Kare te Pipiria e patoi ana i te tareʼu anga i te kopapa o te aronga tei mate.

I roto i tetai au papaanga o te Pipiria, kua taʼuia te au kopapa e te au ivi o tetai pae tei mate. (Iosu. 7:25; 2 Para. 34:4, 5) Penei kua akaari te reira e kare taua aronga ra e tau ana kia tanumia. Inara te taʼuiia anga te au kopapa tei mate, kare te aiteanga e kare ratou pouroa e tau ana kia tanumia.

Ka kite tatou i teia i roto i te papaanga o te mateanga o te Ariki ko Saula e tana tamariki tamaroa e toru. Kua mate ratou i roto i te tamakianga i te ngati Philiseti. Ko tetai tamaiti tei mate, ko Ionatana, e tangata turuturu e e oa piri vaitata no Davida. Te kite anga tetai aronga tumutoa Iseraela i Iabesa-gileada e eaa tei tupu, kua rave mai ratou i te kopapa o Saula e tana tamariki, kua tutungi te reira ki te ai, e kua tanumiaia to ratou ivi. I muri mai, kua akameitaki a Davida i taua aronga Iseraela no ta ratou i rave.—1 Samu. 31:2, 8-13; 2 Samu. 2:4-6.

I roto i te Pipiria, ko te manakonakoanga o te aronga tei mate koia oki ka akatu akaou mai te Atua ia ratou. Noatu me kua tareʼuia tetai tangata tei mate e me kare, ka rauka rai ia Iehova i te akatu akaou mai i tera tangata ma tetai kopapa ou. Te akaue anga te Ariki ko Nebukanesa kia titiriia te au mapu Epera tokotoru ki roto i te umu ai vera, kare ratou i mataku ana e ka tareʼuia to ratou kopapa no te mea kua irinaki ratou e ka rauka rai i te Atua i te akatu akaou mai ia ratou. (Dani. 3:16-18) Ko teia katoa te manako o te au tavini akarongo mou o Iehova tei tamateia i roto i te puakapa tamamaeanga Nazi, e kua taʼuia to ratou kopapa. Kua mate tetai au tavini tiratiratu o te Atua no te au pomu tei aruru, me kore tetai ravenga ke tei takore i to ratou kopapa. Noatu rai, papu e ka akatu akaouia mai ratou.—Apo. 20:13.

Me akatu akaou mai a Iehova i tetai tangata, kare Aia e anoanoia kia akaoki akaou i te kopapa taito o tera tangata. Kua akaariia teia te akatu akaou mai anga te Atua i te au Kerititiano akatainuia ki te oraanga i runga i te rangi. Mei ia Iesu rai, tei ‘akaoraia e te vaerua,’ ka akatu akaouia mai te aronga akatainuia ma tetai kopapa vaerua. Kare to ratou kopapa tangata e aru ia ratou ki te rangi.—1 Pete. 3:18; 1 Kori. 15:42-53; 1 Ioa. 3:2.

E irinaki ana tatou e ka akatu akaouia mai tetai tangata tei mate no te mea ka rauka i te Atua i te akatupu i tana taputou e e inangaro maata tona i te rave i te reira. (Anga. 24:15) E tika, penei kare tatou e marama ana e i akapeea te Atua te akatu akaou anga i te tangata i mua ana, e ka akapeea aia me rave i te reira a te tuatau ki mua. Noatu rai, ka rauka ia tatou i te irinaki ki roto ia Iehova. Kua oronga mai aia i te akapapuanga na te akatu akaou anga ia Iesu.—Anga. 17:31; Luka 24:2, 3.

E mea meitaki no te au Kerititiano kia akamanako i te au mea tau ki te tangata, eaa ta ratou ka manako, e eaa te au umuumuanga i te pae ture no te akaatea anga i te au kopapa mate. (2 Kori. 6:3, 4) Pera katoa, na te ngutuare tangata e iki me ka tareʼuia te kopapa o tetai tangata tei mate e me kare.