1. Eaa tei riro ei tuanga puapinga tikai i roto i ta tatou akamorianga?

TAKAPINI i te ao katoa, ka kiteaia te ingoa o Iehova i runga i tetai au are e i runga i te au apinga i roto i te are vairanga apinga taito. Me kua kite ana koe i te ingoa o Iehova i ko i teia au ngai, kare e ekoko e kua umere koe. Ei Au Kite no Iehova, e tuanga puapinga tikai te ingoa o te Atua i roto i ta tatou akamorianga. Kare atu e aronga ke i kapikiia e te ingoa o te Atua mei ia tatou rai. Inara e maata atu te o maira ki te kapikiia anga e te ingoa o Iehova. No to tatou tikaanga ngateitei ei au Kite nona, ko ta tatou apainga, kia akangateitei Iaia.

2. No te tikaanga ngateitei ei Au Kite no Iehova, eaa ta tatou apainga?

² Kia akamareka i te Atua, e maata atu te o maira i te kapikiia anga i tona ingoa. Ka anoano katoaia tatou kia aru i tana au kaveinga e kia “kopae i te kino.” (Sala. 34:14) Kua akataka meitaki a Paulo i teia na te tata anga e: ‘Ko te tangata ravarai e taiku i te ingoa o Iehova ra, e akaruke anake ratou i te tuatua kino.’ (E tatau ia 2 Timoteo 2:19.) No reira ei iti tangata no te Atua, akapeea tatou me ‘akaruke anake i te tuatua kino’ koia oki, me kopae i te au tu kino ravarai?

3, 4. Eaa te au tuatua a Paulo tei ngata i tetai aronga kia marama, e no teaa ra?

³ I roto ia 2 Timoteo 2:19, te tuatua ra a Paulo no runga i “te tumu o te Atua.” E rua akakiteanga tei tataia ki runga i teia tumu. Te mea mua, ‘Kua kite a Iehova i tona uaorai.’ No roto te reira ia Numero 16:5. (Akara i te atikara i mua ake.) Akapeea ra te rua o te akakiteanga, koia oki, ‘Ko te tangata ravarai e taiku i te ingoa o Iehova ra, e akaruke anake ratou i te tuatua kino’? Tetai aronga, e ngata ia ratou kia marama i teia akakiteanga. No teaa ra?

⁴ Te akaari maira te au tuatua a Paulo e te taiku ra aia i tetai tuanga ke o te au Tuatua Tapu Epera. Inara kare atu e irava i roto i tera tuanga e aiteite ana ki taua akakiteanga ra. No reira, eaa ta Paulo e taiku ra i te tuatua anga e: ‘Ko te tangata ravarai e taiku i te ingoa o Iehova ra, e akaruke anake ratou i te tuatua kino’? No roto mai te akakiteanga mua a Paulo ia Numero pene 16, e te taikuia ra te reira ki te meameaau anga o Kora. Te taikuia ra ainei te rua o te akakiteanga ki taua tupuanga ra?

5-7. Eaa te au tupuanga i to Mose tuatau ta Paulo e taiku ra i roto ia 2 Timoteo 2:19? (Akara i te tutu mua o teia atikara.)

⁵ Kua piri atu a Datana e Abirama kia Kora i te meameaau anga. (Nume. 16:1-5) Kare ratou i kauraro ana kia Mose e kua kopae ratou i te turanga teitei ta te Atua i oronga kiaia. Kua riro ratou ei akakeuanga kino ki te ngati Iseraela no te mea te noo ra ratou i rotopu i te iti tangata. I na, i mua ake i te akataka anga a Iehova e koai ma tona aronga akamori tiratiratu, kua oronga aia okotai akauenga.

⁶ Te akakite ra te Pipiria e: “Kua tuatua mairā Iehova kia Mose, na ko maira, E karanga atu koe ki te uipaanga nei, e na ko atu, E aere ke kotou ki te mamao ke i te puakapa o Kora, to Datana, e to Abirama. Kua tu akerā Mose, aere atura kia Datana e Abirama ra, kua aru maira te aronga pakari o Iseraela iaia. Kua karanga atura aia ki taua uipaanga ra, na ko atura, Teia taku tuatua kia kotou, e aere ke kotou i te au puakapa o teianei puke tangata kino, auraka e arapaki ua atu i tetai mea ngiti a ratou ra, ka mate aea kotou i ta ratou katoa ra au ara. Kua aere ke anake iora ratou, to tetai pae e tetai pae i te puakapa o Kora, to Datana, e to Abirama.” (Nume. 16:23-27) E oti, kua takore a Iehova i te aronga meameaau pouroa. Inara ko te aronga tiratiratu i mua i te Atua, kua ora ratou. No teaa ra? No te mea kua ‘akaruke anake ratou i te tuatua kino’ na te akatakake anga ia ratou uaorai mei te aronga meameaau.

