Akaperepere i Toou Tikaanga Ngateitei i te Angaanga Kapiti Kia Iehova!
“E oa rave angaanga oki matou no te Atua.”—1 KORI. 3:9.
1. Eaa to Iehova manako no runga i te angaanga e eaa tana i rave?
E MEA mareka na Iehova i te rave i tana angaanga. (Sala. 135:6; Ioa. 5:17) E ka inangaro aia i te au angera e te tangata kia mareka katoa i ta ratou angaanga, no reira kua oronga aia i ta ratou angaanga kia mataora ratou. Ei akaraanga, kua akaō mai a Iehova i tana Tamaiti anau tai ei tauturu iaia i te anga mai anga i te au mea pouroa. (E tatau ia Kolosa 1:15, 16.) Te akakite maira te Pipiria kia tatou e, i mua ake ka aere mai ei a Iesu ki te enua nei tei runga aia i te rangi e angaanga kapiti ra e tona Metua.—Mase. 8:30.
2. Akapeea tatou i kite ei e i rave ua ana te au angera i te au angaanga puapinga e te mataora?
2 I roto i te puka o Genese kia Apokalupo, te akamāramaia maira e kua oronga a Iehova i te angaanga na te au angera. Muri ake i te ara anga a Adamu raua ko Eva, kua akaateaia mai raua ki vao i te Parataito e kua oronga a Iehova i tetai angaanga na te au angera. I roto ia Genese, te akakite ra e “kua tuku iora [te Atua] i te au Kerubi, ma te koke mura i te koraparapa ua anga, i te pae i te itinga o te ra i taua kainga i Edene ra, ei tiaki i te ara i te rakau o te ora.” (Gene. 3:24) E i roto ia Apokalupo, ‘kua tono mai oki te Atu ra ko te Atua i tana au angela, e akakite ki tona au tavini i te au mea i vaitata i te tupu.’—Apo. 22:6.
AU ANGAANGA NA TE TANGATA
3. Ia Iesu i te enua nei, akapeea aia i te aru anga i te akaraanga a tona Metua?
3 Ia Iesu i runga nei i te enua, kua mataora aia i te rave i te angaanga ta Iehova i oronga kiaia e kua aru i te akaraanga a tona Metua na te oronga anga i te angaanga puapinga ki tana au pipi. Kua akamaroiroi aia ia ratou kia mataora i te rave i ta ratou angaanga na te tuatua anga e: “Tika, tika tikai taku e karanga atu kia kotou, Ko te akarongo mai iaku ra, ka rave katoa aia i teianei au angaanga taku e rave nei: e maata ua atu rai tana e rave i teia; no te mea te aere nei au ki taku Metua.” (Ioa. 14:12) Kua tauturu a Iesu i tana au pipi kia kite e e angaanga rapurapu ta ratou ka rave: “Ka rave au i te angaanga a tei tono mai iaku nei, koi vai ake te ao: te vaitata mai nei oki te po, kare roa e tangata e angaanga i reira.”—Ioa. 9:4.
4-6. (a) Eaa tatou i mataora ai e kua rave a Noa raua ko Mose i ta Iehova i akakite kia raua? (e) Eaa te ka tupu mei te au angaanga ta te Atua i oronga ki te tangata?
4 I mua roa ake ka aere mai a Iesu ki te enua nei, kua oronga a Iehova i te au angaanga ki te tangata kia mareka ratou. Noatu kare a Adamu raua ko Eva i rave ana i ta raua angaanga kia tae ki te openga, e maata rai te tangata tei rave i ta te Atua i oronga kia ratou. (Gene. 1:28) Ei akaraanga, kua oronga a Iehova kia Noa i te au ikuikuanga taka meitaki e ka akapeea aia me tarai i tetai araka kia ora mai aia e tona ngutuare tangata mei te Vaipuke. E kua pera rai a Noa i ta Iehova i tuatua kiaia. No te mea kua aru a Noa i te au ikuikuanga a Iehova, te ora nei tatou i teia tuatau.—Gene. 6:14-16, 22; 2 Pete. 2:5.
