1, 2. (a) Koai te kite maata roa atu no Iehova? (e) Eaa te aiteanga o te ingoa ko Iesu, e eaa tana i rave kia tauturu i te ngati Iuda kia akamareka ia Iehova?

I TE akavaia anga a Iesu, kua akakite aia ma te mataku kore ki te kavana Roma o Iudea ko Ponotio Pilato e: “I anau mai ei au nei, i aere mai ei au ki te ao nei, e akakite i te tuatua-mou.” (E tatau ia Ioane 18:33-37.) I te au mataiti i muri mai, kua kapiki te apotetoro ko Paulo ia Iesu e ko te kite “tei aaki i te aakianga tuatua meitaki ki mua i te aroaro o Ponotio Pilato.” (1 Timo. 6:13) Te noo nei tatou i roto i tetai ao tei tutaraia e Satani e tei ki i te tu makitakita. Kia rave ua atu i te angaanga tutuanga, ka anoanoia tatou kia mataku kore mei ia Iesu rai, “te kite mou e te tuatua-mou.”—Apo. 3:14.

² Kua kapikiia te ngati Iuda pouroa e e au kite no Iehova, tera ra ko Iesu te kite maata roa atu. (Isa. 43:10) I mua ake i te anauanga o Iesu, kua akakite tetai angera ki tona metua angai ko Iosepha e: “Ko Iesu te ingoa taau e tapa nona: e akaora oki aia i tona au tangata i ta ratou ara.” (Mata. 1:20, 21) Te aiteanga o te ingoa ko Iesu i te reo Epera, “Ko Iehova oki te Ora.” Ka taangaanga a Iehova ia Iesu kia akaora i te tangata mei te ara e te mate. Kua akakite a Iesu ki te ngati Iuda e ka anoanoia ratou kia tataraara e rauka akaou ei ia ratou te akameitakianga a Iehova.  (Mata. 10:6; 15:24; Luka 19:10) Kua tutu aere aia no runga i te Patireia o te Atua. Kua tata a Mareko e: “Aere aturā Iesu ki Galilea, i te tuatua aere anga i te evangelia o te basileia o te Atua ra, Na ko atura, Kua tae ki te tuatau, kua vaitata mai nei te basileia o te Atua; e tataraara kotou, e ka akarongo i te evangelia nei.” (Mare. 1:14, 15) Kua maroiroi e kua mataku kore a Iesu i tona tutu aere anga. Kua mataku kore katoa aia i te akaapa anga i te au arataki akonoanga ririnui o te ngati Iuda, e ko teia tetai tumu i tamate ei te au arataki akonoanga ngati Iuda iaia.—Mare. 11:17, 18; 15:1-15.

3. Eaa tei tupu e toru ra i muri ake i to Iesu matenga?

³ E toru ra i muri ake i te tamateia anga a Iesu, kua tupu tetai mea umere. Kua akatuakaou a Iehova iaia, kare ei kopapa tangata mari ra ei kopapa vaerua. (1 Pete. 3:18) Kua akapapu a Iesu ki tana au pipi e kua ora akaou aia i tona mama anga kia ratou. I taua ra rai i akatuakaouia mai ei aia, kua mama aia ki te au pipi tukeke e rima taime.—Mata. 28:8-10; Luka 24:13-16, 30-36; Ioa. 20:11-18.

4. Eaa tei tupu i te mama anga a Iesu ki tana au pipi, e eaa tana i akaue ia ratou kia rave?

⁴ Te mama anga mai a Iesu no te rima o te taime, te uipa ra tana au apotetoro e etai atu. I reira kua tauturu aia ia ratou kia marama e ko tona matenga e te tuakaouanga, kua totouia te reira i roto i te au Tuatua Tapu. I te openga o taua uipaanga ra, kua akakite a Iesu ki tana au pipi i ta ratou ka rave. Akakite aia e “kia tutu aereia te tuatua no te tataraara, e no te akakore anga i te ara i tona ingoa, mei Ierusalema atu nei.” I reira kua akaue a Iesu ia ratou e: “Ko kotou anake oki te kite i teianei tuatua.”—Luka 24:44-48.

