1, 2. Akapeea a Iehova me komunikeiti ki tona au tavini?

I ARATAKI ua ana rai a Iehova i tona iti tangata. I te tuatau i topa, kua taangaanga aia i te au angera, te au orama, e te au moemoea kia akakite i te ka tupu i te tuatau ki mua, me kore i te oronga i te au tukuanga angaanga puapinga. (Nume. 7:89; Eze. 1:1; Dani. 2:19) Tetai au taime, kua iki te Atua i tetai au tangata ei mata Nona kia akakite i tana aratakianga. Noatu e i akapeea te iti tangata o Iehova i te akarongo anga i tana tuatua, e akameitakiia ana ratou me aru i tana au aratakianga.

² I teia tuatau, e taangaanga ana a Iehova i tona vaerua tapu, te Pipiria, e te putuputuanga kia arataki ia tatou. (Anga. 9:31; 15:28; 2 Timo. 3:16, 17) Taka meitaki tikai tana aratakianga, mei te mea rai e te akarongo ra tatou Iaia i te karanga anga mai kia tatou e: “Teia te ara, e na reira te aere.” (Isa. 30:21) E taangaanga katoa ana a Iehova ia Iesu ei akakite i Tana tuatua kia tatou. Kua iki Aia ia Iesu kia arataki i te putuputuanga na roto i te “tavini akono meitaki e te pakari.” (Mata. 24:45) Ka anoanoia tatou kia ariki i teia aratakianga puapinga tikai, no te mea me rave tatou i teia, ka rauka ia tatou te ora mutu kore.—Ebe. 5:9.

3. Eaa te ka akakeu ia tatou kia kore e akarongo pu tikai ia Iehova? (Akara i te tutu mua o teia atikara.)

³ Kua kite a Satani e ka akaoraia tatou me aru tatou i te  aratakianga a Iehova, no reira te tauta nei aia i te akavare ia tatou kia kore e akarongo atu i te reira. Pera katoa, penei kare to tatou ‘ngakau pikikaa maata’ i inangaro i te akarongo pu tikai kia Iehova. (Iere. 17:9) I roto i teia atikara, ka kite tatou e akapeea me akavi i teia nga timataanga e kia akarongo ki te reo o te Atua. Pera katoa, ka kite tatou e me akarongo e me pure tatou kia Iehova, ka tauturuia tatou kia noo vaitata kiaia noatu e eaa te ka tupu.

4. Akapeea a Satani i te akanauru anga i te aerenga manako o te tangata?

⁴ E tauta ana a Satani i te akanauru i te manako o te tangata na roto i te au tuatua e te au akakitekiteanga pikikaa. (E tatau ia 1 Ioane 5:19.) Na roto i te au nuti pepa, te au puka, te au makatini, te ratio, te tivi, e te Initaneti, te akatotoaia ra te au akakitekiteanga i te ao katoa. E akakite ana teia au apinga i te au akakitekiteanga puapinga, inara e maata te taime te akakite ra te reira i te au tu e te au angaanga tei patoi i te au turanga o Iehova. (Iere. 2:13) Ei akaraanga, penei ka karanga ratou e kare te akaipoipoanga tane e te tane, vaine e te vaine i te mea tarevake. Te taki atura teia i te au tangata kia manako e e pakari roa te tuatua a te Pipiria no runga i te pirianga tane ki te tane e te vaine ki te vaine.—1 Kori. 6:9, 10.

5. Akapeea tatou me kopae i te au akakitekiteanga pikikaa a Satani?

⁵ Akapeea te au tangata tei inangaro i te au turanga o Iehova i te kopae anga i te au akakitekiteanga pikikaa a Satani? Akapeea ratou e kite ei i tuke i rotopu i te mea meitaki e te mea kino? Te pau maira te Pipiria e na “te akono marie anga kia tau ki [ta te Atua] ra tuatua.” (Sala. 119:9) Te tauturu maira te Tuatua a te Atua ia tatou kia kite i te tuke i rotopu i te tuatua mou e te pikikaa. (Mase. 23:23) Kua akakite mai a Iesu e ka anoano tatou i “te au mea katoa ra no roto mai i te vaa o te Atua.” (Mata. 4:4) Ka anoanoia tatou kia apii e akapeea me taangaanga i te au kaveinga Pipiria no ko mai ia Iehova i roto i to tatou oraanga. Ei akaraanga, i mua roa ake ka tataia ai tetai ture no te akaturi, kua kite a Iosepha e ko te piri atu ki te vaine a Potiphara, e ara ïa i te Atua. Kare roa aia i manako ana i te akarongo kore kia Iehova. (E tatau ia Genese 39:7-9.) Noatu e kua māro te vaine a Potiphara iaia no tetai tuatau roa, kua iki a Iosepha i te akarongo ki te reo o Iehova, kare i te reo o te vaine a Potiphara. I teia tuatau, ka inangaro katoa tatou i te akarongo i te reo o Iehova, kare i te au akakitekiteanga pikikaa a Satani.

