1, 2. Eaa ta Iehova i akakite kia Mose kia rave, e eaa ta Iehova i taputou kiaia?

AKAMANAKO ana ia koe ei mata no te iti tangata o te Atua e te tuatua ra ki te tutara ririnui roa atu i te enua nei. Eaa toou manako? Penei ka taitaia koe, ka mataku, e kare e rauka ia koe te tuatua. Akapeea koe me akamata i taau tuatua? Ka rauka ainei ia koe i te tuatua ma te tukatau ei karere tonokia e te Atua?

² Ko teia tei tupu kia Mose. E tangata akaaka tikai aia. (Nume. 12:3) Inara kua tono a Iehova iaia kia tuatua kia Pharao, e tangata kino e te akaparau. Kua akakite a Iehova kia Mose kia akaue ia Pharao kia tuku e mirioni ua atu o te iti tangata o te Atua mei te tuikaa. (Exo. 5:1, 2) Ka marama tatou i te tumu i ui ei a Mose kia Iehova e: “Koai oki au, ka tae ei au kia Pharao ra, e ka arataki mai ei au i te tamariki a Iseraela mei Aiphiti mai?” Penei kua manako a Mose e kare e rauka iaia i te tuatua kia Pharao. Tera ra kua taputou a Iehova kia Mose e kare aia e aere koia anake ua. “Ei vaitata katoa ïa au ia koe,” i tuatua ai a Iehova.—Exo. 3:9-12.

3, 4. (a) Eaa a Mose i mataku ei? (e) Eaa ra toou manako ka aiteite ei ki to Mose?

³ Eaa a Mose i mataku ei? Kua mataku aia ko te kore aea a Pharao e ariki me kore e akarongo ki tetai karere no ko mai i te Atua ko Iehova. Kua mataku katoa a Mose e ka ekoko te ngati Iseraela  e na te Atua i iki iaia kia arataki ia ratou mei Aiphiti mai. Akakite aia kia Iehova e: “E i na, kare ratou e akatika mai i taku, kare oki e akarongo mai i toku reo: ka riro ra ratou i te tuatua mai e, Kare a Iehova i mama mai kia koe.”—Exo. 3:15-18; 4:1.

⁴ Akapeea koe? Penei kare roa koe e tuatua atu ki tetai tutara ririnui. Inara, akapeea me e ngata ia koe te tuatua atu ki te tangata i roto i taau ngai tutuanga no runga ia Iehova e tona Patireia? Ka tamou mai tatou i tetai apiianga puapinga mei te akauenga a Iehova kia Mose e tei tupu i muri mai.

5. Eaa ta Iehova i tuku ki roto i te rima o Mose, e akapeea teia i te tauturu anga iaia kia tukatau? (Akara i te tutu mua o teia atikara.)

⁵ I te akakite anga a Mose kia Iehova i tona mataku e kare te tangata e irinaki iaia, kua akapapa te Atua ia Mose kia puapingaia. Akakite te Pipiria e: “Kua tuatua mairā Iehova [kia Mose] Eaa tena i toou na rima? Kua karanga atura aia, E rakau. Kua tuatua maira aia, Ka titiri ana ki raro i te one. Kua titiri iora aia i taua rakau ra ki raro i te one, e riro atura ei ovi; oro ke aturā Mose i taua mea ra. Kua tuatua mairā Iehova kia Mose, Ka akatika ana koe i to rima, ka opu i te iku. (Kua akatika akera aia i tona rima, e kua opu akera, riro atura ei rakau i roto i tona rima;) Kia akarongo mai ratou e, kua mama mai te Atua o to ratou ai metua ra, ko Iehova, . . . kia koe.” (Exo. 4:2-5) Na te mana o te Atua i akariro i te rakau i roto i te rima o Mose ei ovi! Na teia temeio i akapapu e e karere a Mose na Iehova e tei iaia te mana no ko mai i te Atua. Kua akakite a Iehova kiaia e: “E rave koe i taua rakau ra i to rima, ko taau ïa taoonga kia rave i te au akairo.” (Exo. 4:17) No teia akapapuanga, kua rauka ia Mose i te tuatua kia Pharao pera katoa ki te iti tangata o te Atua ma te tukatau.—Exo. 4:29-31; 7:8-13.

6. (a) Eaa to roto i to tatou rima me tutu aere tatou, e no teaa ra? (e) Akamarama mai i te aiteanga e “e mea ora oki te tuatua a te Atua” e akapeea te reira i “ririnui” ei?

