TE AKARUKE anga te iti tangata o te Atua ia Babulonia i te mataiti 537 M.T.N., kua akamanako a Iehova i te mataara ta ratou ka aru kia oki ki Ierusalema. Akakite aia kia ratou e: “E akateateamamao ana i te ara no te au tangata ra; e akāū ki runga, e akāū i te arataa ki runga; auraka ei tokatoka.” (Isa. 62:10) Akamanako ana i te ngati Iuda i te rave anga i teia angaanga. Penei kua aere tetai pupu aronga na mua, e kua akaki i te au vaarua i runga i te mataara e kua akatikatika i te au ngai pukupuku. Na te rave anga i teia, kua tauturuia to ratou au taeake tei aru ia ratou na muri mai kia oki ki to ratou enua anau.

Te akatutu ra teia i te akatupu anga i te au akakoroanga pae vaerua. Te inangaro nei a Iehova i tona au tavini pouroa kia aru i teia mataara ma te kore e arai anga. Te akamaroiroi maira tana Tuatua ia tatou e: “E akamaara meitaki i te arataa o to vaevae, e e akatinamouia toou katoa ra au aerenga.” (Mase. 4:26) Noatu me e tangata mapu koe e me kare, ka puapingaia koe mei te akoanga no ko mai i te Atua.

Penei kua rongo ana koe i te tangata e tuatua ra no runga i tetai mapu: ‘E maata tikai te au mea meitaki ka rauka iaia i te rave.’ E meitaki te oraanga kopapa o te au mapu, e viviki ratou i te akamanako, e e inangaro maata to ratou kia rauka te puapinga. Te akakite maira te Pipiria e: “Ko te ririnui te inuinu o te tangata ou.” (Mase. 20:29) Me taangaanga tetai mapu i tona maroiroi e tona tareni i roto i te angaanga a Iehova, ka taeria iaia te au akakoroanga pae vaerua e ka rauka te mataora mou.

Inara, penei kua kite koe e e puapinga katoa te au tareni a te au mapu i roto i teianei ao. Me meitaki tetai Kerititiano mapu i roto i tana apii, penei ka maro atu tetai puapii, me kore tetai oa apii iaia kia aruaru i te  apii teitei. E me meitaki tetai taeake me kore tuaine mapu i roto i te tipoti, penei ka tauta tetai aronga i te maro iaia kia aruaru i te angaanga tipoti. Kua aro atu ainei koe i teia turanga? Kua kite ainei koe i tetai mapu tei aro atu i teia turanga? Eaa te ka tauturu i tetai Kerititiano mapu kia rave i te au ikianga meitaki?

Ka tauturu te au kaveinga Pipiria i tetai tangata kia akapapa iaia uaorai i te aere na te mataara meitaki rava atu i roto i te oraanga. Te na ko ra a Koheleta 12:1 e, “E tenana e akamanako i Tei anga ia koe i to ou anga ra.” Ka akapeea koe me kore tetai tangata mapu me “akamanako i Tei anga ia koe”?

Akamanako ana e eaa tei tupu kia Eric * i Aperika Opunga. E reka ana aia i te kanga tueporo tarape. I tona 15 mataiti, kua ikiia aia kia piri atu ki roto i te pupu o te pa enua. Te aiteanga i reira, kare e roa atu ka rauka iaia te tereni anga meitaki roa atu i Europa, e peneiake ka ikiia aia no tetai pupu tueporo tarape rongonui. Inara ka akapeea aia me “akamanako” ia Iehova? E eaa te apiianga noou me kore no tetai taeake mapu?

Kua akamata a Eric i te apii i te Pipiria ma te Au Kite o Iehova i tona tuatau i te apii. I roto i tana apii, kua kite mai aia e ka akakore takiri te Atua i te au manamanata o te tangata. Kua kite katoa aia e e puapinga tikai kia taangaanga i tona taime e te maroiroi kia rave i to te Atua anoano. No reira, kare a Eric i iki ana i te kanga tueporo tarape. Mari ra, kua papetitoia aia e kua taangaanga i tona taime e te maroiroi i te tavini ia Iehova. Aere ua rai, kua riro mai aia ei tavini tauturu e kua patiia aia kia aere ki te Apii Pipiria no te au Taeake Kare i Akaipoipo.

