1, 2. (a) Eaa te au apainga a te tiaki mamoe Iseraela? (e) Akapeea te au metua i aite ei ki te tiaki mamoe?

I ISERAELA i taito, e ngata te oraanga o te au tiaki mamoe. Ka angaanga ratou ki vao i te tuatau vera e te tuatau anu, e ka paruru ratou i ta ratou mamoe mei te au manu taetaevao e te aronga keikeia. E akara putuputu ana te au tiaki i te mamoe tataki tai e ka akono i te au mamoe maki. E akono meitaki katoa ana ratou i te au punua mamoe no te mea kare ratou e maroiroi ana.—Gene. 33:13.

² Ka anoanoia te au metua Kerititiano kia akaari i te au tu mei to te tiaki mamoe rai. Na te au metua te apainga kia utuutu i ta ratou tamariki kia tau ki te au turanga o Iehova. (Ephe. 6:4) E ngoie ainei i te rave i te reira? Kare! E timata putuputu ua ana a Satani i te tamariki ki te au manako akavare. Kapiti mai ki teia, e tu apa to te tamariki. (2 Timo. 2:22; 1 Ioa. 2:16) Akapeea koe me tauturu i taau tamariki? Ka uriuri tatou e toru apinga taau ka rave i te tiaki i taau tamariki: (1) kia kite meitaki koe ia ratou, (2) kia angai ia ratou, e te (3) kia arataki ia ratou.

3. Akapeea te au metua e kite meitaki ei i ta ratou tamariki?

³ E akara matariki ana te tiaki mamoe meitaki i tana mamoe tataki tai no te mea ka inangaro aia kia akapapu e te meitaki ra te turanga o te anana. Te na ko ra te Pipiria e: “Ka akara meitaki ana kia kite koe i te tu i to anana mamoe.” (Mase. 27:23) Ei metua, ka inangaroia koe kia kite meitaki i taau “anana mamoe,” koia oki ko taau tamariki. Kia rauka i te rave i teia, ka inangaroia koe kia kite i ta te tamariki e rave ra e kia kite i to ratou au manako. Akapeea koe me rave i teia? Ka anoanoia koe kia pukapuka atu ki taau tamariki.

4, 5. (a) Eaa te au ravenga kia tauturu i taau tamariki kia uriuri maoraora i to ratou au manako? (Akara i te tutu mua o teia atikara.) (e) Eaa taau i rave kia mama atu i taau tamariki i te pukapuka kia koe?

⁴ Kua kite mai tetai au metua e e ngata tikai i te pukapuka ki te tamariki me mamaata mai ratou. Penei kare te au mapu e inangaro i te uriuri i to ratou au manako. Me ko teia toou turanga, eaa taau ka rave? Auraka e manako e ka anoanoia koe kia rave i tetai uriurianga roa kia ratou. Penei, e tauta i te tuatua kia ratou i te tuatau ka maoraora ratou i te pukapuka mai. (Deu. 6:6, 7) Akapou i te taime kia ratou. Aere oriori aere e taau tamariki. Pati ia ratou kia kangakanga kapiti kotou me kore kia angaanga kapiti i roto i te ngutuare. Me mataora taau tamariki, penei ka inangaro ratou i te uriuri i to ratou au manako kia koe.

⁵ Akapeea me kare rai taau tamaiti e inangaro i te tuatua? Tamata i tetai ravenga ke. Ei akaraanga, eiaa e ui ki taau tamaine e eaa tana i rave i tera rā, mari ra e akakite kiaia e eaa taau i rave i tera rā. Penei ka inangaro i reira aia i te tuatua mai no runga i tona ra. Me kore kia kite koe e eaa tona manako no runga i tetai apinga, e ui i te au uianga no runga i te reira, kare e no runga iaia. Penei ka ui koe e eaa te manako o tona au oa no runga i te reira apinga. E oti, penei, e ui koe e eaa tana ka akakite atu ki tona au oa.