⁶ Me apai tatou i te karere a te Atua ki etai ke, eaa ta tatou e mou ra i roto i to tatou rima? Ko te Pipiria, e ka inangaro tatou i te taangaanga i te reira. Manako tetai pae e ko te Pipiria, e puka meitaki ua. Inara e puka puapinga tikai te Pipiria. Tei roto i reira te karere a te Atua no tatou. (2 Pete. 1:21) Tei roto katoa i reira te au taputou a te Atua e te akakite maira e eaa ta te Patireia o te Atua ka rave no tatou. Kua tata a Paulo e: “E mea ora oki te tuatua a te Atua, e te ririnui.” (E tatau ia Ebera 4:12.) Akapeea te tuatua a te Atua i ora ai? E mea ora te au taputou pouroa a Iehova no te mea te angaanga nei rai aia kia akatupu i te reira. (Isa. 46:10; 55:11) Me marama meitaki tetai tangata i teia tuatua mou i roto i te Tuatua a te Atua, ka riro tana i tatau i roto i te Pipiria ei akakeuanga ririnui i roto i tona oraanga.

7. Akapeea tatou me “tika oki i te tua i te tuatua-mou ra”?

⁷ Kua oronga mai a Iehova kia tatou i tana Tuatua ora, te Pipiria. Ka rauka ia tatou te taangaanga i teia puka ei akapapu e no ko mai i te Atua ta tatou i tuatua e ka tau kia irinakiia te reira. Ko te tumu ïa i akamaroiroi ei a Paulo ia Timoteo kia “tika oki i te tua i te tuatua-mou ra.” (2 Timo. 2:15) Akapeea tatou me taangaanga i te ako a Paulo? Na te iki meitaki anga i te au irava ta tatou ka tatau ki te tangata. To tatou akakoroanga, koia oki, kia itae i te ngakau o te aronga e akarongo maira. Ko te au aenga pepa tei tukuia mai i te mataiti 2013, kua neneiia ei tauturu ia tatou kia rave i te reira.

8. Eaa ta tetai akaaere tavini i tuatua no runga i te au aenga pepa?

⁸ Aiteite ua te akanooanga o te au aenga pepa ou. No reira me kite tatou e akapeea  me taangaanga i te aenga pepa okotai, ka kite tatou i te taangaanga pouroa i te reira. Kua tata tetai akaaere tavini i Hawaii, i Marike e: “Kua kite matou i te puapinga o teia au aenga pepa ou i roto i te angaanga tutu aere mei tera are ki tera are e te akakitekite i te ngai tangata.” Eaa ra i mama ei i te taangaanga i te au aenga pepa? Karanga aia e no te uianga e te au pauanga i te kapi mua. Kare te pu ngutuare e manamanata e ka oronga aia i te pauanga tarevake. Karanga te taeake e no te akanooanga o te au aenga pepa, manganui te tangata ka inangaro i te komakoma, e ka taki atu te reira ki te pukapukaanga meitaki.

9, 10. (a) Akapeea te akanooanga o te au aenga pepa i te tauturu anga ia tatou kia taangaanga i te Pipiria? (e) Ko teea aenga pepa taau i reka i te taangaanga, e no teaa ra?

⁹ I roto i te au aenga pepa tataki tai, e irava iki meitakiia tetai te ka rauka ia tatou kia tatau atu ki te pu ngutuare. Ei akaraanga, ko te aenga pepa Ka Ope Ainei te au tu Mamae? Ui ki te pu ngutuare i te uianga i te kapi mua. Ka rauka iaia i te pau e “ae,” “kare,” “penei.” Noatu e eaa tana pauanga, uri ki te kapi i roto e e karanga atu, “Teia ta te Pipiria e akakite maira.” E oti, tatau ia Apokalupo 21:3, 4.

¹⁰ Me taangaanga koe i te aenga pepa Eaa Toou Manako no Runga i te Pipiria? kare e manamanata e ko teea te pauanga ta te pu ngutuare ka iki. Uri ki te kapi i roto, e karanga e, “Te akakite maira te Pipiria e, ‘te au tuatua tapu katoa i tataia ra, e mea akauruia mai e te Atua.’” Penei ka karanga katoa koe e, “E maata atu te manako i roto i teia irava.” E oti, eeu i taau Pipiria e e tatau ia 2 Timoteo 3:16, 17.

11, 12. (a) Akapeea koe me taangaanga i te au aenga pepa kia mataora atu taau angaanga orometua? (e) Akapeea te au aenga pepa me tauturu ia koe kia rave i te atoro akaou anga?

¹¹ Penei ka inangaro koe i te tatau e te uriuri maata atu i te aenga pepa. Tei runga ua i te turanga o te pu ngutuare. Noatu e eaa te manako o te tangata, ka rauka ia ratou tetai karere i roto i te aenga pepa, e kua tatau atu oki koe kia ratou te Tuatua a te Atua. Noatu e kua tatau ua koe e tai me kore e rua irava i te atoroanga mua, ka rauka ia koe te oki akaou i te akamaata atu i ta korua pukapukaanga.