5, 6. (a) Ka riro te au pipi a Iesu ei au kite noai? (e) Eaa ta te au pipi a Iesu i akakite aere?

⁵ E 40 ra i muri mai, te mama anga mai a Iesu no te taime openga, kua marama meitaki tana au apotetoro i tana akauenga i tuku mai. Kua akakite aia e: “E ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.” (Anga. 1:8) E ngati Iseraela te au pipi e kua riro takere ratou ei au kite no Iehova. I teianei ra, ka riro mai ratou ei au kite katoa no Iesu. Eaa te aiteanga i tera?

⁶ Ka akamata ratou i te akakite e, te taangaanga nei a Iehova ia Iesu kia akaora i te tangata. E meitaki maata atu teia tu akaoraanga i ta Iehova akaora anga i te ngati Iseraela i te au tuatau i topa. Ka riro te matenga e te tuakaouanga o Iesu Karaiti ei akarangatira i te tangata mei te ara e te mate. I te akatainuia anga te au pipi a Iesu ki te vaerua tapu i te Penetekote mataiti 33 T.N., kua akamata ratou i te akakite aere i te au “peu taka ke a te Atua.” Manganui tei akarongo i te karere e kua tataraara, kua tuku i to ratou akarongo ki roto i te atinga o Iesu, e kua papetitoia. E taoonga ou i te rangi to Iesu tei akatuakaouia mai, e kua taangaanga a Iehova iaia kia akaora e tauatini ua atu tangata i te enua nei.—Anga. 2:5, 11, 37-41.

7. Eaa tei akapapuia e te au tupuanga i te Penetekote o te mataiti 33 T.N.?

⁷ Te akapapu maira te au tupuanga o te Penetekote i te mataiti 33 T.N. e kua ariki a Iehova i te atinga apa kore o Iesu ei oko tei anoanoia kia akarangatira i te tangata mei te ara. (Ebe. 9:11, 12, 24) Kua akamarama a Iesu e kua aere mai aia “kia oronga i tona ora ei oko no te tangata e manganui.” (Mata. 20:28) Ko te ngati Iuda  anake ua ainei te ka puapingaia no teia oko? Kare, ka riro te oko ei “apai ke atu i te ara a to te ao!” Te rotai ra teia ki te anoano o te Atua, “ko tei inangaro i te tangata katoatoa kia ora.”—Ioa. 1:29; 1 Timo. 2:4-6.

8. Akapeea i rauka ai i te au pipi mua a Iesu i te tutu aere no runga iaia, e eaa tei rauka ia ratou i te rave?

⁸ Kua tutu aere te au pipi mua a Iesu ma te mataku kore no runga iaia. Akapeea teia i tupu ei? Kare e no to ratou uaorai maroiroi. Kua pati ratou kia Iehova no tona vaerua tapu kia oronga mai i te tu mataku kore kia rave ua atu i te angaanga tutuanga. (E tatau ia Angaanga 5:30-32.) Mei te 27 mataiti i muri ake i te rave anga i te angaanga tutuanga, kua akakite te au pipi a Iesu i te “tuatua-mou i te evangelia” ki te ngati Iuda e te Kenitara “i raro ake i teianei rangi.”—Kolo. 1:5, 23.

9. Mei tei totouia, eaa tei tupu ki te putuputuanga Kerititiano?

⁹ Te mea tangi ra, i te tuatau i aereia, kua apii te au mema o te putuputuanga i te au apiianga pikikaa. (Anga. 20:29, 30; 2 Pete. 2:2, 3; Iuda 3, 4) Tei tupu mai, kua akakino teia au puapii pikikaa i te putuputuanga katoa. Kua totou a Iesu e ka tupu ua atu teia kino e tae rava atu ki “te openga o teianei ao.” (Mata. 13:37-43) I roto ia Okotopa 1914, kua akamana a Iehova ia Iesu ei Ariki ki rungao i te tangata. I taua taime ra, kua akamata te “tuatau openga” o te ao o Satani.—2 Timo. 3:1.

10. (a) Eaa te mataiti ta te au Kerititiano akatainuia i tutu aere? (e) Eaa tei tupu i roto ia Okotopa 1914, e akapeea tatou i kite ei i te reira?

