1, 2. Mei teaa rai te oraanga o Adamu raua ko Eva i te akamataanga, e eaa te au uianga tei tupu mai?

I TE angaia anga a Adamu raua ko Eva, kare o raua enemi. E nga tangata apa kore raua e noo ra i roto i tetai parataito. Kua mataora raua i tetai pirianga vaitata ei tamaiti e ei tamaine na Tei Anga mai ia raua. (Gene. 2:7-9; Luka 3:38) Kua oronga te Atua i tetai angaanga puapinga na raua. (E tatau ia Genese 1:28.) Eaa te roa i to raua oraanga ka oti ei teia angaanga ia raua? Kare raua i anoanoia kia noo e tuatau ua atu kia “akaki i te enua nei, e e akavi,” inara ka anoanoia raua kia ora e tuatau ua atu ei akono “i te au mea ora katoa e totoro aere ua ki rungao i te enua nei.” Ka rauka ia raua te rave mataora i teia angaanga e tuatau ua atu.

² Eaa i tuke roa ai te turanga i teianei? Inangaro tatou kia mataora, tera ra eaa i maata ai to tatou au enemi, te mea maata roa atu ko te mate? Ka akapeea te Atua me akakore i teia au enemi? Te au pauanga tei roto i te Pipiria e ka uriuri tatou i te reira i roto i teia atikara.

3, 4. (a) Eaa te akauenga ta te Atua i oronga kia Adamu e Eva? (e) Mei teaa rai te puapinga no raua kia akono i taua akauenga ra?

³ Noatu e kua angaia a Adamu raua ko Eva kia ora e tuatau ua atu, kare te aiteanga e kare roa raua e mate. Kia ora ua rai raua, ka anoanoia kia akaea, kia inu, kia moe, e kia kaikai. Tera ra, e puapinga atu to raua pirianga kia Iehova, te Tumu o te ora. (Deu. 8:3) Te ravenga anake e ora ai e e mataora ai raua, koia oki na te tuku anga ia Iehova kia arataki ia raua. I mua ake ka angaia ai a Eva, kua akakite taka meitaki a Iehova kia Adamu e: “E kai ua koe i to te au rakau katoa o te kainga nei: Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.”—Gene. 2:16, 17.

⁴ Te akaari maira “te rakau e kite ei i te meitaki e te kino” i to te Atua tikaanga kia iki i te mea meitaki e te mea kino. Kua kite takere a Adamu i te tuke i rotopu i te meitaki e te kino no te mea kua angaia aia i te tu o te Atua, e e akava ngakau tona. Kua akamaara te rakau kia Adamu raua ko Eva e ka anoano ua rai raua i te aratakianga a Iehova. Me ka kai raua i taua rakau ra, mei te mea atura e te karanga ra raua ki te Atua e, “Kare maua e inangaro i taau ture.” Tei tupu mai, ka mate raua e ta raua uanga, mei ta te Atua rai i akamatakite kia raua.

5. Eaa te tumu i akarongo kore ei a Adamu raua ko Eva kia Iehova?

⁵ Kua akakite a Adamu kia Eva i te akauenga a Iehova. Kua kite meitaki a Eva i teia, no reira i rauka ai iaia i te taiku i taua au tuatua ra i muri mai. (Gene. 3:1-3) Kua akakite aia i te reira kia Satani, tei tuatua mai na roto i te ovi. Kua akatupu a Satani i te inangaro no te mana e kia akaaere iaia uaorai. (Akaaite ia Iakobo 1:14, 15.) Akakite aia kia Eva e te pikikaa ra te Atua e me akarongo kore aia ki te Atua, kare aia e mate, mari ra ka riro mei te Atua rai te tu. (Gene. 3:4, 5) Kua irinaki a Eva iaia, e kua rave i tona uaorai inangaro na te kai anga i te ua rakau, e te akakite anga kia Adamu kia kai katoa i te reira. (Gene. 3:6, 17) Kua pikikaa a Satani ia Eva. (E tatau ia 1 Timoteo 2:14.) Noatu e kua kite a Adamu e e tarevake te reira, kua akarongo aia i te reo o tana vaine. I te akara anga e oa teia ovi, inara ko tei tuatua na roto i te ovi, e enemi kino tikai aia tei kite takere i te tumatetenga ka tupu no tana pikikaa.