¹² I muri ake i te aenga pepa, ko te tumu tuatua “Kia Akamanako.” Raro ake i teia tumu tuatua, ko te au irava e tetai uianga ka rauka kia uriuriia i te atoro akaou anga. Te  uianga i muri i te aenga pepa Eaa Toou Manako no te Tuatau ki Mua? koia oki “Akapeea te Atua me taui i to tatou ao kia meitaki atu?” Te taikuia ra a Mataio 6:9, 10 e Daniela 2:44. I roto i te aenga pepa Ka Ora Akaou Tikai Ainei Tei Mate? te uianga, koia oki “Eaa ra tatou e ruaine ei e e mate ei?” Te taikuia ra a Genese 3:17-19 e Roma 5:12.

13. Akamarama mai e akapeea me taangaanga i te au aenga pepa ei akamata i te apii Pipiria.

¹³ Kua akanooia teia au aenga pepa ei tauturu ia tatou kia akamata i te au apii Pipiria. Ka rauka i tetai tangata i te scan i te QR code * i muri ake i te aenga pepa, e ka aratakiia aia ki ta tatou Web site. I runga i te Web site, ka patiia aia kia apii i te Pipiria. Te akaari katoa maira te au aenga pepa i te poroutia Nuti Meitaki no ko i te Atua! Te taiku maira te au aenga pepa i tetai apii i roto i te poroutia. Ei akaraanga, te aenga pepa Koai Tikai te Akatere ra i Teianei Ao? te taki atura ki te apii 5 o te poroutia. Te aenga pepa Akapeea te Ngutuare Tangata e Mataora Ai? te taki atura ki te apii 9. Kua akanooia teia au aenga pepa kia tauturu ia tatou kia taangaanga i te Pipiria i te atoroanga mua e i te au atoro akaou anga. Na roto i teia mataara, penei ka maata atu ta tatou apii Pipiria. Eaa atu tetai ravenga ka taangaanga meitaki tatou i te Tuatua a te Atua?

14, 15. Akapeea koe me aru i te akaraanga o Paulo i roto i taau angaanga orometua?

¹⁴ Kua inangaro tikai a Paulo i te marama i te manako o “te tangata katoa” i roto i tana angaanga orometua. (E tatau ia 1 Korinetia 9:19-23.) No teaa ra? No te mea kua inangaro aia i te tauturu i “te tangata ravarai,” te ngati Iuda e etai ke, kia apii i te tuatua mou e kia rauka te ora. (Anga. 20:21) Akapeea tatou me aru i te akaraanga o Paulo ia tatou e akapapa ra no te angaanga orometua e me tutu aere tatou ki “te tangata ravarai”?—1 Timo. 2:3, 4.

¹⁵ I te au marama tataki tai, e akakiteia ana i roto i Ta Tatou Angaanga Patireia te au ravenga kia oronga i ta tatou karere. Tamata i te reira. Tera ra, akapeea me te manako ra te tangata i taau ngai tutuanga no runga i tetai tumu tuatua ke? E akapapa i te tuatua atu i tetai apinga te ka akakeu i to ratou manako. Eaa te manako o te au tangata i toou ngai tutuanga? Iki i tetai irava ka tau no te reira tumu tuatua. Akakite mai tetai akaaere kotinga e tana vaine e i akapeea raua i te taangaanga i te Pipiria i roto i te angaanga orometua: “Te maataanga o te tangata, ka akatika ia maua kia tatau e tai irava e kia akamarama poto ua i te reira. Muri ake i te aravei anga ia ratou ma te Pipiria i roto i to maua rima, ka tatau maua i te irava.” I te au parakarapa e aru maira, ka akara tatou i tetai au tumu tuatua, au uianga, e te au irava tei taangaanga meitakiia i roto i te angaanga orometua. Penei ka inangaro koe i te tamata i te reira i roto i taau ngai tutuanga.

16. Akamarama mai e akapeea me taangaanga ia Isaia 14:7 i roto i te angaanga orometua.

¹⁶ Me te noo ra koe i roto i tetai ngai kino e te tā ua, penei ka ui koe ki tetai tangata e: “Ka rauka ainei ia koe te kite i teia nuti i runga i te kapi mua o te nuti pepa: ‘Kua noo ponuiaau te ao katoa nei, kua akaanga te roi, kua puroro mai te reo imene o te tangata’? Ko teia ta te Pipiria e akakite maira i roto ia Isaia 14:7. Te tika, e maata te au taputou a te Atua i roto i te Pipiria no te tuatau ponuiaau kare e roa atu, ka tae mai.” E oti, tatau i tetai o teia au taputou i roto i te Pipiria.

