Kua tatau meitaki ainei koe i te au itiu ou o Te Punanga Tiaki? Akara ana me ka rauka ia koe i te pau i te au uianga ka aru mai:

Eaa te tuatau i tā ei te ngati Iseraela i te punua mamoe no te Pasa ia Nisana 14?

Akakite mai tetai au urianga Pipiria e kia tā i te punua mamoe “i te aiai,” koia oki i muri ake i te opunga ra, inara i te tuatau e marama ra rai. (Exo. 12:6)—12/15, kapi 18-19.

Eaa te au kaveinga Pipiria te ka tauturu i te au mapu kia rave i te au ikianga meitaki?

E toru kaveinga: (1) E kimi i te basileia o te Atua na mua, e te tuatua-tika nana. (Mata. 6:19-34) (2) Rauka te mataora i te tavinianga i etai ke. (Anga. 20:35) (3) Rekareka i te tavinianga ia Iehova i toou mapuanga. (Kohe. 12:1)—1/15, kapi 19-20.

Aea e raveia ai “te akaipoipo anga a te Punua-mamoe”? (Apo. 19:7)

Ka raveia te “akaipoipo anga a te Punua-mamoe” me upokotu atu rai te Ariki ko Iesu Karaiti, koia oki i muri ake te takoreia anga a Babulonia Maata e te tamakianga o Aramakito.—2/15, kapi 10.

Eaa te tumu no te ngati Iuda o te anere mataiti mua kia ‘tapapa’ atu i te Mesia? (Luka 3:15)

Kare e rauka ia tatou i te akapapu e kua marama te ngati Iuda o te anere mataiti mua i te totou i roto ia Daniela no runga i te taime e tae mai ei te Mesia. (Dani. 9:24-27) Noatu rai, penei kua rongo ratou i te akakiteanga a te angera ki te au tiaki mamoe me kore ta te peroveta vaine ko Ana i tuatua te kite anga aia i te pepe ko Iesu i ko i te iero. Pera katoa, kua aere mai te aronga akara etu ki Ierusalema i te kimi i te “Ariki anau ou o te ngati Iuda nei.” (Mata. 2:1, 2) E i muri mai, kua akakite mai a Ioane Papetito e kare e roa atu, ka mama mai te Mesia.—2/15, kapi 26-27.

Eaa te Atua i akatika ai i te aronga mana kia takinga kino i te aronga akaaka?

Tetai tumu, koia oki: Kare e tika i te Atua kia pikikaa. (Tito 1:2) Mei muatangana roa mai, kua akamatakite te Atua i te tangata e me ka meameaau te tangata iaia, ka tupu te kino, mei te takinga kino anga i tetai e tetai. Naringa te Atua i takore i taua au ravenga takinga kino ra, kare ainei e ka riro tana au tuatua ei mea pikikaa?—3/1, kapi 11.

Akapeea tatou me kopae i te tuatua anga i te Koia e te Kare? (2 Kori. 1:18)

E tika, tetai taime kare e rauka ia tatou i te rave i ta tatou i tuatua no te au turanga kare e rauka ia tatou i te akono. Inara me papau tatou i te rave i tetai angaanga, ka anoanoia tatou kia rave i ta tatou ka rauka i te akono i te reira.—3/15, kapi 32.

Eaa te au akaaoanga te ka tupu me akaruke tetai Kerititiano i tona ngutuare tangata kia neke ki tetai enua ke kia rauka te moni?

Me kare te au metua e te tamariki e noo kapiti ana, penei ka riro te reira ei mea kino ki te manako ngakau o te tamariki e ka kino to ratou turanga no te mea tika e te mea tarevake. Penei ka riri ratou i te metua no te akaruke anga ia ratou. E ka aro atu te aronga tei akaruke i te ngutuare tangata i te timataanga kia rave i te ainga tau kore.—4/15, kapi 19-20.

Akapeea tatou me kopae i te timataanga kia akara i te au tutu ainga viivii?

E toru takainga: (1) Me kite tatou i te tutu ainga viivii, e uri ke atu. (2) Paruru i to tatou manako na te akamou anga i te reira ki runga i te au mea meitaki e te pure anga ki te Atua. (3) Paruru i to tatou aerenga na te kopae anga i te au teata e te au Web site tei akaari i te au tutu ainga viivii.—5/1, kapi 12-14.

Mei teaa rai te tu oraanga o te au tuikaa o Roma?

E maata te au tuikaa tei maroia kia angaanga i roto i te au maina, e i taua taime rai, kua meitaki te turanga o te aronga tanutanu e te aronga akono puakatoro. Penei ka anoanoia tetai tuikaa kia tapekaia tona kaki ki te kiri auri kua tataia te tutaki ka rauka mai me oro aia e me kiteaia mai e tetai tangata e kua akaokiia aia ki tona pu. Ko te au tuikaa tei oro mei te ngai tapeka anga, penei ka tataia ki runga i tona rae te reta F, te aiteanga e tuitarere.—5/1, kapi 15.

Eaa te au uianga e a ka akamanako tatou me aravei atu tatou i te tangata i roto i te angaanga orometua?

Koai ma taku e tuatua ra? Teiea te ngai e pukapuka ra au ki te tangata? Eaa te taime meitaki kia tuatua ki te tangata? Akapeea au me tuatua kia ratou?—5/15, kapi 12-15.

Eaa ta Iehova ka rave me takinokino a Satani e tona ao i te au tavini o te Atua?

Ka akaora viviki a Iehova, te Atua Mana Katoatoa i Tona iti tangata. Me takinokino a Satani e tona ao i te au tavini o Iehova, mei te mea rai e te takinokino ra ratou Iaia. (Zeka. 2:8)—5/15, kapi 27.