6. Akapeea taau tamariki i te kite anga e ka akapou koe i toou taime kia ratou e ka mama ua i te tuatua atu kia koe?

⁶ Ka inangaro taau tamariki i te pukapuka kia koe me kite ratou e te vā ua ra koe e e mama ua i te tuatua atu kia koe. Me kua pou toou taime i te angaanga e kare oou taime no ratou, kare te tamariki e akakite atu i to ratou au manamanata kia koe. Akapeea koe i te akapapu anga e e mama ua te tuatua atu kia koe? Eiaa e akakite ua kia ratou e, “Me e manamanata toou, tuatua mai koe kiaku.” Ka inangaro te au mapu kia kite e kare koe e riri me tuatua atu ratou. Ka inangaro katoa ratou kia kite e e puapinga to ratou manamanata kia koe. Karanga a Kayla e 19 ona mataiti e: “Ka rauka iaku i te tuatua ki toku papa no runga i tetai ua atu apinga. Kare aia e tāpu mai, e kare katoa aia e akaapa mai; ka akarongo ua ra aia. E oti, ka oronga mai aia i te ako meitaki tikai.”

7. (a) Akapeea tetai metua me oronga i te ako tau meitaki no runga i te akaoa atu anga tetai tamaiti ki tetai tamaine? (e) Akapeea te au metua i te akariri atu anga i ta ratou tamariki?

⁷ Tetai taime, ka anoanoia koe kia uriuri ki taau tamariki i te au tumu tuatua ngata, mei te akaoa anga tetai tamaiti ki tetai tamaine. Me akapera koe, kia akapapu e te apii ra koe i te mataara tau kia rave i te reira. Ei akaraanga, akamanako ana e kua aere koe ki tetai are kai e ko taau ua i kite i runga i te papaanga, e au akamatakiteanga no runga i te au kai poitini. Kare e ekoko e ka akaruke koe i te reira are kai e ka aere ki tetai ngai ke. Penei ka tupu mai tetai turanga mei te reira rai ki taau tamariki. Me e akamatakiteanga ua taau ka ako atu kia ratou, penei ka riri taau tamariki e kare e pati akaou i taau tauturu. (E tatau ia Kolosa 3:21.) Tauta kia tau meitaki taau ako. Karanga tetai tuaine mapu ko Emily e: “Me tuatua mai toku nga metua no runga i te akaoa atu anga ki tetai tamaiti, kare raua e akariro i teia tumu tuatua ei mea  kino. Ka akakite ua raua i te tu mataora i te kite maata atu i tetai tangata, e te kimi i tetai tokorua akaipoipo. Na teia i tauturu iaku kia tuatua maoraora atu kia raua no runga i teia. Ko te tika, ka inangaro au ia raua kia kite i toku au pirianga oa, e kare au e inangaro i te uuna i teia mei ia raua.”

8, 9. (a) Me tuatua taau tamariki, eaa te puapinga ka rauka me akakoromaki e me akarongo meitaki koe ma te kore e tamanamanata? (e) Eaa te puapinga tei rauka ia koe no te akarongo ki taau tamariki?

⁸ Kia akakoromaki marie e kia akarongo meitaki ki taau tamaiti. Ka akaari teia e e mama ua i te tuatua atu kia koe. (E tatau ia Iakobo 1:19.) Kua karanga a Katia, e metua vaine koia anake ua e: “I mua ana, kare i rauka iaku i te akakoromaki i taku tamaine. Kare au e akatika ana kia akaoti aia i tana tuatua. Te tumu, no te mea kua roiroi au me kore kare oku taime. I teianei ra no te mea kua taui toku tu, taui rai taku tamaine i tona tu. E tu taokotai tikai tona.”

⁹ Tetai metua tane ko Ronald te ingoa, kua tupu katoa teia kiaia e tana tamaine mapu. “I tona akakite anga mai e kua akainangaro aia i tetai tamaiti i te apii, i te akamataanga, riri tikai au,” i karanga ai aia. “Inara i toku akamaara anga i te tu akakoromaki e te tau meitaki o Iehova ki tona au tavini, manako mai au e e meitaki atu i te akatika i taku tamaine kia akakite mai i tona manako i mua ake ka akatikatika ai au iaia. Mataora tikai au no tei rave i teia! No te taime mua, kua marama au i te manako o taku tamaine. Te oti anga tana tuatua, kua mama atu i te tuatua kiaia ma te tu aroa. Te mea poitirere, kua akarongo mai aia ki taku ako. Akaari mai aia i te tu ngakau tae kia taui i tona tu.” Me matau koe i te pukapuka ki taau tamariki, ka kite tikai koe i to ratou au manako. Te ka tupu mai, ka tauturu koe ia ratou kia rave i te au ikianga meitaki. *

10, 11. Akapeea koe me tauturu i taau tamariki kia noo tamou ki roto i te tuatua mou?

