KUA aue maata a Petero i muri ake i tona uuna anga ia Iesu. Noatu e kua anoanoia aia kia angaanga pakari kia meitaki akaou mai tona turanga pae vaerua, kua inangaro a Iesu i te taangaanga iaia ei tauturu i etai ke. No reira a Iesu i karanga ai e: “Kia akaariuia mai koe ra, ka akatinamou atu i to au taeake.” (Luka 22:32, 54-62) Aere ua rai, kua riro a Petero ei pou no te putuputuanga Kerititiano i te anere mataiti mua. (Gala. 2:9) Mei te reira katoa, penei ka rauka akaou i tetai taeake tei tavini ei tangata pakari i mua ana, kia rave akaou i te reira e kia akamaroiroi i te au taeake i te pae vaerua.

Penei, kua akaateaia tetai pae mei te tavini anga ei au akaaere, e tei tupu mai kua manako puapinga kore ratou ia ratou uaorai. Ko Julio, * tei tavini ana ei tangata pakari i Bolivia tere atu i te 20 mataiti, kua tuatua e: “Kua riro te akateateamamao i te au akoanga, te aravei anga i te au taeake, e te atoro anga i te au mema o te putuputuanga ei tuanga maata i roto i toku oraanga! Poitirere ua ake au kua taui te reira, e kare aku angaanga i roto i te putuputuanga. E tuatau ngata tikai te reira.” I teianei, kua tavini akaou a Julio ei tangata pakari.

Kua tata a Iakobo e: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa.” (Iako. 1:2) Te tuatua ra a Iakobo no runga i te au timataanga tei tupu no te takinga kino anga, e to tatou tu apa. Kua taiku aia i te au anoano tika kore, te akono i te tu o te tangata, e te vai atura. (Iako. 1:14; 2:1; 4:1, 2, 11) Me ako mai a Iehova ia tatou, penei ka riro te reira ei mea mamae. (Ebe. 12:11) Inara noatu teia au timataanga, ka rauka rai ia tatou te tu rekareka.

Noatu me kua akaateaia tatou mei te tavini anga  ei tangata pakari, ka rauka rai ia tatou i te akapapu i te tu ketaketa o to tatou akarongo e kia akaari i te inangaro no Iehova. Ka rauka katoa ia tatou i te akamanako i te tumu i tavini ei tatou ei tangata pakari. Kua tavini ainei tatou kia puapingaia tatou uaorai, me kua tavini tatou no te inangaro i te Atua e te irinaki papu e nana te putuputuanga, e ka tau te reira kia akaperepereia? (Anga. 20:28-30) Te au taeake tei tavini ei aronga pakari i mua ana, me rave ua atu i te angaanga tapu ma te mataora, te akapapu ra ratou ki te katoatoa, pera katoa a Satani e, e tika tikai to ratou inangaro ia Iehova.

Te akoia anga te Ariki ko Davida no tana au ara kino, kua ariki aia i te akoanga e kua akakoreia tana ara. Kua imene a Davida e: “E ao tona, to te akakoreia tana ara, to tei tapokiia tona kino! E ao to te tangata, kare i tapepeia e Iehova i te ara, e kare e pikikaa o roto i tona ngakau.” (Sala. 32:1, 2) Kua meitaki atu a Davida no tei akoia aia, e kare e ekoko e kua meitaki atu tana tiaki anga i te iti tangata o te Atua.

Maata te taime, me tavini akaou te au taeake ei tangata pakari, ka riro mai ratou ei tiaki meitaki atu mei to mua ana. “Teianei, marama meitaki au e akapeea me tauturu i te aronga tei rave i te tarevake,” i karanga ai tetai tangata pakari. Akakite katoa tetai atu tangata pakari e: “I teianei e puapinga maata atu kiaku te tavini anga i te au taeake.”