5 Kua oronga a Iehova kia Mose i te au ikuikuanga taka meitaki e ka akapeea aia me akatu i te puakapa e te aru anga i te au akanoonooanga no te taoonga taunga. Kua rave rai a Mose i ta Iehova i tuatua kiaia. (Exo. 39:32; 40:12-16) Eaa ta tatou ka mou mai i teia tuatau mei ta Mose angaanga pakari i rave e tona tu kauraro? Mei ta te apotetoro ko Paulo i akamārama mai, kua akatutu te puakapa e te taoonga taunga i “te au mea memeitaki a muri atu.”—Ebe. 9:1-5, 9; 10:1.
6 E orongaia ana te au angaanga tukeke ki te au tavini o te Atua ei akatupu i tona akakoroanga. Inara, noatu e taui ana te angaanga, kua riro rai te reira ei akapaapaa ia Iehova e kia puapingaia te tangata. Ko teia rai ta Iesu i rave i tona tuatau i runga i te rangi e i tona tuatau i te enua nei. (Ioa. 4:34; 17:4) Mei te reira katoa ia tatou i teia tuatau, me rave tatou i te angaanga ta Iehova i oronga mai, ka riro te reira ei akangateitei iaia. (Mata. 5:16; e tatau ia 1 Korinetia 15:58.) Eaa tatou i tuatua akapera ai?
MANAKO PAPU NO RUNGA I TE ANGAANGA
7, 8. (a) Akataka mai i te tikaanga ngateitei tei orongaia ki te au Kerititiano i teia tuatau. (e) Ka akapeea tatou me ariu atu ki te aratakianga a Iehova?
7 E akangateiteianga tikai i te kite e te pati maira a Iehova i te aronga apa ua kia tavini iaia ei oa rave angaanga. (1 Kori. 3:9) Tetai au Kerititiano, e tikaanga ngateitei to ratou no te angaanga patu are mei ia Noa rai raua ko Mose. Tetai, penei e akatu ana ratou i te au Are Akaputuputuanga, te au Are Uipaanga Patireia e te au opati manga. Te aronga e akaou ra i te au Are Uipaanga Patireia me kore i te opati maata i Warwick, i New York, e akaperepere i to kotou tikaanga ngateitei! (Akara i te tutu mua o teia atikara.) E angaanga tapu te reira. Noatu e ko tetai pae ua e akatu ra i te au are, ko te au Kerititiano pouroa e rave ra i te angaanga tutuanga. Na roto katoa i teia mataara e akangateiteiia ana te ingoa o Iehova e ka riro ei mea puapinga no te tangata. (Anga. 13:47-49) Na roto i te akaaerenga a te Atua e aratakiia ai te angaanga tutuanga. Penei ka riro teia ei taui i te angaanga te ka orongaia mai kia tatou.
Ebera 13:7, 17.) Penei kare tatou e mārama ana i te tumu i orongaia mai ei teia angaanga ou me kore te aratakianga ou. Inara ka aru tatou i ta Iehova no te mea kua kite tatou e no ko mai iaia teia au tauianga e ka riro te reira ei mea puapinga kia tatou.
8 E inangaro ua ana te au tavini akarongo mou o Iehova i te aru i tana aratakianga. (E tatau ia9. Eaa te akaraanga meitaki ta te aronga pakari i akanoo no te putuputuanga?
9 E akaari ana te aronga pakari i to ratou inangaro maata i te rave i te anoano o Iehova na roto i te mataara e arataki ra ratou i te putuputuanga. (2 Kori. 1:24; 1 Tesa. 5:12, 13) Inangaro ratou i te rave i te angaanga ma te maroiroi e te aru anga i te au tauianga te ka apii ratou i te au mataara ou no te angaanga tutuanga. E kite ana ratou i te au akameitakianga no te akanoo i te akakitekiteanga na runga i te tereponi, i ko i te uapu, me kore i te ngai tangata, noatu e kare tetai pae i kite roa e ka akapeea me rave i teia au tauianga. Ei akaraanga, e ā painia i Tiamani tei iki i te tutu aere i roto i tetai ngai pitiniti kua roa kare i raveia ana. Karanga tetai ko Michael e, kua rū tikai ratou no te mea kua roa e kare ratou i rave ana i teia. Akakite katoa aia e: “Mea papu e kua kite a Iehova i teia no te mea, kua riro to matou rā ei mea mataora e kare roa e ngaropoina ia matou te reira. Mataora tikai matou e kua aruia te aratakianga i roto i Ta Tatou Angaanga Patireia e kua irinaki matou ki runga ia Iehova no te tauturu!” Ka inangaro ainei koe i te tamata i tetai au mataara ou no te tutu aere i roto i toou ngai?