¹⁰ Kua kite te tiaki mamoe meitaki e e aere ke ana te mamoe. Penei ka akamata tetai mamoe i te kai i te ngangaere i te ngai kare e mamao ana mei te anana. Aere ua rai, ka mamao roa atu te mamoe mei te anana. Ka tupu katoa te reira ki te tamariki. Ka marie ua to ratou akaruke anga i te tuatua mou. Penei te akavareia ra ratou e te au pirianga oa kino me kore e te au tamataora kino. (Mase. 13:20) Akapeea koe me paruru i taau tamariki kia kore teia kino e tupu kia ratou?

 ¹¹ Me apii koe i taau tamariki, auraka e tavarevare i te tauturu ia ratou me kite koe i tetai ngai ka tau kia akatanoia. Pera katoa, tauturu ia ratou kia akaketaketa i to ratou au tu meitaki. (2 Pete. 1:5-8) Ko te akamorianga a te ngutuare te taime meitaki roa atu ïa noou kia rave i te reira. Akakite mai Ta Tatou Angaanga Patireia o Okotopa 2008 e: “Te akamaroiroiia maira te au upoko o te ngutuare kia akono ratou i ta ratou apainga i mua ia Iehova, kia akapapu e te rave putuputu ra ratou i tetai porokaramu puapinga no te Apii Pipiria a te ngutuare.” Te taangaanga meitaki ra ainei koe i teia atianga kia arataki i taau tamariki? Papu e ka ariki rekareka te tamariki i taau tautaanga kia tauturu ia ratou.—Mata. 5:3; Phili. 1:10.

12. (a) Akapeea te au mapu e puapinga ai mei te akamorianga a te ngutuare? (Akara i te pia “ Ariki Rekareka Raua i te Reira.”) (e) Akapeea koe e puapinga ai mei te akamorianga a te ngutuare?

¹² Kua puapingaia tetai mapu ko Carissa e tona ngutuare tangata i ta ratou porokaramu no te Akamorianga a te Ngutuare. Karanga aia e: “E reka ana au me noo kapiti matou i te pukapuka. Ia matou e rave ra i teia, te akavaitata ra matou tetai ki tetai e te akatupu ra i te au angaanga ta matou ka akamaara i te tuatau ki mua. E rave ua ana rai toku papa i ta matou porokaramu no te Akamorianga a te Ngutuare. E tu akamaroiroi tikai te kite atu e e puapinga te reira kiaia—e kua manako rai au e e puapinga te reira. Te tauturu katoa ra te reira iaku kia akangateitei iaia ei metua e ei arataki i te pae vaerua.” Kua karanga tetai tuaine ko Brittney e: “Kua riro te akamorianga a te ngutuare ei akavaitata iaku ki toku nga metua. Te akaari maira te reira kiaku e kua inangaro raua i te akarongo mai ki toku au manamanata e te manako tikai ra raua iaku. Kua tauturu te reira ia matou kia riro mai ei ngutuare tangata matutu e te taokotai.” Ko te akakoroanga maata o te au metua koia oki kia apii i ta ratou tamariki kia inangaro ia Iehova. Ko te akamorianga a te ngutuare tetai ravenga meitaki roa atu no te rave i teia. *

13. Akapeea tetai tamaiti i te akakeuia anga kia tavini ia Iehova?

¹³ E taangaanga ana te tiaki mamoe i tetai rakau ei arataki e ei paruru i tana anana. Tona akakoroanga koia oki, kia arataki i te mamoe ki “te one kai meitaki.” (Eze. 34:13, 14) Ei metua, mei te reira rai toou akakoroanga. Ka inangaro koe i te arataki i taau tamariki kia tavini ia Iehova. Ka inangaro koe i taau tamariki kia manako mei te tata taramo tei tata e: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau.” (Sala. 40:8) Me manako akapera taau tamariki, ka inangaro ratou i te akatapu i to ratou oraanga kia Iehova e kia papetitoia. Ka anoanoia kia rava to ratou marama i te rave i teia ikianga puapinga, e ka anoanoia ratou kia inangaro tikai i te tavini ia Iehova.

14, 15. (a) Eaa te akakoroanga o te au metua? (e) Eaa te tumu ka manako ekoko ei tetai mapu no runga i te tuatua mou?

¹⁴ Penei i te akara anga, kare taau tamariki e piri vaitata ana kia Iehova. Penei kua ekoko ratou e tei te Au Kite o Iehova te tuatua mou? Eaa taau ka rave? Tauta pakari i te apii i taau tamariki e kia tauturu ia ratou kia inangaro ia Iehova mei roto mai i to ratou ngakau. Apii ia ratou kia ariki rekareka i ta te Atua au mea pouroa i rave no ratou. (Apo. 4:11) I reira, me papa ratou, na ratou rai e iki i te akamori ia Iehova.

