Kua tata a Davida e: “Kare ra au i kite i te tangata tuatua-tika i te akaruke angaia, e tona uanga i te pati aere anga i te kai.” Te akataka ra aia i tei tupu ki te maataanga o te au tavini o Iehova e tana i kite i roto i tona uaorai oraanga. Kua kite meitaki aia e ka akono ua rai te Atua i tona au tavini. (Sala. 37:25) Inara, kare te aiteanga o te tuatua a Davida e kare roa tetai Kerititiano e ngere i te au apinga no te oraanga.

I tetai au atianga, kua aro atu a Davida i te au turanga ngata tikai. Ei akaraanga, te oro ke anga aia mei ia Saula. Te pou atura tana kai, no reira kua pati aia i te varaoa nana uaorai e na tona au tangata. (1 Samu. 21:1-6) I taua atianga ra, kua “pati aere” a Davida i te kai. Noatu ra, kua kite aia e kare a Iehova i akaruke iaia. Ko te tika, kare roa a Davida i anoanoia ana kia pati akatenga i te kai tana e anoano ra kia ora aia.

I roto ia Mataio 6:33, ka kite tatou i te akapapuanga a Iesu e ka oronga mai te Atua i ta tatou e umuumu ra me tuku ua rai tatou i te Patireia na mua i roto i te oraanga. Kua akakite a Iesu e: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra [te kai, te vai, e te kakau] ia kotou.” Tera ra, kua akakite katoa a Iesu e me tupu te takinga kino anga, penei ka mate tona au “taeake” i te pongi. (Mata. 25:35, 37, 40) Teia tei tupu ki te apotetoro ko Paulo. I tetai au atianga kua mate aia i te pongi e kua kaki vai.—2 Kori. 11:27.

Te akakite maira a Iehova e ka takinga kinoia tatou na roto i te au mataara tukeke. Penei ka akatika aia ia tatou kia ngere i tetai apinga kia rauka ia tatou te pau atu i te akaapaanga a te Tiaporo. (Iobu 2:3-5) Ei akaraanga, kua takinga kinoia to tatou au taeake Kerititiano i roto i te au puakapa takinokinoanga a te Nazi. Tetai ravenga kino koia oki, kua akangere ratou i te kai a te Au Kite ei aati i to ratou tu tiratiratu. Kua vai tiratiratu te au Kerititiano akarongo mou kia Iehova e kare aia i akaruke ana ia ratou. Kua akatika aia ia ratou kia na roto i teia timataanga, mei iaia rai e akatika ra i te au Kerititiano pouroa kia aro atu i te au timataanga tukeke. Inara kare e ekoko e ka tauturu a Iehova i te aronga pouroa tei takinga kinoia no tona ingoa. (1 Kori. 10:13) Ka tau tatou kia akamaara i te au tuatua i roto ia Philipi 1:29: “E mea orongaia mai oki ia kotou ia Iesu Mesia nei, to kotou mate iaia ra, auraka te akarongo anake ua ra.”

Te taputou maira a Iehova e ka tauturu aia i tona au tavini. Te na ko ra a Isaia 54:17 e: “Te taoonga ra noou i angaiaʼi ra, kare ïa e manuia.” Te akapapu ra teia taputou e te au taputou ke atu e ka paruru te Atua i tona iti tangata. Tera ra, penei ka anoanoia tetai Kerititiano kia na roto i te au timataanga, e tae roa atu ki te matenga.