10. Eaa tetai au tauianga tei raveia i roto i te akaaerenga i tetai au mataiti i topa?
10 Tetai au taime, e raveia ana tetai au tauianga i ko i te Betela. Ei akaraanga, i tetai au mataiti i topa kua kapitiia tetai au opati manga ki tetai. Kua riro teia au tauianga ei akatuke i te oraanga o tetai au taeake no te mea kua anoanoia ratou kia rave i te au tauianga, inara kua kite ratou i te au akameitakianga. (Kohe. 7:8) Mataora tikai ratou e e tuanga ta ratou i rave i roto i te tuatua enua o te iti tangata o Iehova!
11-13. Eaa tetai au akaaoanga ta tetai au taeake i aro atu no te au tauianga a te akaaerenga?
11 E maata te au apiianga puapinga ta tatou ka kite mai mei te au taeake tei o ki roto i te au angaanga tei raveia kia kapiti i te au opati manga. E maata te au taeake e te au tuaine tei roa te tavini anga i roto i teia au opati manga. Tetai nga tokorua tei tavini i roto i tetai Betela meangiti ua, kua patiia raua kia aere ki te Betela i Mexico, e maata atu te au taeake i reira i to roto i te Betela no reira mai raua. Karanga a Rogelio te tane e: “Kua ngata tikai ia maua i te akaruke i to maua kopu tangata e to maua au oa.” Tetai taeake ke mai tei patiia kia aere ki Mexico ko Juan. Akakite aia e mei te mea rai e te akamata nei tona oraanga. Karanga aia e: “Ka akatupu akaou koe i te au pirianga oa. Ka umuumuia kia taui ki te au peu e te au aerenga manako ou.”
12 Te kapitiia anga tetai au opati manga i Europa, e maata te au taeake i Betela tei patiia kia aere ki te opati manga i Tiamani. Kua aro atu ratou i te au akaaoanga no te mea, kare i te mea māma ua i te akaruke i to ratou enua anau. Tetai au taeake no Switzerland, kare ratou e kite akaou i te manea o te au maunga teitei e te au taeake no Austria kare ratou e kite i to ratou au taeake.
13 Te au taeake e te au tuaine tei aere ki tetai opati manga i tetai enua ke mai, e maata te au tauianga ta ratou i anoano i te rave. Kua anoanoia ratou kia taui ki te turanga o te au kainga ou, te au oa ou e te au angaanga ou. Kua anoano katoaia ratou kia taui ki te turanga o te putuputuanga ou, te ngai tutuanga ou e penei tetai reo ou. Kare i te mea māma i te rave i teia au tauianga, inara e maata te au taeake i Betela tei āriki i te rave i teia. No teaa ra? Ka akara ana tatou.
14, 15. (a) Eaa ta tetai au taeake i akakite no runga i to ratou tu akaperepere i te tikaanga ngateitei i te angaanga kapiti kia Iehova? (e) Akapeea to ratou tu te riro anga ei akaraanga meitaki no tatou?
14 Karanga a Grethel e: “Kua āriki au i te patianga no te mea e mataara te reira noku kia akaari kia Iehova e e maata atu toku inangaro iaia i te inangaro no tetai enua, tetai are, me kore i tetai tikaanga ngateitei.” Karanga a Dayska e: “Te rauka anga iaku i te akamaara e no ko mai ia Iehova te patianga, kua āriki rekareka au i te reira.” Kua akatika a André raua ko Gabriela i te reira e kua karanga e: “I roto i teia mataara, kua kite maua i te tikaanga ngateitei i te tavini ia Iehova ma te kore e tamanamanata ia maua.” Irinaki raua e me raveia tetai au tauianga i roto i te akaaerenga a Iehova, e mea meitaki kia āriki mataora i to te kopae i te reira.
To tatou tikaanga maata rava atu koia oki, kia rave i te angaanga a Iehova!