¹⁵ Me te ekoko ra rai taau tamariki no runga i te tuatua mou, kia akakoromaki e kia arataki ua atu rai ia ratou. Tauturu ia ratou kia marama e ko te tavini anga ia Iehova te oraanga meitaki roa atu te ka apai mai i te au puapinga mutu kore. Pera katoa, tauta kia kite i te au tumu i ekoko ei ratou. Ei akaraanga,  te patoi ra ainei taau tamaiti i ta te Pipiria e akakite maira, me e mataku ua aia i te tutu atu ki te au tamariki ke? Kua ekoko ainei taau tamaine me kua tau rai te au akauenga a te Atua, me e maromaroa aia e kua manako e kare aia e inangaroia mai ana?

16, 17. Akapeea te au metua i te tauturu anga i ta ratou tamariki kia akatupu i tetai pirianga no ratou uaorai kia Iehova?

¹⁶ Akapeea e rauka ai ia koe i te tauturu i taau tamariki kia kopae i te manako ekoko no te tuatua mou? Maata te au metua tei rauka i te tauturu i ta ratou tamariki na te ui anga i teia au uianga: “I toou manako, e māmā ainei me e pakari roa te oraanga Kerititiano? Eaa i toou manako te au akameitakianga i te riro anga ei Kerititiano? Eaa te au mea te o maira? Eaa toou manako no runga i te au akameitakianga e orongaia maira i teianei e no te tuatau ki mua? E maata atu ainei te au akameitakianga ka rauka mai i te au mea te o maira?” E ui atu i teia au uianga ma te inangaro e te takinga meitaki i taau tamariki. Auraka e maani i taau tamariki kia manako e te akaapa ra koe ia ratou. I roto i te pukapuka anga, penei ka inangaro koe i te uriuri no runga ia Mareko 10:29, 30. Penei ka inangaro tetai au tamariki i te tata e rua papaanga, okotai no te au puapinga ei Kerititiano, e tetai no te au mea e o maira. Penei ka tauturu teia ia koe e taau tamariki kia akataka i te au manamanata ta ratou e aro atura e kia akatikatika i te reira. Me ka anoanoia te apii i te nga puka ta te Pipiria e Apii Maira e te “Aroa o te Atua” ki te aronga e akaari maira i te inangaro, kare ainei e e maata atu te puapinga i te apii i te reira ki taau uaorai tamariki? Te rave ra ainei koe i tera?

¹⁷ Me mamaata mai taau tamariki, na ratou rai e iki e me ka tavini ratou ia Iehova. Kare ratou e rave i teia no te mea naau i rave i teia ikianga. Ka anoanoia te tamariki kia akatupu i tetai pirianga no ratou uaorai kia Iehova. (Mase. 3:1, 2) Akapeea me e ngata i taau tamaiti i te akavaitata atu ki te Atua? Akamaroiroi iaia kia akara matatio i tona irinakianga na te ui anga kiaia uaorai i teia au uianga: ‘Akapeea au i kite ei e e Atua tetai? Akapeea au e kite ei e te manako tikai maira a Iehova iaku? Te irinaki tikai ra ainei au e ka puapingaia au me akono i te au akauenga a te Atua?’ E te au metua, kia riro kotou ei au tiaki meitaki e kia arataki i ta kotou tamariki ma te tu akakoromaki. Tauturu ia ratou kia akapapu kia ratou uaorai e ko te oraanga meitaki roa atu, ko te tavini anga ia Iehova. *—Roma 12:2.

18. Akapeea te au metua i te aru anga i te Tiaki Mamoe Maata, ko Iehova?

¹⁸ Ka inangaro te au Kerititiano pouroa kia aru i te Tiaki Mamoe Maata, ko Iehova. (Ephe. 5:1; 1 Pete. 2:25) Ka anoanoia tikai te au metua kia kite i te tu o ta ratou anana, koia oki ta ratou tamariki akaperepereia. Ka anoanoia te au metua kia arataki i ta ratou tamariki kia puapingaia ratou mei te au taputou a te Atua. Ae, e rave maroiroi i taau ka rauka kia tiaki i taau tamariki e kia utuutu ia ratou kia inangaro ia Iehova!