6, 7. Akapeea a Iehova i te tukuanga i tana akava anga ki runga ia Adamu e Eva?

⁶ Kua meameaau a Adamu raua ko Eva ia Iehova, ko tei oronga mai i te ora e te au apinga meitaki no raua. Tika rai, kua kite a Iehova e eaa tikai tei tupu. (1 Para. 28:9; e tatau ia Maseli 15:3.) Tera ra, kua akatika aia ia Adamu, ia Eva, e ia Satani kia akaari e mei teaa tikai to ratou manako no runga iaia. Ei Metua, kare e ekoko e kua mamae tikai a Iehova i ta ratou i rave. (Akaaite ia Genese 6:6.) Inara ei Akava, kua akautunga aia i te aronga ara.

⁷ No runga i te rakau e kite ei i te meitaki e te kino, kua akakite te Atua kia Adamu e: “I te rā e kai ei koe i to reira, ka mate ïa koe.” Penei kua manako a Adamu e ko te aiteanga o teia  tuatua, koia oki ka mate aia i mua ake ka opu ei te ra. Inara i taua “aiai” ra, kua tuatua atu a Iehova kia Adamu raua ko Eva. (Gene. 3:8) Ei Akava tuatua tika, kua na mua aia i te akarongo ki ta raua ka tuatua mai. (Gene. 3:9-13) E oti, kua akautunga aia i taua nga tangata ara ra kia mate. (Gene. 3:14-19) Naringa a Iehova i tamate ia raua i taua taime rai, kare tona akakoroanga no te tangata e tupu. (Isa. 55:11) Noatu e kua tupu te kino o te ara i reira tikai, kua akatika a Iehova ia Adamu raua ko Eva kia anau i te tamariki te ka rauka te manakonakoanga no te tuatau meitaki ki mua. I roto i Tona mata, kua mate a Adamu raua ko Eva i te rā i ara ei raua. E no te mea mei te ra okotai rai te 1,000 mataiti kia Iehova, kua mate rai raua i te “rā okotai.”—2 Pete. 3:8.

8, 9. Akapeea te ara a Adamu i te takino anga i tana uanga? (Akara i te tutu mua o teia atikara.)

⁸ Ka takinoia ainei te tamariki a Adamu raua ko Eva no ta raua i rave? Ae. Te akamarama maira a Roma 5:12 e: “E teianei no te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” Akakite katoa te apotetoro ko Paulo e: “Mei te tangata katoa e manganui i akariroia ei tangata ara i te akono kore o te tangata okotai.” (Roma 5:19) Ko te tangata akarongo mou ko Abela te tangata mua tei mate. (Gene. 4:8) Mei reira mai kua ruaine te uanga a Adamu e kua mate. Kua iri mai te ara e te mate ki runga i te tangata katoatoa, e nga enemi kare e rauka kia kopaeia. Noatu e kare tatou i marama tikai e i akapeea te ara e te mate i te iri mai anga ki runga i te uanga a Adamu, te kite nei ra tatou i te au tupuanga no te reira.

⁹ Kua tau meitaki te Pipiria i te akaaite i te ara e te mate ki tetai “tapoki i tapokiiaʼi te mata o te tangata katoa ra, e te vaî i rarangaia i rungao i te au enua katoa ra.” (Isa. 25:7) Kare roa e rauka i te tangata kia kopae i te ara e te mate. No reira te Pipiria i karanga ai e “mei te tangata i ope i te mate ia Adamu.” (1 Kori. 15:22) No reira kua ui a Paulo e: “Naai au e akaora i teianei kopapa mate?” (Roma 7:24) Ka rauka ainei i tetai ua atu tangata i te akaoraia? *

10. (a) Eaa te au irava Pipiria e akaari maira e ka akakore a Iehova i te mate? (e) Eaa ta teia au irava e apii maira ia tatou no runga ia Iehova e tana Tamaiti?