15 Me kapitiia te au opati manga, e tukuia ana tetai au taeake i Betela ki roto i te angaanga painia. Kua tupu teia i te kapitiia anga te au opati manga o Denmark, Norway, e Sweden e kua riro mai e ko te opati manga Scandinavia. Karanga tetai nga tokorua ko Florian e Anja e: “Mataora maua i ta maua angaanga ou. Kia maua, e mea meitaki tikai i te tavini ia Iehova noatu teiea te ngai ka tavini maua. Te rauka nei ia maua i te karanga e kua akameitakiia mai maua!” Noatu e kare te maataanga ia tatou e anoanoia kia rave i teia au tauianga, ka rauka ia tatou i te aru i te inangaro o teia au taeake e te au tuaine kia tuku i te au anoano o te Patireia ei mea mua i roto i to tatou oraanga. (Isa. 6:8) E mea papu e ka akameitaki mai a Iehova i te aronga tei akaperepere i to ratou tikaanga ngateitei i te angaanga kapiti kiaia noatu e eaa te ngai.
KIA MATAORA I TOOU TIKAANGA NGATEITEI I TE ANGAANGA KAPITI KIA IEHOVA!
16. (a) Eaa ta Galatia 6:4 e akakite maira kia tatou kia rave? (e) Eaa te tikaanga maata rava atu tei rauka ia tatou?
16 No te mea e aronga apa ua tatou, tetai taime e akaaite ana tatou ia tatou uaorai ki etai ke. Inara, te akakite maira te Tuatua a te Atua e kia akamou ua rai i to tatou manako ki runga i ta tatou uaorai ka rauka i te rave. (E tatau ia Galatia 6:4.) Kare tatou katoatoa e rauka kia riro mai ei aronga pakari, ei painia, ei mitinari, me kore kia angaanga i roto i te Betela. Noatu e au tikaanga ngateitei tikai teia, ko te tikaanga maata rava atu koia oki, kia akakite i te tuatua meitaki ei oa rave angaanga na Iehova. Kia akaperepere tikai tatou i teia tikaanga ngateitei!
17. Eaa te tikaanga tikai i roto i teia akatereanga a Satani, e eaa te reira kare i te tumuanga tau no tatou kia manako paruparu?
17 I roto i teia akatereanga a Satani, penei kare tatou e rauka i te tavini ia Iehova mei ta tatou ka inangaro. Penei kare e rauka ia tatou i te akatere i te turanga o te ngutuare tangata me kore i te turanga o te maki pae kopapa. Inara kare te reira i te tumuanga tau no tatou kia manako paruparu. Noatu eaa to tatou au manamanata, ka rauka rai ia tatou i te akakite no runga i te ingoa o Iehova e tona Patireia. Ko te mea puapinga rava atu no tatou koia oki, kia rave i te ka rauka ia tatou no Iehova, e kia pure kia akameitaki mai aia i te aronga e rauka ra i te rave maata atu i ta tatou e rave ra. E akamaara e ko te aronga pouroa tei akapaapaa i te ingoa o Iehova, te akaperepere maira aia ia ratou!
18. Eaa ta tatou ka tapapa atu i te tuatau ki mua, e eaa te tikaanga ngateitei tei rauka ia tatou i teia tuatau?
18 Noatu to tatou tu apa ua, e mareka ana a Iehova ia tatou kia riro ei oa angaanga nona. E tikaanga ngateitei tikai te reira kia angaanga kapiti ki te Atua i teia au ra openga! Te tapapa nei tatou i te tuatau ki mua, ki te “ora mutu kore,” te tuatau e mataora ai to tatou oraanga tei kore i rauka i teia tuatau. Kare e roa atu ana i roto i tona ao ou, ka akameitaki mai a Iehova ia tatou ki te oraanga mutu kore ma te mataora e te tu ponuiaau.—1 Timo. 6:18, 19.
Te akaperepere ra ainei koe i toou tikaanga ngateitei kia tavini ia Iehova? (Akara i te parakarapa 16-18)
19. Eaa te manakonakoanga no te tuatau ki mua ta Iehova i taputou mai kia tatou?
19 Kare e roa atu, ka tae mai te ao ou ta te Atua i taputou mai. Ka akamanako ana tatou i ta Mose i tuatua ki te ngati Iseraela i mua ake ka tomo ei ratou ki roto i te Enua Taputouia: “E na to Atua na Iehova e akamanuia rava mai i te au angaanga katoa a to rima ra.” (Deu. 30:9) Muri ake ia Aramakito, ka oronga a Iehova i te enua ki te aronga tei angaanga kapiti kiaia mei tana rai i taputou. E oti, ta tatou angaanga ou ka rave koia oki, kia akariro i te enua ei parataito manea!