E uianga puapinga teia; no te aronga tikai kua mate to ratou tokorua akaperepere. Penei ka inangaro ratou i te kapiti akaou ki to ratou tokorua akaipoipo tei akatuakaouia mai mei te mate, i roto i te ao ou. Karanga tetai taeake e: “Kare maua ko taku vaine i inangaro kia ope to maua akaipoipoanga. Inangaro maata tikai maua i te akamori kapiti i te Atua ei tane e te vaine e mutu kore ua atu. Kare toku manako i taui.” E tumuanga meitaki ainei tetai kia tapapa atu e ka akaipoipo akaou te aronga ka akatuakaouia? Te pauanga? Kare tatou i kite.

No te au mataiti e manganui, kua akakite ta tatou au puka e i te tuatua anga a Iesu no te tuakaouanga e te akaipoipoanga, te tuatua ra aia no runga i te tuakaouanga i te enua nei. Pera katoa, kua akakite te reira e kare e akaipoipoanga i roto i te ao ou. * (Mata. 22:29, 30; Mare. 12:24, 25; Luka 20:34-36) Inara e mea tau ainei kia manako e te tuatua ra a Iesu no te tuakaouanga i te rangi? Ma te kore e maro atu e na matou ua te tika, ka uriuri ana tatou i ta Iesu i tuatua.

Akamanako ana e koai ma ta Iesu e tuatua atura. (E tatau ia Luka 20:27-33.) Te tuatua ra aia ki te au Sadukea. Kare ratou e irinaki ana i te tuakaouanga, e kua timata ratou ia Iesu na te ui anga no runga i te tuakaouanga e te akaipoipoanga taokete. * Kua pau a Iesu e: “Te akaipoipo nei te tamariki o teianei ao, e te orongaia nei kia akaipoipoia: Kareka te aronga i manakoia e, e tau ia ratou tetai ao ra, e te tuakaouanga mei te mate mai, kare ïa ratou e akaipoipo, kare oki e oronga kia akaipoipoia: Kare oki ratou e mate akaou, e tau oki ratou ki te au angela ra; e tamariki ratou na te Atua ra, e tamariki oki ratou no te tuakaouanga.”—Luka 20:34-36.

Eaa te tumu i karanga ai ta tatou au puka e te tuatua ra a Iesu no runga i te tuakaouanga i te enua nei? E rua nga tumu maata. Te mea mua, i te akara anga te tuatua ra te au Sadukea kia Iesu no runga i te tuakaouanga i te enua nei. No reira e mea tau kia manako e ka pau a Iesu na te akakite anga i te tuakaouanga i te enua nei. Te rua, kua taopenga a Iesu i tana tuatua na te taiku anga ia Aberahama, Isaaka e Iakoba. Ka akatuakaouia mai teia au pateriareka tiratiratu ki te enua nei.—Luka 20:37, 38.

Tera ra, e mea tau kia irinaki e te tuatua ra a Iesu no te tuakaouanga i te rangi. Akapeea tatou i kite ei? Ka akara ana tatou e rua tuanga puapinga o te irava.

“Te aronga i manakoia e, e tau ia ratou . . . te tuakaouanga mei te mate mai.” Ko te aronga akatainuia tei vai tiratiratu te “aronga tau i te basileia o te Atua.” (2 Tesa. 1:5, 11) Na roto i te atinga oko o Karaiti, kua riro ratou ei aronga tuatua tika; no reira me mate ratou, ka takoreia ta ratou ara. (Roma 5:1, 18; 8:1) E “ao [to ratou] e te tapu” no te mea kua tau ratou no te tuakaouanga i te rangi. (Apo. 20:5, 6) I tetai tua ra, ka kapitiia mai “te aronga tuatua-tika kore” ki te aronga ka akatuakouia i te enua nei. (Anga. 24:15) Kua tau ainei  kia kapikiia ratou ei “aronga tau” no te tuakaouanga?