¹⁰ Ae, ka rauka ia Iehova i te akaora ia Paulo. Ka tatau tatou i roto i te Pipiria e: “Nana e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.” (Isa. 25:8) Mei tetai metua tei akaatea i te tumu i mamae ei tana tamariki e tei orei i to ratou roimata, ka rekareka maata a Iehova i te akakore takiri i te mate! Te turuturu ra a Iesu iaia. Ka kite tatou i roto ia 1 Korinetia 15:22 e: “E ope katoa [te tangata] i te akaoraia e te Mesia.” Kua pau katoa a Paulo i tana uaorai uianga e “Naai au e akaora i teianei kopapa mate?” ki te tuatua e: “E akameitaki au i te Atua i te mea e ora i to tatou Atu ra ia Iesu Mesia.” (Roma  7:25) Te taka ua ra e kare roa a Iehova i apai ke ana i tona aroa no te tangata i te ara anga a Adamu raua ko Eva. Pera katoa a Iesu, ta Iehova i taangaanga kia anga ia Adamu e Eva, kare tona aroa no te tangata i kore ana. (Mase. 8:30, 31) Inara akapeea te tangata i te akaoraia anga mei te ara e te mate?

11. Eaa ta Iehova i rave ei tauturu i te tangata?

¹¹ I te rave anga a Adamu i te ara, kua akautunga a Iehova iaia kia mate. Tei tupu, kua iri te ara e te mate ki runga i te tangata ravarai. (Roma 5:12, 16) Te akamarama maira a Roma 5:18 e: “Mei te tangata ravarai i taea i te utunga akaapa i te ara a te tangata okotai.” Akapeea i reira a Iehova i te tauturu anga i te tangata ma te kore e kopae i tona uaorai au turanga teitei? Kua pau a Iesu i teia uianga i te tuatua anga e i aere mai ei aia kia “oronga i tona ora ei oko no te tangata e manganui.” (Mata. 20:28) Ei tangata apa kore, ka rauka ia Iesu i te oronga iaia uaorai ei oko i te tangata katoa. Akapeea teia e raveia ai?—1 Timo. 2:5, 6.

12. Eaa te oko tei tutaki i tei ngere ia Adamu?

¹² Ei tangata apa kore, ka rauka ia Iesu kia ora e mutu kore ua atu. Ko ta Iehova teia i inangaro no Adamu. No to Iesu aroa i tona Metua e te uanga a Adamu, kua akaatinga aia i tona oraanga tangata tei aite ki tei ngere ia Adamu. Muri mai, kua akatuakaou a Iehova ia Iesu ei vaerua ki te rangi. (1 Pete. 3:18) Kua tau te oko ki te tu tika o Iehova no te mea kua tutakiia te oraanga apa kore ki te oraanga apa kore. Kua rauka ia Iesu i te oronga i te manakonakoanga no te oraanga mutu kore ki te uanga a Adamu. No reira a Paulo i kapiki ei ia Iesu e ko “te Adamu openga, e Vaerua ora ïa.”—1 Kori. 15:45.

13. Eaa ta “te Adamu openga” ka rave no te aronga tei mate?

¹³ Kare e roa atu ana, ka oronga “te Adamu openga” i te oraanga mutu kore no te uanga a Adamu. Kapiti mai kia ratou, ko te maataanga o te aronga tei mate. Ka akatuakouia mai ratou ki runga i te enua nei.—Ioa. 5:28, 29.