⁷ Te tata anga a Paulo e: ‘Kua kite a Iehova i tona uaorai,’ te taiku ra aia ia Numero 16:5. E i te akakite anga aia e: ‘Ko te tangata ravarai e taiku i te ingoa o Iehova, e akaruke anake ratou i te tuatua kino,’ penei te tuatua ra aia no te au tupuanga i roto ia Numero 16:5, 23-27. No reira e mea tau kia manako e te tuatua ra teia nga akakiteanga i roto ia 2 Timoteo 2:19 no runga i teia tupuanga okotai. Eaa ta tatou i mou mai mei teia nga akakiteanga? Te kite maira a Iehova e eaa to roto i to tatou ngakau. Te kite katoa ra aia e koai ma tona au tavini tiratiratu, e te tapapa ra aia ia ratou kia kore e piri atu ki te aronga kino.

8. I to te kapikiia anga i te ingoa o Iehova e ei tuanga no te putuputuanga, eaa atu ta tatou ka anoanoia kia rave?

⁸ Kua taangaanga katoa a Paulo i te au tupuanga i to Mose tuatau ei akamaara kia Timoteo e ka anoanoia aia kia paruru i tona uaorai pirianga kia Iehova. E maata atu tei anoanoia no te au Kerititiano kia rave i to te riro ua anga ei tuanga no te putuputuanga, mei ta te au tavini tiratiratu o te Atua i to  Mose tuatau tei anoano i te rave maata atu i to te kapikiia anga i te ingoa o Iehova. Ka anoanoia te au tavini akarongo mou pouroa o te Atua kia kopae i te au tu kino ravarai. Eaa te aiteanga o te reira kia Timoteo? E eaa ta tatou ka apii mai mei te akoanga a Paulo?

9. Akapeea “te ui neneva puapinga kore ra” i te akakino anga i te putuputuanga Kerititiano i mua ana?

⁹ I roto i ta Paulo reta kia Timoteo, kua oronga aia i te akoanga tau no te kopae anga i te kino. Ei akaraanga, kua akakite a Paulo kia Timoteo e ‘auraka e tauetono i te tuatua rikiriki puapinga kore’ e kia patoi i te reira. (E tatau ia 2 Timoteo 2:14, 16, 23.) Eaa te aiteanga o tana tuatua? Te apii ra tetai pae i roto i te putuputuanga i te au apiianga pikikaa ki te tangata. Te totoa ra tetai pae i te au manako tei akatupu i te pekapeka. Tetai o teia au apiianga, kare e tuke roa ana ki te au apiianga a te Pipiria, inara kua akakino te reira i te tu taokotai o te putuputuanga. Ko te tumu teia i akamaroiroi ei a Paulo ia Timoteo kia kopae i “te ui neneva puapinga kore.”

10. Eaa ta tatou ka rave me kite tatou i te au apiianga a te aronga tei patoi ia Iehova?

¹⁰ I teia tuatau, kare i te mea matau te kite i te aronga tei patoi ia Iehova i roto i te putuputuanga. Tera ra, penei te vai ra te au apiianga kare e rotai ana ki te au apiianga a te Pipiria. Noatu noea mai teia au apiianga tarevake, ka anoanoia tatou kia kopae takiri i te reira. Ko te aronga tei patoi ia Iehova, kare i te mea tau kia tuatua atu kia ratou i runga i te Initaneti me kore na roto i tetai mataara ke. Noatu e ka inangaro tatou i te tauturu i taua aronga ra, kare tatou e kauraro ana i te Atua me pukapuka tatou kia ratou. Te akaue maira Aia ia tatou kia patoi e kia kopae takiri ia ratou.

11. Eaa te tumu ka tupu ei te ke i roto i te putuputuanga, e akapeea te aronga pakari te akanoo anga i te akaraanga meitaki?