17. Akapeea tatou me taangaanga ia Mataio 5:3 me pukapuka ki tetai tangata?

¹⁷ E ngata ainei i te au tane e manganui i toou ngai i te akono i to ratou ngutuare tangata?  Me koia ïa, penei e akamata i te pukapuka na te ui anga e: “Toou manako, eia moni ka anoanoia no tetai tangata kia mataora tona ngutuare tangata?” Muri ake i tana pauanga, penei ka karanga koe e: “Manganui te tangata e maata atu ta ratou moni i rauka mai, inara kare rai to ratou ngutuare tangata e mataora ana. No reira, eaa tikai te ka anoanoia?” Tatau ia Mataio 5:3 e oti, akamata i tetai apii Pipiria.

18. Akapeea tatou me taangaanga ia Ieremia 29:11 kia akapumaana i etai ke?

¹⁸ Te mamae ra ainei te tangata i toou ngai no tetai tumatetenga i tupu ua akenei? Penei ka akamata koe na te tuatua anga e: “Aere mai au i te oronga atu i tetai manako pumaana.” (E tatau ia Ieremia 29:11.) Kua kite ainei koe i te nga mea ta te Atua i inangaro no tatou? Ko ‘te au’ e ‘te openga ta tatou i manako.’ Kare ainei i te mea pumaana i te kite e te inangaro ra te Atua kia meitaki to tatou oraanga? Inara akapeea te reira e tupu ei? E oti, uri ki tetai apii tau i roto i te poroutia Tuatua Meitaki.

19. Akamarama mai e akapeea me taangaanga ia Apokalupo 14:6, 7 me tuatua tatou ki te aronga e akonoanga ta ratou.

¹⁹ Te noo ra ainei koe i tetai ngai e maata te aronga e akonoanga ta ratou? Me koia ïa, penei ka akamata koe i te tuatua na te ui anga e: “Me tuatua mai tetai angera kia koe, ka akarongo ainei koe i tana e tuatua maira? (E tatau ia Apokalupo 14:6, 7.) Karanga te angera e ‘ka mataku i te Atua,’ inara ko teea Atua tana e tuatua ra? Ko ‘tei anga i te rangi, e te enua.’ Koai te reira?” E tatau ia Salamo 124:8, te na ko ra e: “Tei te ingoa o Iehova to tatou tauturu, ko tei anga i te au rangi e te enua nei.” I reira, akamarama maata atu no runga i te Atua ko Iehova.

20. (a) Akapeea tatou me taangaanga ia Maseli 30:4 i te apii i te ingoa o te Atua ki tetai tangata? (e) Eaa te irava taau i reka i te taangaanga i roto i taau angaanga orometua?

²⁰ Penei ka akamata koe i te pukapuka ki tetai mapu na te tuatua anga e: “Ka inangaro au i te tatau i tetai irava e ui ra i tetai uianga puapinga. (E tatau ia Maseli 30:4.) Kare e rauka i tetai tangata i te rave i teia au mea, no reira papu e te toʼu ra teia irava ki Tei Anga mai ia tatou. * Akapeea tatou e kite ei i tona ingoa? Ka inangaro au i te akaari atu kia koe i roto i te Pipiria.”

21, 22. (a) Akapeea tetai irava tei iki meitakiia i te taui anga i te oraanga o tetai tangata? (e) Eaa taau ka tauta pakari i te rave i roto i taau angaanga orometua?

²¹ Kare roa koe e kite i ta te tangata ka rave me akarongo ratou i tetai irava tei iki meitakiia. Ei akaraanga, kua topapa tetai nga Kite i te ngutupa o tetai vaine mapu i Autireria. Kua ui tetai ia raua e, “Kua kite ainei koe i te ingoa o te Atua?” e kua tatau ia Salamo 83:18. “Poitirere tikai au!” i karanga ai te vaine. “Te akaruke anga raua, kua akaoro au e 56 kiro mita te mamao ki ko i tetai toa oko puka i te akara i te au urianga Pipiria tukeke e oti kua akara au i te ingoa i roto i tetai tikitinari. Te papu anga iaku e ko Iehova te ingoa o te Atua, manako mai au e eaa atu taku kare i kite.” Kare i roa ana, kua apii raua ko te tangata tana ka akaipoipo i te Pipiria, e i muri mai, kua papetitoia raua.

²² E mana to te Tuatua a te Atua i te taui i te oraanga o te tangata. Me tatau tetai tangata i te Pipiria, ka rauka iaia te akatupu i te akarongo ketaketa i roto i te au taputou a Iehova. Na teia akarongo e akakeu iaia kia taangaanga i tana e apii ra. (E tatau ia 1 Tesalonia 2:13.) E ririnui atu te karere a te Pipiria i tetai ua atu apinga ta tatou ka tuatua. No reira kia tauta pakari tatou i te taangaanga maata i te Tuatua a te Atua i roto i ta tatou angaanga orometua. E mea ora ïa!