14. Akapeea e rauka ai i te akarangatira i te tangata mei te tu apa?

¹⁴ Akapeea e rauka ai i te akarangatira i te tangata mei te tu apa? Kua akanoo a Iehova i tetai kavamani i te rangi kia akatupu i teia. Ko Iesu e te 144,000 tei ikiia no roto i te tangata te ka tutara i roto i taua kavamani ra. (E tatau ia Apokalupo 5:9, 10.) No te mea e aronga apa ua te 144,000 i mua ana, ka marama meitaki ratou i te tu o te aronga ta ratou ka tutara atu. No tetai 1,000 mataiti, ka tauturu a Iesu e tona au tutara i te tangata kia riro mai ei aronga apa kore.—Apo. 20:6.

15, 16. (a) I roto i te Pipiria, eaa te aiteanga o “taua enemi openga ra, ko te mate,” e aea te reira e akakoreia ai? (e) Eaa ta 1 Korinetia 15:28 e karanga ra no runga i ta Iesu ka rave?

¹⁵ I te openga o te 1,000 mataiti, ka akarangatiraia te aronga akarongo mei te ara e te mate. Akamarama a Paulo e: “Mei te tangata i ope i te mate ia Adamu, e ope katoa i te akaoraia e te Mesia. E akonoia ra te tangata ravarai i tona uaorai pupu; ko te Mesia te momua; e i muri ake, ko to te Mesia ïa [te aronga te ka tutara kapiti kiaia], kia mama mai aia ra. Ko te openga iora ïa, ka tuku atu ei aia i te basileia ki te Atua, ki te Metua ra; kia ope rava te aronga au, e te mana, e te maroiroi, i te akakoreia e ia. E iaia oki te au, e kia ope rava te au enemi katoa i te tukuia  e ia ki raro ake i ona vaevae. E taua enemi openga ra, ko te mate, e akakoreia ïa.” (1 Kori. 15:22-26) I te openga, ka akakoreia te mate tei iri ki runga ia tatou mei ia Adamu. Ae ka takore takiriia “te tapoki i tapokiiaʼi te mata o te tangata katoa ra.”—Isa. 25:7, 8.

¹⁶ Kua akakite katoa a Paulo e: “E kia tuku tikaia te au mea ravarai ki raro ake iaia ra, ei reira e kitea puiaʼi e, i raro katoa ake te Tamaiti uaorai iaia, i tei tuku i te au mea katoa i raro ake iaia ra; kia riro ko te Atua i rungao i te au mea katoa i te au ngai ravarai.” (1 Kori. 15:28) Kua tupu i reira te akakoroanga o te tutaraanga a Iesu. Ka rekareka aia i te akaoki i tona mana kia Iehova e ka oronga i te tangata apa kore Kiaia.

17. Eaa te ka tupu kia Satani?

¹⁷ Eaa te ka tupu kia Satani, tei akaapaia no te au kino ravarai tei tupu ki te tangata? Ka kite tatou i te pauanga i roto ia Apokalupo 20:7-15. I te openga o te 1,000 mataiti, ka akatikaia a Satani kia timata i te au tangata apa kore no te taime openga. I reira, ka takore takiriia a Satani e tetai ua atu tei iki i te aru iaia ki “te rua o te mate.” (Apo. 21:8) Kare roa “te rua o te mate” “e akakoreia,” no te mea ko te aronga i reira, kare ratou e ora akaou. Me vai tiratiratu tatou kia Iehova, kare tatou e mataku e ka takinoia tatou e “te rua o te mate.”

18. Akapeea te angaanga ta te Atua i oronga kia Adamu i te akatupuia anga?

¹⁸ Ka riro te tangata i reira ei aronga apa kore e ka ariki pu tika a Iehova ia ratou no te oraanga mutu kore. Ka akakore takiriia te au enemi o te tu mataora o te tangata. Ka akatupuia te angaanga ta te Atua i oronga kia Adamu noatu e kare aia i reira. Ka mataora tana uanga i te akono i te enua e te au manu. Mataora tikai tatou no te mea kare e roa atu ana, ka akakore a Iehova i te enemi openga, ko te mate!