Naringa e kua aruaru a Eric i te tueporo tarape, penei ka rauka iaia te apinga nui e te rongonui. Inara kua marama aia i te tika anga o te au kaveinga Pipiria e: “To te tangata apinga nui ra apinga, ko tona ïa oire ketaketa, e mei te patu teitei ra ïa i tona uaorai manako anga.” (Mase. 18:11) Ae, ko te paruru anga ta tetai tangata ka rauka mai mei tana apinga, kare te reira i te mea tika tikai. Tei maata atu, me aruaru te tangata i te apinga nui, e maata te taime ka “ko mama rava ia ratou uaorai i te iriea e manganui.”—1 Timo. 6:9, 10.

Te mea meitaki ra, e maata te aronga mapu tei rauka te mataora e te tu tinamou na te rave anga i te angaanga tavinianga tamou. Karanga a Eric e: “Kua piri atu au ki roto i te ‘pupu’ maata o te au tavini tamou o Iehova. Ko teia te pupu meitaki roa atu, e te akameitaki nei au ia Iehova no te akaari mai anga i te mataara ki te mataora mou e te puapinga i roto i toku oraanga.”

Akapeea koe? I to te aruaru anga i te au akakoroanga o teianei ao, e akamou i “toou aerenga” i mua ia Iehova na te rave anga i te angaanga painia.—Akara i te atikara “ Rauka Iaku te Puapinga i Roto i te Angaanga a Iehova.”

Te atoro mai anga tetai nga tokorua i te opati manga i Marike, kua kite raua i te tu mataora o te au taeake e te au tuaine i ko i te Betela. Kua akakite mai te tuaine e kare raua ko tona tokorua e oronga ana i ta raua ka rauka i te tavini ia Iehova. No reira, kua iki te nga tokorua i te oronga maata atu i to raua taime e te maroiroi i roto i te angaanga a Iehova.

Kua emiemi te nga tokorua i te rave i te au tauianga. Inara i tetai rā, kua akamanako raua i te tia no runga ia Ioane 8:31, te karanga anga a Iesu e: “I tāpu tika kotou i taku tuatua, e pipi tikai kotou naku i reira.” Kua akamanako raua e: “Noatu eaa ta maua ka akaatinga ei akamama mai i to maua oraanga, ka puapingaia maua.” No reira, kua oko raua i to raua are maata, kua akakore raua i te au mea kare e anoanoia, e kua neke raua ki tetai putuputuanga tei anoano i te tauturu. I teianei te painia ra raua e te tauturu ra i te akatu i te au Are Uipaanga Patireia e te tauturu ra i ko i te au uruoaanga tapere. Eaa to raua manako? “Kua umere tikai maua no te mataora tei rauka mai mei tetai oraanga mama ua, e te rave anga i ta te akaaerenga a Iehova e akamaroiroi maira ia tatou kia rave.”

Kua tata a Solomona e: “E akara tika atu to mata ki mua ia koe, e anga i to topiri-mata ki mua atu ia koe.” (Mase. 4:25) Mei tetai tangata akaoro motoka tei akara ki runga i te mataara, ka anoanoia tatou kia kopae i te au akavareanga te ka arai ia tatou mei te akanoo anga e te akatupu anga i te au akakoroanga pae vaerua.

Eaa tetai au akakoroanga pae vaerua taau ka akanoo? Ko te angaanga tavinianga tamou tetai akakoroanga meitaki tikai. Tetai akakoroanga ke, koia oki kia neke ki tetai putuputuanga tei anoano i te  aronga tutu aere kia kapi ta ratou ngai tutuanga mamaata. Me kore penei e maata te au papuritia i roto i tetai putuputuanga, inara kare e maata ana te aronga pakari me kore te au tavini tauturu. Ka rauka ainei ia koe i te akanoo i teia au akakoroanga? Penei ka rauka ia koe i te pati atu ki te akaaere kotinga no te tauturu. Me inangaro koe i te aere ki tetai ngai mamao, ka rauka ia koe i te pati no te au ikuikuanga no runga i tetai putuputuanga mamao te anoano ra i te tauturu. *

Akara akaou ana tatou i te tutu tei akatakaia i roto ia Isaia 62:10. Penei kua angaanga pakari tetai aronga ngati Iuda i te akatikatika i te mataara e te tama i te reira kia rauka i te iti tangata o te Atua kia oki ki to ratou enua anau. Me te tauta ra koe kia taeria atu te au akakoroanga i roto i te angaanga a Iehova, auraka e tuku i te au. Ma te tauturu a te Atua, ka taeria e koe teia au akakoroanga. E pati ua rai kia Iehova no te pakari e kia akaatea i te au apinga tei arai i toou arataa. I te tuatau ka aereia, papu e ka kite koe e ka akapeea te Atua me tauturu ia koe kia “akamaara meitaki i te arataa o to vaevae.”—Mase. 4:26.