¹⁰ No tetai 30 tuma mataiti i mua ake ia Okotopa 1914, kua tutu aere te au Kerititiano akatainuia e ka akamata te tutaraanga a te Patireia o te Atua i taua mataiti ra. Kua akatumuia to ratou kite ki runga i te totou a Daniela no tetai pu rakau maatamaata tei tipuia ki raro, e ka tupu akaou i muri ake i tetai tuatau. (Dani. 4:16) Kua akataka mai a Iesu i te akairo te ka tauturu i tana au pipi kia kite e kua riro aia ei Ariki, e kua akamata te au ra openga. Te akapapu maira te au tupuanga o te ao katoa nei mei te mataiti 1914 e ko Iesu te Ariki. (Mata. 24:3, 7, 14; Luka 21:24) I teia tuatau, ko “te peu taka ke a te Atua” ta tatou e tutu aere nei, te kapiti maira i te  tika e kua akamana a Iehova ia Iesu ei Ariki no te Patireia i te mataiti 1914.

11, 12. (a) Eaa tei tupu i te mataiti 1919? (e) Eaa tei taka meitaki i te mataiti 1935? (Akara i te tutu mua o teia atikara.)

¹¹ I te mataiti 1914, i te riro anga a Iesu Karaiti ei Ariki, kua akamata aia i te akarangatira i tona aronga akatainuia mei ia “Babulonia maata” koia oki ko te au akonoanga pikikaa. (Apo. 18:2, 4) I te mataiti 1919, muri ua ake i te openga o te Tamaki I o te Ao, kua rauka i te aronga akatainuia te tikaanga kia tutu aere takapini i teianei ao. Kua tutu aere ratou no runga i te mana akaora o te oko, e te tuatua meitaki o te Patireia o te Atua. Tei tupu mai, tauatini ua atu tangata tei apii i te tuatua mou e kua akatainuia ei au ariki kia tutara kapiti e te Karaiti i te rangi.

¹² I te mataiti 1935, taka meitaki e kua akamata takere te Karaiti i te akaputuputu i tana “mamoe ke atu.” I teia tuatau, mirioni ua atu te au mamoe ke atu no roto mai i te ao katoa nei. Raro ake i te aratakianga a te aronga akatainuia, te aru ra ratou i te akaraanga mataku kore o Karaiti i te tutu aere. Te tuku katoa ra te mamoe ke atu i to ratou akarongo ki roto i te atinga o Iesu, e ko te tumu anake ïa e ora ai ratou. Kua kite ratou e me akakoromaki ratou i te angaanga tutuanga e me taangaanga i to ratou oraanga kia akamareka ia Iehova, ka ora mai ratou mei te “mate maata” e ka noo ki roto i te ao ou o te Atua.—Ioa. 10:16; Apo. 7:9, 10, 14.

13. Ei Au Kite no Iehova, eaa ta tatou ka tauta kia rave, e ka akapeea tatou me aru i te au Kerititiano o te anere mataiti mua?

¹³ E tikaanga ngateitei te tutu aere ki etai ke no runga i “te peu taka ke” ta Iehova i rave i te tuatau i topa, e tana au taputou no te tuatau ki mua. E tika, kare i te mea mama ua te rave ua atu i teia angaanga. Penei ka patoi mai te tangata i ta tatou karere me kore ka takinga kino ia tatou. Me koia ïa, ka rauka ia tatou te aru i te akaraanga o te apotetoro ko Paulo e tona au taeake. Kua karanga a Paulo e: “I maroiroi ra matou i to matou Atua i te tuatua anga atu ia kotou i te evangelia a te Atua i roto rai i te taumāro maata.” (1 Tesa. 2:2) Ka anoanoia tatou kia akatupu i ta tatou i taputou i te akatapuia anga tatou. Ka inangaro tatou kia vai tiratiratu kia Iehova i te tuatau ka “pou rava” te ao kino o Satani. (Isa. 6:11) Kare tatou e rauka i te rave i teia i to tatou uaorai maroiroi. Mei te au Kerititiano rai i te anere mataiti mua, ka pati tatou kia Iehova no tona vaerua tapu kia rauka ia tatou “te mana maata meitaki.”—E tatau ia 2 Korinetia 4:1, 7; Luka 11:13.