6, 7. Eaa ta tatou ka rave kia kopae i te au apiianga kino a Satani?

⁶ Kua kī te ao katoa i te au manako tukeke a te au akonoanga, e te irinaki nei te manganui o te tangata e kare e kitea te akonoanga mou. Inara me puareinga ua tatou i te akarongo kia Iehova, ka arataki mai aia ia tatou ki te tuatua mou. Tera ra, ka iki tatou e koai ta tatou ka akarongo. E  mea ngata i te akarongo ki nga reo e rua i te taime okotai. Mei te mamoe rai i kite i te reo o te tiaki, ka anoanoia tatou kia kite i te reo o Iesu. Koia ta Iehova i iki ei arataki ia tatou.—E tatau ia Ioane 10:3-5.

⁷ Akakite a Iesu e: “Kia matakite i ta kotou e akarongo nei.” (Mare. 4:24) E mea tika e te taka meitaki te aratakianga a Iehova, tera ra ka anoanoia tatou kia akapapa i to tatou ngakau kia ariki i tana tuatua. Me kare tatou e matakite, penei ka akarongo tatou ki te au apiianga kino a Satani, kare e ki te aratakianga meitaki a te Atua. Auraka rava tatou e akatika i te au imene, te au vitio, te au porokaramu tivi, te au puka, te au oa, te au puapii, me kore te aronga kite pakari o teianei ao kia akatere i to tatou oraanga.—Kolo. 2:8.

8. (a) Akapeea a Satani i te akanauru anga ia tatou kia rave i te tarevake? (e) Eaa te ka tupu kia tatou me kopae tatou i te au akairo akamatakiteanga?

⁸ Kua kite a Satani e e aronga ara tatou. Me timata mai aia i to tatou tu paruparu, ka ngata tikai ia tatou i te vai tiratiratu kia Iehova. (Ioa. 8:44-47) Ei akaraanga, penei kua akamutu tatou i te pure, kua akamarie mai i roto i te angaanga orometua, me kore kua akatau i te au uipaanga. E au akairo teia i te akamatakite ia tatou i te tupu ra i roto i to tatou ngakau, e me kopae tatou i te reira ka tupu te kino maata. Aere ua rai, me kare tatou e matakite, penei kare tatou e akarongo akaou i te reo o Iehova. Te openga i reira, ka rave tatou i te mea tarevake, penei kare roa tatou e manako ana kia rave. (Roma 7:15) Tera ra, ka rauka ia tatou te kopae i teia au tu kino me matakite tatou i te au akairo e me akatikatika viviki i te au manamanata. Me akarongo meitaki tatou i te reo o Iehova, kare roa tatou e akarongo ki te au apiianga pikikaa.—Mase. 11:9.

9. Eaa ra i puapinga tikai ei no tatou kia kite vave e ka rave tatou i te ara?

⁹ Me e maki kino to tetai tangata, penei ka rauka i te rapakau i tona maki me kitea vaveia te reira. Pera katoa ia tatou, me kite tatou e ka rave tatou i te ara, kia kimi viviki i te ravenga kia kore e “riro ei tuikaa [na Satani] i tona ra anoano.” (2 Timo. 2:26) Eaa ta tatou ka rave me kua kite tatou e kua aere ke to tatou manako e te anoano ki ta Iehova e umuumu ra? Kia oki viviki tatou Kiaia, kia kimi i tana aratakianga, e kia aru i te reira. (Isa. 44:22) Inara ko te tika, penei ka tupu ua te mamae no te au ikianga tarevake ta tatou i rave noatu e kua oki tatou kia Iehova. E meitaki atu me kare tatou e akaruke ia Iehova i te akamataanga.

10, 11. (a) Eaa tetai au akairo no te tu parau? (e) Eaa te apiianga ta tatou ka mou mai mei te meameaau anga o Kora, Datana, e Abirama?

