“EUREKA!” Te aiteanga o teia kupu, “Kua kitea e au!” I te 19 anere mataiti, i te tuatau e kimi pu ra te tangata i te auro i California i Marike, ka akarongoia teia kupu me kitea e tetai tangata te auro. Inara kua kitea e Charles Taze Russell e te Aronga Apii Pipiria tetai mea maata roa atu te puapinga. Kua kitea e ratou te tuatua mou Pipiria, e kua inangaro tikai i te akakite i te reira ki te katoatoa.

I te tuatau maana o te mataiti 1914, e mirioni ua atu tangata tei aere mai kia akara i te “Photo-Drama of Creation,” e teata roa tei neneiia e te International Bible Students Association (I.B.S.A.). Kua akaari teia teata i te au tutu karakara, te tua anga oraora, e te akatangi imene reka. Ko teia teata akatumuia ki runga i te Pipiria, kua akaari te reira mei te tuatau i anga ai te Atua i te au mea ravarai e tae ua atu ki te openga o te Tutaraanga Tauatini Mataiti o Iesu Karaiti.—Apo. 20:4. *

Akapeea ra i reira te aronga i roto i te au oire rikiriki e te au ngai mamao? Akapeea e rauka ai ia ratou te tuatua mou Pipiria? I roto ia Aukute 1914, kua tuku mai te I.B.S.A. i te “Nuku Eureka”—e mea apai aere tei aiteite ki te “Photo-Drama” tera ra kare e ripene teata. E toru tuanga o te “Nuku Eureka”: Te mea mua, te “Eureka X” tei akatangi i te au tua rekotiia e te imene. Te rua, ko te “Eureka Y” tei akatangi i te au rekotianga e tei akaari i te au tutu manea. Te toru, ko te “Nuku Eureka na te Ngutuare Tangata,” tei taangaangaia i roto i te kainga, kua akatangi i te tua e te imene. Kua rauka katoa mai te au ponikarapu e te au matini akaari teata oko mama.

No te mea kare e anoanoia te matini akaari teata me kore te au are teata mamaata, kua rauka i te Aronga Apii Pipiria te apai i teia nuku kare e tutaki ki te au ngai mamao, e kua totoa te karere Patireia ki te au ngai ou. Ko te “Eureka X,” e rekoti akatangi ua, te ka rauka i te akatangi i te po e te ao. Te “Eureka Y” tei akaari i te au tutu, ka rauka i te angaanga kare e uira na te taangaanga i te mori gas. “Ka rauka ia matou te akaari i teia au tutu i tetai ua atu ngai,” i karanga ai tetai ripoti i roto i te Watch Tower reo Finnish. E tika rai te reira!

Kare te aronga Apii Pipiria i anoano ana i te tarau i te au are teata mamaata, mari ra, kua rauka ia ratou te au ngai kare e tutaki, mei te au are apii, te au are akavaanga, te au ngai o te rerue, e te au pia noonooanga i roto i te au are mamaata. Maata te akaari anga  tei raveia i te ngai atea, kua akanooia tetai kakau teatea i runga i te paruru o te are vairanga kai. Kua tata a Anthony Hambuch e: “Kua akapapa te aronga tanutanu i te au nooanga i roto i tetai ngai atea i roto i ta ratou ngai tanutanu, e kua akanooia tetai au potonga rakau mamaata ei nooanga no te tangata, kia akarakara i te porokaramu.” Kua taangaanga teia pupu “Eureka” i te “pereoo Nuku” ei tari i ta ratou apinga, to ratou kiri kakau, te au puakapa e te au apinga tunu kai.

E maata te aronga tei akara i te nuku “Eureka.” I Marike, e 400 tangata tei tae mai i te akara i te nuku i roto i te are apii o tetai oire e 150 tangata. I tetai au ngai ke, kua na raro ua tetai pae i te aere e 8 kiro mita te mamao i te akara i te “Nuku Eureka.” I Sweden, kua akakeuia te au tangata tupu i roto i te kainga o Charlotte Ahlberg’s i te akarongo anga i te au rekoti anga. Tetai 1,500 tangata kua aere mai i te akara i te nuku i roto i tetai oire kō auro i Autireria. Akakite te Watch Tower e i ko i te au apii tua rua e te apii teitei, kua umere te au “poropeta e te aronga apii i te kite i te au tutu, e te au rekotianga manea i runga i te ponikarapu.” Kua rongonui katoa te “Nuku Eureka” i roto i te au are teata.

Kua riro te “Nuku Eureka” ei ravenga meitaki i roto i te “Class Extension Work,” koia oki ka tono tetai pupu Aronga Apii Pipiria i te au vaa tuatua kia akamata i te au pupu apii ou. Kare i kiteaia e eaa te numero o te aronga i kite i te “Nuku Eureka.” Maata te au apinga akaari “Nuku” kua taangaanga putuputuia. Inara i te mataiti 1915, e 14 rai i roto i te 86 pupu “Nuku” i ripoti putuputu mai. E i te openga o te mataiti, kua ripotiia e 1 mirioni tuma tangata i akara i te “Nuku.” E 30,000 tangata tei pati mai i te au puka Pipiria.

Noatu kare te “Nuku Eureka” e akamaaraia, tera ra kua akara te au tangata mei Autireria ki Argentina, mei Aperika Apatonga ki Peritane e mei Initia ki te Caribbean, e mirioni ua atu tangata tei akara ana i teia nuku umere tikai. Maata anga ia ratou kua kite i te tuatua mou Pipiria—tei maata tona meitaki i te auro—no reira i kapiki ei e “Eureka!”