¹¹ Te vai nei rai tetai au mea ke te ka akakino i te turanga au o te putuputuanga. Ei akaraanga, penei e tukeke te manako no runga i te tamataora tau no te au Kerititiano. Me maro tatou i to tatou uaorai manako ki runga i etai ke, penei ka tupu te pekapeka. Inara akapeea me te turuturu ra tetai pae i roto i te putuputuanga i te tamataora, kare e rotai ana ki te au turanga tau o te Atua? Kare te aronga pakari e akatika i tera tu. (Sala. 11:5; Ephe. 5:3-5) Inara, ka matakite ratou kia kore e māro i to ratou uaorai manako ki runga i etai ke. Ka aru ratou i te akoanga a te Pipiria tei karanga e: “Ka angai i te anana a te Atua i roto ia kotou na, . . . Auraka ma te akaueue ua ki runga i te tuanga a te Atua ra, ei kaveinga ra kotou no te anana.”—1 Pete. 5:2, 3; e tatau ia 2 Korinetia 1:24.

12, 13. (a) Akapeea te Au Kite o Iehova me iki i te tamataora tau, e eaa te au kaveinga Pipiria ta ratou ka aru? (e) Akapeea te au kaveinga i roto i te parakarapa 12 e tau ei ki te au turanga tukeke o te oraanga?

¹² Kare to tatou akaaerenga e iki ana e ko teea te au teata, au vitio kangakanga, te au puka, e te au imene ta tatou ka kopae. Eaa te tumu? No te mea te akakite maira te Pipiria ki te tangata pouroa kia tereni i to ratou uaorai akava ngakau kia kite “i te meitaki e te kino.” (Ebe. 5:14) Ka rauka ia tatou te taangaanga i te au kaveinga Pipiria ei tauturu ia tatou kia rave i te au ikianga tau no runga i te tamataora. No te maata o te ikianga ta tatou ka rave, ka anoanoia tatou ‘kia kite i te mea mareka na te Atu.’ (Ephe. 5:10) Te apii katoa maira te Pipiria e e tikaanga to te upoko o te ngutuare tangata, no reira ka rauka ia ratou te iki i te tamataora tau no to ratou uaorai ngutuare tangata.—1 Kori. 11:3; Ephe. 6:1-4.

¹³ Ko te au kaveinga Pipiria tei taikuia i runga akenei, ka tauturu ia tatou kia rave i te au ikianga tau i roto i te au turanga tukeke o te oraanga. Ei akaraanga, e tukeke te manako o te tangata no runga i te tu akamanea,  te turanga o te oraanga pae kopapa, te kai, e te vai atura. Penei ka tauta tetai pae i te māro atu i to ratou uaorai manako ki runga i etai ke, e penei ka akatupu te reira i te pekapeka. Inara me kare e akakinoia te au kaveinga Pipiria, kare e tumuanga tau kia akatupu i te pekapeka no runga i ta te au Kerititiano tataki tai ka rave. Te akakite maira te Pipiria e “kare oki te tavini o te Atu nei e tika kia māro; kia maru ra aia i te tangata katoa nei.”—2 Timo. 2:24.

14. Akapeea a Paulo te akatutu anga i te puapinga kia kopae i te kapitianga kino?

¹⁴ Ei au tavini no te Atua, akapeea tatou me ‘akaruke anake i te tuatua kino’? Na te kopae anga i te kapitianga kino. Akapeea a Paulo i te akatutu anga i te reira? I muri ake i te akakite anga i “te tumu o te Atua,” kua tata aia no runga i tetai “are maata.” I roto i teia are, ko te au “āriki,” koia oki ko te au apinga tei maaniia ki ‘te auro, te ario, te rakau e te karakaraea, no te meitaki tetai papaki, e no te kino tetai.’ (2 Timo. 2:20, 21) E oti, kua akamaroiroi a Paulo i te au Kerititiano kia kopae i te au “āriki” tei taangaangaia “no te kino.”

15, 16. Eaa ta tatou i apii mai mei te akatutuanga o te “are maata”?

¹⁵ Eaa te aiteanga i ta Paulo akatutuanga? Ko te “are maata,” kua aite te reira ki te putuputuanga Kerititiano. Ko te “au āriki” i roto i te are, kua aite ki te au mema tataki tai o te putuputuanga. I roto i tetai are, penei ka riro tetai au āriki ei mea kino me kapitiia te reira ki tetai apinga viivii me kore ki tetai apinga repo. Me tupu teia, ka anoanoia te pu o te ngutuare kia akatakake i te au apinga viivii mei te au apinga ma, ei akaraanga te au apinga tei taangaangaia ei tunu kai.