¹⁰ Ka inangaro tatou kia kite e ka arataki ke to tatou ngakau ia tatou mei ia Iehova. Ei akaraanga, penei ka riro tatou ei aronga parau me kore ei aronga noinoi. Ka rauka i teia nga tu i te akakeu ia tatou kia rave i te au tarevake kino. Penei ka manako tetai tangata parau e e puapinga aia e ka rauka iaia te rave i tana i inangaro. Penei ka manako aia e kare e tika i tetai tangata kia akakite atu kiaia i tana ka rave, kapiti mai tona au taeake Kerititiano, te aronga pakari, me kore te akaaerenga. Penei ka mamao roa aia mei ia Iehova e ka ngata i te akarongo i Tona reo.

¹¹ Kua iki a Iehova ia Mose e Aarona kia arataki i to Iseraela i roto i te metepara. Inara kua meameaau a Kora, Datana, e Abirama no te mea kua ngakau parau ratou e kua inangaro i te rave i ta ratou uaorai akanooanga no te akamori ia Iehova. Akapeea a Iehova te ariu mai anga? Kua tamate aia i teia aronga meameaau. (Nume. 26:8-10) Ka kite tatou i tetai apiianga puapinga mei teia akaraanga. Te meameaau ia Iehova, ka arataki atu ki te tumatetenga. Te na ko ra te Pipiria e: “Ko te parau to te mate ra na mua.”—Mase. 16:18; Isa. 13:11.

12, 13. (a) Oronga mai i tetai akaraanga e akapeea te tu noinoi me taki atu ki te tumatetenga. (e) Akamarama mai e akapeea te tu noinoi i te tupu viviki anga me tuku ua atu tatou i te reira.

¹² E kino pakari katoa te tu noinoi. E manako ana tetai tangata noinoi e kare te aratakianga a Iehova e tau kiaia. Penei ka manako aia e ka rauka iaia te rave mai i tetai apinga, kare e nana. Ko Naamana tetai rangatira vaeau o Arama, kua tu aia i te maki repera e kua akaora te peroveta o te Atua ko EIisaia iaia. Kua rekareka tikai a Naamana e kua oronga i te au apinga aroa, te moni e te kakau no Elisaia, inara kare aia i ariki mai i te reira. Tera ra, e tavini to Elisaia ko Gehazi tei inangaro i taua apinga aroa ra nona uaorai. Kua noinoi a Gehazi. Kua arumaki a Gehazi ia Naamana ma te kore e tuatua atu kia Elisaia, e kua pikikaa kia Naamana kia oronga mai i te au apinga aroa nona. Eaa tei tupu ki te tangata noinoi ko Gehazi? Kua tu aia i te maki repera!—2 Ari. 5:20-27.

¹³ Me tuku ua atu tatou i te reira, ka tupu viviki te tu noinoi mei tetai anoano meangiti ki tetai apinga te ka takino i to tatou oraanga. Taka meitaki teia i roto i te tua Pipiria o Akana. Kua tuatua aia e: “Akara iora au i tetai kakau Babulonia meitaki ra, i roto i taua au apinga no te āru ra, e te au sekela ario e rua anere, e tetai manga auro e rima ngauru sekela kia aite, e noinoi akera au i taua apinga ra, e kua rave iora au.” Kare a Akana i patoi i tona anoano tarevake, mari ra kua keia aia i te au apinga e kua uuna i te reira ki roto i tona puakapa. Kua akaari a Iehova i te ara a Akana ki te katoatoa, e i taua ra rai kua peiia teia tangata keikeia e tona ngutuare tangata ki te toka kia mate. (Iosu. 7:11, 21, 24, 25) Ka rauka te tu noinoi kia tupu ki tetai ua atu ia tatou mei tei tupu kia Akana. No reira tatou ka inangaro ei kia ‘matakite i te morimori apinga.’ (Luka 12:15) Ko te ainga tau kore tetai atu tu noinoi. Noatu e ka manako kino tatou i tetai taime, e mea puapinga kia akatere i to tatou manako kia kore te au anoano tika kore e akakeu ia tatou kia ara.—E tatau ia Iakobo 1:14, 15.

14. Eaa ta tatou ka rave me akakeuia tatou e te tu parau me kore noinoi kia rave i tetai mea tarevake?

¹⁴ Ae, ka arataki atu te tu parau e te noinoi ki te tumatetenga. Na te akamanako anga i te au kino te ka tupu me rave tatou i te tarevake, ka tauturuia tatou kia akarongo ua atu ki te reo o Iehova. (Deu. 32:29) I roto i te Pipiria, kua akakite mai a Iehova  kia tatou i te au akameitakianga me rave i te tika e te au tu kino ka tupu me rave tatou i te mea tarevake. Me akakeuia tatou e te tu parau me kore noinoi kia rave i tetai mea tarevake, e mea meitaki kia akamanako pakari i te ka tupu kia tatou, ki to tatou aronga akaperepere, e to tatou pirianga kia Iehova.