14, 15. (a) I te anere mataiti mua, eaa tei tupu ki te au Kerititiano, e i akapeea a Petero i te akamaroiroi anga ia ratou? (e) Eaa ta tatou ka akamaara me takinga kinoia tatou no te mea e Au Kite tatou no Iehova?

 ¹⁴ I teia tuatau, mirioni ua atu te tangata e karanga ra e e Kerititiano ratou, inara te rave ra ratou i te au mea ta Iehova e rikarika ra, e kare Aia e mareka ana ia ratou. (Tito 1:16) I te anere mataiti mua, kare te maata anga o te tangata e akamori ana i te Atua na roto i te mataara tana e ariki ra. Te tika, kua makitakitaia te au Kerititiano mou e te tangata takapini ia ratou i taua tuatau ra. Ei akamaroiroi i taua au Kerititiano ra, kua akakite te apotetoro ko Petero e: “Kia akakinoia kotou i te ingoa o te Mesia ra, e ao to kotou.” Eaa ratou ka rekareka ai? No te mea kua mareka te Atua ia ratou e tei ia ratou tona vaerua tapu.—1 Pete. 4:14.

¹⁵ I teia tuatau, te akakinoia ra ainei te Au Kite o Iehova no te ingoa o te Mesia? Ae, no te mea kare tatou e tutu aere ana no runga ia Iehova anake, inara te tuatua katoa ra tatou no runga ia Iesu e te akakite ra e koia te Ariki o te Patireia o te Atua. Kua takinga kino katoaia a Iesu no te mea e kite aia no Iehova. Kua akakite aia ki te aronga tei patoi iaia e: “I aere mai nei au ma te ingoa o toku Metua, e kare kotou i oo mai iaku nei.” (Ioa. 5:43) No reira me takinga kinoia mai koe e te tangata no te mea te tutu aere ra koe, akamaara e te mareka ra te Atua ia koe e tei ia koe tona vaerua tapu.

16, 17. (a) Eaa te manako o te iti tangata o Iehova takapini i teia ao katoa no runga i te angaanga tutuanga? (e) Eaa taau ka tauta kia rave?

¹⁶ Akamaara katoa e, maata atu te tangata takapini i te ao nei e ariki maira i te tuatua mou. Noatu e e noo ana tatou kiea, i roto katoa i te au ngai e tutu putuputuia ana, maata ua atu te tangata tei inangaro i te akarongo mai ki ta tatou karere mataora. No reira me kite tatou i te aronga e inangaro maira, e akapapu tatou i te oki atu i te atoro ia ratou e kia tauta i te apii i te Pipiria kia ratou. I reira e rauka ai ia tatou i te tauturu ia ratou kia kite ia Iehova, kia akatapu i to ratou oraanga kiaia, e kia papetitoia. Eaa toou manako me rave koe i teia angaanga? Ko Sarie no Aperika Apatonga mai, e Kite no Iehova no tetai 60 tuma mataiti, kua karanga aia e: “Kua ariki rekareka tikai au e na roto i te atinga oko o Iesu, kua rauka iaku tetai pirianga meitaki kia Iehova, te Atua Ngateitei o te ao katoa e pini ua ake, e te mataora nei au e ka rauka iaku te akakite aere i tona ingoa kaka.” Kua tauturu raua ko tana tane ko Martinus, i ta raua tamariki e toru e te au tangata e manganui kia riro ei aronga akamori ia Iehova. Karanga katoa aia e: “Kare atu e angaanga merengo tikai, e te taangaanga ra a Iehova i tona vaerua tapu kia oronga mai i te maroiroi tei anoanoia e matou kia rave ua atu i teia angaanga akaora tangata.”

¹⁷ Noatu e kua papetito takereia tatou e me kare, ka tau tatou kia ariki rekareka i te tikaanga kia uipa kapiti ki te Au Kite o Iehova. No reira e rave ua atu i te angaanga tutuanga ma tona iti tangata takapini i teia ao katoa, e kia vai mā ua koe mei te ao o Satani. Me akapera koe, ka apai mai koe i te tu ngateitei ki to tatou Metua aroa i te rangi, ko Iehova.