kia tatou.

17. Eaa to tatou manako no runga ia Iehova e tana akaaerenga?

¹⁷ Kare e roa atu, ka ope te ao o Satani. Inara e rauka ai ia tatou kia akaoraia mei te reira, ka anoanoia kia vai ketaketa to tatou akarongo e kia akamori tiratiratu ia Iehova kapiti atu ki tana akaaerenga. E aite rai to tatou manako ki to Davida tei imene e: “Okotai aku mea anoano ia Iehova ra, ko taku ï[a] e umuumu ua nei; kia noo rai i roto i te are o Iehova e ope roa ake oku puke rā i te ora anga nei, kia akara au i te meitaki o Iehova, e kia ui marie au ki roto i tona nao.” (Sala. 27:4) No reira, e mea puapinga no tatou tataki tai kia piri vaitata kia Iehova e kia aru vaitata i tana akaaerenga.