15. Eaa ta tatou ka apii mai mei te akaraanga o Iesu?

¹⁵ Te inangaro maira a Iehova i te oraanga meitaki rava atu no tatou. (Sala. 1:1-3) Te oronga ra Aia i te aratakianga meitaki i te tuatau tau tikai. (E tatau ia Ebera 4:16.) Noatu e e tangata apa kore a Iesu, kua komunikeiti ua rai aia kia Iehova. E pure putuputu ana a Iesu. Kua turuturu e kua arataki a Iehova ia Iesu na roto i te au mataara takake. Kua tono a Iehova i te au angera kia akono iaia, kua oronga i te vaerua tapu nona, e kua tauturu iaia kia iki i te au apotetoro e 12. Kua tuatua mai a Iehova mei te rangi i te akaari e kua turuturu e kua mareka roa Aia ia Iesu. (Mata. 3:17; 17:5; Mare. 1:12, 13; Luka 6:12, 13; Ioa. 12:28) Mei ia Iesu rai, ka tau katoa tatou kia pure putuputu ma te ngakau tae. (Sala. 62:7, 8; Ebe. 5:7) Ka tauturu te pure ia tatou kia akavaitata atu kia Iehova e kia akapaapaa iaia i roto i to tatou oraanga.

16. Akapeea a Iehova me tauturu ia tatou kia akarongo ki tona reo?

¹⁶ Kare a Iehova e māro ana ia tatou kia aru i tana ako, inara ka oronga mai aia i te reira me inangaro tatou. Ka tau tatou kia pati iaia no tona vaerua tapu kia arataki ia tatou, e ka oronga ua mai aia i te reira. (E tatau ia Luka 11:10-13.) Te na ko ra te Pipiria e: “E matakite i to kotou akarongo anga.” (Luka 8:18) Ei akaraanga, me pati tatou kia Iehova no te tauturu kia kopae i te ainga tau kore e oti, ka akara tatou i te au tutu ainga viivii me kore i te au teata tau kore, te akaari ra tatou e kare tatou e inangaro roa ana i tana tauturu. Ka anoanoia tatou kia kimi i te au ngai tei reira te vaerua o Iehova, mei te au uipaanga putuputuanga. Manganui te au tavini o Iehova tei kopae i te tumatetenga na te akarongo anga kia Iehova i ko i ta tatou au uipaanga. Te kite anga ratou e te tupu maira tetai anoano tika kore, kua akatikatika ratou i te manamanata.—Sala. 73:12-17; 143:10.

17. Eaa te tumu ka tupu ei te kino maata me irinaki kia tatou uaorai?

¹⁷ Ka kite tatou i tetai apiianga puapinga mei te ariki o Iseraela ko Davida. Te irinaki ua anga a Davida ia Iehova, kua rauka iaia te rave i te au mea ririnui. I tona mapu anga, kua tamate aia i te tuputupua ko Golia. Muri mai, kua riro a Davida ei vaeau e oti, ei ariki. Ko tana angaanga, ko te paruru i te iti tangata e te rave i te au ikianga meitaki no te patireia o Iseraela. Tera ra, i tona irinaki anga kiaia uaorai, kua akavareia aia e tona uaorai ngakau. Kua ara aia kia Bate-seba e kua tamate i te tane a Bate-seba. Inara, i te ako anga a Iehova iaia, kua akarongo akaaka a Davida, kua aaki i tona au tarevake, e kua riro akaou mai ei oa no Iehova.—Sala. 51:4, 6, 10, 11.

18. Eaa te ka tauturu ia tatou kia akarongo ua atu rai ki te reo o Iehova?

¹⁸ Te apii maira a 1 Korinetia 10:12 ia tatou kia kore e irinaki ia tatou uaorai. Te akakite taka ua ra te Pipiria e kare e rauka ia tatou te arataki ia tatou uaorai, no reira me kare tatou e aratakiia e te reo o Iehova, ka aratakiia tatou e te reo o Satani. (Iere. 10:23) E mea puapinga kia pure putuputu tatou e kia aru i te aratakianga a te vaerua tapu. Ae, kia akarongo meitaki ua atu rai tatou ki te reo o Iehova.