¹⁶ Kua aite te reira ki te au tavini o te Atua i teia tuatau. Kia riro tatou ei aronga mā i roto i te au turanga tukeke o te oraanga, ka anoanoia tatou kia akatakake ia tatou uaorai mei te aronga i roto i te putuputuanga kare e aru i te au kaveinga a Iehova. (E tatau  ia 1 Korinetia 15:33.) Me ka anoanoia tatou kia kopae i te aronga i roto i te putuputuanga tei akarongo kore ki te Atua, ka inangaro katoaia kia kopae i te kapiti atu ki te aronga i vao ake i te putuputuanga. E rave ana tatou i teia no te mea e manganui te tangata i vao ake i te putuputuanga, e noinoi ratou, akarongo kore ki te metua, viivii, pikikaa, kino, akavaavaa i te tangata memeitaki ra, e e aronga anoano i te au mea navenave, kare i anoano i te Atua.—2 Timo. 3:1-5.

17. Eaa ta te ngati Iseraela tiratiratu i rave ‘kia akaruke anake i te tuatua kino’?

¹⁷ Te akaue anga a Iehova i te ngati Iseraela kia ‘aere mamao ke mei te puakapa o Kora, to Datana, e to Abirama,’ “kua aere ke anake iora” te aronga tiratiratu. (Nume. 16:24, 27) Kare ratou i tavarevare ana i te akatakake ia ratou uaorai mei te aronga meameaau, e kua papu tikai ia ratou ta ratou i rave. Kua aere ke ratou ‘mei tetai pae e tetai pae.’ Ko te aronga tiratiratu ra, kua inangaro ratou i te akarongo ma to ratou ngakau katoa. Kua akapapu meitaki teia e te turuturu ra ratou ia Iehova e te patoi ra i te tuatua kino. Eaa ta tatou ka apii mai mei teia akaraanga?

18. Eaa te aiteanga o ta Paulo tuatua no Timoteo kia “rere ke koe i te au anoano o to mea ou anga ra”?

¹⁸ E puapinga tikai to tatou pirianga kia Iehova. No reira ka anoanoia tatou kia paruru i te reira. Ko te aiteanga teia o ta Paulo tuatua kia Timoteo kia “rere ke koe i te au anoano o to mea ou anga ra.” (2 Timo. 2:22) Penei e 30 tuma o Timoteo mataiti. Inara i tetai taime, e akatupu ana te aronga mamaata i taua tu ra. Me aro atu a Timoteo i ‘te au anoano o tona ou anga ra,’ ka anoanoia aia kia “rere ke” mei te reira e ‘kia akaruke anake i te tuatua kino.’ Kua tuatua a Iesu i tetai mea aiteite ki te reira, i te karanga anga e: “E te apa ra koe i to mata, koiti atu, e akaruke ke atu.” (Mata. 18:9) Ko te au Kerititiano tei inangaro i te aru i teia akoanga e te paruru i to ratou pirianga ki te Atua, ka anoanoia kia rave viviki i te reira.

19. Akapeea tetai pae i te paruru anga i to ratou pirianga kia Iehova?

¹⁹ Akapeea tetai au Kerititiano i te paruru anga i to ratou pirianga kia Iehova? Ko te aronga e manamanata to ratou i mua ana no te kona kava, kua iki kia kore e inu akaou i te kava. Pera katoa te aronga e tu apikepike to ratou no te iki i te tamataora kino, kua anoanoia kia kopae i te au akakeuanga te ka arataki atu ki te au anoano kino. (Sala. 101:3) Ei akaraanga, mua ake i te riro mai anga tetai taeake ei Kite no Iehova, e reka ana aia i te aere ki te ura, te ngai e rave ana te tangata i te au angaanga tau kore. Inara muri ake i te apii anga i te tuatua mou, kua iki aia kia kore e ura akaou, pera katoa me aere aia ki tetai ura tei akanooia e te au taeake e te au tuaine. Kare aia i inangaro i te akatupu akaou i te anoano mei to mua ana. Ko te tika, kare te au Kerititiano e anoanoia kia kopae i te inu kava, te ura, me kore tetai ua atu apinga kare e tarevake ana. Tera ra, kia matakite tatou pouroa, e kia paruru i to tatou pirianga kia Iehova.

20. Noatu e kare i te mea mama ua kia ‘akaruke anake i te tuatua kino,’ eaa te ka riro ei akapumaana ia tatou?

²⁰ E tikaanga ngateitei to tatou kia kapikiia ei Au Kite no Iehova. Inara, e apainga katoa te reira na tatou. Ka anoanoia tatou kia ‘akaruke anake i te tuatua kino,’ e kia “kopae i te kino.” (Sala. 34:14) Kare teia i te mea mama ua i te rave. Inara e mea pumaana i te kite e te aroa maira a Iehova i “tona uaorai,” koia oki ko te aronga tei kauraro kiaia.—2 Timo. 2:19; e tatau ia 2 Paraleipomeno 16:9a.