Kua akakite te tata taramo e: “Kare [a Iehova] e tamou i te akamura mai.” (Sala. 103:9) Eiaa tatou e manako e kare roa te Atua e irinaki akaou i tetai tangata tei rave i te tarevake kino. “Kua manako au e kua puapinga kore au,” i karanga ai a Ricardo, tei akaateaia mei te tavini anga ei tangata pakari noatu kua tavini aia no tetai au mataiti. “No tetai tuatau roa, kua araiia au mei te tavini anga akaou ei akaaere, no toku manako maromaroa. Kare au i manako papu e ka rauka iaku i te akaari i te tu akarongo mou. Inara no te mea e reka ana au i te tauturu i etai ke, kua rauka iaku i te akamata i te au apii Pipiria, te akamaroiroi i te au taeake i ko i te Are Uipaanga Patireia, e te angaanga kapiti kia ratou i roto i te angaanga orometua. Kua tauturu teia iaku kia manako papu, e i teianei te tavini akaou nei au ei tangata pakari.”

Me akamoupuku tetai taeake, penei ka araiia aia mei te tavini akaou ei tangata pakari. E meitaki atu  kia aru i te akaraanga o Davida, tei anoanoia kia oro ke mei te Ariki vareae ko Saula! Kare a Davida i tutaki i te kino kia Saula, noatu e kua rauka iaia te rave i te reira. (1 Samu. 24:4-7; 26:8-12) I te tamateia anga a Saula i roto i te tamaki, kua aue a Davida e kua tuatua no runga iaia e tana tamaiti ko Ionatana e e nga tangata mataora e te taurekareka raua. (2 Samu. 1:21-23) Kare a Davida i akamoupuku ana.

Me manako koe e kua akono tau koreia koe, auraka e akatika i te tu riri kia tupu i roto i toou ngakau. Ei akaraanga, te akaateaia anga a William ei tangata pakari i muri ake i te 30 mataiti i tona tavini anga i Peritane, kua riri aia i tetai pae o te aronga pakari. Eaa tei tauturu ia William kia manako meitaki akaou? “Kua akamaroiroiia au i te tatau anga i te puka o Iobu,” i karanga ai aia. “Me kua tauturu a Iehova ia Iobu kia akatupu i te au ki tona au taeake e toru, papu e ka tauturu Aia iaku kia akatupu i te au ki te aronga pakari Kerititiano!”—Iobu 42:7-9.

Me kua iki koe kia kore e tavini akaou ei tangata pakari, e mea meitaki kia akamanako i te tumu i akapera ei koe. Kua maata roa ainei te au manamanata? Kua riro ainei tetai au mea ke ei tuanga puapinga i roto i toou oraanga? Kua maromaroa ainei koe no te tu apa o etai ke? Noatu eaa tei tupu, kia akamaara e kua rauka ia koe i te tauturu maata atu i te au taeake ia koe e tavini ra ei tangata pakari. Kua akamaroiroiia ratou e taau au akoanga e toou akaraanga, e kua tauturu te au atoroanga ia ratou kia akakoromaki i to ratou au timataanga. Kua akarekareka taau angaanga ei tangata pakari i te ngakau o Iehova, e toou uaorai ngakau.—Mase. 27:11.

Kua tauturu a Iehova i te au taeake kia mataora e kia inangaro akaou i te tiaki i te putuputuanga. Me kua akaruke koe me kore kua akaateaia koe mei te tavini anga ei tangata pakari, ka rauka ia koe kia riro akaou mai ei akaaere. (1 Timo. 3:1) Kare rava a Paulo i “tivata i te pure” no te au Kerititiano i Kolosa kia akakiia ratou e te kite i te anoano o te Atua “kia tau to [ratou] aerenga i te Atu i te au mea katoa e mareka mai ei.” (Kolo. 1:9, 10) Me kua rauka akaou ia koe te tavini akaou ei tangata pakari, e irinaki kia Iehova no te maroiroi, te akakoromaki, e te mataora. I teia au ra openga, te anoano ra te iti tangata o te Atua i te tauturu a te aronga pakari. Ka rauka ainei ia koe i te tavini akaou i toou au taeake e te akamaroiroi ia ratou?