“Kare oki ratou e mate akaou.” Te karanga ra tetai au Pipiria ke e “kare ratou i raro akaou i te mana o te mate” e “kare o te mate mana akaou i rungao ia ratou.” Ko te aronga akatainuia tei akaoti i to ratou oraanga i te enua nei ma te tu tiratiratu, ka akatuakaouia ki te rangi e ka rauka te oraanga mate kore, koia oki, te oraanga ope kore, kare roa e takoreia. (1 Kori. 15:53, 54) Kare o te mate mana i rungao ia ratou me rauka ia ratou te tuakaouanga i te rangi. *

Kia tau ki ta tatou i uriuri, eaa ta tatou i kite mai? E mea tau kia irinaki e te tuatua ra a Iesu no te tuakaouanga i te rangi. Me koia ïa, ka kite i reira tatou e toru apinga no runga i te aronga ka akatuakaouia i te rangi: (1) Kare ratou e akaipoipo, (2) kare e rauka ia ratou te mate, e te (3) ka aite ratou ki te au angera i te rangi. Inara me te tuatua ra a Iesu no te tuakaouanga i te rangi, ka anoanoia kia pauia tetai au uianga.

Mea mua, me te manako ra te au Sadukea i te tuakaouanga i te enua nei, eaa ra a Iesu i taiku ei i te tuakaouanga i te rangi? Kare a Iesu e pau tika ana i tona au enemi i te au taime ravarai, kia tau ki ta ratou e manako ra. Ei akaraanga, te ui anga te ngati Iuda iaia kia rave i tetai akairo, kua karanga aia e: “Ka vavaʼi ua na i teianei nao, e kia po toru ake, kua tu akaou ïa iaku.” Papu e te kite ra a Iesu e ka manako ratou no runga i te nao me kore te iero i Ierusalema, inara “ko tona kopapa te nao tana i karanga ra.” (Ioa. 2:18-21) Penei kua manako a Iesu e kare e anoanoia kia pau i te au Sadukea pikikaa. Kare oki ratou e irinaki ana i te tuakaouanga pera te au angera. (Mase. 23:9; Mata. 7:6; Anga. 23:8) Mari ra, penei kua inangaro aia i te oronga i tetai au akakitekiteanga no te tuakaouanga i te rangi ki tana au pipi, te ka rauka ia ratou taua tuakaouanga ra.

Te rua, eaa ra a Iesu i taopenga ai i tana tuatua ma te taiku anga ia Aberahama, Isaaka, e Iakoba? Ka akatu akaouia teia aronga i te enua nei. (E tatau ia Mataio 22:31, 32.) Akara ana e i mua ake ka taiku ei a Iesu i teia au tangata akarongo mou e toru, kua karanga aia e, “i te tuatua ra i te tuakaouanga o tei mate ra.” Penei kua rave a Iesu i teia i te neke i te tumu manako mei te tuakaouanga i te rangi ki te tuakaouanga i te enua. Kua kite a Iesu e kua ariki te au Sadukea i te tataanga a Mose, no reira kua taiku aia i te tuatua a te Atua kia Mose i ko i te pu rakau e kā ua ra. Kua inangaro a Iesu i te akapapu ki te au Sadukea e ka riro te tuakaouanga i te enua nei ei tuanga no te akakoroanga o te Atua.—Exo. 3:1-6.

Te toru, me ka tau te au tuatua a Iesu ki te tuakaouanga i te rangi, ko te aiteanga ainei e ka akaipoipo te aronga ka akatuakaouia mai i te enua nei? Kare te Pipiria i oronga mai i te pauanga taka meitaki no tera uianga. Me te tuatua ra rai a Iesu no te tuakaouanga i te rangi, kare i reira tana tuatua e oronga i te manako te ka turuturu i te akaipoipoanga o te aronga te ka akatuakaouia i te ao ou.

Tera ra, kua kite tatou e te akakite atea maira te Pipiria e ka motu te pirianga akaipoipo me mate tetai tokorua. No reira, me kua mate toou tokorua, kare koe e umuumuia kia manako tataraapa me iki koe i te akaipoipo akaou. Naau uaorai te reira ikianga, e kare e tau kia akaapaia koe no te kimi anga i te pirianga pumaana o tetai tokorua akaipoipo.—Roma 7:2, 3; 1 Kori. 7:39.

Penei e maata ta tatou uianga no runga i te oraanga i roto i te ao ou. Ma te kore e tamanako ua i te au pauanga ki teia au uianga, kia tiaki marie ua atu tatou. Tera ra kia maara ua rai tatou i teia: Ka mataora te aronga i akarongo kia Iehova, e nana e akamerengo i te au anoano e te inangaro o te tangata na roto i te mataara meitaki rava atu.—Sala. 145:16.